Ita-nia relasaun ho Maromak Jeová metin ka lae?
“Hakbesik ba Maromak, no nia sei hakbesik ba imi.”—TIAGO 4:8.
1. Tanbasá mak ita tenke hakaʼas an nafatin atu hametin ita-nia relasaun ho Jeová?
SE ITA mak Testemuña ba Jeová neʼebé batizmu ona, ita iha rikusoin ida neʼebé folin-boot tebes. Neʼe mak ita-nia relasaun diʼak ho Maromak Jeová. Maibé ita-nia relasaun ho Jeová bele sai fraku tanba ita moris iha Satanás nia mundu aat neʼe no ita mak ema sala-naʼin. Tan neʼe mak ita hotu tenkesér hakaʼas an nafatin atu hametin ita-nia relasaun diʼak ho Jeová.
2. Oinsá mak ita bele hametin ita-nia relasaun diʼak ho Maromak Jeová?
2 Ita fiar Maromak Jeová iha duni no nia mak ita-nia Belun ka lae? Ita hakarak hametin liután ita-nia relasaun diʼak ho Jeová ka lae? Tiago 4:8 hatete: “Hakbesik ba Maromak, no nia sei hakbesik ba imi.” Atubele iha relasaun diʼak entre ita ho Jeová, ita ho nia tenke hakbesik ba malu. Se ita hakbesik liután ba Jeová, nia mós sei hakbesik liután ba ita, toʼo ita mós sei sente hanesan Jesus, neʼebé dehan: “Ida neʼebé haruka haʼu mai, nia iha duni, no . . . haʼu hatene nia.” (João 7:28, 29) Maibé saida deʼit mak ita bele halo atubele hakbesik ba Jeová?
Oinsá mak ita bele ko’alia ho Maromak? (Haree parágrafu 3)
3. Oinsá mak ita ho Maromak Jeová bele ‘koʼalia ba malu’?
3 Se ita hakarak hakbesik liután ba Maromak Jeová, ita ho nia tenke ‘koʼalia ba malu’. Maibé oinsá? Hanoin toʼok kona-ba belun diʼak ida neʼebé hela dook husi ita. Karik ita ho belun neʼe haruka mensajen ba malu, ka telefone malu. Nuneʼe mós, atu koʼalia ba Jeová, ita presiza halo orasaun beibeik ba nia. (Lee Salmo [Mazmur] 142:2. *) No liuhusi lee ninia Liafuan, Bíblia, neʼe hanesan ita rona Jeová koʼalia fali mai ita. Ita presiza lee Bíblia beibeik no hanoin kleʼan kona-ba buat neʼebé ita lee. (Lee Isaías [Yesaya] 30:20, 21. *) Agora, mai ita haree oinsá mak hodi halo nuneʼe bele hametin ita-nia relasaun nuʼudar belun diʼak ho Jeová.
HUSIK JEOVÁ KOʼALIA BA ITA BAINHIRA ITA ESTUDA BÍBLIA
4, 5. Oinsá mak Jeová koʼalia ba Ita liuhusi Bíblia? Fó toʼok ezemplu.
4 Ita hatene katak Bíblia mak Maromak nia liafuan ba ema hotu. Maibé Bíblia bele ajuda ita ida-idak atu hakbesik ba Maromak Jeová ka lae? Bele! Bainhira ita lee no estuda Bíblia beibeik, ita presiza husu ba ita-nia an: ‘Haʼu sente oinsá kona-ba buat neʼebé haʼu lee? Oinsá mak haʼu rasik bele halo tuir liafuan neʼe iha haʼu-nia moris?’ Se ita halo buat hotu neʼe, neʼe katak ita husik Jeová mak koʼalia ba ita. Nuneʼe, ita sei sente besik liután ba Jeová nuʼudar ita-nia Belun diʼak neʼebé sempre ajuda ita.—Ebreu 4:12; Tiago 1:23-25.
