Hanoin kleʼan beibeik buat espirituál nian
“Hanoin didiʼak kona-ba buat sira-neʼe; fó ó-nia an tomak ba buat sira-neʼe, atu nuneʼe ema hotu bele haree ho momoos oinsá ó laʼo ba oin.”—1 TIMÓTEO 4:15.
KNANANUK: 22, 52
1, 2. Iha dalan saida deʼit mak ita-nia kakutak úniku tebes?
ITA ema nia kakutak mak buat neʼebé úniku tebes. No tanba kakutak nia kbiit mak ema bele aprende língua. Liuhusi língua mak ita bele lee, hakerek, koʼalia, komprende ema koʼalia, halo orasaun, no kanta hahiʼi ba Jeová. Sientista sira mós seidauk komprende loloos oinsá mak ita-nia kakutak bele halo buat sira-neʼe. Profesór língua nian ida hatete: “Labarik sira-nia kbiit atu aprende língua mak halo ema úniku tebes.”
2 Ita-nia kbiit atu uza língua mak prezente furak ida husi Maromak. (Salmo [Mazmur] 139:14; Apokalipse 4:11) Iha buat importante ida tan neʼebé halo ita-nia kakutak úniku mak tanba Maromak kria ita “tuir nia ilas”. Tan neʼe mak ita la hanesan ho animál tanba ita iha liberdade atu hili no atu uza língua nia kbiit hodi fó hahiʼi ba Jeová.—Gênesis (Kejadian) 1:27.
3. Jeová fó prezente furak saida atu ajuda ita sai matenek?
3 Atu ajuda ita serbí no hahiʼi nia, Jeová fó ita prezente furak ida, neʼe mak Bíblia. Ohin loron, Bíblia kompletu no la kompletu iha ona hamutuk língua 2.800 liu. Bainhira ita lee no medita kona-ba eskritura sira, neʼe bele halo ita komprende Maromak nia hanoin mak hanesan saida. (Salmo [Mazmur] 40:5; 92:5; 139:17) No Jeová nia hanoin bele halo ita sai matenek no lori ita ba salvasaun.—Lee 2 Timóteo 3:14-17.
4. Medita katak sá, no ita bele husu kona-ba pergunta saida deʼit?
4 Medita signifika katak ita hanoin kleʼan no fokus ita-nia hanoin tomak kona-ba buat diʼak ka buat aat. (Salmo [Mazmur] 77:12; Provérbios [Amsal] 24:1, 2) Tópiku rua importante ba ita atu hanoin kleʼan mak kona-ba Jeová no Jesus Kristu. (João 17:3) Karik ita bele hanoin: ‘Lee no medita iha ligasaun saida? Ita bele medita kona-ba saida? No oinsá mak ita bele iha toman diʼak atu medita beibeik?’
ESTUDA IHA DALAN NEʼEBÉ DIʼAK
5, 6. Bainhira lee, saida mak bele ajuda ita atu komprende no hanoin-hetan informasaun neʼebé ita foin lee?
5 Ita bele uza kakutak atu halo buat furak oioin. Porezemplu, dada iis, laʼo, saʼe bisikleta, no buat seluk tan. Dala ruma ita la presiza hanoin mós ita bele halo buat sira-neʼe. Hanesan neʼe mós bainhira ita lee. Tan neʼe mak importante atu fó atensaun ba pontu sira neʼebé ita lee. Bainhira ita lee tiha parágrafu ida ka atu tama ba subtítulu foun ida, karik diʼak atu para hodi hanoin lai ita komprende ona ka lae kona-ba informasaun neʼebé ita foin lee. Dala ruma ita-nia neon bele preokupa ho buat seluk neʼebé halo susar ba ita atu fó atensaun ba buat neʼebé ita lee. Saida mak bele ajuda ita iha situasaun hanesan neʼe?
6 Sientista sira hatete katak bainhira ita lee sai buat ruma ho lian, neʼe bele halo fasil ba ita atu hanoin-hetan informasaun neʼebé ita lee. Ita-nia Kriadór hatene katak ita-nia kakutak iha duni kbiit hanesan neʼe. Tan neʼe mak nia haruka Josué atu lee livru Ukun-Fuan nian “ho lian neineik”. (Lee Josué [Yosua] 1:8. *) Lee Bíblia ho lian neineik bele duni ajuda ita hanoin-hetan eskritura sira no bele mós ajuda ita atu tau atensaun.
