1, 2. Iha dalan saida mak Maromak hakarak ninia povu hotu atu adora nia?

 IMI joven sira mak bensaun boot iha Jeová nia kongregasaun. Iha rai barak, irmaun-irmán barak neʼebé hetan batizmu mak joven sira. Hodi haree joven barak fó sira-nia moris ba Jeová halo ita kontente tebes!

² Imi joven sira gosta halimar hamutuk ho kolega sira neʼebé idade hanesan ho imi ka lae? Ita hotu gosta ransu hamutuk ho ita-nia belun sira, loos ka lae? Maibé Jeová hakarak ita adora nia hamutuk ho ita-nia irmaun-irmán sira hotu, laʼós balu deʼit. Maski irmaun-irmán sira idade kiʼik ka boot, ka mai husi rai naran deʼit, Jeová hakarak ninia povu iha unidade iha sira-nia leet. Apóstolu Paulo dehan katak Maromak nia hakarak mak “atu ema hotu hetan salvasaun no hatene didiʼak kona-ba lia-loos”. (1 Timóteo 2:3, 4) No iha Apokalipse 7:9, dehan katak ema neʼebé adora Maromak mai husi “nasaun, suku, povu no lian hotu”.

3, 4. (a) Ohin loron, joven barak hatudu hahalok saida? (b) Iha Éfeso 4:25, apóstolu Paulo kompara kongregasaun kristaun hanesan saida?

³ Joven sira neʼebé la adora Jeová mak la hanesan duni ho sira neʼebé adora nia. Joven barak neʼebé la adora Maromak buka  atu halo kontente deʼit sira-nia an rasik. Matenek-naʼin balu hatete katak ohin loron, joven sira hatudu hahalok neʼe barak liu fali tempu uluk. Ho sira-nia hatais no koʼalia, sira hatudu sira la respeitu ema seluk, liuliu ema neʼebé idade ona.

⁴ Ema barak iha mundu tomak hatudu hahalok hanoin an deʼit. Neʼe halo susar ba ita atu sees an husi hahalok neʼe hodi halo kontente Jeová. Iha apóstolu sira-nia tempu, apóstolu Paulo fó avizu ba ema kristaun sira atu sees husi “hahalok no hanoin sira neʼebé agora book an iha ema kontradór sira-nia laran”. (Lee Éfeso 2:1-3.) Maibé ita kontente tanba joven sira iha kongregasaun la hanesan neʼe. Sira hakarak serbí Jeová hamutuk sira-nia irmaun-irmán sira. Sira hatene katak Maromak nia kongregasaun hanesan “liman-ain husi isin-lolon ida”. (Éfeso 4:25) Nuʼudar ita sai besik liu ba mundu nia rohan, importante tebes hodi besik nafatin ho ita-nia irmaun-irmán sira. Agora ita sei koʼalia kona-ba ezemplu balu husi Bíblia neʼebé hatudu tanbasá importante tebes atu iha unidade ho ita-nia irmaun-irmán sira.

5, 6. Saida mak ita aprende husi Lot no ninia família?

⁵ Iha tempu Bíblia nian, Jeová nia povu hasoru perigu barak maibé Jeová proteje bainhira sira hamutuk no ajuda malu. Ita hotu, maski kiʼik ka boot, bele aprende husi Bíblia nia ezemplu sira-neʼe. Ulukliu, mai ita aprende kona-ba Lot nia istória.

⁶ Lot no ninia família iha perigu laran tanba Jeová hakarak halakon Lot nia sidade Sodoma. Jeová haruka anju sira fó avizu ba Lot hodi sai husi sidade no halai ba foho. Anju sira dehan ba nia: “Halai bá atu salva ó-nia moris!” (Gênesis [Kejadian] 19:12-22) Lot ho ninia oan-feto sira halo tuir anju sira-nia avizu neʼe, maibé balu iha Lot nia família lae. Lot dehan ba mane sira neʼebé atu kaben ho ninia oan-feto sira katak sira presiza sai, maibé sira haree nia “hanesan ema neʼebé halimar deʼit”. Sira mate tanba sira la halo tuir. (Gênesis [Kejadian] 19:14) Husi ema hotu iha sidade neʼe, só Lot no ninia oan-feto sira deʼit mak la mate tanba sira nafatin besik ba malu.

