1, 2. Oinsá mak Jesus hatudu katak nia iha domin neʼebé kleʼan ba ema?

LIUHUSI Maromak nia Oan-Mane mesak mak ita bele haree kona-ba Jeová nia matenek neʼebé aas liu hotu. Nia mak Maromak nia “badain”. Hanoin toʼok Jesus nia ksolok bainhira nia haree ninia Aman “halo hela lalehan” no “nahe hela mundu nia aliserse”. Maibé husi buat hotu neʼebé ninia Aman halo, buat neʼebé liuliu fó ksolok ba Jesus mak ema. (Provérbios [Amsal] 8:22-31) Loos duni, Jesus hadomi ema husi uluk kedas, husi tempu neʼebé nia sei hela iha lalehan.

² Ikusmai, Maromak nia Oan-Mane mesak ho hakarak rasik “husik buat hotu” hodi tun ba rai sai nuʼudar ema no “fó nia moris hodi sosa fali ema barak”. Ninia hahalok neʼe hatudu duni katak nia hadomi no iha laran-metin ba ninia Aman no mós nia iha domin neʼebé kleʼan ba ema hotu. (Filipe 2:5-8; Mateus 20:28) Bainhira moris iha rai, Maromak mós fó kbiit ba Jesus atu bele halo milagre oioin. No liuhusi ninia milagre sira, ita bele haree katak Jesus hadomi duni ema no milagre sira-neʼe mós hatudu katak Jesus sei halo tan buat furak oioin iha futuru.

3. Iha lisaun neʼe ita sei koʼalia kona-ba saida?

 ³ Bainhira moris iha rai, Jesus mós haklaken “liafuan diʼak kona-ba Maromak nia Ukun”. (Lucas 4:43) Tanba nia hatene katak liuhusi Ukun neʼe mak bele halo Maromak nia naran sai santu fali no Ukun neʼe mak dalan ida deʼit atu rezolve ema nia problema sira ba nafatin. Tan neʼe mak bainhira haklaken, Jesus mós halo milagre oioin hodi hatudu katak nia hanoin tebes ema hotu nia moris. Tanbasá mak ita presiza hatene kona-ba buat sira-neʼe? Tanba bele hametin ita-nia fiar no esperansa ba futuru. Agora mai ita koʼalia hamutuk kona-ba milagre haat neʼebé Jesus halo.

4. Konta toʼok istória kona-ba Jesus hasoru ema lepra ida.

⁴ Jesus haklaken hela iha sidade ida iha rai-Galileia. Iha neʼebá Jesus hasoru mane ida neʼebé kona moras aat ida naran lepra. (Marcos 1:39, 40) Ema neʼe moras todan tebes toʼo doutór Lucas hatete katak ninia “isin nakonu ho moras-lepra”. (Lucas 5:12) Bíblia hatete katak bainhira haree Jesus, “mane neʼe hakneʼak ho oin ba rai no husu Jesus dehan: ‘Naʼi, haʼu hatene katak se Ita-Boot hakarak, Ita bele halo haʼu sai moos.’” Mane lepra neʼe hatene katak Jesus iha kbiit atu kura ninia moras neʼe, maibé nia hanoin: ‘Jesus hakarak kura haʼu ka lae?’ Tanbasá mak nia hanoin hanesan neʼe? Tanba se nia mak kompara Jesus hanesan ho ema farizeu, karik Jesus sei la kura nia, tanba ema farizeu hakribi tebes ema moras-lepra sira. Entaun, Jesus hanoin saida bainhira nia haree ema neʼe? Karik moras-lepra neʼe han ninia isin balu monu hotu husi ninia isin-lolon. Se ita mak Jesus, ita sei halo saida?

5. Tanbasá mak Jesus hakarak kura ema lepra neʼe?

⁵ Tuir Moisés nia Ukun-Fuan, ema lepra neʼe tenkesér hakilar “Haʼu la moos, haʼu la moos!” maibé nia la halo hanesan neʼe. (Levítico [Imamat] 13:43-46) Maski nuneʼe, Jesus la hirus nia, tanba Jesus hanoin ema neʼe no nia hakarak ajuda nia. Ita la hatene iha tempu neʼebá Jesus hanoin hela kona-ba saida, maibé ita hatene Jesus nia sentimentu mak saida. Ninia laran sente triste tebes kona-ba ema neʼe. Tan neʼe nia lolo ninia liman hodi book ema lepra neʼe, karik ba ema seluk, sira taʼuk atu halo nuneʼe. Tuirmai Jesus ho laran-diʼak hatete ba nia: “Haʼu hakarak. Sai moos bá.” No ninia “moras-lepra lakon kedas”. (Lucas 5:13) Husi neʼe ita bele haree katak Jeová fó kbiit ba Jesus, laʼós atu halo milagre deʼit, maibé mós atu Jesus bele hatudu katak nia hadomi duni ema.—Lucas 5:17.

