Tau fiar nafatin ba Maromak Jeová!
“Oh, povu, tau fiar ba nia iha tempu hotu.”—SALMO (MAZMUR) 62:8.
1-3. Tanbasá mak apóstolu Paulo bele tau fiar metin ba Jeová? (Haree dezeñu iha leten.)
HANOIN toʼok se ita mak moris nuʼudar ema kristaun iha apóstolu sira-nia tempu iha sidade Roma. Ema Roma duun katak ema kristaun sira odi ema hotu, no iha tinan 64 bainhira ahi han sidade Roma, ema Roma mós duun katak ema kristaun sira mak sunu sidade neʼe. Tan neʼe, ema Roma kaer ita-nia maluk sira no fó terus oioin ba sira. Sira balu hedi ba ai-riin no sunu moris iha kalan hodi halo naroman, no sira seluk tan, animál siʼak mak tata lees sira. Loroloron, ita sente katak karik susar hanesan neʼe mós bele kona ita.
2 Durante tempu neʼe mak apóstolu Paulo sai dadur iha Roma ba dala segundu. Iha dadur laran, karik nia hanoin: ‘Haʼu-nia maluk sira sei mai ajuda haʼu ka lae?’ Nia hanoin hanesan neʼe tanba uluk bainhira nia iha susar laran, la iha ema ida mak ajuda nia. Maski nuneʼe, iha tempu neʼebá, Paulo la mesak. Nia hakerek: “Naʼi hamriik besik haʼu no fó kbiit mai haʼu.” Loos, Naʼi Jesus mak fó kbiit ba Paulo atubele tahan susar neʼebé nia hasoru. Tan neʼe mak Paulo hatete: “Nia salva haʼu husi leaun nia ibun.”—2 Timóteo 4:16, 17. * (Haree nota iha kraik.)
3 Paulo hanoin hikas fali oinsá Maromak Jeová ajuda ona nia iha tempu uluk, tan neʼe nia fiar metin katak Jeová sei fó forsa ba nia atubele tahan susar neʼebé nia hasoru daudauk no mós susar naran deʼit neʼebé sei kona nia iha futuru. Nia hakerek: “Naʼi sei salva haʼu husi buat aat hotu.” (2 Timóteo 4:18) Loos duni, liuhusi ninia esperiénsia rasik, Paulo hatene ona katak maski la iha ema ida mak bele ajuda nia, maibé sei iha Jeová ho Jesus neʼebé sempre ajuda nia.
OPORTUNIDADE BA ITA ATU “TAU FIAR BA JEOVÁ”
4, 5. (a) Sé loos mak bele ajuda ita iha situasaun hotu? (b) Oinsá mak ita bele hakbesik liután ba Jeová?
4 Ita mós hasoru ona susar ruma neʼebé halo ita sente mesamesak ka lae? Karik ita balu lakon serbisu, hasoru susar iha eskola, iha moras boot, ka hasoru situasaun seluk neʼebé susar tebes atu tahan. Karik ita mós husu ona ajuda husi ema seluk, maibé halo ita sai laran-tun tanba la bele hetan ajuda tuir ita-nia presiza. Tuir loloos, dala ruma problema balu neʼebé ita hasoru la iha ema ida mak bele rezolve. Se nuneʼe, ita bele halo saida? Bíblia hatete mai ita atu “tau fiar ba Jeová”. (Provérbios [Amsal] 3:5, 6) Maibé, ita bele fiar duni katak Jeová sei ajuda ita ka lae? Sin, bele! Husi istória oioin neʼebé hakerek ona iha Bíblia laran, hatudu momoos katak Maromak Jeová ajuda duni ninia povu.
5 Keta sai hirus ba ema seluk se sira la ajuda ita bainhira ita hasoru susar. Diʼak liu halo tuir apóstolu Paulo nia ezemplu hodi haree situasaun susar neʼe nuʼudar oportunidade ba ita atu tau fiar tomak ba Maromak Jeová deʼit no haree oinsá mak Nia sei tau matan ita. Hodi halo nuneʼe, ita bele hametin liután ita-nia fiar no hakbesik liután ba Jeová nuʼudar ita-nia Belun.
ITA TENKE TAU FIAR TOMAK BA JEOVÁ
6. Iha susar laran, tanbasá mak dala ruma la fasil atu tau fiar ba Jeová?
6 Karik ita hasoru daudauk susar ruma, no ita halo ona buat hotu atu hadiʼa situasaun neʼe no mós halo orasaun ona ba Jeová hodi husu ajuda. Se nuneʼe, ita bele sente hakmatek hodi tau fiar ba Jeová ka lae? Sin, bele! (Lee Salmo [Mazmur] 62:8; * 1 Pedro 5:7.) Se ita hakarak iha relasaun diʼak ho Jeová, importante ba ita atu aprende tau fiar tomak ba nia. Maibé neʼe la fasil. Tanbasá? Razaun ida mak tanba dala ruma Jeová la hatán kedas ita-nia orasaun.—Salmo (Mazmur) 13:1, 2; 74:10; 89:46; 90:13; Habacuque (Habakuk) 1:2.
