1, 2. Iha loron neʼebé Jesus moris-hiʼas, oinsá mak nia anima ninia dixípulu sira?

 JESUS nia dixípulu naʼin-rua laʼo daudaun husi Jeruzalein ba knua ida dook maizumenus kilómetru 11. Sira laran-triste hela tanba Jesus foin mate no sira la hatene katak Jesus mós foin moris-hiʼas fali. Derrepente Jesus mosu no laʼo hamutuk ho sira. “No hahú husi Moisés no profeta sira hotu nia liafuan, nia esplika ba sira buat neʼebé hakerek kona-ba nia iha Eskritura.” (Lucas 24:13-15, 27) Liafuan sira-neʼe fó laran-manas tebes ba dixípulu naʼin-rua neʼe tanba Jesus esplika Eskritura sira momoos ba sira.—Lucas 24:32.

² Fila fali ba Jeruzalein iha kalan neʼe kedas, dixípulu naʼin-rua bá hasoru apóstolu sira hodi konta fali ba sira saida mak akontese ba sira naʼin-rua iha dalan. Bainhira sira koʼalia hela, Jesus mosu ba sira hotu iha neʼebá. Apóstolu sira taʼuk tebes bainhira sira haree nia no ladún fiar katak Jesus duni mak mosu ba sira. Tuirmai Bíblia esplika oinsá mak Jesus anima fali sira: “Nia loke sira-nia neon hodi hatene didiʼak Eskritura.”—Lucas 24:45.

3. Saida mak bele halo ita laran-tun, no oinsá mak ita bele iha ksolok nafatin hodi serbí Jeová?

³ Dala ruma, ita bele sente laran-triste hanesan Jesus nia dixípulu sira. Maski ita serbí hela Jeová ho laran-manas,  ita bele sai laran-tun tanba ema lakohi rona bainhira ita haklaken ba sira. (1 Korinto 15:58) Karik mós tanba ita-nia estudante Bíblia sira la laʼo ba oin iha lia-loos. Karik sira balu fila kotuk ona ba Jeová. Entaun, oinsá mak ita bele iha ksolok nafatin hodi halo Maromak nia serbisu? Buat ida neʼebé bele ajuda ita mak komprende didiʼak Jesus nia ai-knanoik nia signifika sira. Agora ita hakarak koʼalia hamutuk kona-ba Jesus nia ai-knanoik tolu no haree toʼok ita bele aprende saida husi ai-knanoik sira-neʼe.

4. Jesus nia ai-knanoik kona-ba fini-naʼin neʼebé dukur hela signifika saida?

⁴ Lee Marcos 4:26-29. Jesus nia ai-knanoik kona-ba fini-naʼin neʼebé dukur hela signifika saida? Fini-naʼin reprezenta haklaken-naʼin. Fini reprezenta mensajen neʼebé sira haklaken ba ema laran-diʼak sira. Hanesan ema halo baibain, fini-naʼin neʼe “toba iha kalan no hadeer fali iha loron”. Husi tempu kari fini toʼo tempu koʼa nian, iha klaran “fini sira-neʼe moris no sai boot” mesak. Fini sira-neʼe moris neineik-neineik no tuir faze ida-idak. Ema ida atu laʼo ba oin iha lia-loos hodi hakbesik liután ba Jeová mós hanesan. Neʼe presiza neineik-neineik no tuir faze ida-idak. Se nia laʼo ba oin toʼo nia foti desizaun atu serbí Maromak, nia mós fó fuan hodi dedika ninia moris ba Jeová no tuirmai hetan batizmu.

5. Tanbasá mak Jesus uza ai-knanoik kona-ba fini-naʼin neʼebé dukur hela?

⁵ Tanbasá mak Jesus uza ai-knanoik neʼe? Tanba Jesus hakarak ita hatene katak Jeová mak halo lia-loos sai buras iha ema ida nia laran “neʼebé prontu atu simu lia-loos”. (Apóstolu 13:48; 1 Korinto 3:7) Ita bele kuda no rega bee, maibé ita la bele obriga ka dada ai neʼe hodi boot lalais. Hanesan ho ema iha ai-knanoik laran, ita mós la hatene oinsá mak fini neʼe moris. Nuʼudar ita halaʼo ita-nia moris loroloron nian, ita mós la hatene oinsá mak lia-loos sai buras iha ema ida nia laran. Maibé toʼo tempu ida nia sei fó fuan. Ikusmai nia haklaken ho ita!—João 4:36-38.

