IRMAUN ida naran Julian hatete: “Bainhira haʼu rona avizu katak kongregasaun hasai haʼu-nia oan-mane, haʼu sente haʼu-nia moris la vale tan ona mai haʼu. Uluk, haʼu besik loos ho nia tanba nia mak haʼu-nia oan-boot. Ami sempre hamutuk. Nia mak oan diʼak, maibé derrepente ninia hahalok troka. Iha tempu ami rona avizu neʼe, haʼu-nia feen tanis deʼit, no haʼu la hatene oinsá atu konsola nia. Ami mós hanoin karik ami la halaʼo didiʼak ami-nia knaar nuʼudar inan-aman.”

Se ema sente triste tebes bainhira kongregasaun hasai ema ruma, tanbasá mak ita bele dehan katak arranju neʼe mak hatudu domin? Eskritura sira fó razaun saida hodi hasai ema husi kongregasaun? No ema halo saida mak tenke hasai sira husi kongregasaun?

Oinsá mak kongregasaun deside atu hasai ema kristaun ida? Neʼe deside husi fatór rua. Primeiru, tanba ema neʼebé batizmu ona mak halo sala neʼebé boot. Segundu, tanba nia la arrepende an.

Loos, ita hotu halo sala loroloron, maibé Jeová iha direitu atu hatete saida mak nia hakarak husi ita. Ninia hakarak mak ita hotu hatudu hahalok santu. Porezemplu, Jeová hakarak ita sees husi sala todan sira hanesan sala-foʼer, adora estátua, naʼok, oho ema, hamatak ema, no mós halo matan-dook nia atividade.—1 Korinto 6:9, 10; Apokalipse 21:8.

Tuir loloos, moris tuir Jeová nia matadalan mak proteje ita. Ita mós sente hanesan neʼe ka lae? Iha kongregasaun laran, ita sente dame tanba ita hamutuk ho ita-nia irmaun-irmán sira neʼebé moris tuir morál diʼak, no ita mós bele tau fiar ba sira. Ema kristaun sira hatudu hahalok hanesan neʼe tanba ita dedika ona ita-nia an ba Maromak, hodi promete katak ita sei moris tuir ninia matadalan neʼebé ita hetan iha ninia Liafuan.

Maibé oinsá se ema kristaun ida neʼebé monu ba sala boot tanba fraku ruma? Jeová nia atan fiar-naʼin sira husi tempu uluk mós halo sala, maibé Maromak la rejeita kedas sira. Ezemplu ida mak Liurai David, nia halo sala-foʼer no mós oho ema, maibé profeta Natan dehan ba nia: “Jeová . . . fó perdua ba ó-nia sala.”—2 Samuel 12:13.

Maromak fó perdua ba David nia sala tanba nia arrepende an ho laran. (Salmo [Mazmur] 32:1-5) Ohin loron kongregasaun sei hasai ema ida só deʼit se nia la arrepende an husi ninia sala, no kontinua halo buat neʼebé aat. (Apóstolu 3:19; 26:20) Se katuas sira neʼebé serbí iha grupu tesi-lia nian haree katak ema neʼe la hatudu arrepende an husi laran, sira tenke hasai nia.

Dala ruma, ita sente desizaun atu hasai ema ruma husi kongregasaun mak la loos, liuliu se ita mak besik ho ema neʼebé kongregasaun hasai. Maibé Jeová nia Liafuan fó razaun diʼak tanbasá mak ita bele fiar katak arranju neʼe mak arranju neʼebé hatudu domin.

Jesus dehan katak “liuhusi ema nia hahalok loos mak nia hatudu sai ninia matenek”. (Mateus 11:19) Desizaun matenek atu hasai ema husi kongregasaun neʼebé la arrepende an, neʼe lori rezultadu diʼak. Mai ita haree kona-ba rezultadu tolu tuirmai neʼe:

Hasai ema atu hatudu respeitu ba Jeová nia naran. Tanba ita reprezenta Jeová, ita-nia hahalok bele fó naran diʼak ka ladiʼak ba nia. (Isaías [Yesaya] 43:10) Oan ida bele fó naran diʼak ka naran ladiʼak ba ninia inan-aman, depende ba ninia hahalok. Hanesan neʼe mós, ema nia hanoin kona-ba Jeová dala ruma depende ba ezemplu diʼak ka ladiʼak neʼebé sira haree husi ema neʼebé lori ninia naran. Jeová nia naran sei hetan hahiʼi se ninia atan sira halo tuir ninia matadalan kona-ba morál. Situasaun neʼe hanesan ho Ezequiel nia tempu. Ema iha tempu neʼebá, bainhira temi ema judeu, sira-nia hanoin sempre halai kedas ba Jeová.—Ezequiel (Yehezkiel) 36:19-23.