6. Tanbasá mak Jesus nia milagre sira úniku tebes, no ninia milagre sira atu hatudu saida mai ita?

⁶ Ho Jeová nia kbiit, Jesus bele halo milagre furak oioin. Jesus laʼós kura moras-lepra deʼit, nia mós kura ona moras oioin. Bíblia dehan katak ema barak hakfodak bainhira “sira haree ema monok koʼalia, ain-kudeʼik sira laʼo no matan-delek sira haree”. (Mateus 15:31) Bainhira Jesus kura ema ida, nia la presiza opera atu halo ema neʼe diʼak fali. Nia iha kbiit atu halo ema nia moras diʼak kedas. Dala ruma husi dook deʼit nia bele kura ema ona. (João 4:46-54) Jesus nia kbiit neʼe hatudu saida mai ita? Neʼe hatudu katak ita-nia Liurai Jesus hakarak no iha kbiit atu kura ema hodi sai diʼak ba nafatin. Bainhira ita hatene kona-ba dalan neʼebé Jesus trata ema ho diʼak, neʼe halo ita tau fiar ba Bíblia nia profesia neʼebé hatete katak iha mundu foun, “nia sei sente kasian ba ema kiʼik no ema kiak”. (Salmo [Mazmur]  72:13) Iha tempu neʼebá Jesus sei kura ema hotu tanba ninia laran mak book nia atu halo nuneʼe.

7, 8. Bainhira Jesus sai husi Galileia bá Judeia, nia halo saida deʼit?

⁷ Jesus kura tiha mane lepra iha Galileia no liutiha fulan balu nia bá fali Judeia atu haklaken liafuan diʼak kona-ba Maromak nia Ukun. Karik ema rihun ba rihun rona ona kona-ba Jesus nia mensajen no haree mós ninia domin neʼebé nia hatudu ba sira. Ho laran, Jesus hakarak duni atu fó kmaan ba ema kiak no ema laran-susar sira. Liuhusi ninia haklaken, Jesus fó sira esperansa kona-ba futuru.—Isaías (Yesaya) 61:1, 2; Lucas 4:18-21.

⁸ Toʼo tiha fulan-Nisan, Jesus bá Jeruzalein atu selebra Festa Salvasaun nian. Ema barak tebes mai iha sidade neʼe atu selebra festa sagradu neʼe. Husi templu nia sorin, parte norte nian, iha pixina ida naran Betesda, no iha neʼe Jesus hasoru mane ida neʼebé laʼo ladiʼak.

9, 10. (a) Tanbasá mak ema bá hobur malu iha pixina Betesda? (b) Iha pixina neʼe Jesus halo saida, no neʼe hanorin ita kona-ba saida? (Haree dezeñu iha pájina 8.)

⁹ Ema moras lubun-boot ida mak mai hobur iha Betesda. Tanbasá mak sira mai hotu iha pixina neʼe? Tanba sira fiar katak se bee iha pixina neʼe mak nafurin, ema moras neʼebé tun ba pixina neʼe bele sai diʼak kedas. Imajina toʼok situasaun iha tempu neʼebá. Ema barak hein ho ansi no laran la hakmatek tanba neʼe mak sira-nia esperansa ida deʼit atu hetan isin-diʼak fali. Maibé Jesus ema perfeitu ida, nia moras la iha, entaun nia mai fatin neʼe atu halo saida? Nia mai tanba ninia domin ba ema moras sira-neʼe. Iha fatin neʼe mak Jesus hasoru malu ho mane neʼebé moras kleur liu fali Jesus moris iha rai.—Lee João 5:5-9.

