1, 2. Ema kristaun hotu tenkesér hakarak atu sai saida? Esplika toʼok ho ai-knanoik ida.

BAINHIRA ema ida atu sosa ai-fuan iha merkadu, buat importante ba nia mak atu sosa ai-fuan neʼebé tasak, tanba ai-fuan neʼebé tasak mak morin, la siin, no bele han kedas. Tan neʼe, ai-fuan boot ka kiʼik, karun ka la karun, importante ba nia mak tasak.

² Bainhira ema ida laʼo ba oin iha lia-loos toʼo nia dedika an no batizmu, nia presiza laʼo ba oin nafatin. Ninia hakarak mak atu sai Maromak nia atan neʼebé tasak ka maduru. Tan neʼe mak apóstolu Paulo hakerek ba ema kristaun sira iha Éfeso katak sira presiza laʼo ba oin nafatin iha lia-loos. Nia fó anima ba sira hodi “sai ida deʼit iha fiar no hetan matenek loloos kona-ba Maromak nia Oan-Mane, hodi sai nuʼudar ema boot, neʼe katak sai kompletu nuʼudar ema boot loloos hanesan ho Kristu”.—Éfeso 4:13.

3. Situasaun saida iha kongregasaun Éfeso mak atu hanesan ho ohin loron?

³ Iha tempu neʼebé apóstolu Paulo hakerek ninia karta, kongregasaun Éfeso harii kleur tiha ona. Iha kongregasaun neʼe,  iha dixípulu barak mak maduru tebes. Maibé, iha mós ema balun neʼebé presiza atu laʼo ba oin nafatin. Situasaun ho ohin loron mós hanesan. Ita iha irmaun-irmán barak mak maduru ona iha lia-loos, maibé laʼós ema hotu hanesan neʼe. Porezemplu, tinan-tinan ema barak hetan batizmu, no ema sira-neʼe presiza duni atu laʼo ba oin nafatin hodi sai maduru iha lia-loos. Oinsá ho Ita rasik?—Koloso 2:6, 7.

4, 5. Iha dalan saida deʼit mak ema kristaun maduru ida-idak la hanesan, maibé saida mak sira hotu hanesan? (Haree foto iha pájina 3.)

⁴ Bainhira ita atu sosa ai-fuan tasak iha merkadu, ita bele haree katak ai-fuan ida-idak medida la hanesan. Maibé ita hatene katak ai-fuan sira-neʼe tasak ona, tanba karik ita bele haree husi ninia kór ka buat seluk husi ai-fuan sira-neʼe. Hanesan neʼe mós ho ema kristaun ida-idak, balu mai husi rai neʼebé la hanesan, sira-nia idade la hanesan, hahalok ka kultura la hanesan, maibé ita bele hatene sira liuhusi hahalok kristaun neʼebé sira hatudu loroloron. Hahalok sira-neʼe mak hanesan saida?

⁵ Jeová nia atan neʼebé maduru moris tuir Jesus nia ezemplu. (1 Pedro 2:21) Entaun ba Jesus, hahalok saida mak importante tebes? Neʼe mak hadomi Jeová ho laran, moris, no neon tomak. No mós hadomi ema seluk hanesan nia an rasik. (Mateus 22:37-39) Tan neʼe mak iha moris loroloron nian, ema kristaun neʼebé maduru sempre hatudu katak nia hanoin liu kona-ba ninia relasaun ho Jeová no oinsá mak nia bele uza tempu atu ajuda ema seluk.

6, 7. (a) Ema kristaun maduru presiza hatudu hahalok saida tan? (b) Ita presiza husu ita-nia an pergunta saida?

