1-3. Tanbasá mak irmán ida fiar katak Jeová hatene nia presiza saida?

LANA, pioneiru regulár ida, sei nunka haluha buat neʼebé akontese ba nia iha rai-Alemaña iha tinan 2012. Nia halo orasaun rua, no nia fiar katak Jeová hatán duni ninia orasaun rua neʼe. Orasaun primeiru mak, bainhira iha dalan atu bá aeroportu, iha komboiu laran nia halo orasaun atu husu Jeová loke dalan ba nia hodi nia bele haklaken ba ema. Toʼo tiha iha aeroportu, ema fó sai katak aviaun aban mak sei semo. Maibé Lana nia osan la toʼo ona ba nia atu aluga fatin hodi toba kalan ida tan, entaun nia halo orasaun ba Jeová atu ajuda nia iha situasaun ida-neʼe.

² Iha tempu Lana foin halo hotu ninia orasaun, derrepente nia rona ema ida husu nia: “Hei Lana, ó halo saida iha neʼe?” Afinál mane joven neʼebé koʼalia hela ho nia mak ninia kolega eskola uluk nian. Joven neʼe atu bá Áfrika Súl no ninia amá ho avó-feto mak lori nia mai atu haree nia saʼe aviaun. Bainhira joven neʼe nia amá rona katak Lana la iha fatin atu toba, nia konvida Lana ho laran-diʼak atu bá toba ho sira iha uma. Sira laran-luak tebes ba Lana no sira husu pergunta barak ba Lana  kona-ba ninia fiar no ninia serbisu nuʼudar haklaken-naʼin tempu tomak.

³ Dadeer-saan tuirmai, bainhira sira han tiha matabixu, sira husu tan pergunta barak ba Lana kona-ba Bíblia. Lana mós husu oinsá atu bele kontaktu sira hodi Lana bele hatán tan sira-nia pergunta kona-ba Bíblia. Ikusmai Lana fila toʼo uma ho saúde diʼak no kontinua halaʼo ninia knaar pioneiru nian. Husi neʼe Lana fiar ho laran katak Jeová hatene saida mak nia presiza no rona duni ninia orasaun rua neʼe hodi nuneʼe mak buat hotu laʼo ho susesu.—Salmo (Mazmur) 65:2.

4. Iha lisaun neʼe ita atu koʼalia kona-ba saida?

⁴ Se problema ida mak derrepente mosu, ita husu kedas ajuda husi Jeová liuhusi orasaun, no Jeová kontente tebes atu rona orasaun hanesan neʼe husi ninia atan sira. (Salmo [Mazmur] 34:15; Provérbios [Amsal] 15:8) Maibé iha orasaun Ami Aman, Jesus dehan katak iha buat neʼebé importante liután mak ita tenke harohan. Iha lisaun neʼe ita sei koʼalia kona-ba buat importante haat neʼebé temi iha orasaun Ami Aman neʼebé ita bele husu ba Jeová.—Lee Mateus 6:11-13.

5, 6. Tanbasá mak Jesus hakarak ita atu harohan kona-ba “fó ami ai-han” maski ita la iha problema ho ai-han loroloron nian?

⁵ Iha orasaun Ami Aman Jesus haruka ita atu husu: “Fó ami ai-han” ba ohin nian, laʼós “fó haʼu-nia ai-han” ba ohin nian. Katuas área nian ida naran Victor husi rai-Áfrika hatete: “Ho laran, haʼu hatoʼo agradese beibeik ba Jeová tanba haʼu ho haʼu-nia feen la presiza preokupa kona-ba presiza loroloron nian. Ami la presiza preokupa katak aban hahán iha ka lae, ka sé mak atu selu osan aluga uma nian, tanba irmaun-irmán barak laran-diʼak tebes ba ami, loroloron sira mak tau matan ba ami. Haʼu-nia orasaun mak haʼu harohan atu sira neʼebé fó ajuda ami kontinua tau matan ba sira rasik nia moris ekonomia nian.”

