BA TINAN barak ona estadu Rúsia bandu Testemuña ba Jeová nia atividade. Maibé iha tinan 1991, Testemuña ba Jeová haksolok tebes tanba sira sai livre ona no hetan rejistu legál nuʼudar organizasaun ida. Iha tempu neʼebá, sira la imajina katak Testemuña sei sai barak tebes toʼo naʼin-170.000 ohin loron! Iha haklaken-naʼin sira-neʼe nia leet, iha mós irmaun-irmán sira husi rai seluk neʼebé mai toʼo rai-Rúsia atu ajuda serbisu koʼa nian. (Mateus 9:37, 38) Mai ita koñese sira balu.

Iha tinan neʼebé Testemuña ba Jeová sira hetan liberdade iha rai-Rúsia, irmaun Mateus iha rai-Bretaña, ho tinan 28, nia rona diskursu ida iha reuniaun boot, neʼebé fó sai kona-ba situasaun iha kongregasaun sira iha Europa Leste. Porezemplu diskursu-naʼin hatete katak kongregasaun ida iha St. Petersburg, Rúsia, katuas kristaun la iha, irmaun ida deʼit mak serbí nuʼudar atan ba kongregasaun, maski nuneʼe irmaun-irmán sira halaʼo estudu Bíblia ho ema naʼin-atus ba atus! Mateus hatete: “Rona tiha diskursu neʼe, haʼu hanoin beibeik kona-ba rai-Rúsia, nuneʼe haʼu halo orasaun ba Jeová katak haʼu hakarak muda ba fatin neʼe.” Mateus rai osan, faʼan ninia sasán, no muda ba rai-Rúsia iha tinan 1992. Rezultadu saida mak nia hetan?

Mateus konta: “Foufoun, susar ba haʼu mak atu aprende língua Rúsia nian, neʼe halo haʼu la bele koʼalia kona-ba buat espirituál.” Susar ida seluk mak hela-fatin. “Dala barak haʼu la hela metin, uma-naʼin hasai haʼu derrepente deʼit. Tan neʼe haʼu tenke muda bá-mai beibeik.” Maski nia hasoru susar hirak-neʼe, nia hatete: “Haʼu kontente tebes tanba haʼu muda mai rai-Rúsia, neʼe mak desizaun diʼak liu iha haʼu-nia moris. Iha neʼe, haʼu aprende sadere ba Jeová no haree oinsá Jeová tau matan haʼu-nia moris.” Ikusmai, Mateus hetan knaar atu serbí nuʼudar katuas, pioneiru tempu-tomak, no agora daudauk nia serbí iha sukursál besik sidade St. Petersburg.

Iha tinan 1999 bainhira irmaun Hiroo ho tinan 25 tuir Eskola Treinu Atan Kristaun iha rai-Japaun, irmaun ida neʼebé dirije eskola neʼe fó laran-manas ba  nia atu bá serbí iha rai seluk. Hiroo rona tiha ona katak iha rai-Rúsia presiza duni ajuda no nia hahú aprende ona língua Rúsia nian. Nia dehan: “Haʼu koko vizita rai-Rúsia ba fulan neen. Haʼu hili atu bá neʼebá iha tempu malirin hodi bele hatene se haʼu bele tahan malirin ka lae.” Tanba dala ruma rai neʼe sai malirin loos. Liutiha neʼe, nia fila fali ba rai-Japaun atu rai osan, tuirmai, nia muda ba rai-Rúsia no hela metin iha neʼebá.