7. Tanbasá mak dala ruma Jeová la hatán kedas ita-nia orasaun?
7 Tansá mak Jeová la hatán kedas ita-nia orasaun? Bíblia hatete Jeová mak hanesan aman ida no ita mak hanesan ninia oan sira. (Salmo [Mazmur] 103:13) Aman neʼebé hadomi nia oan, dala ruma nia la fó kedas buat neʼebé oan husu. Nia hatene katak ninia oan bele husu buat ruma derrepente deʼit maibé lakleur lakohi fali. Nia mós hatene buat saida mak diʼak liu ba ninia oan, ka oan nia hakarak neʼe diʼak ka la diʼak ba ema seluk. Nia hatene saida loos mak oan presiza, no mós bainhira loos mak tempu neʼebé diʼak atu fó buat neʼebé oan hakarak. Se aman ida tenke fó kedas buat hotu neʼebé oan husu, neʼe katak aman mak sai fali atan ba ninia oan. Nuneʼe mós ho Aman Jeová iha lalehan. Nia hadomi tebes ita, no nuʼudar Kriadór, nia hatene ho loloos buat neʼebé ita presiza no tempu neʼebé loos atu fó buat neʼebé ita husu. Tan neʼe, diʼak ba ita atu hein ba Jeová hodi haree oinsá mak nia sei hatán ba ita-nia orasaun.—Kompara ho Isaías (Yesaya) 29:16; 45:9.
8. Maromak Jeová promete saida mai ita?
8 Ita mós presiza hanoin-hetan katak Jeová hatene duni ita ida-idak nia kbiit no fraku. (Salmo [Mazmur] 103:14) Tan neʼe, nia fó mai ita kbiit natoon deʼit atubele tahan. Klaru katak dala ruma ita sente ita la bele tahan tan susar neʼebé ita hasoru. Maibé Jeová promete katak nia sei nunka husik ita hasoru susar neʼebé todan liu fali ita-nia kbiit atu tahan, no nia sei fó ‘dalan ba ita atu sai’. (Lee 1 Korinto 10:13.) Nuneʼe, ita bele sente kmaan hodi fiar metin katak Jeová komprende didiʼak ita-nia kbiit toʼo iha neʼebé.
9. Se Jeová la hatán kedas ita-nia orasaun, ita presiza halo saida?
9 Se ita husu Jeová nia ajuda maibé nia la hatán kedas, mai ita hein ho pasiénsia bá. Keta haluha katak Jeová hakarak tebes ajuda ita, nia hatene ho loloos tempu neʼebé diʼak atu fó buat neʼebé ita husu, no nia mós hein ho pasiénsia. Bíblia hatete: “Jeová hein ho pasiénsia atu hatudu laran-diʼak ba imi no hatudu laran-sadiʼa ba imi. Tanba Jeová mak Maromak justisa nian. Ksolok ba ema hotu neʼebé hein nafatin ba nia.”—Isaías (Yesaya) 30:18.
“LEAUN NIA IBUN”
10-12. (a) Susar saida deʼit mak bele kona ita bainhira ita tau matan ba família neʼebé moras? (b) Se ita tau fiar tomak ba Jeová iha susar laran, ita-nia relasaun diʼak ho Jeová sei sai oinsá? Fó toʼok ezemplu.
10 Karik ita mós hasoru daudauk susar boot neʼebé halo ita sente hanesan apóstolu Paulo, no ita presiza hetan salvasaun husi “leaun nia ibun”. (2 Timóteo 4:17) Iha situasaun hanesan neʼe, importante tebes atu sadere ba Jeová. Porezemplu, se ita tau matan daudauk ba família ida neʼebé moras, karik ita halo ona orasaun ba Jeová hodi husu kbiit no matenek atubele tahan hasoru susar neʼe no bele halo desizaun diʼak. * (Haree nota iha kraik.) Bainhira halo tiha buat hotu neʼebé ita bele halo, ita bele sente dame iha laran tanba hatene katak Jeová haree nafatin ita no sei ajuda ita kontinua tahan ho laran-metin ba nia.—Salmo (Mazmur) 32:8.