6. Ita presiza rekoñese kona-ba saida?

⁶ Ita bele aprende saida husi ai-knanoik neʼe? Primeiru, ita presiza rekoñese katak ita la iha kbiit hodi halo estudante Bíblia ida laʼo ba oin lalais iha lia-loos. Maski ita hakaʼas an ona hodi ajuda no apoia nia, ita nunka bele obriga ema neʼe atu hetan batizmu. Atu dedika ninia moris ba Maromak, nia rasik mak bele halo desizaun neʼe. Selae Jeová la simu ninia dedikasaun, tanba Jeová hakarak ema ida dedika ninia an husi nia rasik nia laran no mai husi domin.—Salmo (Mazmur) 51:12; 54:6; 110:3.

7, 8. (a) Ita aprende saida tan husi Jesus nia ai-knanoik kona-ba fini-naʼin neʼebé toba hela? Fó toʼok ezemplu ida. (b) Ita aprende saida kona-ba Jeová no Jesus husi ai-knanoik neʼe?

⁷ Segundu, komprende ai-knanoik neʼe bele ajuda ita la laran-tun se foufoun ita la haree rezultadu diʼak husi ita rasik nia serbisu haklaken. Ita presiza iha pasiénsia. (Tiago 5:7, 8) Se ita hakaʼas an ona hodi ajuda ita-nia estudante, maibé lia-loos la sai buras iha ninia laran, neʼe la dehan katak ita rasik mak hanorin la diʼak. Tanba Jeová husik deʼit lia-loos atu sai buras iha ema ida nia laran, se ema neʼe haraik-an no hakarak troka ninia moris. (Mateus 13:23) Tan neʼe keta kompara ita rasik nia serbisu haklaken diʼak ka la diʼak liuhusi ema naʼin-hira mak hetan ona batizmu. Jeová hafolin ita-nia serbisu laʼós liuhusi ema naʼin-hira mak ita ajuda ona tama lia-loos, maibé nia haree kona-ba ita badinas  ka lae atu haklaken.—Lee Lucas 10:17-20; 1 Korinto 3:8.

⁸ Terseiru, ita la bele haree borus ema nia laran hodi hatene ema neʼe halo hela mudansa saida, loos ka lae? Porezemplu, misionáriu ida estuda hela Bíblia ho feen-laʼen ida. Sira fó-hatene ba misionáriu neʼe katak sira hakarak sai haklaken-naʼin ida. Entaun, misionáriu neʼe fó-hanoin ba sira katak primeiru sira tenke para tiha fuma sigarru. Maibé misionáriu neʼe hakfodak ho sira bainhira sira hatete sira para tiha fuma fulan hirak liu ona. Sira halo desizaun neʼe tanba sira hatene katak maski sira la fuma iha ema nia oin maibé Jeová bele haree sira no nia hakribi tebes ema laran-makerek hanesan neʼe. Maski misionáriu neʼe la hatene mudansa saida mak feen-laʼen neʼe halo ona, maibé tanba sira rasik nia domin ba Jeová, neʼe ajuda sira halo desizaun neʼebé loos.

9. Jesus nia ai-knanoik kona-ba rede ikan signifika saida?

⁹ Lee Mateus 13:47-50. Jesus nia ai-knanoik kona-ba rede ikan signifika saida? Jesus kompara serbisu haklaken hanesan ho hatún rede boot iha tasi laran. Hanesan ho rede neʼebé kaer ikan barak oioin, ita-nia serbisu haklaken mós dada ema barak oioin. (Isaías [Yesaya] 60:5) Ita bele haree ida-neʼe liuhusi ema rihun ba rihun oioin neʼebé tuir ita-nia reuniaun-boot ho Memoriál tinan-tinan. Ema hanesan ikan neʼebé diʼak sai parte ba kongregasaun. Restu sai hanesan ikan neʼebé ladiʼak no Jeová la simu sira.