7. Oinsá mak Jeová ajuda ema Izraél sira bainhira sira sai husi Ejitu?

⁷ Hanoin toʼok ezemplu ida tan. Bainhira ema Izraél sai husi rai-Ejitu, sira la fahe malu ba grupu kiʼik ida-idak hodi hili rasik dalan neʼebé sira hakarak tuir. Maibé sira hotu laʼo hamutuk. No iha tempu Jeová fahe Tasi Mean, Moisés la hakat tasi mesak, ka lori ema balu deʼit mak bá hamutuk ho nia. Lae, povu hotu laʼo ho Moisés, no Jeová fó ninia protesaun ba sira. (Êxodo [Keluaran] 14:21, 22, 29, 30) Ema barak neʼebé laʼós ema Izraél mós deside hodi husik Ejitu no bá hamutuk ho sira. (Êxodo [Keluaran] 12:38) Ita la hanoin katak grupu joven ida sees husi sira seluk hodi hili dalan seluk neʼebé sira hakarak tuir, tan deʼit sira sente neʼe mak dalan diʼak liu. Ema Izraél ida neʼebé haketak an hodi tuir ninia dalan rasik, Jeová sei la proteje nia.—1 Korinto 10:1.

8. Iha Jeosafát nia tempu, oinsá mak Maromak nia povu besik nafatin ba malu?

⁸ Iha Liurai Jeosafát nia tempu, tropa boot ida mai haleʼu Maromak nia povu atu ataka sira. (2 Crônicas [Tawarikh] 20:1, 2) Ema Izraél sira halo saida? Sira tau fiar ba Jeová no harohan hodi husu ninia matadalan. (Lee 2 Crônicas [Tawarikh] 20:3, 4. a) Sira ida-idak la buka rasik ninia dalan hodi rezolve problema neʼe, maibé sira  hamutuk. Bíblia hatete: “Ema Judá hotu hamriik iha Jeová nia oin, iha mós labarik kiʼik, feen no oan sira hotu.” (2 Crônicas [Tawarikh] 20:13) Nasaun Izraél tomak, husi idade kiʼik toʼo boot, tau fiar ba Jeová no halo tuir nia. Sira besik ba malu nafatin, no Jeová proteje sira husi sira-nia inimigu. (2 Crônicas [Tawarikh] 20:20-27) Sira-nia istória hatudu ezemplu diʼak kona-ba oinsá Maromak nia povu bele tahan terus bainhira sira hamutuk.

9. Saida mak ita aprende husi ema kristaun sira iha apóstolu sira-nia tempu?

⁹ Iha apóstolu sira-nia tempu, ema kristaun sira adora Maromak hamutuk ho dame no unidade. Porezemplu, bainhira ema judeu no ema seluk sai tiha ema kristaun, sira hotu fiar ba hanorin ida deʼit. Sira ransu hamutuk, han hamutuk no halo orasaun hamutuk. (Apóstolu 2:42) No iha tempu neʼebé sira presiza duni ajuda tanba ema fó terus ba sira, sira nafatin besik ba malu. (Apóstolu 4:23, 24) Bainhira ita hasoru terus no susar, ita mós presiza unidade hodi apoia malu, loos ka lae?

10. Liuliu bainhira mak ita presiza duni sai besik ba malu?

¹⁰ Lakleur tan, ita sei hasoru susar neʼebé ema hotu uluk nunka hasoru. Profeta Joel hatete katak loron neʼe hanesan “nakukun taka metin rai”. (Joel 2:1, 2; Sofonias [Zefanya] 1:14) Iha tempu neʼebá, Jeová nia povu presiza duni sai besik ba malu, no iha unidade iha sira-nia leet. Labele haluha Jesus nia liafuan: “Ukun ida sei lakon se ninia povu funu hasoru malu.”—Mateus 12:25.

11. Saida mak ita bele aprende kona-ba unidade husi eskritura iha Salmo 122:3, 4? (Haree dezeñu iha pájina 22.)

¹¹ Iha tempu antigu, uma sira iha Jeruzalein harii rabat malu. Ema neʼebé hakerek salmu ida dehan katak sira “sai ida deʼit”. Ema sira neʼebé hela iha uma sira-neʼe sente seguru tebes tanba sira hela besik malu no sira bele ajuda malu. Uma rabat malu sira-neʼe karik reprezenta unidade iha Izraél nia suku sira-nia leet bainhira sira halibur hamutuk hodi adora Jeová nuʼudar nasaun ida. (Lee Salmo [Mazmur] 122:3, 4. b) Husi ida-neʼe ita aprende katak importante tebes atu sai ida deʼit, agora no mós bainhira susar sira sei mosu iha futuru.