11 Maibé dala ruma ita sente katak problema aumenta liután. Porezemplu, doutór sira lia la tuir malu kona-ba tratamentu ruma. Ka, ita hakarak ita-nia família sira atu fó kmaan ba ita, maibé sira mai lori susar deʼit ba ita. Maski buat hirak-neʼe akontese, kontinua hakbesik liután ba Jeová no husu nia haraik kbiit ba ita atubele tahan. (Lee 1 Samuel 30:3, 6. *) Ikusmai, ita sei haree duni oinsá mak Jeová ajuda ita, no ita-nia relasaun diʼak ho Jeová sei sai metin liután.
12 Hanoin toʼok kona-ba irmán Linda. * (Haree nota iha kraik.) Ba tinan barak, nia tau matan ba ninia inan-aman neʼebé idade ona toʼo sira mate. Nia hatete: “Durante tempu neʼe, haʼu ho haʼu-nia laʼen no alin-mane, dala barak ami sente la hatene atu halo saida no sai bilán deʼit. Dala ruma mós ami sente kbiit-laek atu halo buat ida. Maibé, hodi hanoin hikas fali ba tempu neʼe, ami hatene ho momoos katak Jeová hamutuk duni ho ami. Nia fó forsa mai ami atu tahan no fó buat neʼebé ami presiza duni maski ami la bele halo buat ida ona.”
13. Oinsá mak fiar metin ba Jeová ajuda irmán Rosanda tahan hasoru terus oioin neʼebé kona nia tuituir malu?
13 Fiar metin ba Jeová mós bele ajuda ita tahan hasoru terus boot neʼebé ataka ita-nia moris. Mai ita hanoin kona-ba irmán Rosanda neʼebé terus oioin kona nia tuituir malu. Bainhira Rosanda nia laʼen neʼebé laʼós Testemuña hakarak soe malu ho nia, iha tempu neʼebá mós Rosanda nia alin-mane kona moras aat ida naran lupus. Fulan balu liutiha, ninia alin-mane neʼe nia feen mate. Liutiha tempu balu bainhira Rosanda komesa sente kmaan uitoan husi terus hotu neʼe, nia foti pioneiru regulár. Maibé lakleur deʼit, Rosanda nia inan mós mate. Saida mak ajuda Rosanda tahan nafatin? Nia hatete: “Loroloron, haʼu koʼalia buat hotu ba Jeová, inklui mós desizaun kiʼik sira neʼebé haʼu halo. Ida-neʼe halo haʼu sente besik loos ba Jeová. Haʼu aprende atu sadere ba Jeová deʼit no la sadere ba haʼu-nia an rasik ka ema seluk. Maromak Jeová ajuda duni haʼu, nia la husik haʼu kuran buat ida. Rezultadu mak durante neʼe, haʼu aprende atu laʼo hamutuk ho Jeová hodi liu terus hotu neʼebé haʼu hasoru.”
Susar oioin bele koko ita-nia relasaun diʼak ho Jeová, hanesan mós ho susar neʼebé kona moris família nian (Haree parágrafu 14-16)
14. Se kongregasaun hasai ona ita-nia família ida, ita presiza fiar saida?
14 Hanoin toʼok mós ba situasaun susar seluk: Porezemplu, ita-nia família ida foin hasai husi kongregasaun. Ita hatene ona Bíblia dehan katak ita la bele ransu ho ema neʼebé kongregasaun hasai ona. (1 Korinto 5:11; 2 João 10) Maibé tanba ita hadomi tebes ita-nia família neʼe, ita sente susar loos atu halo tuir Bíblia nia mandamentu. * (Haree nota iha kraik.) Husu ba ita-nia an: ‘Haʼu fiar ho laran tomak katak Aman Jeová iha lalehan sei fó kbiit ba haʼu atubele halo tuir nia ho laran-metin ka lae? Haʼu hanoin neʼe mak oportunidade ida ba haʼu atu hakbesik liután ba Jeová ka lae?’
15. Tanbasá mak Adão la halo tuir Maromak Jeová?
15 Mai ita hanoin kona-ba ema primeiru, Adão. Adão fiar katak nia sei la mate maski nia han ai-fuan neʼebé Jeová bandu ka lae? Lae. Bíblia hatete katak Adão la monu ba Diabu nia lohi. (1 Timóteo 2:14) Se nuneʼe, tansá mak nia la halo tuir Maromak? Adão han ai-fuan neʼebé Eva lori, tanba nia hadomi Eva liu fali hadomi Jeová. Adão rona ba ninia feen, laʼós ba Maromak Jeová nia ukun-fuan.—Gênesis (Kejadian) 3:6, 17.