Se ita halo hahalok sala-foʼer, ita sei halo foʼer Maromak nia naran santu. Apóstolu Pedro fó konsellu ba ema kristaun sira, dehan: “Nuʼudar oan neʼebé halo tuir ho didiʼak, imi keta moris tuir imi-nia hakarak uluk nian neʼebé imi iha kuandu imi la hatene Maromak, maibé sai santu bá iha imi-nia hahalok hotu hodi tuir Ida neʼebé Santu neʼebé bolu imi, tanba hakerek nanis ona: ‘Imi tenke santu, tanba haʼu santu.’” (1 Pedro 1:14-16) Hahalok neʼebé moos no santu fó glória ba Maromak nia naran.

Maibé se Testemuña ba Jeová ida sai toman atu halo hahalok neʼebé ladiʼak, ikusmai ninia maluk sira sei hatene kona-ba neʼe. Bainhira kongregasaun hasai ema ruma, neʼe hatudu katak Jeová nia povu mak moos no katak sira kaer metin ba Maromak nia matadalan sira, hodi bele santu nafatin. Mane ida husi rai-Suisa, ninia feton kongregasaun hasai tanba sala-foʼer. Mane neʼe tuir reuniaun no dehan katak nia hakarak tuir organizasaun neʼebé “la simu hahalok aat”.

Hasai ema bele proteje kongregasaun neʼebé moos. Apóstolu Paulo fó avizu ba ema kristaun sira iha Korinto katak perigu atu husik deʼit ema neʼebé ho neon halo sala nafatin. Nia kompara ema nia hahalok aat hanesan fermentu neʼebé bele “halo masa tomak saʼe” tanba hahalok aat sira-neʼe bele kona ema seluk. Depois nia fó konsellu ba sira hanesan neʼe: “Hasai tiha husi imi-nia leet ema neʼebé halo hahalok aat.”—1 Korinto 5:6, 11-13.

“Ema neʼebé halo hahalok aat” neʼebé Paulo temi mak ema ida iha sira-nia leet neʼebé la iha moe atu halo sala-foʼer. Ema seluk iha ninia kongregasaun mós komesa simu hahalok neʼe. (1 Korinto 5:1, 2) Se sira husik deʼit hahalok neʼe, ema seluk iha kongregasaun karik sei sente sira mós bele halo tuir hahalok la morál neʼebé ema barak hatudu iha sira-nia sidade. Se la hasai husi kongregasaun ema neʼebé ho neon halo hahalok aat, neʼe bele halo ema seluk sente sira la presiza halo tuir Jeová nia mandamentu sira. (Eclesiastes [Pengkhotbah] 8:11) Ema neʼebé la arrepende sira-nia sala bele sai hanesan “fatuk neʼebé subar iha bee okos” hodi halo fraku ema seluk iha kongregasaun nia fiar.—Judas 4, 12.

Hasai ema husi kongregasaun bele halo ema neʼe rekoñese ninia sala. Jesus konta istória kona-ba mane joven ida neʼebé husik ninia aman nia uma no gasta arbiru ninia rikusoin hotu hodi moris iha dalan neʼebé ladiʼak. Mane neʼe ikusmai foin hatene katak moris ketak husi ninia aman mak la iha folin duni. Nia arrepende an no fila fali ba ninia família. (Lucas 15:11-24) Aman haksolok tanba ninia oan troka ninia hahalok, neʼe haleno Jeová nia sentimentu. Jeová hatete: “Haʼu haksolok laʼós tanba ema aat mate, maibé haʼu haksolok kuandu ema aat ida fila fali husi ninia dalan no hetan moris.”—Ezequiel (Yehezkiel) 33:11.

