Maromak nia atan klosan balu koʼalia nuneʼe, maibé sira mós hatene katak Jeová hakarak ninia atan sira atu bele kaben deʼit ho ema neʼebé “iha Naʼi”. (1 Korinto 7:39) Entaun, tanbasá mak sira koʼalia nafatin hanesan neʼe?

Sira halo komentáriu hanesan neʼe tanba iha rai balu, irmán klosan mak barak liu fali irmaun. Porezemplu, iha rai-Koreia, porsentu 57 mak irmán no irmaun iha porsentu 43 deʼit. Iha rai-Kolómbia mós hanesan, porsentu 66 mak irmán hotu, no irmaun iha porsentu 34 deʼit.

Iha rai balu tan, inan-aman neʼebé la iha lia-loos mak halo komplikadu ba sira-nia oan atu buka kaben. Sira husu folin aas ba mane sira neʼebé mak hakarak kaben ho sira-nia oan-feto. Tanba irmaun sira la bele selu folin sira-neʼe, entaun sira mós la kaben deʼit ona. Tan neʼe, irmán klosan barak laran-todan atu hanoin katak sei bele buka-hetan irmaun sira husi kongregasaun ka lae. *

Se Ita-Boot mak iha hela situasaun hanesan neʼe, fiar bá katak Jeová hatene Ita-nia situasaun neʼe, no nia mós komprende Ita-nia sentimentu sira.—2 Crônicas (Tawarikh) 6:29, 30.

Maski nuneʼe, Jeová nafatin fó mandamentu mai ita atu kaben deʼit ho ema neʼebé iha Naʼi. Tanbasá? Tanba nia  hatene saida mak diʼak liu ba ita no nia hakarak proteje ita. Nia lakohi haree ita halo desizaun neʼebé sala no ikusmai halo ita rasik mak la kontente no terus. Hanesan neʼe mak Neemias uza Salomão nia ezemplu neʼebé ladiʼak hodi koʼalia ba ema judeu sira, tanba iha tempu neʼebá, ema judeu barak mak kaben ho feto neʼebé la adora Maromak. Salomão “nia Maromak hadomi nia, . . . maibé ninia feen husi rai seluk halo nia monu ba sala”. (Neemias 13:23-26) Tan neʼe mak Jeová hakarak ninia atan kaben deʼit iha Naʼi tanba nia hatene ida-neʼe mak diʼak ba ita. (Salmo [Mazmur] 19:7-10; Isaías [Yesaya] 48:17, 18) Ita agradese tebes ba Jeová tanba nia fó matadalan neʼebé diʼak tebes hodi ajuda ita. No bainhira ita simu Jeová nuʼudar ita-nia Ukun-Naʼin, ita mós rekoñese katak nia mak iha direitu atu manda ita.—Provérbios (Amsal) 1:5.

Ita hakarak hasees an duni atu la bele ‘kesi ita-nia an hamutuk ho ema neʼebé laʼós fiar-naʼin’. Tanba kaben ho ema neʼebé la hadomi Jeová bele halo ita mós para serbí Jeová. (2 Korinto 6:14) Ohin loron ema kristaun barak mak halo tuir ona Jeová nia mandamentu neʼe, no sira haree duni rezultadu diʼak husi halo tuir mandamentu neʼe. Maibé iha mós ema balu mak lakohi halo tuir.

Irmán ida husi Austrália naran Maggy * konta saida mak akontese ba nia bainhira nia namora ho ema ida neʼebé laʼós iha Naʼi. Nia dehan: “Tan deʼit haʼu hakarak hamutuk ho nia, haʼu falta reuniaun barak tebes. Haʼu-nia espiritualidade mós sai fraku tebes.” Ezemplu seluk mak kona-ba irmán Ratana husi Índia. Nia namora ho kolega eskola ida neʼebé foin estuda Bíblia. Maibé ikusmai mak foin hatene katak nia estuda Bíblia hodi nia bele namora ho irmán neʼe. No tan deʼit atu bele kaben ho nia, irmán neʼe mós troka ninia fiar no la adora tan Jeová.