⁶ Karik ita la iha problema ho ai-han loroloron nian, maibé ita presiza hanoin kona-ba irmaun-irmán seluk neʼebé moris ho kiak ka sira neʼebé hasoru daudaun dezastre ruma. Ita tenkesér, laʼós halo orasaun deʼit, maibé mós fó ajuda ba sira. Porezemplu, karik ita bele ajuda sira se sira presiza buat ruma. Ita mós bele tau osan iha kaixa kontribuisaun beibeik ba serbisu mundu tomak, tanba ita hatene katak osan sira-neʼe sei uza didiʼak atu ajuda irmaun-irmán sira iha mundu tomak.—1 João 3:17.

7. Jesus hatete saida atu hanorin ita katak ita tenkesér la bele “hanoin barak kona-ba loron tuirmai”?

⁷ Bainhira Jesus koʼalia tiha kona-ba orasaun Ami Aman, nia hatutan hatete se Jeová hatene oinsá atu tau matan ba ai-funan sira, “nia sei hakarak liután atu fó hatais ba imi neʼebé fiar kiʼik, loos ka lae? Tan neʼe, keta hanoin barak no dehan, . . . ‘Saida mak ami sei hatais?’” Tuirmai nia fó sujestaun ida: “Keta hanoin barak kona-ba loron tuirmai.” (Mateus 6:30-34) Ida-neʼe hanorin duni ita atu la bele preokupa liu ho buat isin nian, se ita iha ona buat neʼebé ita presiza ba moris loroloron nian, neʼe toʼo ona. Karik ita bele halo orasaun kona-ba atu hela iha neʼebé, oinsá atu serbisu hodi tau matan ba família, ka oinsá mak ita bele tau matan didiʼak ba ita-nia saúde. Maibé bainhira halo orasaun, ita lakohi atu koʼalia deʼit kona-ba presiza isin nian. Tuir loloos, iha buat ida neʼebé importante liután atu ita temi iha orasaun.

8. Jesus nia liafuan fó-hanoin mai ita kona-ba saida? (Haree dezeñu iha pájina 25.)

⁸ Jesus nia liafuan mós fó-hanoin mai ita kona-ba ai-han importante ida seluk. Nia  hatete: “Ema sei la moris deʼit ho paun, maibé ho liafuan hotu neʼebé sai husi Jeová nia ibun.” (Mateus 4:4) Tan neʼe mak ita tenke halo orasaun beibeik atu Jeová bele kontinua fó ai-han espirituál mai ita iha tempu loloos.

9. Tanbasá mak sala hanesan ho tusan?

⁹ Jesus dehan: “Fó perdua ba ami-nia sala [tusan, nota-rodapé].” (Mateus 6:12; Lucas 11:4) Neʼe tanba ita-nia sala hanesan ho debe. Tinan 60 liubá, ita-nia Livru Haklaken 1951 esplika katak bainhira ita halo sala kontra Maromak nia ukun-fuan, neʼe hanesan ita debe Jeová. Maromak bele foti fali kedas ita-nia moris. Nia bele foti fali ninia dame husi ita no hakotu kedas ita-nia relasaun ho nia. Bainhira ita halo sala, ita debe domin husi nia tanba tuir loloos ita tenke laran-metin ba nia. Tan neʼe mak Livru Haklaken hatete katak: “Halo sala mak hahalok la iha domin ba Maromak.”—1 João 5:3.

10. Jeová uza saida atu perdua ita, no ita sente oinsá kona-ba neʼe?

¹⁰ Loroloron ita presiza Jeová atu fó perdua mai ita. No ita agradese tebes ba nia tanba nia uza Jesus nia sakrifísiu neʼebé selu tiha ona ba ema nia sala iha maizumenus tinan 2.000 liubá atu fó perdua mai ita ohin loron. Jesus nia sakrifísiu neʼe mak buat folin boot tebes ba ita-nia moris tanba la iha ema ida mak bele sosa fali ita atu ita bele livre husi sala no mate. (Lee Salmo [Mazmur] 49:7-9; * 1 Pedro 1:18, 19.) Liafuan sira iha orasaun Ami Aman temi katak “perdua ba ami-nia sala”, neʼe atu fó-hanoin mai ita katak, laʼós ita mesak deʼit mak presiza Jesus nia sakrifísiu, maibé ita-nia irmaun-irmán sira mós presiza. Jeová mós hakarak ita atu hanoin kona-ba ema seluk nia relasaun diʼak ho nia. Tan neʼe mak bainhira ema seluk halo sala hasoru ita, ita lakohi demora atu fó perdua lalais ba sira. Baibain sira halo sala kiʼik deʼit, maibé ida-neʼe mak oportunidade diʼak ba ita atu hatudu katak ita hadomi nafatin sira hodi fó perdua ba sira, hanesan Jeová fó perdua mai ita ho laran-luak.—Koloso 3:13.

