Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

Ema kristaun sira bele sunu mate-isin ka lae?

Ida-neʼe mak ema ida-idak ka família ida-idak nia desizaun rasik. Maski Bíblia la koʼalia kona-ba bele ka lae sunu ema nia mate-isin, maibé Bíblia hatete katak bainhira Liurai Saul no ninia oan Jónatas mate, sira-nia mate-isin ema sunu tiha mak foin hakoi. (1 Samuel 31:2, 8-13)—15/6, pájina 7.

Oinsá mak ita bele manán hasoru tentasaun atu haree pornografia?

Buat tolu neʼebé bele ajuda mak (1) Se ita haree kois buat ruma neʼebé sei hamosu hanoin foʼer, lalais hateke fali ba buat seluk. (2) Proteje ita-nia neon hodi hanoin kona-ba buat neʼebé diʼak no halo orasaun ba Jeová. (3) Halo desizaun ho matenek hodi sees husi filme no sítiu sira iha internét neʼebé hatudu pornografia.—1/7 pájina 8-10.

Kuandu fó kastigu-mate ba kriminozu sira, tansá mak ema hatohar mós kriminozu sira-nia ain?

Iha tempu Bíblia, dala ruma ema Roma fó kastigu-mate ba ema hodi prega sira ba ai-riin. Kriminozu sira neʼebé iha Jesus nia sorin-sorin, ema judeu sira husu hodi halo tohar sira-nia ain. Neʼe sei halo susar ba sira atu dada iis no halo sira mate lalais. Nuneʼe, sira bele hakoi lalais ema nia mate-isin. (Deuteronômio [Ulangan] 21:22, 23)—1/7 pájina 7.

Fuma oho ona ema naʼin-hira?

Durante tinan 1901 toʼo 2000, fuma oho ona ema naʼin-100.000.000. Tinan-tinan, fuma oho ema naʼin-6.000.000.—1/7 pájina 3.

Ema neʼebé planu atu muda ba rai seluk hodi haklaken bele hasoru susar saida deʼit?

Sira bele hasoru susar hanesan (1) toman moris nian neʼebé la hanesan, (2) hanoin família, (3) buka kolega. Irmaun-irmán barak neʼebé manán ona susar sira-neʼe hetan bensaun barak.—15/7, pájina 4-5.

Tanbasá mak ita-nia tratu foun sira fasil atu uza?

Tanba tratu sira-neʼe hakerek iha dalan neʼebé hanesan deʼit. Tratu ida-idak iha eskritura no pergunta ida hodi bele lee ba uma-naʼin. Kualkér resposta saida deʼit mak nia hili, ita bele loke tratu neʼe hodi hatudu saida mak Bíblia hatete. Tratu sira mós iha pergunta atu loke dalan hodi vizita fali.—15/8, pájina 12-14.

Oinsá mak inan-aman bele tau matan didiʼak ba sira-nia oan?

Importante tebes atu rona ba sira hodi bele hatene didiʼak sira. Hanorin sira didiʼak kona-ba lia-loos. Fó matadalan ho domin ba sira, porezemplu, se sira iha duvida kona-ba sira-nia fiar.—15/9, pájina 18-21.

Maromak nia Ukun sei lori bensaun saida deʼit?

Moras no mate sei la iha tan, ema hotu sei iha serbisu diʼak. Funu, hamlaha no ema kiak sei la iha tan.—1/10 pájina 6-7.

Aliansa ida-neʼebé mak fó oportunidade ba ema hodi ukun hamutuk ho Kristu?

Bainhira halaʼo tiha Naʼi nia Han Kalan, Jesus halo aliansa ida ho ninia dixípulu sira neʼebé bolu aliansa Ukun nian. (Lucas 22:28-30) Aliansa neʼe fó garantia ba sira katak sira sei ukun hamutuk ho Jesus.—15/10, pájina 16-17.

Sé mak “povu ida ba nia naran” neʼebé temi iha Apóstolu 15:14?

Neʼe mak ema neʼebé Maromak hili ona hodi sai nasaun ida hodi ‘fó sai kona-ba kmanek’ husi Ida neʼebé bolu sira. Nasaun neʼe inklui ema judeu sira no mós ema neʼebé laʼós judeu. (1 Pedro 2:9, 10)—15/11, pájina 24-25.