1, 2. (a) Inan-aman sira neʼebé iha oan joven hanoin barak kona-ba saida? (b) Tanbasá mak tempu joven nian bele sai tempu neʼebé diʼak tebes?

BA INAN-AMAN kristaun sira, buat neʼebé lori solok boot mak bainhira sira-nia oan hetan batizmu. Irmán Berenice iha oan naʼin-haat, sira hotu hetan batizmu bainhira sira seidauk toʼo tinan 14. Nia dehan: “Iha tempu neʼe ami iha emosaun oioin. Ami kontente tebes katak ami-nia oan sira hakarak serbí Jeová, maibé ami mós hatene katak sira sei hasoru susar barak.” Se Ita iha oan joven ida ka besik ona foin-saʼe, karik Ita mós hanoin barak kona-ba neʼe.

² Matenek-naʼin ida neʼebé estuda kona-ba foin-saʼe sira dehan katak tempu joven nian bele fó susar ba inan-aman no joven sira rasik. Maibé nia mós hatete katak inan-aman la presiza hanoin sira-nia oan joven mak hanesan malandru ka sei hanesan labarik. Tuir loloos tempu joven nian bele sai tempu neʼebé diʼak tebes. Tanbasá? Matenek-naʼin neʼe dehan katak tempu joven nian mak tempu neʼebé joven sira hatudu sira-nia kreativu, bele sente emosaun oioin, no iha presiza atu ransu ho belun sira. Neʼe hatudu katak, bainhira Ita-nia oan sei joven, neʼe mak tempu kapás ba sira atu haburas relasaun kleʼan ho Jeová, hanesan Jesus halo  bainhira nia sei joven. (Lee Lucas 2:52.) Sira mós bele halo planu sira kona-ba haklaken no haburas hakarak atu halo buat barak liután iha Maromak nia serbisu. Sira mós bele foti sira-nia desizaun rasik, hanesan desizaun atu dedika sira-nia moris ba Jeová no halo tuir nia. Maibé nuʼudar inan ka aman ida, Ita bele halo saida atu treinu Ita-nia oan joven atu serbí Jeová? Ita bele aprende husi dalan neʼebé Jesus fó treinu ba ninia dixípulu sira ho domin, haraik-an no matenek.

3. Tanbasá mak Jesus bolu ninia apóstolu sira nuʼudar ninia belun?

³ Jesus laʼós deʼit apóstolu sira-nia Naʼi, maibé nia mós sai sira-nia belun. (Lee João 15:15.) Iha Bíblia nia tempu, baibain ema la fahe sira-nia sentimentu ho ninia atan sira. Maibé Jesus la haree ninia apóstolu sira hanesan atan. Nia hadomi sira no gasta tempu ho sira. Nia kontente atu fó-hatene saida mak nia hanoin no sente iha laran, no nia mós rona didiʼak bainhira sira fó sai sira-nia sentimentu. (Marcos 6:30-32) Neʼe halo sira sai belun neʼebé diʼak no prepara apóstolu sira ba serbisu neʼebé sira sei halo iha futuru.

4. Oinsá mak Ita bele sai belun ho Ita-nia oan? (Haree foto iha pájina 8.)

⁴ Maski oan sira tenke halo tuir Ita nuʼudar inan-aman, maibé Ita mós hakarak sai sira-nia belun. Belun sira sempre gasta tempu hamutuk. Halo orasaun no hanoin didiʼak se Ita bele hamenus tempu husi serbisu hodi Ita bele uza tempu barak liután ba Ita-nia oan. Belun neʼebé diʼak mós gosta buat neʼebé hanesan. Tan neʼe, koko atu buka-hatene saida mak Ita-nia oan gosta, hanesan múzika, filme no desportu. No hakaʼas an atu hatudu interese ba buat sira-neʼe. Ilaria neʼebé hela iha rai-Itália hatete: “Haʼu-nia inan-aman hatudu interese ba múzika neʼebé haʼu gosta. Haʼu-nia apá sai haʼu-nia belun diʼak no haʼu bele koʼalia ba nia kona-ba buat hotu, inklui buat privadu.” Se Ita sai belun ba Ita-nia oan no ajuda sira atu sai Jeová nia belun, neʼe la dehan katak Ita lakon ona Ita-nia autoridade, ka kbiit nuʼudar inan ka aman. (Salmo [Mazmur] 25:14) Tuir loloos, Ita-nia oan sei haree katak Ita hadomi no respeitu sira, no sira sei sente fasil atu hakbesik Ita.