⁶ Ema kristaun neʼebé maduru hatudu domin, maibé nia mós presiza hatudu hahalok seluk tan neʼebé mai husi espíritu santu. (Galásia 5:22, 23) Hahalok hanesan laran-maus, kontrola an, no pasiénsia. Hahalok sira-neʼe ajuda nia atu tahan situasaun susar hodi la sai hirus ka lakon esperansa lalais. Bainhira nia halaʼo estuda mesak, nia sempre buka atu hatene Bíblia nia prinsípiu sira hodi nia bele hatene saida mak loos no saida mak sala. Hodi nuneʼe, bainhira nia halo desizaun ruma, ita bele haree katak ema neʼe mak ema maduru duni, tanba nia uza konxiénsia neʼebé tuir Bíblia nia matadalan hodi halo ninia desizaun. Ema kristaun neʼebé maduru mós haraik-an, tanba nia rekoñese katak Jeová nia dalan sira mak diʼak liu ninia rasik. * (Haree nota iha kraik.) Nia mós haklaken ho badinas no hafolin unidade iha kongregasaun laran.

⁷ Maski ita serbí Jeová ba tinan barak ona, ita ida-idak presiza husu ba ita-nia an, ‘Iha área saida tan iha haʼu-nia moris mak haʼu presiza halo tuir Jesus hodi bele kontinua laʼo ba oin iha lia-loos?’

8. Oinsá mak ita hatene katak Jesus komprende didiʼak eskritura sira?

⁸ Jesus Kristu komprende didiʼak eskritura sira. Maski nia foin tinan 12, nia hatene ona oinsá atu koʼalia kona-ba eskritura sira ho mestre sira iha templu laran, no ema “sira hotu neʼebé rona ba nia hakfodak tebes kona-ba ninia matenek no ninia resposta sira”. (Lucas 2:46, 47) Ikusmai, bainhira  nia halaʼo serbisu haklaken, nia uza Maromak nia Liafuan hodi hatán ninia inimigu sira, neʼe halo sira hotu koʼalia ladiʼak.—Mateus 22:41-46.

9. (a) Ema maduru nia toman kona-ba estuda Bíblia mak saida? (b) Ita-nia objetivu bainhira estuda Bíblia mak saida?

⁹ Ezemplu neʼebé Jesus hatudu mai ita hanorin ita katak atu sai ema neʼebé maduru, ita presiza hatene didiʼak eskritura sira. Atu bele halo nuneʼe, ita tenke keʼe kleʼan liután ba Bíblia nia informasaun sira, tanba Bíblia hatete katak “ai-han toos mak ba ema neʼebé boot ona”. (Ebreu 5:14) Loos duni, ema kristaun maduru ida tenkesér hatene “matenek loloos kona-ba Maromak nia Oan-Mane”. (Éfeso 4:13) Tan neʼe, husu ba ita-nia an: ‘Haʼu lee Bíblia loroloron ka lae? Haʼu nunka falta atu halaʼo estuda mesak ka lae? Iha semana ida-idak haʼu sempre la falta atu halaʼo adorasaun família nian ka lae?’ Bainhira ita lee Bíblia, fó atensaun ba oinsá mak Bíblia nia prinsípiu bele ajuda ita komprende liután Jeová nia hanoin no sentimentu. Tuirmai, uza Bíblia nia prinsípiu sira atu halo desizaun. Halo hanesan neʼe beibeik bele ajuda ita hakbesik liután ba Jeová.

10. Saida mak ema kristaun maduru nia hanoin kona-ba Maromak nia matadalan sira?

¹⁰ Ema neʼebé maduru hatene katak iha matenek deʼit la toʼo, nia tenkesér gosta mós atu halo tuir Maromak nia matadalan sira. Nia hatudu sai ninia hakarak neʼe hodi tau uluk Jeová nia hakarak iha ninia moris. Nia mós sei hakaʼas an atu soe hotu ninia hahalok uluk nian hodi tau fali Kristu nia hahalok diʼak sira neʼebé “Maromak kria tuir ninia hakarak; no hahalok neʼe mak loos no laran-metin”. (Lee Éfeso 4: 22-24.) Importante atu hanoin-hetan katak Maromak nia espíritu santu mak leno ema hodi hakerek Bíblia. Tan neʼe mak bainhira ema kristaun ida estuda Bíblia, neʼe hanesan nia husik Maromak nia espíritu santu loke ninia neon no laran atu halo tuir Maromak nia matadalan, no neʼe sei ajuda nia atu aumenta ninia matenek no domin ba Maromak Jeová. Neʼe mak halo nia laʼo ba oin atu sai ema kristaun maduru ida.