12. Bainhira Gog ataka Jeová nia povu, saida mak sei ajuda ita atu hetan salvasaun?

¹² Tanbasá importante tebes atu iha unidade iha futuru? Iha Ezequiel (Yehezkiel) kapítulu 38, hatete katak “Gog husi rai-Magog” sei ataka Jeová nia povu. Iha tempu neʼebá, ita la bele husik buat ida atu haketak ita. Se ita fiar katak Satanás nia mundu bele proteje ita, ita hanoin sala duni. Ita presiza besik nafatin ba ita-nia irmaun-irmán sira. Maibé neʼe la dehan katak ita sei hetan salvasaun tan deʼit ita hamutuk ona nuʼudar grupu ida. Ita ida-idak mós presiza tau fiar ba Jeová no halo tuir nia hodi nuneʼe Jeová no Jesus bele proteje ita no lori ita tama ba mundu foun. (Joel 2:32; Mateus 28:20) Maski nuneʼe, importante tebes atu besik nafatin ho Maromak nia povu, tanba Maromak sei la salva ema neʼebé hili sira rasik nia dalan.—Miquéias (Mikha) 2:12.

13. Joven sira bele aprende saida husi ezemplu sira iha lisaun neʼe?

¹³ Agora imi joven sira bele komprende tanbasá importante tebes atu besik nafatin imi-nia irmaun-irmán sira. Hakaʼas an atu la ransu deʼit ho ema neʼebé tinan hanesan ho imi, no la haketak an husi maluk sira  iha kongregasaun. Lakleur tan ita hotu, husi idade kiʼik toʼo boot, sei presiza duni ita-nia maluk kristaun sira. Nuneʼe, hametin imi-nia relasaun ho irmaun-irmán sira agora, no serbí Jeová hamutuk ho sira. Tanba iha futuru, unidade neʼe bele salva imi-nia moris!

14, 15. (a) Tanbasá mak Jeová fó treinu ba ita agora atu iha unidade? (b) Konsellu saida deʼit mak Jeová fó hodi ita bele iha unidade?

¹⁴ Agora daudaun Jeová ajuda ita “hodi bele serbí nia hamutuk ida deʼit” ho ita-nia irmaun-irmán sira. (Sofonias [Zefanya] 3:8, 9) Nia fó treinu hela ba ita hodi prepara ita ba tempu neʼebé “buat hotu sei halibur iha Kristu”. (Lee Éfeso 1:9, 10.) Jeová nia hakarak mak hodi kriatura hotu iha lalehan no rai adora nia ho unidade. Ita bele fiar katak Jeová nia hakarak neʼe sei sai loos. Imi joven sira bele sai parte ba família neʼe ba nafatin. Imi hakarak sai ida deʼit ho Jeová nia organizasaun ka lae?

¹⁵ Jeová fó treinu hela ba ita hodi iha unidade agora para ita bele moris hamutuk ho dame iha mundu foun. Ho pasiénsia, nia hanorin ita atu “hanoin malu”, “hadomi malu tebetebes hanesan maun-alin”, “kontinua fó laran-manas ba malu”, no “hametin malu”. (1 Korinto 12:25; Roma 12:10; 1 Tesalónika 4:18; 5:11) Jeová hatene katak dala ruma susar ba ita atu iha unidade iha ita-nia leet tanba ita hotu sala-naʼin. Tan neʼe mak nia haruka ita atu “fó perdua ho laran”.—Éfeso 4:32.

16, 17. (a) Tanbasá mak ita halibur hamutuk iha reuniaun sira? (b) Joven no labarik sira bele aprende saida husi Jesus nia ezemplu?

¹⁶ Dalan ida seluk neʼebé Jeová uza hodi treinu ita atu iha unidade, mak liuhusi reuniaun sira. Iha Ebreu 10:24, 25, fó-hanoin ita atu “hanoin malu hodi ajuda malu atu hatudu domin no hahalok diʼak”. Iha reuniaun sira, ita bele ‘fó laran-manas ba malu, liuliu nuʼudar ita haree loron neʼe besik ona mai’.

¹⁷ Jesus hatudu ezemplu diʼak ba ita tanba nia gosta halibur hamutuk ho Jeová nia povu. Bainhira nia tinan 12, nia bá hamutuk ho ninia inan-aman hodi halibur hamutuk ho Maromak nia povu hodi adora nia. Loron ida, ninia inan-aman buka nia la hetan. Jesus bá tiha neʼebé? Nia bá tiha halimar ho ninia kolega sira ka lae? Lae. José no Maria hetan nia iha templu, tuur hamutuk ho mestre sira, koʼalia hela kona-ba Eskritura sira.—Lucas 2:45-47.

