CESAR ho ninia feen Roseo kontente ho sira-nia moris iha Kalifórnia. Cesar serbisu tempu-tomak hadiʼa AC no ninia feen serbisu part-time iha klínika ida. Sira naʼin-rua hela iha sira-nia uma rasik. Maibé loron ida, buat ida troka sira-nia moris. Saida mak neʼe?

Iha fulan-Outubru 2009, sukursál iha Estadus Unidus haruka karta ida ba kongregasaun hotu iha rai neʼe. Karta neʼe konvida irmaun-irmán sira neʼebé iha esperiénsia ona atu halo serbisu voluntáriu hodi ajuda haluan sukursál iha Wallkill, Novaiorke. Ema nia idade neʼebé liu ona kritériu atu serbí iha Betel mós bele hatama aplikasaun. Cesar no Roseo hatete: “Tanba ami idade liu ona, ami hatene katak ida-neʼe mak oportunidade espesiál ida neʼebé ami lakohi husik liu deʼit.” Tan neʼe, Cesar no Roseo hatama sira-nia aplikasaun.

Cesar no Roseo hein tinan ida, maibé sira la hetan konvite atu tama Betel. Maski nuneʼe, sira foti desizaun atu halo simples sira-nia moris. Sira-nia uma boot ho metru 200 kuadradu neʼebé sira foin halo tinan hirak liubá, sira fó aluga ba ema seluk no sira rasik muda ba uma kiʼik ida ho metru 25 kuadradu. Cesar hatete: “Hodi halo mudansa hanesan neʼe, fasil liu ba ami atu bá Betel se konvite ruma husi Betel bolu ami.” Liutiha fulan ida, Betel bolu duni sira hodi serbisu voluntáriu ba tempu uitoan iha Wallkill. Cesar hatete: “Ami haree katak Jeová fó bensaun ba ami tanba ami halo simples ami-nia moris.”

Irmaun ho irmán sira atus ba atus halo sakrifísiu barak hodi ajuda serbisu konstrusaun iha Novaiorke. Sira barak ajuda daudaun hodi haluan sukursál iha Wallkill no seluk ajuda hodi  harii sede jerál iha Warwick. * Irmaun-irmán sira-neʼe barak husik sira-nia uma kapás no serbisu diʼak hodi serbí Jeová iha dalan boot liután. Oinsá mak Jeová fó bensaun ba sira-nia hakaʼas-an neʼe?

Way no Debra mak feen-laʼen ida husi Kansas ho idade 50 liu. Way nia serbisu mak hadiʼa eletrisidade. Sira faʼan sira-nia uma no sasán barak hodi muda ba Wallkill. Agora sira ajuda serbisu iha Betel ba loron balu iha semana ida nia laran. Tanba sira la serbisu iha Betel tempu-tomak, sira mak tau matan ba sira-nia presiza rasik. Way no Debra halo mudansa barak hodi bele serbí iha Betel, maibé sira sente sakrifísiu sira-neʼe la saugati deʼit. Kona-ba ninia knaar iha Betel, Debra hatete: “Bainhira haʼu halo serbisu konstrusaun iha neʼe, haʼu sente hanesan haʼu hola parte iha serbisu harii uma neʼebé baibain ita haree iha dezeñu mundu foun nian.”

Melvin no Sharon faʼan tiha sira-nia uma no sasán iha Carolina Súl hodi bele muda ba Warwick. Maski susar ba sira atu halo sakrifísiu sira-neʼe, maibé sira sente atu ajuda ho projetu neʼe mak priviléjiu boot. Sira dehan: “Ami sente kontente tebes tanba hatene katak, hodi hola parte iha projetu neʼe, ami kontribui ba Maromak nia organizasaun iha mundu tomak.”

Kenneth no Maureen, mak feen-laʼen ida ho idade 50 liu. Kenneth iha esperiénsia atu harii uma no sira planu atu muda husi Kalifórnia hodi ajuda ho projetu Warwick nian. Sira husu irmán ida iha kongregasaun atu tau matan ba sira-nia uma no sira mós arranja hodi sira-nia família tau matan ba Kenneth nia aman neʼebé idade ona. Sira sente oinsá tanba sira halo sakrifísiu sira-neʼe hodi serbí iha Betel? Kenneth hatete: “Ami hetan bensaun barak tebes. Maski dala ruma susar, maibé ami-nia moris kontente loos, no ami husu ema seluk atu koko toʼok serbisu neʼe.”

Irmaun-irmán sira neʼebé muda hodi ajuda serbisu konstrusaun, sira presiza halo mudansa barak. William no Sandra, neʼebé idade 60 liu hela iha Pennsylvania. Sira iha kompañia rasik no fó serbisu ba ema naʼin-17. Husi tempu sira sei kiʼik sira serbí iha kongregasaun ida deʼit, no sira-nia família barak mós hela iha fatin neʼe. Bainhira sira planu hela atu muda hodi ajuda iha Betel iha Wallkill, sira dehan katak buat  neʼebé susar liu mak husik sira-nia família no moris neʼebé sira toman ona.” Maibé sira halo orasaun barak no foti desizaun atu muda. William no Sandra sente oinsá kona-ba sira-nia desizaun neʼe? William hatete: “Ita la bele kompara solok neʼebé ita hetan hodi serbí hamutuk ho família Betel. Agora haʼu no Sandra kontente liu fali uluk!”