11. Jesus komprende saida kona-ba ema bainhira nia moris iha rai?

¹¹ Bainhira Jesus moris iha rai, nia moris hamutuk ho ema sala-naʼin. Ninia inan-aman, alin sira no família sira hotu ema sala-naʼin. Tanba la perfeitu, ninia dixípulu sira mós iha hahalok foti-an no buka diʼak deʼit. Porezemplu, iha kalan antes nia mate, ninia dixípulu sira haksesuk malu makaʼas kona-ba “sé mak boot liu entre sira”. (Lucas 22:24) Maski Jesus hatene katak sira la perfeitu, maibé nia nunka lakon esperansa katak loron ida ninia dixípulu sira sei sai ema maduru no sira sei hamutuk atu forma kongregasaun neʼebé iha unidade. Iha kalan neʼe duni mak Jesus halo orasaun ba Jeová iha lalehan atu fó bensaun ba ninia apóstolu sira-nia unidade. Jesus husu atu sira hotu bele sai ida deʼit, nia dehan: “Hanesan Ita, Aman, Ita ida deʼit ho haʼu no haʼu ida deʼit ho Ita, atu sira mós bele sai ida deʼit ho ita naʼin-rua, . . . atu nuneʼe sira bele sai ida deʼit hanesan Ita no haʼu ida deʼit.”—João 17:21, 22.

12, 13. (a) Tuir Éfeso 4:15, 16, tanbasá mak unidade iha kongregasaun importante tebes? (b) Saida mak ajuda irmaun ida troka ninia hahalok uluk nian?

¹² Jeová nia atan neʼebé maduru sempre buka dame ho ema seluk iha kongregasaun laran. (Lee Éfeso 4:1-6, 15, 16.) Nuʼudar Maromak nia povu, ita hotu nia hakarak mak iha unidade no rona malu. Tuir buat neʼebé Jeová hatete, atu iha unidade, ita tenkesér hatudu haraik-an. Irmaun ka irmán neʼebé maduru sempre serbisu hamutuk maski ema ida-idak iha sira-nia frakeza oioin. Se nuneʼe, husu ba ita-nia an: ‘Se iha irmaun ka irmán ida hatudu ninia frakeza ruma mai haʼu, haʼu sei halo saida? Haʼu sente oinsá se ema ida hakanek haʼu-nia sentimentu? Haʼu-nia toman mak atu la koʼalia tan ho nia ka lae? Ka haʼu sempre buka dalan atu hadiʼa fali haʼu-nia relasaun ho nia? Se ita mak ema kristaun maduru ida, ita-nia hakarak mak atu rezolve problema, laʼós atu kria problema, loos ka lae?

¹³ Iha irmaun ida naran Uwe. Uluk, irmaun-irmán sira-nia frakeza sempre halo nia hirus. Tan neʼe nia deside atu uza Bíblia no livru Pemahaman Alkitab hodi estuda kona-ba David nia moris. Tanbasá mak nia hili David? Nia hatete: “David haree ona hahalok ladiʼak barak husi ema fiar-naʼin seluk. Porezemplu, Liurai Saul koko atu oho nia, ema balu buka atu tuda mate nia, no ninia feen rasik hatún nia. (1 Samuel 19:9-11; 30:1-6; 2 Samuel 6:14-22) Maibé David nunka husik ema nia hahalok sira-neʼe atu hamenus ninia domin ba Jeová. David mós iha laran neʼebé sadiʼa tebes, hahalok neʼebé haʼu mós gosta atu iha. Husi buat neʼebé haʼu aprende, buat sira-neʼe troka haʼu-nia hanoin ba irmaun-irmán sira-nia frakeza. Agora se ema ida hakanek haʼu la ho neon, haʼu husik deʼit. Haʼu-nia hakarak mak atu buka dame no unidade iha kongregasaun.” Ita mós iha hakarak hanesan neʼe ka lae?