Durante tinan 12 nia laran, Hiroo serbí ona iha kongregasaun barak iha rai-Rúsia. Iha ninia kongregasaun, nia mesak deʼit mak katuas, tan neʼe dala ruma nia tenke tau matan ba haklaken-naʼin 100 liu. Semana-semana, nia mak hatoʼo diskursu barak iha Reuniaun Serbisu, nia halaʼo Eskola Serbisu Kristaun, Estudu Livru Haklaken, no nia mós tenke halaʼo Grupu Estudu Livru ba grupu lima. Nia mós tenke bá vizita irmaun-irmán sira ida-idak atu tau matan sira. Kona-ba tempu neʼebá, Hiroo hatete: “Hodi ajuda irmaun-irmán sira hametin sira-nia fiar, neʼe halo haʼu haksolok tebes.” Nia hatutan tan: “Haʼu serbí ona nuʼudar katuas no pioneiru ida iha rai-Japaun, maibé bainhira haʼu muda mai no serbí iha neʼe mak haʼu foin sente loloos katak Jeová mak haʼu-nia belun diʼak. Haʼu aprende sadere ba Jeová iha haʼu-nia moris tomak.” Iha tinan 2005, Hiroo kaben ho irmán Svetlana, no sira naʼin-rua kontinua serbí nuʼudar pioneiru.

Iha maun-alin naʼin-rua husi rai-Kanadá, ida naran Mateus ho idade 34 no ida seluk Miguel idade 28. Uluk sira naʼin-rua bá vizita rai-Rúsia, no sira hakfodak tebes tanba ema barak tuir reuniaun, maibé la iha irmaun sira neʼebé bele halaʼo estudu Bíblia ho sira. Mateus dehan: “Iha kongregasaun ida neʼebé uluk haʼu vizita, ema naʼin-200 mak tuir, maibé iha deʼit irmaun katuas ida neʼebé idade loos ho atan joven ida, sira naʼin-rua deʼit mak dirije reuniaun tomak. Haree situasaun hanesan neʼe halo haʼu hakarak tebes muda bá neʼebá atu ajuda sira.” Nia hahú hela iha rai-Rúsia iha tinan 2002.

Liutiha tinan haat, irmaun Miguel mós muda ba rai-Rúsia no haree katak rai neʼe sei presiza duni irmaun sira. Nuʼudar atan ba kongregasaun, nia simu knaar atu tau matan osan, livru no haklaken-fatin. Irmaun sira mós husu Miguel atu halo serbisu neʼebé baibain katuas sekretáriu mak halo, hatoʼo diskursu sira, no ajuda arranja reuniaun boot sira no harii reuniaun-fatin sira. Tuir loloos, toʼo ohin loron mós kongregasaun barak iha rai-Rúsia presiza irmaun barak liután atu ajuda sira. Irmaun Miguel neʼebé ohin loron sai ona katuas ida, hatete: ‘Maski haʼu okupadu tebes ho knaar oioin, maibé ajuda irmaun sira halo haʼu kontente tebes, neʼe mak dalan matenek duni atu uza haʼu-nia moris!’

Ikusmai, Mateus kaben ho irmán Marina, no Miguel kaben ho irmán Olga. Kaben-naʼin sira-neʼe kontinua ajuda kongregasaun sira hamutuk ho maluk fiar-naʼin seluk.

Iha tinan 1994 bainhira irmán Tatyana sei tinan 16, pioneiru tempu-tomak naʼin-neen husi rai-Xeka, Polónia no Eslovákia mai serbí iha ninia kongregasaun iha rai-Ukránia. Kona-ba pioneiru sira-neʼe, nia hatete: “Sira mak ema neʼebé badinas haklaken, laran-diʼak, fasil ba ema atu hakbesik, no sira mós iha koñesimentu barak kona-ba Bíblia.” Tatyana haree oinsá sira hetan bensaun tanba sira fó sira-nia an atu serbí Jeová, no ida-neʼe halo Tatyana hanoin: ‘Haʼu mós hakarak sai hanesan sira.’