Ezemplu ida tan mak husi rai-Kamaroins. Foin idade 19 deʼit irmán Ndenguè kaben ona ho mane ida neʼebé la adora Jeová. Uluk, iha tempu sira sei namora hela, ninia namoradu promete ba nia katak sei nunka bandu nia hodi serbí Jeová. Maibé, sira foin kaben tiha ba semana rua deʼit, ninia laʼen bandu kedas nia atu la bele tuir reuniaun sira. Irmán neʼe dehan: “Loroloron haʼu tanis hela deʼit tanba haʼu sente mesamesak loos. Haʼu foin hatene katak ema seluk mak kontrola fali haʼu. Haʼu-nia laran fó sala tebes mai haʼu.”

Neʼe loos, ema balu neʼebé la adora Jeová, iha laran neʼebé diʼak ka laran-maus. Kaben ho ema sira-neʼe mós karik la fó susar ba ita-nia moris. Maibé hanoin toʼok, se ita kaben ho ema neʼebé la adora Jeová, oinsá mak ita-nia desizaun neʼe bele kona ita-nia relasaun ho Jeová? Iha laran ita sente oinsá tanba ita rasik hatene hela katak ita kontra ona Jeová nia matadalan? Importante liu mak oinsá mak Jeová sente kona-ba ita-nia desizaun neʼe?—Provérbios (Amsal) 1:33.

Irmaun-irmán iha mundu tomak bele fó sasin katak kaben deʼit ho ema neʼebé iha Naʼi mak desizaun neʼebé diʼak liu hotu. Iha irmaun-irmán klosan barak mak hakarak halo Jeová kontente hodi buka deʼit ema neʼebé adora nia atu kaben ho sira. Ezemplu ida mak irmán Michiko. Nia husi Japaun. Nia hakarak deʼit atu halo tuir Jeová maski ninia família sira hakarak tebes nia atu kaben ho ema neʼebé la adora Jeová. No bainhira nia haree ninia kolega diʼak sira iha kongregasaun kaben, maibé nia mak seidauk kaben, neʼe halo nia mós laran-tun. Nia dehan: “Haʼu hatete beibeik ba haʼu-nia an katak tanba Jeová mak ‘Maromak neʼebé kontente’, entaun ita-nia solok mós la depende ba deʼit ita kaben ona ka seidauk. Haʼu mós fiar katak nia mak bele fó buat neʼebé ita-nia laran hakarak. Se agora mak ita la bele buka-hetan ema neʼebé ita gosta atu kaben, diʼak liu hein deʼit.” (1 Timóteo 1:11) Ikusmai Michiko kaben duni ho irmaun diʼak ida, no nia mós kontente tebes tanba nia rona ba Jeová nia matadalan.

Irmaun balu mós presiza hein toʼo sira sente ema neʼe diʼak ba sira mak sira foin hakarak kaben ho ema neʼe. Ezemplu ida mak Bill, nia husi Austrália. Nia hatete katak dala ruma ninia laran mós monu ba feto neʼebé laʼós Testemuña sira. Maibé nia hakaʼas an hodi la besik liu ba sira, tanba nia lakohi atu ‘kesi ninia an hamutuk ho ema neʼebé laʼós fiar-naʼin’. Nuʼudar tempu liu daudaun, nia mós laran monu ba irmán balu, maibé sira la iha sentimentu ba nia. Bill hein tinan 30 mak nia foin hetan irmán ida neʼebé iha planu neʼebé hanesan ho ninian. Nia hatete: “Haʼu arrepende uitoan mós lae. Haʼu sente ida-neʼe mak bensaun ida hodi bele bá haklaken hamutuk, estuda hamutuk, no halaʼo  adorasaun hamutuk. Haʼu mós kontente hodi bele ransu ho haʼu-nia feen nia kolega sira, tanba sira mós adora Jeová. Ami sempre uza Bíblia hodi haburas ami-nia moris kaben nian.”