14. Jesus hili ema hanesan saida atu sai ninia belun?

¹⁴ Jesus Kristu nunka halo an, tan neʼe mak mane, feto, joven, ema idade, ka labarik sira sente hakbesik lalais ba nia. Maibé kona-ba atu hili ema sai ninia belun, Jesus haree didiʼak, nia la hili arbiru deʼit. Nia hatete ba ninia apóstolu sira: “Imi mak haʼu-nia belun sira se imi halo buat neʼebé haʼu haruka imi atu halo.” (João 15:14) Jesus hili deʼit ema neʼebé mak halo tuir nia no sira neʼebé serbí Jeová ho laran tomak. Ita mós hili ema neʼebé serbí Jeová ho laran tomak atu sai belun diʼak ka lae? Tanbasá mak ida-neʼe importante?

15. Oinsá mak ransu hamutuk ho ema kristaun neʼebé maduru bele ajuda joven sira?

¹⁵ Ai-fuan balu kuandu ita falun metin, neʼe halo nia tasak lalais. Hanesan neʼe mós ho irmaun-irmán sira-nia domin neʼebé falun metin ita, neʼe bele ajuda ita sai tasak ka maduru. Karik ita mak joven ida neʼebé hanoin hela atu halo buat ruma iha ita-nia moris. Diʼak atu habelun ho irmaun-irmán sira neʼebé serbí Jeová ba tinan barak ona, tanba sira iha esperiénsia barak no hatene oinsá atu kaer metin ba unidade iha kongregasaun laran. Iha sira-nia moris, sira mós hasoru ona problema oioin no sira hatene saida mak bele hanetik ita atu serbí Jeová. Sira bele ajuda ita atu hili moris neʼebé diʼak. Ransu hamutuk ho irmaun-irmán sira hanesan neʼe bele ajuda ita halo desizaun neʼebé diʼak hodi laʼo ba oin atu sai ema kristaun neʼebé maduru.—Lee Ebreu 5:14.

16. Oinsá mak irmaun-irmán idade sira iha kongregasaun ajuda irmán joven ida?

¹⁶ Porezemplu, Helga sei hanoin-hetan uluk nia foin atu remata eskola, ninia kolega eskola barak koʼalia ba malu kona-ba eskola hotu tiha sira ida-idak hakarak atu halo saida. Barak mak hakarak atu bá eskola iha universidade, tanba sira dehan neʼe mak bele ajuda sira atu hetan serbisu diʼak iha futuru. Maibé Helga bá buka ninia belun husi kongregasaun atu koʼalia kona-ba situasaun neʼe. Nia hatete: “Ema neʼebé haʼu koʼalia ba sira mak ema neʼebé idade boot liu haʼu no sira ajuda tebes haʼu. Sira anima haʼu atu serbí Jeová tempu-tomak. Haʼu foti duni pioneiru ba tinan lima. Maski agora tinan barak liu tiha ona, maibé haʼu nunka arrepende hodi bele uza haʼu-nia tempu joven nian atu serbí Jeová.”

17, 18. Oinsá mak sai maduru iha dalan espirituál bele ajuda ita atu serbí Jeová?

¹⁷ Se ita mak halo tuir didiʼak Jesus nia ezemplu, neʼe bele ajuda ita atu sai ema kristaun neʼebé maduru. Ita sei hakbesik liután ba Jeová, no ita-nia hakarak atu serbí nia sei aumenta liután. Bainhira ema kristaun ida maduru, nia bele iha kapasidade barak liután atu halo Jeová nia serbisu. Tan neʼe mak Jesus anima ninia dixípulu sira, dehan: “Halo imi-nia naroman nabilan iha ema nia oin, atu sira bele haree hahalok diʼak neʼebé imi halo no fó hahiʼi ba imi-nia Aman neʼebé iha lalehan.”—Mateus 5:16.

¹⁸ Loos duni, ema kristaun neʼebé maduru iha folin boot tebes ba kongregasaun. Ema maduru hanesan neʼe mós uza sira-nia konxiénsia didiʼak bainhira halo desizaun ruma. Maibé, oinsá mak ita-nia laran, ka konxiénsia bele ajuda ita halo desizaun ho matenek? No oinsá mak ita bele hatudu respeitu ba ema seluk nia konxiénsia bainhira sira halo desizaun ruma? Lisaun tuirmai sei koʼalia kona-ba pontu sira-neʼe.