18. Oinsá mak orasaun bele hametin ita-nia unidade?

 ¹⁸ Ita mós bele hametin ita-nia unidade hodi halo orasaun ba ita-nia irmaun-irmán sira no husu Maromak Jeová atu ajuda iha sira-nia situasaun ida-idak. Se ita temi sira-nia naran iha ita-nia orasaun, neʼe fó-hanoin ita atu hadomi ita-nia maluk sira. Imi joven sira koko ona atu halo ida-neʼe ka lae? Se imi halo orasaun ba irmaun-irmán sira, neʼe bele ajuda imi sai belun diʼak ho sira. Atu hetan salvasaun bainhira mundu aat neʼe ramata, ita la bele habelun ho Satanás nia mundu, maibé ita presiza hamutuk ho ita-nia maluk kristaun sira.

19-21. (a) Tanba ita mak “isin-lolon ida deʼit”, neʼe book ita atu halo saida? Fó toʼok ezemplu balu. (b) Ita aprende saida husi irmaun-irmán sira neʼebé ajuda malu iha tempu dezastre nian?

¹⁹ Jeová nia povu ohin loron moris tuir matadalan husi Roma 12:5 neʼebé dehan: “Ita isin-lolon ida deʼit.” Bainhira dezastre kona ita-nia maluk kristaun sira, ita hanoin tebes sira no hakarak fó ajuda. Porezemplu, iha fulan-Dezembru 2011, anin no udan boot kona fatin ida naran Mindanao iha rai-Filipinas. Iha kalan ida nia laran, bee saʼe hoban uma hamutuk 40.000, inklui mós ita-nia maluk sira-nian. Sukursál haruka irmaun sira atu bá fó ajuda, maibé antes sira toʼo iha fatin neʼe, irmaun-irmán sira husi fatin seluk haruka ona ajuda ba sira.

²⁰ Iha rai-Japaun, ita-nia irmaun-irmán sira lakon buat barak tanba rai-nakdoko no tsunami. Ita-nia maluk balu lakon buat hotu. Porezemplu, irmán ida naran Yoshiko neʼebé hela dook kilómetru 40 husi Reuniaun-Fatin, lakon ninia uma. Nia hatete: “Ami hakfodak tanba loron tuirmai, katuas área nian no irmaun seluk mai hodi buka ami.” Ho oin-midar nia hatutan tan: “Kongregasaun fó ba ami buat neʼebé ami presiza iha dalan espirituál nian no ami hafolin tebes ida-neʼe. Maibé sira mós fó ba ami sapatu, pasta no roupa toba nian.” Irmaun ida husi grupu neʼebé fó ajuda iha tempu dezastre hatete: “Irmaun sira mai husi fatin oioin iha Japaun. Ho unidade sira ajuda malu. Balu mós mai husi Estadus Unidus. Bainhira ema husu sira tanbasá mak husi dook mós sira hakarak mai, sira hatete, ‘Tanba sira iha-neʼe presiza ajuda, no ami hanesan ida deʼit ho ami-nia maluk sira.’” Ita sente kontente ka lae tanba ita mak parte husi organizasaun neʼebé hatudu domin ba malu? Ita bele fiar katak Jeová mós sente kontente tebes hodi haree unidade neʼe.

²¹ Se ita aprende atu ajuda ita-nia maluk sira agora, ita sei prontu atu hasoru situasaun susar iha futuru. Iha tempu neʼebá, maski karik ita la bele kontaktu ita-nia irmaun-irmán sira iha rai seluk, maibé ita sei iha unidade nafatin ho maluk sira iha ita-nia kongregasaun. Irmán ida iha Japaun naran Fumiko neʼebé uluk hetan susar tanba anin boot kona ninia fatin hatete: “Mundu neʼe besik ona nia rohan. Ita presiza nafatin ajuda ita-nia maluk sira hodi hein ba tempu neʼebé la iha dezastre tan.”

22. Oinsá mak ita-nia unidade sei ajuda ita iha futuru?

²² Entaun, irmaun-irmán sira, joven ka idade, atu ita bele prepara ba Jeová nia loron boot, agora mak tempu atu hakaʼas an hodi haburas unidade ho ita-nia maluk kristaun sira. Tanba bainhira Jeová halakon Satanás nia mundu, nia sei salva ninia povu hanesan nia halo iha tempu uluk. (Isaías [Yesaya] 52:9, 10) Tan neʼe mak maski ita labarik, joven ka idade ona, ita presiza iha unidade nafatin ho ita-nia irmaun-irmán sira hodi ita bele hetan salvasaun. Iha lisaun tuirmai, ita sei koʼalia kona-ba tanbasá mak ita presiza agradese ba buat neʼebé ita simu ona.