5. Oinsá mak Jesus nia dixípulu sira bele hetan kontente hodi serbí Jeová?

⁵ Jesus hatene katak, se ninia dixípulu sira laran-manas atu serbí Jeová no badinas haklaken, sira sei hetan kontente neʼebé loos. Tan neʼe nia hakarak sira atu hakaʼas an iha serbisu haklaken. Nia mós promete katak nia sei ajuda sira.—Mateus 28:19, 20.

6, 7. Hodi halaʼo beibeik programa adorasaun nian, oinsá mak ida-neʼe hatudu katak Ita hadomi oan sira?

⁶ Ita hakarak Ita-nia oan atu besik nafatin ba Jeová. No Jeová fó responsabilidade ba Ita atu “fó dixiplina no matadalan neʼebé tuir Jeová nia hakarak”. (Éfeso 6:4) Tan neʼe, Ita presiza hakaʼas an atu halaʼo programa adorasaun nian ho Ita-nia oan. Hanoin toʼok kona-ba neʼe: Ita hatene katak importante ba oan atu bá eskola no hetan edukasaun, tanba Ita hakarak sira atu laran-manas aprende buat oioin. Maibé sá tan ho edukasaun husi Jeová? Ita hakarak sira atu tuir reuniaun, reuniaun boot sira no adorasaun família nian. Edukasaun neʼebé sira simu husi Jeová bele salva sira-nia moris. Tan neʼe, ajuda sira atu haburas domin atu aprende kona-ba Jeová no hafolin matenek neʼebé loos. (Provérbios [Amsal] 24:14) Importante mós atu treinu Ita-nia oan atu bá haklaken beibeik. Banati-tuir Jesus nia ezemplu hodi ajuda sira sai laran-manas kona-ba haklaken Maromak nia Liafuan ba ema seluk.

 ⁷ Oinsá mak programa adorasaun nian neʼebé halaʼo beibeik bele ajuda joven sira? Erin, neʼebé hela iha rai-Áfrika Súl, hatete: “Bainhira ami sei labarik, baibain ami maña no lakohi atu estuda, tuir reuniaun no bá haklaken. Dala ruma mós ami halo planu ruma atu ami la konsege estuda iha kalan neʼe. Maibé amá-apá la rende an.” Erin agradese ba ninia inan-aman tanba sira ajuda nia atu rekoñese katak buat sira-neʼe importante tebes. Agora, se buat ruma mak halo nia falta reuniaun ka haklaken, ninia hakarak mak atu fila fali lalais ba ninia toman atu tuir reuniaun no bá haklaken.

8. (a) Oinsá mak Jesus hatudu katak nia haraik an? (b) Oinsá mak Jesus nia haraik-an ajuda ninia dixípulu sira?

⁸ Maski Jesus ema sala-laek, nia mós haraik an no hatudu ba ninia dixípulu sira katak nia presiza Jeová nia ajuda. (Lee João 5:19.) Neʼe halo ninia dixípulu sira la respeitu ona Jesus ka lae? Lae. Tuir loloos, bainhira sira haree nia sadere ba Jeová, neʼe halo sira tau fiar liután ba nia. Ikusmai, sira mós banati-tuir ninia ezemplu kona-ba haraik-an.—Apóstolu 3:12, 13, 16.