¹⁰ Jesus husu ba mane neʼe: “Ó hakarak hetan isin-diʼak?” Se ita mak iha neʼebá no bele hateke ba mane neʼe nia matan, ita bele haree katak mane neʼe laran-tun tebes tanba la iha ema ida mak hakarak ajuda nia atu tun ba pixina neʼe. Maibé Jesus haruka nia halo buat neʼebé ema seidauk hanoin nia bele halo. Jesus haruka nia foti ninia toba-fatin no hamriik laʼo. Nia halo tuir duni Jesus nia liafuan no laʼo duni. Milagre neʼe hatudu saida mak sei akontese iha mundu foun. Milagre neʼe mós hatudu duni Jesus nia domin ba ema. Nia bá buka ema sira neʼebé presiza ajuda no nia ajuda sira. Jesus nia ezemplu neʼe book tebes ita atu bá buka nafatin ema iha ita-nia haklaken fatin neʼebé hasoru susar no terus husi mundu aat neʼe.

11. Oinsá mak Marcos 5:25-34 hatudu katak Jesus iha domin ba ema neʼebé moris terus ho moras?

¹¹ Lee Marcos 5:25-34. Feto neʼe nia moras halo nia moe ba tinan 12 ona. Ninia moras hanetik tebes ninia moris loroloron nian, inklui mós ninia adorasaun. Nia uza osan barak no koko ona bá doutór barak, maibé la iha ema ida mak bele kura ninia moras neʼe. Buat aat liután mak moras neʼe aumenta tan deʼit. Loron ida, nia hanoin atu halo buat ida atu kura ninia moras neʼe. Nia laʼo ba ema lubun-boot nia klaran atu bá kaer Jesus nia unuk. (Levítico [Imamat] 15:19, 25) Bainhira Jesus sente iha forsa ida sai husi ninia isin, nia husu ba ema sira: “Sé mak kona haʼu-nia hena?” No “feto neʼe sai taʼuk no nakdedar, tanba hatene buat neʼebé mosu ba nia. Nuneʼe nia mai no monu ain ba Jesus no fó sai lia-loos hotu”. Iha laran Jesus hatene katak Jeová  kura tiha ona feto neʼe, tan neʼe nia koʼalia ho mamar ba feto neʼe: “Oan-feto, ó-nia fiar mak halo ó sai diʼak. Laʼo ho dame bá, no sai isin-diʼak bá husi ó-nia moras boot neʼe.”

12. (a) Koʼalia tiha buat barak ona kona-ba Jesus, saida mak Ita gosta kona-ba nia? (b) Jesus hatudu ezemplu saida mai ita?

¹² Haree Jesus hatudu laran-diʼak ba ema moras sira book tebes ita-nia laran, loos ka lae? Satanás hakarak ita fiar katak ema seluk la hadomi ita no ita ema la iha folin. Maibé liuhusi milagre sira neʼebé Jesus halo, neʼe hatudu katak Jesus hanoin tebes ita ida-idak no nia iha interese ba ita-nia problema hotu. Ida-neʼe mak ita-nia Liurai no Amlulik Boot neʼebé nakonu ho domin! (Ebreu 4:15) Dala ruma susar tebes mai ita atu bele komprende ema neʼebé moras kleur ona nia sentimentu, liuliu ita nunka kona moras sira-neʼe. Jesus mós nunka hetan moras, maibé nia hanoin tebes ema moras sira-nia sentimentu. Neʼe mak ezemplu domin neʼebé diʼak tebes. Mai ita hotu hakaʼas an hatudu sentimentu ba ema neʼebé hetan moras.—1 Pedro 3:8.

13. Lázaro nia moris-hiʼas hanorin ita saida kona-ba Jesus?

¹³ Jesus mós sente laran-triste bainhira nia haree ema triste. Porezemplu, bainhira Lázaro mate, ninia família no maluk sira triste tebes, no kuandu Jesus haree sira, Jesus sai laran-triste no neon susar tebes toʼo nia tanis, maski nia hatene katak tuirmai nia atu fó moris-hiʼas ba Lázaro. (Lee João 11:33-36.) Jesus la moe atu hatudu ninia sentimentu neʼe iha ema barak nia oin, no ho ida-neʼe, ema hotu bele haree katak Jesus hadomi duni Lázaro ho ninia família.  Hodi uza kbiit neʼebé Maromak fó ba nia hodi halo Lázaro moris fali, Jesus hatudu duni katak nia hanoin tebes ema!—João 11:43, 44.

