HAʼU ho Gwen foin tinan lima deʼit, ami aprende dansa ona. Maibé ami seidauk hasoru malu. Toʼo boot mós ami ida-idak iha hakarak neʼebé hanesan. Ami hakarak moris ho dansa deʼit. Maibé toʼo tiha tempu neʼebé ami-nia dansa atu sai naran-boot ona, ami mós lakohi atu dansa tan. Saida mak book ami foti desizaun hanesan neʼe?

David: Haʼu moris iha Shropshire, Inglaterra, iha tinan 1945. Haʼu-nia apá iha toʼos oan ida iha sidade liʼur. Fila husi eskola, haʼu gosta bá fó-han manu, arruma manu-tolun sira, no tau matan ba karau ho bibi sira. Iha tempu eskola feriadu, haʼu mós dala ruma lori tratór hodi ajuda koʼa ami-nia toʼos.

Maibé haʼu-nia apá nota buat ida husi haʼu. Nia nota katak husi kiʼik kedas, se haʼu mak rona múzika ida, haʼu mós komesa dansa ona. Tan neʼe mak bainhira haʼu foin toʼo tinan lima, nia husu haʼu-nia amá lori haʼu ba aprende dansa iha eskola dansa nian. Tanba haʼu-nia mestre hanoin katak iha futuru, haʼu mós bele sai dansa bailadu naʼin diʼak ida, entaun nia mós hanorin haʼu oinsá atu dansa bailadu. Toʼo haʼu tinan 15, haʼu hetan bolsa-estudu hodi bele bá eskola iha London, iha eskola karun ida naran Royal Ballet School. Iha eskola neʼe mak haʼu ho Gwen hasoru malu, no sira tau ami naʼin-rua sai pár ba dansa nian.

Gwen: Haʼu moris iha sidade London iha tinan 1944. Husi kiʼik, haʼu iha ona fiar neʼebé kleʼan ba Maromak. Haʼu koko lee haʼu-nia Bíblia maibé sente kusta tebes atu bele komprende. Uluk, bainhira haʼu foin tinan lima, haʼu mós tuir eskola dansa nian. Tinan neen liutiha, haʼu bá tuir torneiu ida neʼebé loke ba ema hotu iha rai-Bretaña. Ema neʼebé manán bele bá tuir eskola júnior iha Royal Ballet School. No haʼu mak manán prémiu iha torneiu neʼe. Eskola neʼe iha fatin ida naran White Lodge, iha uma boot ida iha Richmond Park. Haʼu eskola no mós aprende dansa bailadu iha eskola neʼe husi mestre naran-boot sira. Bainhira haʼu tinan 16 mak haʼu muda ba eskola senior iha Royal Ballet School iha sidade London. Iha neʼebá mak haʼu koñese David. Fulan hira liutiha, ami naʼin-rua sai pár ida ba dansa bailadu nian. Ami bá hatudu ami-nia dansa iha fatin sinema sira nian iha Royal Opera House iha Covent Garden, London.

David: Loos, hanesan Gwen dehan, ami bá dansa toʼo sinema naran-boot sira hanesan Royal Opera House no London Festival Ballet (agora bolu English National Ballet). Iha treinadór ida, nia mós iha kompañia internasionál ida iha Wuppertal, Alemaña. Nia lori ami naʼin-rua ba neʼebá atu hatudu ami-nia dansa. Iha tempu ami sei dansa, ami dansa toʼo sinema oioin iha nasaun barak. Ami mós dansa ho artista oioin hanesan Dama Margot  Fonteyn no Rudolf Nureyev. Ami-nia moris neʼe halo ami sente orgullu tebes toʼo ami hakarak fó ami-nia moris tomak ba dansa deʼit.

Gwen: Haʼu-nia neon no isin haʼu dedika tomak ba dansa deʼit. Haʼu no David iha hakarak neʼebé hanesan. Ami hakarak sai “númeru un” iha dansa. Hanoin toʼok, ema sempre husu haʼu-nia asinatura, fó ai-funan haʼu, no basa liman ba haʼu-nia dansa, buat sira-neʼe halo haʼu kontente tebes. Hanesan mós ho ema seluk, haʼu fiar ba sorte deʼit. Maibé, haʼu mós bele haree ema iha haʼu-nia sorin-sorin halo hahalok foʼer, fuma, no lanu.

David: Dansa tiha ba tinan barak, haʼu mós baruk ona atu iha moris neʼebé halai bá halai mai. Haʼu hanoin fali moris simples iha foho, moris ho kuda toʼos deʼit. Tan neʼe, iha tinan 1967, haʼu husik tiha dansa hodi fila fali ba serbisu halo ema nia toʼos besik haʼu-nia apá-amá nia uma. Haʼu aluga uma oan ida hodi hela, depois, haʼu telefone ba Gwen iha sinema husu nia katak haʼu atu kaben ho nia. Iha tempu neʼebá nia dansa mesamesak ona, no ninia naran mós sai boot ba daudaun. Entaun atu foti desizaun neʼe, ba nia kusta tebes. Sá tan iha ninia moris tomak, nia nunka moris iha foho. Maibé, nia hatán atu kaben ho haʼu. No nia mós muda mai hela ho haʼu iha foho.

