Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

Oinsá mak “uza matenek” bele ajuda ita atu hatún nervozu?

Ema neʼebé “uza matenek” tuir Provérbios (Amsal) 19:11, nia mak ema neʼebé tetu didiʼak ba situasaun ruma neʼebé bele halo nia hirus. Nia la haree deʼit ba buat neʼebé matan haree ka hanoin deʼit ba buat aat neʼebé nia simu. Bainhira ita komesa nervozu, iha tempu neʼe kedas ita presiza tetu didiʼak situasaun neʼebé ita hasoru. Tanba hodi halo nuneʼe mak ita bele kontrola an atu la sai hirus.—1/1, pájina 12, 13.

Saida mak buat tolu neʼebé ita bele halo atu hakbesik ba Maromak?

Ita presiza hatene Maromak no bolu Maromak nia naran, koʼalia ba nia liuhusi orasaun, no mós halo tuir ninia hakarak. (Isaías [Yesaya] 42:8; Filipe 4:6; Provérbios [Amsal] 27:11)—1/1, pájina 4-6.

Tinan-tinan, atu prepara hodi komemora Jesus nia mate, ita presiza halo saida?

Dalan ida mak ita bele tuir programa lee Bíblia ba Memoriál nian. Dalan seluk mak hakaʼas an atu aumenta ita-nia serbisu haklaken durante tempu memoriál. Ita mós bele prepara ba Memoriál hodi halo orasaun no hanoin didiʼak kona-ba esperansa neʼebé Maromak fó ba ita ida-idak.—15/1, pájina 14-16.

Prezente furak saida mak irmaun-irmán iha rai-Japaun simu?

Sira simu livru oan ida kona-ba Liafuan Diʼak husi Mateus husi Tradusaun Mundu Foun nian. Sira fahe livru neʼe iha serbisu haklaken, no ema barak simu livru neʼe maski sira ladún hatene kona-ba Bíblia.—15/2, pájina 3.

Situasaun saida iha apóstolu sira-nia tempu mak ajuda habelar Maromak nia mensajen?

Tanba iha Pax Romana, situasaun iha tempu neʼebé hakmatek. Dixípulu sira mós aproveita uza estrada diʼak sira hodi haklaken. Iha tempu neʼebá ema barak hatene koʼalia lia-gregu, no ema judeu sira moris namkari iha Roma nia ukun, buat hirak-neʼe apoia serbisu haklaken habelar ba fatin oioin. Dixípulu sira mós aproveita Roma nia lei hodi halaʼo serbisu neʼe.—15/2, pájina 20-23.

Tanbasá mak iha tinan hirak foin daudauk neʼe ita-nia livru sira ladún koʼalia ona kona-ba ilas no realidade husi Bíblia?

Eskritura hatudu duni katak ema balu neʼebé temi iha Bíblia laran sai duni ilas ba buat ruma iha futuru. Ezemplu ida mak buat neʼebé temi iha Galásia 4:21-31. Maibé, ita la bele hanoin ka esplika rasik katak eskritura balu atu reprezenta saida iha futuru. Diʼak liu atu haree ita bele aprende saida husi ema ka akontesimentu neʼebé temi iha Bíblia laran. (Roma 15:4)—15/3, pájina 17-18.

Oinsá mak Jesus nia ezemplu bele ajuda laʼen sira?

Hanesan Jesus fó kmaan ba ema neʼebé lori naha todan, laʼen sira tenke hanoin oinsá atu ajuda feen halo serbisu uma-laran. Jesus mós hanoin ba ema nia diʼak. Nuneʼe, kuandu feen sai moras uitoan ka sente la diʼak, laʼen sira tenke hanoin nia, hatudu pasiénsia no koko atu komprende ninia sentimentu. Hanesan Jesus gosta koʼalia ho ninia dixípulu sira, laʼen sira presiza koʼalia sai sira-nia hanoin no sentimentu ba sira-nia feen. Maski feen nia hahalok ruma la kona laʼen nia laran, maibé laʼen la bele vinga ninia feen hodi la koʼalia tan ho nia. (Mateus 11:28, 29; Marcos 5:25-34; João 15:15)—1/4, pájina 8-10.

Tanbasá hasai ema husi kongregasaun mak arranju domin nian?

Bíblia fó matadalan ida-idak tanbasá mak tenke hasai ema ida husi kongregasaun. (1 Korinto 5:11-13) Neʼe atu hatudu respeitu ba Jeová nia naran, atu bele proteje kongregasaun neʼebé moos, no atu bele halo ema neʼe rekoñese ninia sala.—15/4, pájina 29-30.