14, 15. (a) Saida mak hatudu katak Jeová hakarak tebes atu halakon ema nia terus? (b) Tanbasá mak liafuan “rate” iha lia-gregu kona loos ho Jeová nia kbiit?

¹⁴ Bíblia hatete katak Jesus mak “Maromak nia ilas loloos”. (Ebreu 1:3) Tan neʼe mak liuhusi Jesus nia milagre sira, ita bele hatene katak Jeová mós hakarak halakon terus, moras no mate husi ema nia moris. Lakleur tan Jeová no Jesus sei halo ema mate sira moris fali. Jesus dehan: “Oras sei toʼo mai kuandu ema hotu neʼebé iha rate laran sei . . . sai husi rate.”—João 5:28, 29.

¹⁵ Liafuan “rate” iha lia-gregu mai husi verbu “fó-hanoin”. Liafuan neʼe kona loos ho Jeová nia kbiit tanba liafuan neʼe esplika duni katak atu fó moris-hiʼas ba ema ida, Jeová presiza hanoin-hetan kona-ba ema neʼe. Nuʼudar Maromak neʼebé Forsa Boot Liu Hotu, no Ida neʼebé kria buat hotu, Jeová iha kbiit atu hanoin-hetan buat hotu kona-ba ema neʼebé mate tiha ona, inklui mós ninia hahalok no toman hotu. (Isaías [Yesaya] 40:26) Jeová laʼós iha kbiit deʼit, maibé nia mós hakarak atu hanoin-hetan kona-ba ema neʼe. Moris-hiʼas hotu neʼebé hakerek iha Bíblia mak hanesan ilas ida katak moris-hiʼas sei akontese duni iha mundu foun.

16. Maromak nia atan sira iha oportunidade furak saida?

¹⁶ Se ita mak laran-metin, karik ita bele iha oportunidade atu haree milagre boot ida neʼebé nunka akontese, neʼe mak moris liu terus boot! Bainhira Armajedón liu tiha, ita sei haree tan milagre barak toʼo ita sai ema perfeitu, la iha moras tan. (Isaías [Yesaya] 33:24; 35:5, 6; Apokalipse 21:4) Hanoin toʼok iha tempu neʼebá ita sei haree ema soe hotu sira-nia ókulu, ai-tonka, no kadeira-roda. Jeová hatene katak ema neʼebé moris liu Armajedón presiza atu iha forsa no saúde diʼak hodi sira bele halo serbisu iha tempu neʼebá. Tanba sira mak ema neʼebé sei halo mundu tomak atu sai paraízu furak ida.—Salmo (Mazmur) 115:16.

17, 18. (a) Jesus nia milagre hatudu saida? (b) Tanbasá mak Ita tenke hakaʼas an atu moris iha mundu foun?

¹⁷ Jesus nia milagre sira neʼebé nia halo iha tempu uluk fó anima ba “ema-lubun boot” ohin loron katak iha futuru ita sei iha esperansa hodi haree moras hotu sei lakon ba nafatin. (Apokalipse 7:9) Dalan neʼebé Jesus kura ema mós hatudu katak nia hanoin no hadomi tebes ema. (João 10:11; 15:12, 13) Jesus nia sentimentu sira haleno Jeová nia hanoin kona-ba ninia atan ida-idak.—João 5:19.

¹⁸ Ema iha mundu hasoru hela laran-triste oioin, laran-susar, no mate. (Roma 8:22) Tan neʼe mak ita presiza mundu foun, mundu neʼebé moras la iha tan hanesan Maromak promete nanis ona. Eskritura iha Malaquias (Maleakhi) 4:2 hatete katak iha tempu neʼebá ema neʼebé sai diʼak husi moras sei “haksoit hanesan karau-vaka nia oan neʼebé bokur”, kontente no laran nakonu ho ksolok tanba sala la ukun tan ema. Tan neʼe mak ita hakarak hatudu agradese neʼebé kleʼan no hametin ita-nia fiar ba Maromak nia promesa sira hodi hakaʼas an atu bele moris iha mundu foun. Ita kontente tebes atu bele hatene katak milagre sira neʼebé Jesus uluk halo mak ezemplu ba buat sira neʼebé atu akontese iha futuru. Iha tempu neʼebá ema hotu sei livre husi sala hodi moris iha Mesias nia ukun okos!