IRMAUN ida naran Ernesto * neʼebé idade 70 liu hatete: “Problema ho haʼu-nia saúde aumenta ba beibeik.” Ita mós sente hanesan neʼe ka lae? Se Ita idade ona no la iha ona forsa no saúde diʼak hanesan uluk, karik Ita mós sente hanesan buat neʼebé hakerek iha Eclesiastes (Pengkhotbah) kapítulu 12. Iha versíkulu 1, tempu katuas-ferik nian kompara hanesan “loron susar”. Maski nuneʼe, Ita nafatin bele kontente iha Ita-nia moris hodi serbí Jeová.

Imi irmaun-irmán sira neʼebé idade ona, imi lalika sente katak imi mesak deʼit mak hasoru susar kona-ba idade, tanba Jeová nia atan sira iha tempu uluk mós hasoru susar sira neʼebé hanesan. Porezemplu, bainhira Isaac, Jacob no Aijá sai katuas ona, sira-nia matan sai malahuk. (Gênesis [Kejadian] 27:1; 48:10; 1 Reis [Raja-Raja] 14:4) Ba Liurai David, nia sempre malirin. (1 Reis [Raja-Raja] 1:1) Tanba idade ona, mane riku ida naran Barzilai la bele sente hahán nia gostu ka rona múzika. (2 Samuel 19:32-35) No Abraão no Noemi, sira hasoru terus tanba sira-nia kaben mate.—Gênesis (Kejadian) 23:1, 2; Rute 1:3, 12.

Saida mak ajuda sira hodi laran-metin ba Jeová no kontente nafatin? Abraão fiar ba Maromak nia promesa no nia “hetan kbiit liuhusi ninia fiar”. (Roma 4:19, 20) Ita mós presiza fiar metin. Atu bele iha fiar hanesan neʼe, la depende ba ita-nia tinan, forsa ka situasaun moris nian. Ita bele haree ida-neʼe liuhusi Jacob nia ezemplu. Nia fraku, matan-delek no la bele laʼo bá-mai, maibé nia hatudu katak nia fiar duni ba Maromak nia promesa sira. (Gênesis [Kejadian] 48:1-4, 10; Ebreu 11:21) Irmán ida ho idade 93 naran Ines, nia terus tanba moras todan, maibé nia hanoin pozitivu nafatin. Nia hatete: “Loroloron haʼu sente Jeová fó bensaun mai haʼu. No loroloron haʼu hanoin kona-ba mundu foun. Ida-neʼe mak fó esperansa mai haʼu.”

Halo orasaun, lee Maromak nia Liafuan no tuir reuniaun sira, bele hametin liután ita-nia fiar. Profeta Daniel neʼebé katuas ona, nia halo orasaun loron ida dala tolu, no nia sempre estuda Maromak nia Liafuan. (Daniel 6:10; 9:2) Feto-faluk Ana “sempre bá iha templu atu adora Maromak”. (Lucas 2:36, 37) Bainhira ita tuir reuniaun sira no hola parte, Ita sei sente kmaan maibé Ita mós sei anima Ita-nia maluk sira seluk. Maski buat neʼebé Ita bele halo ba nia mak limitadu, la haluha katak Jeová sempre kontente atu rona Ita-nia orasaun sira.—Provérbios (Amsal) 15:8.

Karik imi irmaun-irmán sira neʼebé laran-metin ba Maromak sente susar tebes atu lee tanba matan-malahuk, ka susar atu tuir reuniaun tanba isin fraku ona. Se hanesan neʼe, ita bele halo saida? Irmaun-irmán barak neʼebé la bele tuir reuniaun sira bele rona ba reuniaun liuhusi telefone. Irmán ida naran Inge neʼebé idade 79, maski nia matan haree la moos ona, maibé nia bele prepara ba reuniaun. Oinsá? Irmaun ida iha ninia kongregasaun print informasaun ba nia hodi halo letra boot atu irmán Inge bele haree.

Tuir loloos, karik imi irmaun-irmán balu iha buat ruma neʼebé ema seluk hakarak atu hetan. Neʼe mak tempu. Ita bele uza ita-nia tempu hodi rona ba gravasaun Bíblia nian, livru, diskursu no drama sira. Ita mós bele telefone ita-nia maluk kristaun sira atu “fó laran-manas ba malu”.—Roma 1:11, 12.

Irmán ida ho idade 80 liu naran Krista hatete: “Hatene katak ita-nia forsa la hanesan uluk ona, neʼe halo ita laran-tun tebes.” Entaun, saida mak bele ajuda ema neʼebé idade ona atu iha solok nafatin? Pedro neʼebé idade 75 ona hatete katak, “Tenke iha hanoin pozitivu, la bele laran-tun, halo deʼit buat neʼebé ita bele halo.”

 Sei iha dalan seluk ka lae atu ita bele haklaken ba ema? Porezemplu, irmán Heidi agora la bele haklaken uma ba uma hanesan uluk, tanba agora nia idade 80 liu ona. Maibé nia aprende atu uza komputadór hodi hakerek surat atu haklaken ba ema. Balu aproveita tempu tuur iha jardín ka terminál hodi haklaken ba ema. Se ita mak ema neʼebé moras iha uma deʼit no presiza bá haree doutór beibeik ka enfermeira-enfermeiru sira mak mai haree ita iha uma, karik bele uza oportunidade hanesan neʼe atu haklaken ba sira.

Bainhira Liurai David sai katuas, nia fó apoiu nafatin ba adorasaun neʼebé moos. Nia fó osan no fó ninia apoiu ba hodi harii Jeová nia templu. (1 Crônicas [Tawarikh] 28:11–29:5) Ohin loron ita mós bele fó apoiu iha dalan hanesan neʼe. Ita bele hanoin toʼok iha mundu tomak presiza ajuda saida. Se ita-nia forsa toʼo, ita mós bele fó ita-nia ajuda, loos ka lae? Bele mós hanoin kona-ba fó apoiu ba pioneiru ka haklaken-naʼin neʼebé serbisu makaʼas husi ita-nia kongregasaun, hanesan liuhusi koʼalia liafuan anima, fó prezente kiʼik, ka halo buat simples ruma atu fó sira han no hemu. Bainhira halo orasaun, ita bele temi joven ka família, irmaun-irmán sira neʼebé serbí tempu-tomak, sira neʼebé moras, no sira neʼebé iha responsabilidade barak.

Ita no mós ita-nia serbisu sira iha folin boot tebes. Ita-nia Aman iha lalehan nunka husik ita tan deʼit ita idade ona. (Salmo [Mazmur] 71:9) Jeová sei nafatin hadomi no hafolin tebes ita. Lakleur tan ita hotu sei moris naruk, maibé la ho moras ka susar tan. Ita sei moris nakonu ho forsa no iha saúde neʼebé perfeitu. Ita sei serbí ita-nia Aman domin nian, Maromak Jeová, toʼo tempu neʼebé la bele sura!