11. Tanbasá mak importante atu fó perdua ba ema seluk?

 ¹¹ Triste mak, tanba la perfeitu, dala ruma ita bele rai odi iha laran. (Levítico [Imamat] 19:18) Se ita konta ba ema seluk saida mak ema halo ba ita, ema seluk bele sai ita-nia apoia, neʼe bele halakon kongregasaun nia unidade. Kuandu ita kontinua halo nuneʼe iha kongregasaun laran, neʼe hatudu katak ita la hafolin Maromak nia laran-sadiʼa ho ninia Oan nia sakrifísiu. Se ita mak la fó perdua ba ema seluk, Jeová mós sei la uza Jesus nia sakrifísiu atu fó perdua mai ita. (Lee Mateus 6:14, 15; Mateus 18:35) Tuirmai, se ita hakarak Jeová fó perdua nafatin ita, ita mós tenke hasees an husi sala boot.—1 João 3:4, 6.

12, 13. (a) Iha tempu Jesus foin hetan batizmu, saida mak akontese ba nia? (b) Tanbasá mak la bele duun ema seluk se ita monu ba tentasaun ruma? (c) Jesus laran-metin toʼo mate fó prova kona-ba saida?

¹² Se ita hanoin fali kona-ba saida mak akontese ba Jesus iha tempu nia foin hetan batizmu, neʼe sei ajuda ita komprende tansá mak importante atu harohan hodi husu: “Keta husik ami monu ba tentasaun.” Maromak nia espíritu santu lori Jesus ba rai-fuik maran hodi “Diabu tenta nia”. (Mateus 4:1; 6:13) Tanbasá mak Jeová husik buat hanesan neʼe akontese ba Jesus? Tanba Jeová haruka Jesus mai iha rai atu rezolve pergunta balu neʼebé Satanás hamosu bainhira Adão no Eva kontra Maromak nia ukun. Porezemplu, pergunta hanesan, ‘Maromak mak kria sala ema ka lae? Bele ka lae ema perfeitu ida hatudu laran-metin ba Jeová kuandu “aat-naʼin” tenta nia? No ema bele iha susesu ka lae atu moris livre husi Jeová nia ukun?’ (Gênesis [Kejadian] 3:4, 5) Bainhira la iha tan duvida kona-ba Maromak nia ukun iha futuru, kriatura hotu iha lalehan no rai sei haree katak dalan Jeová ukun mak diʼak liu hotu.

¹³ Jeová santu, tan neʼe nia nunka koko ema ho buat neʼebé aat. Entaun, tuir loloos, Diabu mak ida neʼebé sempre tenta ema. (Mateus 4:3) Satanás sempre buka dalan oioin atu tenta ema. Maibé ita ida-idak mós bele deside rasik atu husik nia ka la husik nia atu tenta ita. (Lee Tiago 1:13-15.) Ba Jesus, bainhira Satanás tenta nia, nia uza kedas Maromak nia Liafuan hodi kontra hasoru Satanás. Hodi nuneʼe mak Jesus bele iha laran-metin ba Jeová. Maibé Satanás mós la rende an atu tenta Jesus. Nia hein Jesus “toʼo tempu seluk”. (Lucas 4:13) Maski Satanás koko beibeik Jesus, maibé Jesus nunka husik Diabu atu sobu ninia laran-metin ba Jeová. Jesus nia ezemplu hatudu duni katak ema perfeitu ida bele kaer metin ba ninia laran atu apoia Jeová nia ukun maski hasoru daudaun tentasaun neʼebé makaʼas tebes. Satanás laʼós hakarak tenta Jesus deʼit, nia mós hakarak tenta Jesus nia dixípulu hotu atu kontra Jeová, inklui mós Ita.