Gwen: Foufoun susar ba haʼu atu toman ho moris foho nian. Atu serbisu hanesan hois karau nia susu-been, iha tempu saida deʼit mós tenkesér fó-han fahi ho manu sira, moris hanesan neʼe la hanesan tebes ho haʼu-nia moris uluk nian. No tanba David presiza bá tuir kursu toʼos nian ba fulan sia hodi aprende oinsá bele uza ekipamentu foun hodi halo toʼos, entaun loron haʼu sente mesamesak loos tanba kalan mak David foin tama uma. Tuirmai ami mós iha oan-feto ida naran Gilly. David mós hakarak haʼu aprende lori karreta. Loron ida haʼu bá fatin ida no haʼu hasoru Gael. Haʼu koñese nia kleur ona tanba nia serbisu iha loja ida besik ami.

Gael konvida haʼu bá tuur iha ninia uma. Ami haree ami-nia foto kazamentu sira. Iha ninia foto, iha ema barak hamriik hela iha Reuniaun-Fatin nia liʼur. Haʼu husu nia neʼe igreja saida. Nia dehan mai haʼu katak nia ho ninia laʼen mak Testemuña ba Jeová. Haʼu kontente tebes bainhira haʼu rona nia hatete hanesan neʼe, tanba haʼu-nia tian ida mós Testemuña. Haʼu sei hanoin-hetan uluk apá la gosta tebes nia no soe hotu ninia livru sira. Iha laran haʼu hanoin, tanbasá mak apá baibain ema diʼak ida bele hirus ho haʼu-nia tian diʼak neʼe.

Maibé ikusmai haʼu konsege aprende duni tansá mak haʼu-nia tian nia fiar la hanesan ho igreja sira-nian.  Gael hanorin haʼu buat barak kona-ba Bíblia. Nia hatudu husi Eskritura sira katak igreja nia doutrina barak, hanesan Trindade, ka klamar mak la tuir buat neʼebé Bíblia hanorin. (Eclesiastes [Pengkhotbah] 9:5, 10; João 14:28; 17:3) No iha haʼu-nia moris tomak, neʼe mak dala primeiru haʼu haree Maromak nia naran iha Bíblia laran.—Êxodo (Keluaran) 6:3.

David: Gwen konta fali ba haʼu buat sira neʼebé nia aprende husi Bíblia. Haʼu sei hanoin-hetan bainhira haʼu sei kiʼik, haʼu-nia apá hatete ba haʼu katak haʼu tenke lee Bíblia. Tan neʼe mak haʼu mós hakarak estuda hamutuk ho Gwen. Gael ho ninia laʼen, Derrick mak hanorin ami. Liutiha fulan neen, ema hakarak aluga toʼos oan ida ba ami iha Oswestry, nafatin iha Shropshire laran. Tan neʼe ami mós muda ba neʼebá, no Deirdre, irmán ida iha neʼebá mak hanorin fali ami. Tanba ami okupadu tebes hodi tau matan ba animál sira, ami-nia lalaʼok iha lia-loos mós sai neineik liu. Maibé neineik-neineik nuʼudar tempu liu daudaun, ami haree lia-loos mós book duni ami-nia laran.

Gwen: Dezafiu boot ida neʼebé haʼu tenke halakon mak fiar ba sorte. Eskritura iha Isaías (Yesaya) 65:11 ajuda haʼu haree katak Jeová odi “ema neʼebé prepara meza ba maromak Sorte Diʼak nian”. Haʼu presiza duni tempu barak no halo orasaun beibeik hodi bele soe hotu buat sira neʼebé haʼu fiar katak bele lori sorte ba ami. Haʼu mós aprende katak “ema neʼebé foti an, Maromak sei hatún, no ema neʼebé haraik an, Maromak sei foti aas”, ida-neʼe halo haʼu hakaʼas an liután atu sai ema neʼebé Jeová simu no hodi serbí nia. (Mateus 23:12) Haʼu hakarak duni adora Maromak neʼe neʼebé hanoin tebes ema toʼo fó ninia Oan hodi mate ba ema. Iha tempu neʼe ami mós iha tan oan-feto ida, no hodi hatene katak ami-nia família tomak bele moris hamutuk iha paraízu, neʼe halo ami kontente tebes.