Hodi haree ezemplu diʼak husi pioneiru sira-neʼe, durante eskola feriadu, Tatyana ho nia maluk iha toman atu bá haklaken beibeik iha foho iha rai-Ukránia no rai-Belarus, neʼebé seidauk iha Testemuña ba Jeová mak bá haklaken iha neʼebá. Viajen neʼe halo Tatyana kontente tebes, nia hahú halo planu atu bá haklaken iha rai-Rúsia. Ulukliu, nia bá vizita  irmán ida neʼebé muda ona ba rai-Rúsia no nia mós buka serbisu neʼebé bele apoia ninia pioneiru. Ikusmai, iha tinan 2000, nia hahú hela metin iha rai-Rúsia. Susar saida deʼit mak nia hetan?

Tatyana hatete: “Tanba haʼu-nia osan la toʼo atu aluga mesak uma tomak ida, tan neʼe haʼu tenke aluga kuartu kiʼik deʼit iha ema nia uma. Neʼe susar loos ba haʼu no dala ruma haʼu hakarak fila deʼit ba haʼu-nia rai. Maibé Jeová sempre ajuda haʼu atu haree katak kontinua serbí iha neʼe mak diʼak ba haʼu.” Ohin loron, Tatyana serbí nuʼudar misionáriu ida iha rai-Rúsia. Nia dehan: “Durante tinan hirak neʼebé haʼu dook husi haʼu-nia rai, haʼu hetan esperiénsia furak no belun diʼak barak. Buat diʼak liután mak haʼu bele hametin haʼu-nia fiar iha tempu hirak-neʼe nia laran.”

Kleur ona, irmán Masako husi rai-Japaun, neʼebé agora tinan 50 liu, hakarak serbí nuʼudar misionáriu, maski nuneʼe, nia sente nia la bele tanba moras. Maibé bainhira nia sai isin-diʼak uitoan, nia muda ba rai-Rúsia atu ajuda haklaken. Irmán neʼe mós hetan susar kona-ba hela-fatin no serbisu, maibé nia kontinua pioneiru hodi hanorin língua Japaun nian no halo serbisu hamoos. Saida mak ajuda nia kontinua serbí iha rai-Rúsia?

Irmán Masako hanoin fali ba ninia serbisu haklaken durante tinan 14 iha rai-Rúsia, nia dehan: “Haksolok neʼebé haʼu hetan husi serbisu haklaken halo haʼu haluha kona-ba susar oioin neʼebé haʼu hasoru. Haklaken iha fatin neʼebé ema barak simu lia-loos halo haʼu-nia moris kontente no folin duni. Kona-ba haʼu-nia esperiénsia rasik oinsá Jeová ajuda haʼu hetan ai-han, hatais no hela-fatin durante tinan hirak liubá nia laran, neʼe hanesan milagre boot ida.” Irmán Masako mós bá haklaken iha rai-Kirgizistaun. Liután neʼe, nia mós ajuda ona grupu lia-inglés, xinés, no lian ema Uigur nian, no agora daudauk, nia serbí nuʼudar pioneiru ida iha St. Petersburg.

Ohin loron, tanba problema ekonomia nian, família barak mak muda ba rai seluk atu buka moris diʼak. Maibé iha mós família sira neʼebé muda ba rai seluk atu aumenta sira-nia serbisu ba  Jeová hodi banati-tuir Abraão no Sara iha tempu uluk. (Gênesis [Kejadian] 12:1-9) Ezemplu ida mak irmaun Mikhail ho ninia feen irmán Inga, husi rai-Ukránia, sira muda ba rai-Rúsia iha tinan 2003. Lakleur depois sira toʼo iha rai-Rúsia, sira hasoru ema barak neʼebé buka lia-loos husi Bíblia.