5 Porezemplu, bainhira ita lee Jesus nia liafuan: “Keta haloot ba ó-nia an rikusoin iha rai,” ita sente oinsá? Se ita mak hakaʼas an daudauk atu tau uluk Jeová iha ita-nia moris, ita bele sente katak nia sei kontente ho ita no gaba ita. Maibé se ita sente katak ita presiza halo ita-nia moris simples no hakaʼas an liután atu serbí Maromak Jeová, neʼe katak Jeová mak fó-hatene ita kona-ba buat neʼebé ita presiza halo atubele hakbesik liután ba nia.—Mateus 6:19, 20.
6, 7. (a) Bainhira ita estuda Bíblia, ita-nia domin ba Jeová no Jeová nia domin mai ita sai oinsá? (b) Ita-nia objetivu atu estuda Bíblia mak saida?
6 Bainhira ita estuda Bíblia, ita sei aprende kona-ba oinsá mak ita bele troka ita-nia moris atu hakbesik liután ba Jeová. Maibé laʼós neʼe deʼit, ita mós aprende kona-ba Jeová nia hahalok furak sira no buat hotu neʼebé Jeová halo ona ho ninia domin. Ida-neʼe ajuda ita atu hadomi liután nia, no bainhira domin neʼe sai buras liután, Jeová mós sei hadomi liután ita. Nuneʼe, ita ho Maromak Jeová bele hakbesik ba malu liután.—Lee 1 Korinto 8:3.
7 Maibé atu hakbesik liután ba Jeová, ita tenke estuda Bíblia ho hakarak neʼebé loos. Jesus hatete: “Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu.” (João 17:3) Loos duni, bainhira ita estuda Bíblia, ita-nia hakarak mak atu hatene didiʼak Jeová no sai ninia belun, laʼós deʼit hakarak atu aprende buat foun oioin.—Lee Êxodo (Keluaran) 33:13; * Salmo (Mazmur) 25:4.
8. (a) Karik ema balu bele hanoin oinsá kona-ba Jeová nia tesi-lia ba Liurai Azarias? (b) Se ita hatene didiʼak ona Jeová, ita bele fiar saida?
8 Se ita hatene didiʼak Maromak Jeová nuʼudar ita-nia Belun diʼak, ita sei la hanoin barak kona-ba istória husi Bíblia neʼebé la konta razaun hotu tansá Jeová halo buat ruma. Porezemplu, bainhira Liurai Azarias mak ukun rai-Judá, povu sei adora maromak falsu sira, maibé Azarias rasik la halo adorasaun falsu neʼe. Bíblia hatete: “Nia nafatin halo buat neʼebé loos iha Jeová nia haree.” (2 Reis [Raja-Raja] 15:1-5) Maski nuneʼe, Jeová fó kastigu ba Azarias hodi halo nia kona moras-lepra. Tanbasá? Eskritura sira-neʼe la esplika razaun tansá hanesan neʼe. Entaun, ita sente oinsá kona-ba Jeová? Ita sente Jeová mak Maromak neʼebé la justisa ka lae, tanba fó kastigu ba Azarias maski nia ema diʼak? Lae. Se ita hatene didiʼak ona Maromak Jeová, ita bele fiar katak ninia tesi-lia mak sempre loos. Nia sempre fó kastigu “natoon deʼit” ba ema. (Jeremias [Yeremia] 30:11) Tan neʼe, maski ita la hatene tansá mak Jeová fó kastigu ba Azarias, maibé buat ida ita bele fiar mak Jeová nia tesi-lia sempre iha dalan neʼebé loos.
9. Informasaun saida mak ajuda ita atu hatene kona-ba tansá Maromak Jeová fó kastigu ba Liurai Azarias?
9 Tuir loloos, Bíblia fó sai informasaun liután kona-ba Liurai Azarias, neʼebé mós iha naran seluk nuʼudar Liurai Uzias. (2 Reis [Raja-Raja] 15:7, 32) Eskritura seluk hatete katak nia halo “buat neʼebé loos iha Jeová nia haree”, maibé ikusmai, “nia sai foti-an iha laran toʼo estraga ninia an rasik”. (2 Crônicas [Tawarikh] 26:3-5, 16-21) Liurai neʼe sai foti-an tebes toʼo koko atu halo buat neʼebé loloos amlulik deʼit mak bele halo. Bainhira amlulik naʼin-81 hasoru Liurai Uzias no koko atu hapara nia, saida mak nia halo? Tanba liurai neʼe sente nia an mak diʼak liu, nia sai “laran-nakali” hasoru sira! Loos duni, ita la hakfodak tanba Uzias nia hahalok hanesan neʼe, nia merese duni simu kastigu.