7. Tempu saida mak diʼak atu medita kona-ba Maromak nia Liafuan? (Haree dezeñu iha pájina 23.)
7 Medita la hanesan ho lee, tanba medita presiza fokus. Bainhira ita atu halo buat difisil, ita-nia kakutak neʼebé la perfeitu sempre hakarak ita atu halo buat neʼebé fasil. Tan neʼe mak tempu neʼebé diʼak liu hotu atu medita mak tempu neʼebé ita deskansa no neon la preokupa ho buat seluk. Ema neʼebé hakerek salmu sente katak, ba nia, tempu diʼak atu medita mak iha kalan. (Salmo [Mazmur] 63:6) No Jesus, ema neʼebé iha kakutak perfeitu mós rekoñese katak iha fatin hakmatek mak fatin neʼebé diʼak atu medita no halo orasaun.—Lucas 6:12.
BUAT DIʼAK ATU MEDITA
8. (a) Ita bele medita kona-ba saida tan? (b) Jeová sente oinsá bainhira ita fó sai ita-nia sentimentu kona-ba nia?
8 Ita mós bele medita kona-ba buat seluk tan. Porezemplu, bainhira ita haree no hafolin tebes Jeová nia kriasaun ruma, para hodi hanoin kleʼan. Husu ba ita-nia an, ‘Saida mak haʼu bele aprende kona-ba Jeová husi ninia kriasaun neʼe?’ Halo hanesan neʼe bele book ita atu hahiʼi Jeová. Se iha tempu neʼe mak ita hamutuk hela ho ema seluk, fahe ita-nia sentimentu neʼe ho sira tanbasá mak ita hafolin Jeová nia kriasaun neʼe. (Salmo [Mazmur] 104:24; Apóstolu 14:17) Jeová sente oinsá bainhira ita medita no koʼalia sai ita-nia sentimentu kona-ba nia ba ema seluk? Bíblia dehan Jeová kontente tebes. Eskritura dehan: “Iha tempu neʼebá, sira neʼebé taʼuk ba Jeová koʼalia ba malu, sira ida-idak ho nia maluk, no Jeová kontinua atu see tilun no rona ba sira. No iha nia oin komesa hakerek livru ida hodi hanoin-hetan sira neʼebé taʼuk ba Jeová no ba sira neʼebé hanoin kleʼan kona-ba nia naran.”—Malaquias (Maleakhi) 3:16.
Ita hanoin kleʼan kona-ba ita-nia estudante Bíblia nia presiza no situasaun ka lae? (Haree parágrafu 9)
9. (a) Apóstolu Paulo husu Timóteo atu hanoin didiʼak kona-ba saida? (b) Oinsá mak ita bele halo tuir Paulo nia konsellu bainhira atu prepara bá haklaken?
9 Apóstolu Paulo husu ba Timóteo atu “hanoin didiʼak” kona-ba oinsá mak ninia koʼalia, hahalok, no hanoin bele ajuda ema barak. (Lee 1 Timóteo 4:12-16.) Ita mós bele hanoin kona-ba buat sira-neʼe. Porezemplu, bainhira atu bá estuda Bíblia ho ema, ita presiza uza tempu atu medita uluk. Karik ita bele hanoin atu husu pergunta saida mak bele ajuda estudante fó sai ninia hanoin, ka bele uza ai-knanoik saida mak atu ajuda nia komprende. Tempu neʼebé ita uza atu hanoin didiʼak ba buat hanesan neʼe iha folin duni, no neʼe mós bele hametin ita rasik nia fiar no ajuda ita atu fó estuda Bíblia ba ema ho didiʼak no ho laran-manas. Hanesan neʼe mós bainhira ita atu sai bá haklaken, ita tenke prepara uluk ita-nia laran ho didiʼak. (Lee Esdras [Ezra] 7:10. *) Karik ita mós bele lee kapítulu ida husi Apóstolu hodi halo ita laran-manas liután atu bá haklaken. Diʼak mós atu hanoin didiʼak kona-ba eskritura sira ka livru neʼebé ita atu uza ba haklaken. (2 Timóteo 1:6) Hanoin kona-ba ema iha ita-nia haklaken fatin no saida mak sira gosta atu koʼalia ho ita. Prepara buat hotu neʼe bele ajuda ita atu uza Maromak nia Liafuan nia “espíritu no kbiit” atu haklaken ho diʼak liután.—1 Korinto 2:4.