Mikhail hatete: “Bainhira ami bá haklaken iha fatin ida neʼebé seidauk iha Testemuña ida mak haklaken iha neʼebá, katuas ida loke odamatan no husu ba ami: ‘Imi mak ema neʼebé haklaken Bíblia ka?’ Ami hatán: ‘Sin’, no nia dehan: ‘Haʼu hatene loron ida imi sei toʼo mai, selae, Jesus nia liafuan labele sai loos.’ Tuirmai, katuas neʼe temi eskritura iha Mateus 24:14. Iha área neʼebá, ami mós hasoru grupu ida husi feto protestante sira maizumenus naʼin-10, neʼebé hamrook tebes ba lia-loos. Sira iha ona ita-nia livru ida no semana-semana sira estuda Bíblia uza livru neʼe. Ba oras barak ami hatán ba sira-nia pergunta oioin no kanta hamutuk ita-nia knananuk sira, ami mós han hamutuk ho sira. Viajen neʼe furak tebetebes toʼo ami nunka haluha.” Mikhail no Inga mós hatete katak, hodi serbí iha fatin neʼebé presiza haklaken-naʼin barak liután, neʼe halo sira hakbesik liután ba Jeová, hadomi liután ema seluk, no halo sira-nia moris kontente liután. Ohin loron, sira simu knaar atu vizita kongregasaun sira.

Iha tinan 2007, kaben-naʼin husi rai-Ukránia naran Yury no Oksana, neʼebé agora tinan maizumenus 35, bá vizita sukursál Rúsia nian hamutuk ho sira-nia oan-mane naran Aleksey neʼebé agora tinan 13. Iha sukursál, sira haree mapa rai-Rúsia nian neʼebé hatudu área luan tebes mak seidauk iha kongregasaun. Oksana dehan: “Haree tiha mapa neʼe, ami hatene katak rai neʼe presiza duni haklaken-naʼin barak liután. Husi tempu neʼebá, ami hahú halo planu atu muda ba rai-Rúsia.” Saida mak bele ajuda sira? Yury dehan: “Lee informasaun husi ita-nia livru sira hanesan ‘Dapatkah Saudara Melayani di Negeri Asing?’, * neʼe ajuda duni ami. Ami halo tuir sukursál nia sujestaun kona-ba fatin neʼebé ami sei muda bá, no ami buka hela-fatin no serbisu iha neʼebá.” Ikusmai iha tinan 2008, sira hahú hela metin iha rai-Rúsia.

Foufoun, susar ba Yury atu hetan serbisu no hela-fatin neʼebé metin. Yury dehan: “Ami halo orasaun beibeik atu ami la sente laran-tun demais, no hodi tau fiar ba Jeová nia ajuda, ami kontinua bá haklaken. Ami haree duni oinsá Jeová tau matan ami bainhira ami tau uluk ninia hakarak. Serbí iha fatin neʼe hametin duni ami-nia família.” (Mateus 6:22, 33) Oinsá ho labarik Aleksey? Oksana dehan: “Mudansa neʼe lori bensaun ba Aleksey. Nia dedika an ba Jeová no hetan batizmu bainhira nia tinan sia. Tanba nia haree katak rai neʼe presiza duni haklaken-naʼin, nia foti pioneiru estra beibeik durante eskola feriadu. Ami sente kontente loos haree nia badinas haklaken.” Ohin loron, Yury no Oksana serbí nuʼudar pioneiru tempu-tomak.

Hanesan irmaun-irmán barak hatete, bainhira ita muda ba fatin foun atu haklaken, ida-neʼe halo ita tenke tau fiar tomak ba Jeová deʼit. Ita-nia maluk sira neʼebé muda ba fatin foun hasoru susar oioin, maibé sira mós hetan haksolok boot tanba sira haklaken ba ema neʼebé prontu simu liafuan diʼak kona-ba Maromak nia Ukun. Oinsá ho Ita? Ita mós bele ajuda serbisu haklaken iha área neʼebé seidauk iha Testemuña barak ka lae? Se Ita halo nuneʼe, karik Ita mós sei sente hanesan ho irmaun Yury neʼebé esplika kona-ba ninia desizaun atu aumenta ninia haklaken, nia dehan: “Tuir loloos uluk kedas ami tenke mai ona iha neʼe, neʼe deʼit mak halo haʼu arrepende an.”