14. Ita presiza halo saida hodi la bele monu ba tentasaun?

¹⁴ Tanba pergunta kona-ba Jeová nia direitu atu ukun seidauk rezolve hotu, tan neʼe nia husik Diabu uza mundu neʼe atu tenta ita. Entaun tentasaun sira laʼós mai husi Maromak. Tuir loloos Jeová mak ida neʼebé hakarak ajuda ita no nia mak ida neʼebé hatudu fiar mai ita katak ita bele manán hasoru tentasaun sira. Jeová husik Satanás tenta ita tanba ita ema iha kbiit atu hili halo tuir nia ka kontra nia. Atu la bele monu ba tentasaun, ita presiza halo buat rua, neʼe mak: hakbesik nafatin ba Jeová no halo orasaun beibeik atu husu ninia ajuda. Maibé oinsá mak Jeová hatán ita-nia orasaun hodi ita la bele monu ba tentasaun?

15, 16. (a) Tentasaun saida deʼit mak ita presiza kontra hasoru? (b) Se ita monu ba tentasaun, neʼe sé nia sala?

 ¹⁵ Jeová fó ninia espíritu santu ajuda ita hodi ita bele iha kbiit atu la monu ba Satanás nia tentasaun sira. Jeová fó avizu ita kona-ba perigu sira liuhusi ninia Liafuan no kongregasaun. Porezemplu, nia fó avizu ita atu la bele uza demais tempu, osan, no forsa ba buka sasán neʼebé ita la presiza. Espen no Janne hela iha rai riku ida iha Europa. Sira naʼin-rua serbí nuʼudar pioneiru regulár ba tinan barak ona iha fatin neʼebé presiza haklaken-naʼin. Bainhira sira iha oan, sira para husi pioneiru regulár, no agora sira iha tan oan segundu. Espen hatete: “Ami halo orasaun beibeik ba Jeová atu ami la bele monu ba tentasaun tanba agora ami ladún iha ona tempu barak hanesan uluk hodi halo Maromak nia serbisu. Ami husu beibeik ba Jeová atu ajuda ami laran-manas nafatin ba lia-loos no haklaken.”

¹⁶ Tentasaun ida seluk neʼebé tenta makaʼas ema ohin loron mak haree pornografia. Se ita mak monu ba tentasaun neʼe, ita la bele duun ba Satanás. Tanbasá? Tanba Satanás ho ninia mundu bele tenta ita maibé la bele obriga ita atu halo tuir sira-nia hakarak. Ema balu monu ba tentasaun neʼe tanba sira rasik mak husik sira-nia neon hanoin kona-ba buat aat neʼe. Maibé ita bele manán hasoru tentasaun neʼe hanesan irmaun-irmán barak hatudu ona.—1 Korinto 10:12, 13.

17. (a) Oinsá mak ita bele hatudu katak ita hakarak Jeová ‘salva ita husi aat-naʼin’? (b) Jeová besik ona atu halo saida?

¹⁷ Se ita hakarak Jeová atu salva ita husi aat-naʼin, ita tenkesér la hola parte iha Satanás nia mundu no la hadomi ninia mundu ka sasán iha Satanás nia mundu. (João 15:19; 1 João 2:15-17) Maski la fasil atu halo nuneʼe, maibé tempu sei toʼo mai bainhira Jeová sei halakon Satanás ho ninia mundu aat neʼe! Tanba Satanás hatene katak ninia tempu la barak ona, tan neʼe mak husi tempu Jesus soe nia tun mai rai, nia ho “hirus makaʼas” atu sobu ita-nia laran-metin ba Maromak. Tan neʼe mak ita tenke harohan beibeik atu Jeová proteje ita no salva ita husi Satanás.—Apokalipse 12:12, 17.

18. Atu bele moris liu Satanás nia mundu aat neʼe, ita tenke halo saida?

¹⁸ Ita kontente atu moris iha mundu neʼebé la iha tan Satanás. Tan neʼe mak ita presiza halo orasaun beibeik atu husu Maromak nia Ukun toʼo mai no halo ninia naran sai santu, no halo ninia hakarak sai loos iha rai. Husu beibeik ba Jeová atu tau matan ba ita-nia presiza no ajuda ita laran-metin nafatin ba nia. Hakaʼas an liután atu moris hodi halo tuir orasaun Ami Aman.