IHA reuniaun espesiál ida neʼebé halaʼo iha Nagoya, Japaun, iha loron 28 Abríl 2013, membru ida husi Grupu Administradór naran Anthony Morris halo anúnsiu ida neʼebé halo rona-naʼin sira hakfodak. Nia hatete ba sira katak fó sai ona livru foun ida ho títulu Bíblia—Liafuan Diʼak husi Mateus. Ema neʼebé tuir reuniaun neʼe no sira neʼebé rona liuhusi vídeo hamutuk ema naʼin-210.000 liu basa liman la para ba anúnsiu neʼe.

Liafuan Diʼak husi Mateus neʼe foti husi Bíblia Tradusaun Mundu Foun língua Japaun nian. Maibé livru ho pájina hamutuk 128 neʼe úniku tebes. Irmaun Anthony Morris hatete katak livru neʼe halo liuliu atu ajuda ema Japaun sira. Saida mak halo livru neʼe úniku? Tanbasá presiza halo livru neʼe? Ema sente oinsá kona-ba livru ida-neʼe?

Ema barak hakfodak tebes bainhira sira haree dalan hakerek iha Liafuan Diʼak husi Mateus neʼe. Tanba ema Japaun nia livru sira, inklui mós ita-nia livru balu, dala ruma hakerek husi karuk mak bá loos. No iha Japaun, ema bele hakerek husi leten mak tun mai kraik ka husi karuk mak bá loos. Maibé livru foun neʼe ita uza dalan ema hakerek jornál ka livru eskola sira-nian, neʼe mak hakerek halai loos husi leten mak tun mai kraik. Ema Japaun barak sente dalan hakerek hanesan neʼe fasil ba sira atu lee. Agora mós iha subtítulu hodi ajuda lee-naʼin hatene pontu importante sira.

Irmaun-irmán sira iha Japaun aproveita lee kedas Liafuan Diʼak husi Mateus neʼe. Irmán tinan 80 ida hatete: “Haʼu lee Mateus dala barak ona, maibé ho dalan hakerek foun neʼe no mós ninia subtítulu sira ajuda haʼu komprende liután Jesus nia diskursu neʼebé nia hatoʼo iha foho leten.” Irmán tinan 30 ida dehan fali nuneʼe: “Haʼu lee hotu Mateus dala ida deʼit. Haʼu toman liu atu lee husi karuk ba loos, maibé iha Japaun, ema barak mak gosta lee husi leten mak tun mai kraik.”

Tanbasá livru husi Bíblia neʼe diʼak hodi haklaken ba ema Japaun? Maski ema Japaun barak ladún hatene kona-ba Bíblia, maibé sira mós hakarak lee. Tan neʼe mak ho Liafuan Diʼak husi Mateus ida-neʼe, ema Japaun sira neʼebé uluk nunka kaer Bíblia mós bele iha oportunidade atu lee livru sagradu neʼe.

Tanbasá mak hili livru Mateus? Tanba ba ema Japaun, bainhira ita temi liafuan “Bíblia”, sira-nia hanoin halai kedas ba Jesus Kristu. Tan neʼe hili livru Mateus mak diʼak liu, tanba Mateus hakerek kona-ba Jesus nia liña jerasaun no moris, diskursu koñesidu neʼebé Jesus hatoʼo iha foho leten, no Jesus nia profesia kona-ba loron ikus sira. Tópiku sira-neʼe ema Japaun gosta tebes.

Bainhira simu tiha livru neʼe, haklaken-naʼin sira iha Japaun mós uza kedas livru neʼe hodi fahe ba ema husi uma ba  uma no fahe ba vizita fali sira. Irmán ida dehan: “Agora haʼu iha oportunidade barak hodi fahe Maromak nia Liafuan ba ema iha haklaken fatin. Haʼu atu hatete buat ida ba imi, iha reuniaun espesiál nia lokraik, haʼu konsege fahe tiha livru ida ba ema!”

Oinsá mak haklaken-naʼin sira fahe livru neʼe ba ema? Ba uma-naʼin sira iha Japaun, sira rona beibeik ona liafuan hanesan “odamatan kloot”, “fatuk-murak iha fahi nia oin”, no “keta hanoin barak kona-ba loron tuirmai”. (Mateus 6:34; 7:6, 13) Sira hakfodak bainhira sira hatene katak Jesus rasik mak koʼalia liafuan sira-neʼe. Iha tempu sira lee liafuan sira-neʼe husi Liafuan Diʼak husi Mateus, barak mak dehan: “Uluk, haʼu koʼalia ba haʼu-nia an, ‘Bainhira loos mak haʼu bele iha oportunidade atu lee Bíblia. La barak mós, pelumenus dala ida.’”

Bainhira haklaken-naʼin sira ba vizita fali ema neʼebé uluk simu livru Mateus neʼe, barak mak dehan sira lee kedas livru neʼe bainhira haklaken-naʼin fó ba sira. Mane tinan 60 ida hatete ba haklaken-naʼin ida: “Haʼu lee dala hira kedas livru neʼe no haʼu-nia laran sente kmaan tebes. Mai, hanorin tan haʼu kona-ba Bíblia neʼe.”

Sira mós fahe livru Mateus neʼe iha haklaken públiku nian. Loron ida, irmán ida fahe tiha livru Mateus neʼe ba feto ida, depois, nia mós fó ninia e-mail ba feto neʼe. Liutiha oras ida, feto neʼe haruka fali e-mail ida mai irmán hodi hatete katak nia lee tiha ona parte balu husi livru neʼe no nia hakarak ema esplika liután ba nia kona-ba livru neʼe. Semana ida liutiha, sira mós hahú estuda Bíblia hamutuk, no lakleur deʼit, feto neʼe mós tuir ona reuniaun sira.

Kongregasaun sira iha Japaun simu ona 1.600.000 resin kona-ba livru ho títulu Bíblia—Liafuan Diʼak husi Mateus. Fulan-fulan, haklaken-naʼin sira fahe livru neʼe rihun ba rihun ba ema. Iha liafuan loke nian iha livru laran hatete hanesan neʼe: “Ami espera katak hodi lee livru neʼe bele halo Ita-Boot hakarak hatene liután kona-ba Bíblia.”