16. Ita tenke hadomi uluk sé? Tanbasá?
16 Adão nia hahalok neʼe hatudu katak ita tenke hadomi uluk Maromak Jeová liu fali buat hotu-hotu. (Lee Mateus 22:37, 38.) No se ita-nia domin ba Jeová mak boot liu, ida-neʼe sei lori diʼak ba ita-nia família tomak maski sira serbí Jeová ka la serbí Jeová. Tan neʼe, mai ita haburas nafatin ita-nia domin no fiar ba Maromak Jeová. Se ita sente laran-susar kona-ba ita-nia família ida neʼebé hasai ona husi kongregasaun, halo orasaun deʼit ba Jeová no fakar sai ita-nia sentimentu ba nia. * (Haree nota iha kraik.) (Roma 12:12; Filipe 4:6, 7) Maski ita sente triste tebes, hanoin deʼit katak situasaun ida-neʼe mak nuʼudar oportunidade ba ita atu hakbesik liután ba Maromak Jeová. Nuneʼe, ita sei aprende atu sadere ba Jeová no fiar katak hodi halo tuir nia mak sei lori rezultadu diʼak liu ba ita no ita-nia família.
HEIN BA JEOVÁ
Hatudu ita-nia fiar metin ba Jeová hodi haklaken ho badinas (Haree parágrafu 17)
17. Se ita kontinua halaʼo ita-nia knaar haklaken ho badinas, ita bele fiar saida?
17 Tansá mak Jeová salva apóstolu Paulo husi “leaun nia ibun”? Paulo hakerek: “Atu nuneʼe haʼu bele haklaken liafuan diʼak toʼo kompletu.” (2 Timóteo 4:17) Loos, hanesan ho Paulo, ita mós simu knaar atu haklaken “liafuan diʼak” no Jeová haree ita hotu nuʼudar ninia “maluk serbisu-naʼin”. (1 Tesalónika 2:4; 1 Korinto 3:9) Tan neʼe, se ita kontinua halaʼo ita-nia knaar neʼe ho badinas, ita bele fiar metin katak Jeová sei fó ba ita buat hotu neʼebé ita presiza. (Mateus 6:33) No ida-neʼe sei halo ita sente laran-hakmatek nuʼudar ita hein ba Jeová atu hatán ba ita-nia orasaun.
18. Oinsá mak ita bele hametin ita-nia fiar no relasaun diʼak ho Jeová?
18 Mai ita hotu uza ita-nia tempu ohin loron atu hametin ita-nia relasaun diʼak ho Maromak Jeová. Se susar ruma kona ita no halo ita sente laran-susar, haree ida-neʼe nuʼudar oportunidade atu hakbesik liután ba Jeová. Mai ita lee no estuda Maromak nia Liafuan no hanoin didiʼak kona-ba buat neʼebé ita lee. Kontinua halo orasaun ba Jeová no haklaken ho badinas bá. Se ita halo buat hirak-neʼe hotu, ita bele fiar duni katak Jeová sei ajuda ita atu tahan susar saida deʼit neʼebé kona ita ohin loron no mós iha futuru.
^ par. 2 Karik Paulo hetan salvasaun duni husi leaun nia ibun, ka husi situasaun seluk neʼebé perigu tebes.
^ par. 6 Salmo 62:8: “Oh, povu, tau fiar ba nia iha tempu hotu. Iha nia oin fakar sai imi-nia laran. Maromak mak fatin protesaun ba ita.”
^ par. 10 Ita-nia organizasaun fó sai ona informasaun barak neʼebé ajuda ita atu tahan hasoru moras no oinsá atu tau matan ba família neʼebé moras. Haree Sedarlah! 8 Fevereiru 1994; 8 Fevereiru 1997; 22 Maiu 2000; 22 Janeiru 2001, no Livru Haklaken 15 Marsu 2014.
^ par. 11 1 Samuel 30:3, 6: “3 Bainhira David ho ninia mane sira toʼo iha sidade neʼe, sira haree katak sidade neʼe ahi han tiha, no ema lori halai tiha sira-nia feen no oan-mane no oan-feto sira nuʼudar dadur.” “6 David sai neon-susar tebes, tanba mane sira-neʼe koʼalia daudauk atu tuda mate nia, basá sira sente laran-moruk tebes kona-ba sira-nia oan-mane no oan-feto sira. Maibé David hametin ninia an ho ninia Maromak Jeová nia ajuda.”
^ par. 12 Naran sira iha lisaun neʼe laʼós naran neʼebé loos.
^ par. 14 Haree informasaun ho títulu “Hasai ema husi kongregasaun mak arranju domin nian” iha pájina 29 iha livru ida-neʼe.
^ par. 16 Ita-nia organizasaun fó sai ona informasaun barak neʼebé ajuda ita bainhira ita-nia família ida husik ona Jeová. Haree Menara Pengawal 1 Setembru 2006 (pájina 17-21), 15 Janeiru 2007 (pájina 17-20), no Livru Haklaken 15 Janeiru 2013 (pájina 15-16).