10. Buat diʼak saida tan mak ita bele medita?
10 Bainhira rona diskursu públiku iha reuniaun no tuir reuniaun boot sira, ita hakerek nota ka lae? Haree fali ba nota sira-neʼe bele fó oportunidade ba ita atu medita kona-ba saida mak ita aprende ona husi Maromak nia Liafuan no husi ninia organizasaun. No ita mós bele lee kona-ba Livru Haklaken no Matan-moris bá! neʼebé foun ka diʼak mós atu lee no hanoin didiʼak ba livru sira neʼebé ita simu husi reuniaun boot ba loron tolu nian. Bainhira lee livru tinan nian, karik diʼak atu hanoin fali ba esperiénsia neʼebé ita foin lee, depois mak hakat fali ba esperiénsia seluk. Neʼe sei fó oportunidade ba ita atu medita no halo ita-nia laran hafolin liután esperiénsia sira-neʼe. Bainhira lee, karik diʼak atu riska liafuan importante sira ka hakerek pontu diʼak sira iha parágrafu ninin hodi aban-bainrua ita bele uza ba halo vizita fali, halo vizita katuas nian, ka hatoʼo diskursu. Importante tebes mak, bainhira lee ita-nia livru sira, diʼak atu para uitoan no medita hodi ita bele iha oportunidade atu hafolin buat neʼebé ita lee no halo orasaun atu fó agradese ba Jeová ba buat diʼak sira neʼebé ita aprende daudaun.
MEDITA MAROMAK NIA LIAFUAN LOROLORON
11. Saida mak buat neʼebé importante tebes ba ita atu medita, no tanbasá? (Haree mós nota iha kraik.)
11 Bíblia mak livru neʼebé importante tebes ba ita atu medita. Maibé oinsá se loron ida ema bandu ita atu la bele lee tan Bíblia? * (Haree nota iha kraik.) Maski nuneʼe, ita sei bele atu medita kona-ba buat neʼebé ita sei hanoin-hetan iha ita-nia kakutak, buat hanesan eskritura favoritu ruma ka liafuan husi ita-nia livru knananuk nian. (Apóstolu 16:25) Iha tempu hanesan neʼe, Maromak nia espíritu santu sei ajuda ita hanoin-hetan fali buat diʼak sira neʼebé uluk ita aprende.—João 14:26.
12. Oinsá mak ita bele halo planu atu lee Bíblia loroloron?
12 Iha semana-semana, karik bele uza loron balu hodi lee no medita kona-ba eskritura sira neʼebé uza ba Eskola Serbisu Kristaun nian. No ita mós bele uza loron balu tan atu medita didiʼak kona-ba saida mak Jesus halo no hanorin iha evanjellu haat. (Roma 10:17; Ebreu 12:2; 1 Pedro 2:21) Jeová nia organizasaun halo ona livru ida neʼebé konta kona-ba Jesus nia moris tuir tempu ida-idak. Livru neʼe kapás tebes atu lee no uza ba medita, liuliu bainhira ita kompara evanjellu haat hamutuk kona-ba buat neʼebé Jesus halo.—João 14:6.
TANBASÁ MAK MEDITA IMPORTANTE TEBES?
13, 14. Tanbasá mak importante tebes ba ita atu medita beibeik kona-ba buat espirituál nian, no neʼe sei book ita atu halo saida?
13 Medita kona-ba buat espirituál nian bele ajuda ema sai kristaun maduru ida. (Ebreu 5:14; 6:1) Ema neʼebé ladún gasta tempu atu hanoin kona-ba Maromak no Jesus, ninia fiar sei sai fraku lalais. Ema hanesan neʼe neineik-neineik bele hadook an husi Jeová no lia-loos. (Ebreu 2:1; 3:12) Jesus fó avizu katak se ita la rona, ka la simu Maromak nia Liafuan “ho laran neʼebé diʼak”, ita sei la rai metin liafuan sira-neʼe. Se nuneʼe “hanoin resin, no rikusoin nia lasu, no mós ksolok moris nian” bele hanehan ita hodi ita la bele “fó fuan neʼebé tasak”.—Lucas 8:14, 15.
14 Tan neʼe mak ita tenke medita beibeik kona-ba Maromak nia Liafuan. Neʼe sei book ita atu banati-tuir Jeová no haleno ninia hahalok diʼak sira. (2 Korinto 3:18) Se ita hanoin didiʼak katak ita bele kontinua aprende kona-ba Jeová no haleno ninia hahalok sira ba nafatin, neʼe mak priviléjiu neʼebé boot tebes.—Eclesiastes (Pengkhotbah) 3:11.
15, 16. (a) Tanbasá mak diʼak ba ita atu medita kona-ba buat espirituál nian? (b) Tanbasá mak dala ruma difisil ba ita atu bele medita, maibé tanbasá mak ita la bele rende an?
