La fasil ba ema neʼebé iha alerjia kona-ba mina-morin. Tanba sira presiza hasoru ema oioin iha moris loroloron nian, karik balu mós uza mina-morin, ida-neʼe halo susar tebes ba sira atu bele kontrola sira-nia problema neʼe. Tan neʼe, ema balu husu, bele ka lae atu husu ba irmaun-irmán sira atu la bele uza mina-morin bainhira bá tuir reuniaun, ka reuniaun boot sira.

Ita bele fiar katak, la iha ema kristaun ida mak ho laran hakarak halo susar ba ema seluk bainhira halibur hamutuk ho maluk kristaun sira. Ita hotu presiza hetan anima husi reuniaun sira. (Ebreu 10:24, 25) Se ema ida mak iha alerjia makaʼas kona-ba mina-morin toʼo hanetik nia tuir reuniaun sira, karik nia presiza koʼalia ba katuas kongregasaun. Ita komprende katak eskritura la bandu ema atu uza mina-morin, no ita la bele halo lei hodi bandu ema la bele uza mina-morin bainhira atu tuir reuniaun sira. Maibé katuas sira bele fó informasaun ruma ba kongregasaun hodi ajuda ema seluk komprende kona-ba problema neʼebé irmaun-irmán balu hasoru daudaun. Karik katuas mós bele uza parte husi Kongregasaun nia presiza iha Reuniaun Serbisu nian hodi koʼalia kona-ba informasaun balu husi ita-nia livru neʼebé uluk fó sai ona kona-ba tópiku ida-neʼe. Ka sira bele halo anúnsiu simples deʼit kona-ba problema neʼe. Sira-neʼe hotu depende ba situasaun iha kongregasaun ida-idak nian. Maibé katuas sira mós la bele halo anúnsiu beibeik kona-ba problema neʼe, tanba iha reuniaun, sempre iha ema foun ka ema neʼebé mai vizita deʼit. Karik sira la hatene ita iha hela problema neʼe. Se sira uza hela mina-morin balu no se sira rona anúnsiu neʼe, bele hamoe sira.

Se ita iha problema hanesan neʼe iha ita-nia kongregasaun, karik katuas sira bele halo arranju hodi ema sira neʼebé alerjia ba mina-morin bele tuur iha fatin ketak husi ema seluk hodi rona ba reuniaun sira. Maibé, se hanesan neʼe mós ninia alerjia sei makaʼas nafatin, kongregasaun bele halo arranju hanesan ita halo daudaun ba irmaun-irmán neʼebé idade ona ka moras todan iha uma, hodi grava ka uza telefone hodi ajuda irmaun-irmán sira-neʼe bele rona ba reuniaun nafatin iha sira-nia uma.

Foin daudauk, Ita-nia Serbisu Kristaun anima irmaun-irmán sira hodi hanoin kona-ba ema seluk bainhira tuir reuniaun boot ba loron tolu. Baibain reuniaun boot ba loron tolu halaʼo iha salaun laran neʼebé anin ladún tama-sai no la iha fatin ketak ba ema ho alerjia mina-morin nian, tan neʼe atu husu ba irmaun-irmán sira hodi hamenus uitoan mina-morin iha fatin hanesan neʼe. Ida-neʼe matadalan ba reuniaun loron tolu deʼit, laʼós ba kongregasaun nia reuniaun sira.

Iha mundu neʼe, ita tenke moris tuir konsekuénsia neʼebé sala lori mai. Ita agradese tebes tanba irmaun-irmán sira hakaʼas an duni apoia malu hodi sira-nia maluk bele tuir reuniaun. Karik ba sira, hodi la uza mina-morin mak sakrifísiu ida. Maibé tanba domin ba maluk, karik sira sei hili atu halo nuneʼe.

Bíblia nia lee-naʼin sira koñese Pónsio Pilatos liuhusi ninia envolve an kona-ba Jesus nia terus no mate. (Mateus 27:1, 2, 24-26) Tuir loloos, ninia naran mós mosu ona dala barak iha dokumentu seluk. Livru ida hatete katak dokumentu husi istória-naʼin sira koʼalia kona-ba nia “barak liu no detalle liu fali ema Roma nia governadór seluk iha Judeia”.—The Anchor Bible Dictionary.

Josefo, istória-naʼin Judeu nian ida mak temi barak liu kona-ba Pilatos nia naran. Iha ninia istória, nia hakerek kona-ba akontesimentu tolu neʼebé Pilatos hasoru susar sira iha tempu nia halaʼo podér ukun nian iha rai-Judeia. Akontesimentu dala haat nian kona-ba nia hatoʼo husi istória-naʼin naran Filo. Hakerek-naʼin seluk husi Roma naran Tácito neʼebé hakerek istória kona-ba ema Roma nia liurai sira, konfirma katak Pónsio Pilatos duni mak fó orden hodi oho Jesus iha tempu Tibério nia ukun.

Iha tinan 1961, istória-naʼin sira buka-hetan fatuk rohan ida iha ema Roma antigu nia sinema iha Sezareia, rai-Izraél. Iha fatuk neʼe hakerek momoos Pilatos nia naran iha lia-latín. Maski letra sira iha fatuk neʼe nakfera no sorin rahun tiha ona (haree foto), maibé foufoun karik hakerek hanesan neʼe: “Respeitu ba maromak sira, ida-neʼe Tiberieum Pónsio Pilatos, Governadór Judeia nian mak dedika.” Buat neʼebé nia dedika, karik koʼalia kona-ba templu harii hodi fó respeitu ba Roma nia Liurai Tibério.

Iha “Pergunta husi lee-naʼin” ida husi Menara Pengawal 15 Jullu 2002 hatete katak se haklaken-naʼin mane ida mak iha neʼebá, atu nia hetan ona batizmu ka seidauk, irmán tenke taka ninia ulun bainhira halaʼo estuda Bíblia ho ema. Maibé, tanba halo tiha riset barak, matadalan neʼe mós presiza iha mudansa balu.

Se irmán ida lori haklaken-naʼin mane neʼebé hetan ona batizmu bá tuir ninia estuda, irmán neʼe tenkesér taka ulun duni. Nia halo nuneʼe hodi hatudu respeitu ba Jeová nia arranju ulun nian iha kongregasaun. Neʼe tanba agora nia mak halaʼo fali knaar neʼebé irmaun ida mak iha responsabilidade atu halaʼo. (1 Korinto 11:​5, 6, 10) Karik nia bele husu deʼit irmaun neʼe, se irmaun neʼe bele, hodi halaʼo estuda neʼe. Se hanesan neʼe, nia la presiza taka ulun.

Maibé, se irmán neʼe lori haklaken-naʼin ida neʼebé seidauk hetan batizmu ba ninia estuda, no mane neʼe laʼós ninia laʼen, tuir eskritura, nia la presiza taka ulun. Depende ba irmán ida-idak nia konxiénsia, se irmán balu hanoin katak sira presiza taka ulun iha situasaun ida-neʼe, la iha buat ida atu bandu sira.