GRUPU oan ida iha Pittsburgh (Allegheny), Pennsylvania, Estadus Unidus, hahú estuda Eskritura sira iha tinan 1870. Charles Taze Russell mak dirije grupu neʼe, no iha tempu neʼebá, sira estuda tópiku ida kona-ba Kristu nia sakrifísiu. Estuda tiha mak sira foin hatene katak afinál Kristu nia sakrifísiu neʼe importante tebes hodi Jeová halaʼo ninia hakarak hotu. Sira kontente tebes hodi aprende katak Kristu nia sakrifísiu loke dalan ba ema hotu hodi bele hetan salvasaun, inklui mós ema sira neʼebé seidauk hatene kona-ba Jesus. Agradese ba sakrifísiu neʼe book sira hodi hakarak komemora Jesus nia mate tinan-tinan.—1 Korinto 11:23-26.

Tuirmai irmaun Russell fó sai livru ida naran Zion’s Watch Tower. Livru neʼe esplika makaʼas katak liuhusi Kristu nia sakrifísiu neʼe mak Maromak hatudu sai ninia domin. Watch Tower bolu Memoriál ba Jesus nia mate mak “tempu ida neʼebé espesiál tebes”, no husu ba lee-naʼin sira hodi komemora Jesus nia mate iha fatin hotu, atu iha Pittsburgh ka iha grupu-grupu sira. Maski iha grupu neʼe mak “iha deʼit ema rua ka tolu” ka ida deʼit mós diʼak, importante mak “ninia fuan hamutuk iha Naʼi”.

Tinan-tinan, ema neʼebé mai Pittsburgh hodi komemora Jesus nia mate aumenta hela deʼit. Iha konvite laran hatete hanesan neʼe: “Iha neʼe ami ho laran fó benvindu ba imi hotu.” Sira hatudu duni hanesan neʼe. Estudante Bíblia sira ho laran simu no fó ai-han ba irmaun-irmán sira. No iha tinan 1886, iha tempu Memoriál nian, sira halaʼo reuniaun espesiál ida ba loron hira kedas. Tan neʼe, Watch Tower anima ema hotu: “Mai, imi neʼebé laran nakonu ho domin ba ita-nia Naʼi no ba ninia alin sira no ninia lia-loos”.

Ba tinan barak Estudante Bíblia sira halaʼo reuniaun boot ba ema neʼebé fiar ba Jesus nia sakrifísiu neʼebé bá tuir Memoriál iha Pittsburgh. Estudante Bíblia sira aumenta ba beibeik, nuneʼe mós ema neʼebé tuir Memoriál iha mundu tomak. Ray Bopp husi kongregasaun Chicago sei hanoin-hetan katak, maizumenus iha tinan 1910, atu pasa paun no tua ba ema, han oras hira kedas, tanba ema atus hira neʼebé tuir Memoriál neʼe kuaze ema hotu han paun no hemu tua-uvas iha Memoriál neʼe.

Sira uza paun no tua-uvas oinsá? Maski sira lee katak iha Jesus nia Han Kalan Jesus uza tua, maibé Watch Tower fó anima sira hodi uza deʼit uvas-been foun ka been husi uvas-maran neʼebé teʼin tasak tiha ona hodi la bele fó tentasaun ba sira neʼebé iha fraku isin nian”. Maibé sira mós prepara ketak ba ema neʼebé hanoin katak “tua neʼebé saʼe ka fermentu ona deʼit mak bele uza. Ikusmai mak estudante Bíblia sira foin komprende katak tua-uvas neʼebé seidauk kahur buat ida mak bele uza hodi reprezenta Jesus nia raan.

Memoriál mak tempu diʼak hodi hanoin fali ba Jesus nia mate. Maibé iha kongregasaun balu, Memoriál halo sira sente triste tebes toʼo bainhira programa hotu tiha, sira sente liafuan ida susar tebes atu sai husi sira-nia ibun. Tan neʼe mak, livru ida naran  Jehovah iha tinan 1934 hatete katak Memoriál tenkesér halaʼo “ho solok” tanba Jesus komesa ukun ona nuʼudar Liurai husi tinan 1914, laʼós “atu triste fali” kona-ba Jesus nia mate ho terus.

Iha tinan 1935, ba ema neʼebé tuir Memoriál iha tempu neʼebá no mós ho ita neʼebé tuir Memoriál ohin loron, neʼe mak tinan mudansa boot ida kona-ba Memoriál. Tanba iha tempu neʼebá sira foin komprende didiʼak liafuan “ema lubun boot” husi Apokalipse 7:9 katak sá. Uluk, Jeová nia atan sira hanoin katak “ema lubun boot” mak ema kristaun neʼebé dedika an tiha ona neʼebé parte husi grupu hanesan ladún badinas nian. Maibé agora sira foin komprende katak ema lubun neʼe mak Jeová nia atan neʼebé iha esperansa atu moris ba nafatin iha paraízu. Koñesimentu foun neʼe halo Russell Poggensee hanoin didiʼak kona-ba ninia an rasik, nia dehan: “Iha laran, haʼu nunka sente Jeová nia espíritu santu book haʼu hodi iha esperansa atu bá moris iha lalehan.” Tan neʼe nia, ho mós irmaun-irmán balu seluk neʼebé tuir Memoriál, husi tempu neʼebá kedas la han paun ka hemu tan tua-uvas iha Memoriál.

Liuhusi haklaken espesiál mak dalan ida atu ema hotu bele hatudu sira-nia agradese ba Kristu nia sakrifísiu iha “tempu espesiál tebes” neʼe. Bulletin tinan 1932 nian ida fó anima ba ema kristaun katak la bele sai “santu iha Memoriál” deʼit, sai ema neʼebé hakarak han paun no hemu tua-uvas iha Memoriál, maibé lakohi sai “serbisu-naʼin” hodi haklaken mensajen lia-loos nian. Tuirmai, iha tinan 1934, Bulletin husu kona-ba “pioneiru estra” ba irmaun-irmán sira: “Bele toʼo 1.000 ka lae, ema neʼebé foti pioneiru estra iha tempu Memoriál nian?” No kona-ba ema kose-mina sira, Informant hatete hanesan neʼe: “Sira-nia solok bele sai kompletu deʼit se sira mós halo serbisu haklaken kona-ba Maromak nia Ukun.” Nuneʼe mós ba ema sira neʼebé iha esperansa atu moris ba nafatin iha rai. *

Ba Jeová nia povu, Memoriál mak kalan sagradu ida ba sira tinan-tinan. Iha situasaun susar mós sira hakaʼas an hodi tuir Memoriál. Porezemplu, iha tinan 1930, irmán Pearl English ho ninia alin-feto, atu bá tuir Memoriál, sira laʼo husi dook hamutuk kilómetru 80 toʼo fatin Memoriál nian. Iha komarka kloot nakukun nia laran iha rai-Xina, hodi komemora Jesus nia mate, misionáriu ida naran Harold King hakerek poezia no knananuk kona-ba Memoriál no nia mós halo rasik ninia tua husi uvas fuik no paun husi etu. Iha fatin seluk hanesan Europa Leste toʼo Amérika Sentrál no toʼo fali Áfrika, maski iha funu laran ka governu bandu, irmaun-irmán sira mós brani nafatin bá tuir Memoriál hodi komemora Jesus nia mate. Atu iha neʼebé ka iha situasaun saida mós diʼak, ita hakarak halibur hamutuk hodi hatudu respeitu ba Maromak Jeová no Jesus Kristu iha tempu espesiál Memoriál nian.