10. Tanbasá mak Jesus uza ai-knanoik kona-ba rede ikan?

¹⁰ Tanbasá mak Jesus uza ai-knanoik neʼe? Hili ikan diʼak ka ikan la diʼak iha ai-knanoik neʼe laʼós koʼalia kona-ba tesi-lia ikus iha tempu terus boot nian iha futuru. Maibé neʼe refere ba buat neʼebé akontese daudaun iha loron ikus sira-neʼe. Jesus hatete katak laʼós ema hotu neʼebé gosta Bíblia nia mensajen hakarak sai Jeová nia atan ida. Ema barak neʼebé tuir reuniaun sira ka estuda Bíblia ho ita ikusmai lakohi dedika sira-nia moris ba Jeová. (1 Reis [Raja-Raja] 18:21) Balun tan la tuir ona reuniaun sira. Joven balu neʼebé moris mai iha lia-loos mós lakohi aprende oinsá atu bele hadomi Jeová. Maibé Jesus hatete katak ema ida-idak tenke halo ninia desizaun rasik. Se ita halo desizaun neʼebé loos, Jeová sei “hafolin” tebes ita no haree ita hanesan buat “murak” ida.—Ageu (Hagai) 2:7.

11, 12. (a) Saida mak ita bele aprende husi ai-knanoik kona-ba rede ikan? (b) Ita aprende saida kona-ba Jeová no Jesus husi ai-knanoik neʼe?

¹¹ Saida mak ita bele aprende husi ai-knanoik kona-ba rede ikan neʼe? Hodi komprende didiʼak ai-knanoik neʼe bele ajuda ita hodi la sai triste demais se ita-nia estudante ida ka ita rasik nia oan ida deside lakohi serbí Jeová. Karik ita uza ona dalan oioin hodi ajuda nia. Maibé ita presiza hatene katak bainhira ema ida hakarak estuda Bíblia ka sai boot iha lia-loos, laʼós automátiku hakarak sai Jeová nia belun. Se ema neʼe mak lakohi halo tuir Jeová, nia mós la bele sai Maromak nia atan ida.

¹² Se nuneʼe, neʼe dehan katak ema neʼebé husik lia-loos la bele fila ona ba kongregasaun ka lae? Oinsá ho ema neʼebé seidauk dedika sira-nia moris ba Jeová, sira sei iha esperansa ka lae? Antes terus boot hahú, ema sira-neʼe sei iha oportunidade atu sai Jeová nia belun. Jeová bolu hela sira: “Fila fali mai haʼu, no haʼu sei fila fali ba imi.”  (Malaquias [Maleakhi] 3:7) Jesus nia ai-knanoik tuirmai kona-ba oan neʼebé husik hela uma sei koʼalia liután kona-ba neʼe.—Lee Lucas 15:11-32.

13. Jesus nia ai-knanoik kona-ba oan neʼebé husik hela uma signifika saida?

¹³ Jesus nia ai-knanoik kona-ba oan neʼebé husik hela uma signifika saida? Aman neʼebé laran-sadiʼa tebes iha ai-knanoik neʼe reprezenta ita-nia Aman domin nian, Jeová. Oan ida neʼebé estraga arbiru ninia liman-rohan hotu reprezenta ema neʼebé la tuir ona reuniaun sira. Sira sai ba “rai seluk” dook husi Jeová hodi sai parte ida fali iha Satanás nia mundu. (Éfeso 4:18; Koloso 1:21) Ikusmai, ema sira-neʼe rekoñese katak sira halo ona desizaun sala no foti desizaun hodi fila fali ba Jeová. Atu fila, ba sira laʼós buat fasil ida. Maibé tanba sira haraik an no hatene ona buat neʼebé sira halo mak sala, entaun Jeová mós fó perdua ba sira no simu fali sira ho laran.—Isaías (Yesaya) 44:22; 1 Pedro 2:25.

14. Tanbasá mak Jesus uza ai-knanoik kona-ba oan neʼebé husik hela uma?

¹⁴ Tanbasá mak Jesus uza ai-knanoik neʼe? Aman iha ai-knanoik neʼe nunka sai baruk hodi hein katak loron ida ninia oan sei fila. Tan neʼe, bainhira nia haree husi dook ninia oan laʼo hela mai, nia mós halai lalais bá hasoru ninia oan neʼe. Nia hakarak ninia oan hatene katak odamatan uma loke hela ba nia. Hanesan neʼe mós ho Jeová. Nia hakarak ema neʼebé uluk husik nia fila fali ba nia. Hatene ai-knanoik neʼe bele duni ajuda ema sira neʼebé husik ona lia-loos atu fila lalais ba Jeová. Maski sira-nia relasaun ho Jeová bele fraku, ka karik sira sente moe ka susar atu fila, maibé se sira hakaʼas an hodi fila fali, neʼe sei lori diʼak ba sira-nia an. Se sira fila, Jeová, Jesus, no anju sira sei haksolok tebetebes.—Lucas 15:7.