Ricky, neʼebé serbisu nuʼudar manajer ba projetu konstrusaun, hela iha Hawai ho ninia feen Kendra no oan Jacob, neʼebé tinan 11. Ricky hetan konvite atu serbisu iha Betel iha Warwick ba loron balu semana-semana. Ninia feen hakarak Ricky simu konvite neʼe maibé sira la hatene se ida-neʼe mak desizaun neʼebé diʼak. Se sira muda, Jacob presiza sai toman ho buat foun barak, tan neʼe sira duvida se muda ba Novaiorke sei sai diʼak ba sira-nia oan ka lae.

Ricky hatete: “Ami hakarak tuir kongregasaun ida neʼebé iha labarik barak neʼebé laʼo ba oin iha lia-loos hodi Jacob bele ransu ho labarik sira neʼebé diʼak.” Maibé ikusmai, sira muda deʼit ba kongregasaun ida neʼebé la iha labarik barak maibé iha joven balu neʼebé serbisu iha Betel. Ricky hatete: “Ami-nia reuniaun primeiru hotu tiha, ami husu ba Jacob oinsá nia sente kona-ba kongregasaun neʼe, tanba la iha labarik sira idade hanesan ho nia. Jacob hatete mai haʼu, ‘Lalika hanoin barak, apá. Haʼu sei habelun ho joven Betel sira deʼit.’”

Tanba joven Betel sira sai Jacob nia belun, neʼe kona Jacob oinsá? Ricky hatete: “Kalan ida, haʼu laʼo liu Jacob nia kuartu, haʼu haree lampu sei lakan hela. Haʼu hanoin tanba nia halimar vídeo game mak nia seidauk toba, maibé haʼu haree nia lee hela Bíblia! Haʼu husu nia halo saida, nia dehan, ‘Haʼu hakarak lee Bíblia tomak iha tinan ida nia laran, hanesan joven Betel sira halo.’” Ricky no Kendra kontente tebes tanba sira muda ba Novaiorke, laʼós deʼit tanba Ricky bele ajuda ho konstrusaun, maibé tanba Jacob mós laʼo ba oin iha lia-loos.—Provérbios (Amsal) 22:6.

Projetu sira iha Wallkill no Warwick ikusmai sei hotu, no irmaun-irmán sira-neʼe nia serbisu iha Betel mós sei ramata. Maibé sira la hanoin barak kona-ba saida mak sira sei halo bainhira sira-nia serbisu hotu ona. Irmaun-irmán barak iha sentimentu hanesan feen-laʼen ida husi  Florida. John mak manager ba projetu konstrusaun nian. Nia no ninia feen Carmen, maizumenus tinan 50, serbí nuʼudar voluntáriu iha Warwick. Sira hatete: “Toʼo agora ami haree ho matan rasik oinsá Jeová tau matan mai ami. No ami fiar metin Jeová sei la husik ami bainhira ami-nia serbisu ramata.” (Salmo [Mazmur] 119:116) Luis neʼebé serbisu halo sasán bombeiru nian no ninia feen Quenia, serbí iha Wallkill. Sira hatete: “Ami haree ona Jeová fó buat hotu neʼebé ami presiza. Ami hatene duni nia sei kontinua tau matan mai ami, maski ami la  hatene loloos oinsá.”—Salmo (Mazmur) 34:10; 37:25.

Karik sira barak neʼebé ajuda ho konstrusaun iha Novaiorke bele fó razaun oioin atu la simu konvite neʼe. Maibé sira halo tuir buat neʼebé Jeová hatete iha Malaquias (Maleakhi) 3:10: “Koko haʼu bá kona-ba neʼe, . . . se haʼu sei la loke ba imi odamatan bee nian iha lalehan no haʼu loloos sei fakar bensaun ba imi toʼo imi la kuran tan buat ida.”

Oinsá ho Ita? Ita mós sei koko Jeová hodi nia bele fó bensaun ba Ita ka lae? Halo orasaun no hanoin didiʼak kona-ba saida mak Ita bele halo iha projetu konstrusaun sira, maski iha Novaiorke ka iha fatin seluk. Ita sei haree duni Jeová sei fakar bensaun barak ba Ita.—Marcos 10:29, 30.

Dale mak enjeñeiru ida husi Alabama. Nia ho ninia feen Cathy hatete: “Se ita prontu husik moris neʼebé ita toman ona, ita iha oportunidade atu haree Jeová nia liman ajuda ita.” Oinsá mak ita bele prepara an hodi ajuda ho knaar konstrusaun nian? Dale hatete: “Halo buat hotu hodi halo simples deʼit ita-nia moris.” Gary, husi Carolina Norte, serbisu ba tinan 30 nuʼudar badain ida. Nia, hamutuk nia feen Maureen, dehan katak bensaun ida neʼebé sira hetan iha Warwick mak “hasoru irmaun-irmán barak neʼebé uza sira-nia moris serbí Jeová iha Betel no serbisu hamutuk ho sira.” Gary hatutan tan: “Hodi serbí iha Betel, presiza moris simples deʼit. Neʼe mak dalan diʼak liu atu moris iha loron ikus sira-neʼe.” Jason neʼebé badain elétriku nian, nia ho ninia feen Jennifer husi Illinois dehan katak serbisu iha Wallkill mak hanesan hela ona iha mundu foun.” Jennifer hatete: “Hodi hatene Jeová hafolin buat hotu neʼebé ita halo ba nia, neʼe halo ita sente kontente loos. No Jeová sei fó bensaun barak toʼo ita la bele sura.”