15 Medita beibeik kona-ba buat espirituál nian sei ajuda ita hatudu laran-manas nafatin ba lia-loos. Ita-nia laran-manas mós sei fó anima ba irmaun-irmán sira no bele mós ajuda ema neʼebé ita hasoru iha haklaken fatin. Bainhira ita hanoin didiʼak ba Jesus nia sakrifísiu, prezente importante neʼebé Maromak fó ba ita, neʼe sei ajuda ita atu hafolin liután ita-nia relasaun neʼebé diʼak ho ita-nia Aman Santu, Jeová. (Roma 3:24; Tiago 4:8) Irmaun ida husi rai-Áfrika Súl naran Mark, nia tama komarka ba tinan tolu tanba nia lakohi mete polítiku. Nia hatete: “Ita bele kompara medita hanesan ho halo pasiar ba rai foun. Se ita mak medita kleʼan liután kona-ba buat espirituál nian, ita mós sei deskobre buat foun barak kona-ba Maromak Jeová. Dala ruma haʼu sente laran-tun uitoan ka laran susar kona-ba futuru, iha tempu hanesan neʼe haʼu foti Bíblia lee no medita kona-ba eskritura balu. Haʼu sente neʼe halo haʼu kalma fali.”
16 Mundu ohin loron iha buat barak tebes mak bele fahe ita-nia hanoin no dala ruma neʼe halo difisil ba ita atu bele medita kona-ba buat espirituál nian. Irmaun ida tan husi rai-Áfrika naran Patrick hatete: “Haʼu-nia neon mak hanesan kaixa neʼebé nakonu ho informasaun oioin, balu informasaun neʼebé iha folin, balu lae. Loroloron haʼu presiza fahe informasaun sira-neʼe ida-idak. Nuʼudar haʼu hanoin kona-ba buat neʼebé iha haʼu-nia neon, neʼe sempre halo haʼu laran la hakmatek, no haʼu tenke halo orasaun ba Jeová kona-ba buat sira-neʼe hodi haʼu bele medita. Maski haʼu presiza gasta tempu uitoan foin atu bele medita kona-ba buat espirituál nian, maibé neʼe halo haʼu sente hakbesik liután ba Jeová. Halo hanesan neʼe mós loke haʼu-nia neon atu komprende diʼak liután kona-ba lia-loos.” (Salmo [Mazmur] 94:19) Loos duni, se ita mak medita no “buka-hatene didiʼak” eskritura sira loroloron, neʼe sei lori bensaun barak ba ita-nia moris.—Apóstolu 17:11.
OINSÁ ITA BELE IHA TEMPU?
17. Oinsá mak Ita buka tempu atu medita?
17 Ema balu hadeer sedu atu lee, medita, no halo orasaun. Balu halo iha tempu deskansa iha meiudia. Karik ita bele lee iha kalan ka antes ita toba. Balu mós gosta lee Bíblia iha dadeer-saan no antes atu toba sira lee tan. (Josué [Yosua] 1:8) Buat importante mak atu uza tempu hodi medita didiʼak kona-ba Maromak nia Liafuan loroloron.—Éfeso 5:15, 16.
18. Bíblia promete saida ba ema neʼebé medita no halo tuir Maromak nia Liafuan loroloron iha sira-nia moris?
18 Bíblia hatete katak Maromak sei fó bensaun ba sira neʼebé mak medita no uza beibeik ninia Liafuan iha sira-nia moris. (Lee Salmo [Mazmur] 1:1-3. *) Jesus mós hatete katak: “Ksolok ba sira neʼebé rona Maromak nia liafuan no halo tuir!” (Lucas 11:28) Importante liu mak, bainhira ita medita kona-ba buat espirituál nian loroloron, ita sei fó glória ba Jeová, no nia mós sei haraik solok ba ita agora no moris ba nafatin iha mundu foun.—Tiago 1:25; Apokalipse 1:3.
^ par. 6 Josué 1:8: “Livru Ukun-Fuan nian neʼe labele husik ó-nia ibun, no ó tenke lee ho lian neineik loron no kalan, atu ó bele halo tuir buat hotu neʼebé hakerek iha ninia laran; tanba hodi nuneʼe ó sei halo ó-nia dalan sai susesu no ó sei halo hahalok ho matenek.”
^ par. 9 Esdras 7:10: “Ezra prepara ninia laran hodi lee Jeová nia Ukun-Fuan no halo tuir ida-neʼe, no atu hanorin ninia mandamentu sira no ninia tesi-lia iha Izraél.”
^ par. 11 Haree informasaun kona-ba “Perjuangan Kami untuk Tetap Kuat secara Rohani” husi Menara Pengawal 1 Dezembru 2006.
^ par. 18 Salmo 1:1-3: “1 Ksolok ba ema neʼebé la laʼo tuir ema aat nia konsellu, no la hamriik iha sala-naʼin nia dalan, no la tuur iha gozadór nia fatin. 2 Maibé nia gosta Jeová nia ukun-fuan, no ukun-fuan neʼe, nia lee ho lian neineik loron no kalan. 3 No nia sei sai hanesan ai-hun ida neʼebé kuda besik bee dalan, neʼebé fó fuan iha ninia tempu no ninia tahan sira sei la sai namlaek. No nia sei hetan susesu iha buat hotu neʼebé nia halo.”