Hanesan neʼe mós, bainhira kongregasaun hasai ema ida, karik realidade kona-ba buat hotu neʼebé nia lakon sei xoke nia laran no halo nia hadeer fali. Porezemplu, nia sei haree rezultadu aat husi ninia sala no karik nia mós hanoin fali tempu neʼebé nia kontente hamutuk ho ninia kongregasaun neʼebé hanesan ninia família. Karik nia mós sente triste tanba nia la iha ona relasaun diʼak ho Jeová.

 David hakerek salmu ida hodi dehan: “Se ema loos ida baku haʼu, neʼe hatudu katak nia iha domin ho laran-metin; no se nia korrije haʼu, neʼe hanesan mina neʼebé tau iha ulun.” (Salmo [Mazmur] 141:5) Atu ema ida bele rekoñese ninia sala hodi fila fali ba Jeová, presiza duni hatudu domin ba ema neʼe, maibé la bele mamar liu. Hanoin toʼok kona-ba ezemplu neʼe. Labarik ida, hahán nisik nia no nia dada iis ladiʼak. Se ema la ajuda nia, nia bele mate. Depois, aman baku makaʼas nia oan nia kotuk atu nia bele muta sai hahán neʼe. Karik baku hanesan neʼe halo oan nia kotuk sente moras, maibé neʼe bele salva ninia moris. Kona-ba David, nia hatene katak ema loos ida karik presiza fó dixiplina ba nia. Dixiplina neʼe maski bele halo laran-kanek uitoan, maibé David hatene neʼe ba nia rasik nia diʼak.

Baibain, dixiplina atu hasai ema husi kongregasaun, neʼe diʼak ba ema neʼebé halo sala. Hanoin fali irmaun Julian nia oan-mane neʼebé kongregasaun hasai. Liutiha tinan sanulu hanesan neʼe, nia halo mudansa iha ninia moris hodi fila fali ba kongregasaun. Agora nia serbí nuʼudar katuas ba kongregasaun. Nia hatete: “Durante tempu neʼebé hasai haʼu husi kongregasaun, haʼu haree rasik konsekuénsia aat husi haʼu-nia dalan moris. Haʼu presiza duni dixiplina hanesan neʼe.”—Ebreu 12:7-11.

Bainhira hasai ema ida husi kongregasaun, neʼe triste duni ba kongregasaun tomak. Maibé ita ida-idak bele halo ita-nia parte hodi arranju neʼe bele lori buat diʼak.

Katuas kongregasaun sira hakaʼas an atu banati-tuir Jeová nia domin. Bainhira sira fó-hatene ema ida kona-ba desizaun atu hasai nia, ho laran-diʼak, sira esplika kona-ba saida mak nia presiza halo hodi kongregasaun bele simu fali nia. Atu fó-hanoin ema oinsá atu fila fali ba Jeová, katuas sira dala ruma ba vizita sira neʼebé hatudu ona katak sira troka sira-nia hahalok. * (Haree nota iha kraik.)

Ema neʼe nia família bele hatudu domin ba kongregasaun no mós ba ema neʼebé kongregasaun hasai hodi respeitu arranju atu hasai ema neʼe. Julian hatete hanesan neʼe kona-ba ninia oan: “Nia nafatin haʼu-nia oan, maibé ninia moris neʼe mak haketak ami-nia relasaun.”

Ema hotu iha kongregasaun bele hatudu domin hodi la ransu ka la koʼalia ho ema neʼebé kongregasaun hasai. (1 Korinto 5:11; 2 João 10, 11) Hanesan neʼe, sira hatudu katak sira konkorda ho dixiplina neʼebé Jeová fó ba nia liuhusi katuas sira. Ema hotu mós bele hatudu domin no apoia ema neʼe nia família, tanba sira hasoru daudaun susar neʼe. Ita lakohi sira sente katak irmaun-irmán sira mós sei la ransu tan ho sira.—Roma 12:13, 15.

Julian hatete: “Hasai ema husi kongregasaun mak arranju ida neʼebé ita presiza, tanba neʼe ajuda ita moris tuir Maromak nia matadalan. Maski ida-neʼe bele lori laran-susar, maibé ikusmai rezultadu mak diʼak. Se uluk haʼu simu deʼit haʼu-nia oan nia hahalok aat, haʼu hanoin toʼo agora nia seidauk fila fali ba kongregasaun.”