Ita bele halo saida hodi hein ba irmaun ka irmán ida neʼebé adora Jeová? Hanoin uluk kona-ba razaun saida mak ita seidauk kaben. Se ita-nia razaun mak tanba ita hakarak halo tuir Jeová nia mandamentu hodi kaben deʼit ho ninia atan, neʼe desizaun neʼebé diʼak tebes, no Jeová mós kontente tebes ho ita-nia desizaun neʼe. (1 Samuel 15:22; Provérbios [Amsal] 27:11) Tuirmai, halo orasaun beibeik ba Jeová hodi hatoʼo ba nia ita-nia laran sente oinsá. (Salmo [Mazmur] 62:8) Bainhira ita hakaʼas an hodi la monu ba tentasaun no luta hasoru hakarak neʼebé sala, neʼe bele hametin liután ita-nia relasaun ho Jeová. Fiar bá katak Jeová iha interese ba ninia atan hotu, inklui mós ita. Maski nia la promete ema ida ba ita, maibé se ita presiza duni pár ida ba moris, Jeová hatene oinsá mak ita bele buka-hetan hakarak loos neʼe.—Salmo (Mazmur) 145:16; Mateus 6:32.

Dala ruma Ita bele sente hanesan David. Nia dehan: “Oh Jeová, hatán haʼu lalais bá; haʼu-nia forsa besik maran ona. Keta subar husi haʼu.” (Salmo [Mazmur] 143:5-7, 10) Iha tempu hanesan neʼe, keta rende an. Fó Jeová tempu hodi hatudu ba Ita, nia hakarak Ita atu halo saida. Rona ba nia hodi lee ninia Liafuan beibeik no hanoin kleʼan kona-ba buat sira neʼebé Ita lee. Neʼe bele ajuda Ita hodi haree saida mak Jeová hakarak husi Ita no oinsá mak nia ajuda ninia atan sira iha tempu uluk. Se Ita rona didiʼak ba nia, Ita mós bele fiar ba ninia matadalan sira.

Saida tan mak Ita bele halo hodi tempu klosan nian sai kontente nafatin no la estraga deʼit? Hakaʼas an hodi hametin Ita-nia relasaun ho Jeová. Haburas hahalok diʼak sira hanesan matenek, laran-luak, badinas liután, no hahalok sira neʼebé lori naran diʼak. Tanba hahalok sira-neʼe mak bele halo moris família nian kontente aban-bainrua. (Gênesis [Kejadian] 24:16-21; Rute 1:16, 17; 2:6, 7, 11; Provérbios [Amsal] 31:10-27) Tau uluk Maromak nia Ukun iha moris hodi haklaken beibeik no envolve an iha kongregasaun nia atividade sira. Halo buat sira-neʼe bele proteje Ita atu la foti desizaun neʼebé sala. Hanesan Bill hatete kona-ba tempu klosan nian: “Sira liu lalais deʼit! Mais haʼu uza tempu sira-neʼe hodi serbí Jeová liuhusi serbisu pioneiru.”

Jeová nia konsellu kona-ba kaben deʼit “iha Naʼi” sei vale duni ba ita ohin loron. Ita bele hatudu katak Ita iha respeitu ba Jeová hodi halo tuir konsellu neʼe, no Ita rasik mós sei moris ho solok. Bíblia dehan: “Solok ba ema neʼebé hamtaʼuk Jeová, ema neʼebé gosta tebes ninia mandamentu sira. Iha ninia uma, sei iha riku no rikusoin, nia mós sei iha hahalok loos ba nafatin.” (Salmo [Mazmur] 112:1, 3) Tan neʼe, kaer metin ba Maromak nia mandamentu neʼe hodi kaben deʼit “iha Naʼi”.