15, 16. (a) Saida mak ita bele aprende husi ai-knanoik kona-ba oan neʼebé husik hela uma? Fó toʼok ezemplu balun. (b) Ita aprende saida kona-ba Jeová no Jesus husi ai-knanoik neʼe?

¹⁵ Saida mak ita bele aprende husi ai-knanoik kona-ba oan neʼebé husik hela uma? Ita hotu tenke halo tuir Jeová nia ezemplu domin neʼe. Bainhira ema ida fila fali mai kongregasaun, keta halo-an katak ita mak ema santu liu nia, maibé tenke simu fali nia ho ksolok. Selae ita bele estraga fali ita rasik nia relasaun ho Jeová. (Eclesiastes [Pengkhotbah] 7:16)  Buat ida tan ita bele aprende husi ai-knanoik neʼe mak tau esperansa katak ema sira-neʼe sei fila fali, tanba sira mak hanesan ho bibi neʼebé laʼo lakon deʼit, laʼós bibi neʼebé mate tiha ona. (Salmo [Mazmur] 119:176) Entaun, se ita hasoru ema ida neʼebé la tuir ona reuniaun sira, ita hakarak hakaʼas an atu ajuda nia fila fali ka lae? Ita hakarak fó-hatene kedas ba katuas sira hodi sira bele ajuda fali ema neʼe ka lae? Se ita uza lisaun husi Jesus nia ai-knanoik neʼe, ita sei la nonook deʼit.

¹⁶ Ema neʼebé fila ona ba kongregasaun agradese tebes ba Jeová nia laran-sadiʼa no apoia husi irmaun-irmán sira. Irmaun ida uluk kongregasaun hasai nia ba tinan 25 hatete: “Husi tempu kongregasaun simu fali haʼu toʼo agora, haʼu-nia ksolok aumenta tan deʼit, tanba Jeová kontinua fó kmaan mai haʼu. (Apóstolu 3:19) Ema hotu apoia tebes haʼu no hatudu domin nafatin mai haʼu. Neʼe mak haʼu-nia família furak duni.” Irmán joven ida neʼebé uluk husik kongregasaun ba tinan 5 konta: “Haʼu la hatene oinsá bele esplika haʼu-nia ksolok neʼe ba imi. Haʼu haksolok tanba haʼu sente duni domin husi kongregasaun nian neʼebé Jesus hatete. Atu sai parte ida iha Jeová nia organizasaun mak folin boot duni.”

17, 18. (a) Ita aprende ona saida husi ai-knanoik tolu iha lisaun neʼe? (b) Ho hakarak neʼebé metin ita hakarak kontinua halo saida?

¹⁷ Ita bele aprende saida husi ai-knanoik tolu iha leten? Primeiru, ita presiza komprende katak ita la iha kbiit hodi halo estudante Bíblia ida laʼo ba oin lalais iha lia-loos. Entrega deʼit ba Jeová nia liman. Segundu, ita presiza hatene katak bainhira ema ida hakarak estuda Bíblia ka sai boot iha lia-loos, laʼós automátiku hakarak serbí Jeová. Terseiru, nunka sai baruk hodi hein katak loron ida ema neʼebé husik ona Jeová sei fila fali. Bainhira sira fila, ita hakarak halo tuir Jeová nia ezemplu domin nian hodi simu fali sira.

¹⁸ Mai ita ida-idak kontinua buka nafatin koñesimentu, komprensaun, no matenek. Bainhira lee kona-ba Jesus nia ai-knanoik sira, husu ita-nia an: ‘Ai-knanoik neʼe signifika saida? Tanbasá mak Jeová rai ai-knanoik neʼe iha Bíblia laran? Haʼu bele aprende saida kona-ba Jeová no Jesus?’ Bainhira husu pergunta sira hanesan neʼe, ita hatudu katak ita komprende duni Jesus nia liafuan sira signifika saida.