David: Bainhira haʼu haree oinsá mak Bíblia nia profesia sira hanesan Mateus 24 no Daniel sai loos, haʼu-nia fiar ba lia-loos mós sai metin liután. Husi neʼe haʼu bele rekoñese katak, la iha buat ida iha mundu neʼe mak bele kompara ka diʼak liu fali ita-nia relasaun diʼak ho Jeová. Neineik-neineik, haʼu-nia moris mós ladún iha ambisaun ona, tanba haʼu komprende ona katak haʼu-nia feen ho oan sira mós importante hotu, laʼós haʼu-nia an deʼit. Eskritura iha Filipe 2:4 mós fó-hanoin haʼu atu labele hanoin an deʼit hodi hakarak buka toʼos neʼebé boot liu ami iha daudauk neʼe, maibé tenkesér tau Jeová uluk iha haʼu-nia moris. Haʼu mós para hodi la fuma tan. Maibé, atu organiza didiʼak buat hotu hodi ami bele bá tuir reuniaun iha Sábadu kalan sei difisil uitoan mai ami. Tanba bá reuniaun presiza kilómetru 10 husi uma, no iha oras reuniaun neʼe mós ami presiza hois karau nia susu-been. Maibé tanba ho Gwen nia ajuda, hois tiha karau nia susu-been sira, ami sempre la falta atu bá tuir reuniaun ka bá haklaken ho ami-nia oan-feto sira iha domingu dadeer.

Ami-nia família sira hirus tebes ho ami-nia mudansa sira-neʼe. Gwen nia apá deʼit lakohi koʼalia ho nia ba tinan neen. Haʼu-nia inan-aman mós koko makaʼas hodi hapara ami atu labele ransu ho Testemuña sira.

 Gwen: Jeová ajuda duni ami iha tempu susar sira-neʼe. Irmaun-irmán husi kongregasaun Oswestry mós neineik-neineik sai hanesan ami-nia família foun ida no ajuda ami iha ami-nia tempu susar sira. (Lucas 18:29, 30) Ami dedika ami-nia moris ba Jeová hodi hetan batizmu iha tinan 1972. No depois, haʼu komesa pioneiru, tanba haʼu hakarak ajuda ema barak liután atu bele hatene kona-ba lia-loos.

David: Tinan sira neʼebé ami serbisu iha toʼos halo ami kole tebes, maibé ami sempre koko atu hatudu ezemplu diʼak ba ami-nia oan sira oinsá atu serbí Jeová. Ikusmai, tanba governu la fó tan ajuda ona, ami mós la bele halo toʼos ona. Agora uma la iha, serbisu la iha, ho tan oan-feto terseiru foin tinan ida, ami tenke husu deʼit Jeová mak bele ajuda ami. Ami deside atu hanorin ema dansa hodi bele apoia ami-nia família. Maibé ami mós hakarak tau nafatin Maromak uluk iha ami-nia moris. Desizaun neʼe laʼós halo ho saugati deʼit, tanba ikusmai ami-nia oan-feto tolu sai pioneiru hotu. No tanba Gwen mós pioneiru ida, entaun loroloron nia bele apoia ami-nia oan-feto sira iha serbisu haklaken.

Bainhira ami-nia feto boot rua, Gilly ho Denise kaben ona, ami mós la hanorin dansa tan. Ami hakerek surat ba sukursál hodi husu sira fatin ruma presiza ajuda ka lae. Sira haruka ami ba sidade parte súl nian iha Inglaterra. Tanba Debbie, feto kiʼik deʼit mak sei ho ami, entaun haʼu mós foti serbisu pioneiru. Tinan lima liutiha, sira haruka fali ami ba ajuda iha kongregasaun iha parte norte nian. Bainhira Debbie kaben tiha, ami mós hetan priviléjiu hodi ajuda halo konstrusaun internasionál ba tinan sanulu iha Zimbábue, Moldávia, Ungria, no Kosta Marfín. Ikusmai, ami fila fali ba London hodi ajuda konstrusaun iha Betel. Tanba sira haree haʼu iha esperiénsia kona-ba toʼos, entaun sira mós husu haʼu ba ajuda iha Betel nia toʼos iha tempu neʼebá. Iha tempu agora daudauk ami serbí hela nuʼudar pioneiru iha parte norte, oeste uitoan iha Inglaterra.

Gwen: Ami-nia dedikasaun primeiru ba dansa bailadu mohu lalais deʼit. Maibé dedikasaun segundu nian ba Jeová lori solok barak mai ami no sei la mohu, neʼe sei ba nafatin. David ho haʼu sei pár ida nafatin, maibé laʼós pár ba dansa nian, ami agora uza ami-nia ain hodi sai pár ba haklaken nian. Ajuda ema seluk aprende kona-ba lia-loos hodi bele salva ema, lori solok neʼebé kleʼan tebes ba ami. Sira mak hanesan “karta” neʼebé diʼak liu fali naran boot iha mundu neʼe. (2 Korinto 3:1, 2) Se ami mak la iha lia-loos, karik ohin loron ami iha deʼit memória uluk nian, ka foto uluk nian, ka programa sinema nian deʼit husi ami-nia serbisu uluk nian.

David: Uza ami-nia moris hodi serbí Jeová lori mudansa barak ba ami-nia moris. Haʼu rasik bele haree katak neʼe ajuda haʼu atu sai laʼen ka aman diʼak ida. Bíblia hatete katak Miriam, Liurai David, no ema seluk tan uza dansa hodi hatudu sira-nia solok. Ami mós hein ba loron ida ami no ema seluk mós bele dansa ho solok iha Jeová nia mundu foun.—Êxodo (Keluaran) 15:20; 2 Samuel 6:14.