10. Tanbasá mak ita la presiza buka-hatene razaun kona-ba buat hotu neʼebé Jeová halo? Oinsá mak ita bele hametin ita-nia fiar ba Jeová?
10 Ita bele aprende lisaun importante saida? Kona-ba Liurai Azarias, Bíblia fó sai ona tansá Maromak Jeová fó kastigu ba nia. Maibé oinsá ho buat seluk neʼebé Jeová halo no Bíblia la esplika tansá nia halo ida-neʼe? Ita deskonfia kona-ba Jeová nia justisa, ka ita fiar katak Bíblia nia informasaun toʼo ona ba ita atu tau fiar tomak ba Jeová katak buat hotu neʼebé nia halo sempre loos? (Deuteronômio [Ulangan] 32:4) Se ita kontinua hatene didiʼak Maromak Jeová nuʼudar ita-nia Belun, ita-nia domin no fiar ba nia mós sei sai metin liután. No ita mós la presiza buka-hatene razaun hotu kona-ba buat neʼebé Jeová halo. Kuandu ita estuda Bíblia ho didiʼak, ita sei hametin ita-nia relasaun diʼak ho Jeová, no ita sei hakbesik liután ba nia.—Salmo (Mazmur) 77:12, 13.
KOʼALIA BA JEOVÁ LIUHUSI ORASAUN
11-13. Oinsá mak ita bele hatene katak Jeová rona duni ita-nia orasaun? (Haree dezeñu iha pájina 19.)
11 Ita mós bele hakbesik liután ba Maromak Jeová liuhusi orasaun. Ho orasaun, ita bele hahiʼi Jeová, fó-agradese ba nia no husu ninia ajuda. (Salmo [Mazmur] 32:8) Maibé atu iha relasaun diʼak ho Jeová, ita tenkesér fiar katak Jeová sei rona duni ita-nia orasaun.
12 Ema balu hanoin katak Maromak la rona ema nia orasaun no sira fiar katak orasaun mak buat ida neʼebé bele halo ema sente kmaan deʼit. Sira mós dehan katak orasaun mak hanesan dalan ida atu ajuda sira hanoin didiʼak kona-ba sira-nia problema no oinsá atu rezolve problema neʼe. Loos, maski orasaun bele ajuda ita iha dalan hirak-neʼe, maibé ita bele fiar katak Jeová rona duni ita-nia orasaun. Oinsá mak ita bele fiar hanesan neʼe?
13 Hanoin toʼok: Antes Jesus mai toʼo rai, nia haree Jeová hatán ba Ninia atan sira-nia orasaun. Bainhira Jesus sei iha rai mós, nia halo orasaun ba Aman iha lalehan hodi koʼalia sai ninia hanoin no sentimentu tomak. Dala ida, nia halo orasaun ba kalan tomak. (Lucas 6:12; 22:40-46) Se Jesus hatene katak Aman Jeová la rona ba ninia orasaun, nia sei halo orasaun ba kalan tomak ka lae? Jesus mós hanorin ninia dixípulu sira kona-ba oinsá atu halo orasaun ba Jeová. Maibé se Jesus hatene katak Jeová la rona ba ema nia orasaun, nia sei hanorin ninia dixípulu sira atu halo orasaun ka lae? Jesus hatene katak Jeová rona duni ema nia orasaun. Nia hatete ba ninia Aman: “Aman, haʼu hatoʼo obrigadu ba Ita-Boot tanba Ita rona ona haʼu. Haʼu hatene katak Ita-Boot sempre rona haʼu.” Ita mós bele fiar metin katak Jeová sempre rona ita-nia orasaun.—João 11:41, 42; Salmo (Mazmur) 65:2.
14, 15. (a) Bainhira halo orasaun, tansá mak ita presiza husu ho klaru saida loos mak ita hakarak? (b) Oinsá mak irmán Katy nia orasaun ajuda nia hakbesik liután ba Jeová?
14 Dala ruma, susar ba ita atu haree ho momoos oinsá Maromak Jeová hatán duni ita-nia orasaun. Maibé bainhira ita halo orasaun, ita tenke husu ho klaru saida loos mak ita hakarak iha laran. Hodi halo nuneʼe, ita bele hatene ho momoos oinsá Jeová hatán duni ita-nia orasaun, no neʼe sei ajuda ita hakbesik liután ba nia. Se ita koʼalia nakloke ba Jeová hodi fó-hatene buat hotu neʼebé halo ita laran-susar, Jeová mós sei hakbesik ba ita.
15 Ezemplu ida mak irmán Katy. * (Haree nota iha kraik.) Maski nia haklaken beibeik, maibé nia la gosta haklaken. Nia hatete: “Haʼu la gosta duni haklaken. Bainhira haʼu-nia tinan toʼo atu remata serbisu, irmaun katuas ida iha kongregasaun anima loos haʼu atu foti pioneiru regulár toʼo nia fó formuláriu mai haʼu. Haʼu deside atu komesa pioneiru, maibé haʼu mós halo orasaun ba Jeová loroloron atu ajuda haʼu bele gosta serbisu haklaken.” Jeová hatán duni Katy nia orasaun ka lae? Irmán Katy hatete: “Tinan tolu liu tiha, neineik-neineik haʼu sai matenek atu haklaken tanba haʼu uza tempu barak liu iha serbisu haklaken no aprende buat barak husi irmán sira seluk. Agora, haʼu laʼós gosta deʼit haʼu-nia serbisu haklaken, maibé loloos haʼu hadomi tebes serbisu neʼe. Haʼu mós sente besik liután ba Jeová liu fali uluk.” Loos, Katy nia orasaun ajuda nia hakbesik liután ba Maromak Jeová.
KONTINUA HAKBESIK LIUTÁN BA JEOVÁ
16, 17. (a) Atu kontinua hakbesik liután ba Maromak Jeová, ita tenke halo saida deʼit? (b) Iha lisaun tuirmai, ita sei koʼalia kona-ba saida?
16 Atu hakbesik liután ba Maromak Jeová, neʼe mak buat neʼebé la iha rohan. Tan neʼe, mai ita kontinua rona ba Jeová hodi estuda Bíblia beibeik no mai ita koʼalia nafatin ba nia liuhusi orasaun. Se ita halo buat hirak-neʼe, ita-nia relasaun diʼak ho Jeová sei sai metin liután ba beibeik, no ho ninia ajuda ita bele tahan hasoru susar naran deʼit.
Kontinua hakbesik liután ba Maromak Jeová iha ita-nia moris tomak (Haree parágrafu 16, 17)
17 Maibé dala ruma maski ita halo orasaun beibeik mós ita nafatin hasoru problema oioin. Iha tempu hanesan neʼe, karik ita-nia fiar metin ba Jeová komesa sai fraku. Karik ita hanoin katak Jeová la rona ita-nia orasaun, ka ita mós sente katak ita laʼós belun diʼak ho Maromak Jeová. Bainhira ita hasoru susar, oinsá mak ita bele sadere nafatin ba Maromak Jeová? Ita sei koʼalia kona-ba neʼe iha lisaun tuirmai.
^ par. 3 Salmo 142:2: “Iha ninia oin, haʼu fakar sai haʼu-nia laran-susar; haʼu fó-hatene haʼu-nia terus ba nia.”
^ par. 3 Isaías 30:20, 21: “20 Maski Jeová sei fó imi han paun terus nian no hemu bee susar nian, maibé imi-nia Mestre Boot sei la subar an tan, no imi sei haree imi-nia Mestre Boot ho imi-nia matan rasik. 21 Se ó lakon dalan no laʼo sees ba karuk ka ba loos, ó sei rona lian ida husi ó-nia kotuk dehan: ‘Dalan mak neʼe. Laʼo tuir bá.’”
^ par. 7 Êxodo 33:13: “Favór ida, se Ita simu ona haʼu, halo haʼu hatene Ita-nia dalan sira, atu nuneʼe haʼu bele hatene kona-ba Ita no Ita nafatin simu haʼu. No hanoin-hetan katak nasaun neʼe mak Ita-nia povu.”
^ par. 15 Naran neʼe laʼós naran neʼebé loos.