9. Se Ita rekoñese Ita-nia sala no husu deskulpa, oinsá mak ida-neʼe bele ajuda Ita-nia oan joven?

⁹ Ita la hanesan ho Jesus tanba ita halo sala barak. Tan neʼe, haraik an nafatin no rekoñese ita-nia fraku. (1 João 1:8) Se Ita halo hanesan neʼe, Ita-nia oan sei hatudu respeitu liután ba Ita no sei aprende atu rekoñese ninia sala. Hanoin toʼok ezemplu neʼe, Ita sei hatudu respeitu liu ba patraun ida neʼebé rekoñese ninia sala duké ida neʼebé nunka husu deskulpa, loos ka lae? Rosemary, neʼebé iha oan naʼin-tolu, hatete katak nia ho ninia laʼen sempre prontu atu husu deskulpa bainhira sira sala. Nia hatete: “Ida-neʼe halo ami-nia oan sente fasil atu koʼalia nakloke ba ami bainhira sira iha problema.” Nia hatutan tan: “Ami hanorin sira oinsá atu hetan ajuda ba sira-nia problema. Se sira presiza ajuda, ami sempre anima sira atu loke ita-nia livru sira kona-ba Bíblia, no ami mós halo orasaun hamutuk.”

10. Oinsá mak Jesus hatudu haraik-an bainhira nia fó mandamentu ba ninia dixípulu sira?

¹⁰ Jesus iha kbiit atu fó mandamentu ba ninia dixípulu sira, maibé tanba nia ema haraik an, nia mós esplika tanbasá sira presiza halo ida-neʼe. Porezemplu, nia laʼós deʼit haruka sira atu buka uluknanain Maromak nia Ukun no ninia hakarak. Nia mós dehan: “Buat sira seluk nia sei fó mós ba imi.” No bainhira Jesus dehan ba ninia dixípulu sira atu keta tesi lia ba ema, nia esplika tanbasá, hodi dehan: “Atu Maromak la tesi lia ba imi, tanba dalan neʼebé imi tesi lia ba ema, Maromak mós sei tesi lia ba imi.”—Mateus 6:31–7:2.

11. Hodi esplika ba Ita-nia oan joven tanbasá mak Ita halo ukun-fuan ka desizaun ruma, oinsá mak ida-neʼe bele ajuda nia?

¹¹ Buka tempu neʼebé loos atu esplika ba Ita-nia oan tanbasá mak Ita halo ukun-fuan ka desizaun ruma. Tanba se nia komprende tanbasá, neʼe sei halo nia hakarak halo tuir Ita husi laran. Barry, neʼebé haboot oan naʼin-haat hatete: “Bainhira Ita fó razaun, neʼe ajuda Ita-nia oan atu tau fiar ba Ita.” Joven sira sei haree katak Ita la halo ukun-fuan ka desizaun neʼe tan deʼit Ita hakarak uza Ita-nia kbiit maibé tanba Ita iha razaun diʼak. Hanoin-hetan katak joven sira la hanesan labarik kiʼik. Sira aprende daudaun oinsá atu uza sira-nia kbiit atu hanoin no foti desizaun rasik. (Roma 12:1) Barry hatete: “Joven sira presiza aprende oinsá atu foti desizaun sira tuir razaun neʼebé loos, laʼós tuir sira-nia emosaun deʼit.” (Salmo [Mazmur] 119:34) Tan neʼe, hatudu haraik an no  esplika ba Ita-nia oan tanbasá mak Ita foti desizaun neʼe. Se hanesan neʼe, nia sei aprende oinsá atu halo ninia desizaun rasik, no nia sei hatene katak Ita respeitu nia no hatene nia atu sai maduru ona.

12. Oinsá mak Jesus uza matenek atu ajuda Pedro?

¹² Jesus hatudu matenek tanba nia komprende saida mak nia presiza halo atu ajuda ninia dixípulu sira. Porezemplu, bainhira Jesus hatete ba ninia dixípulu katak ema sei oho nia, Pedro hatete ba Jesus atu la bele fó-malisan ba ninia an. Jesus hatene katak Pedro hadomi nia, maibé nia mós hatene katak dalan neʼebé Pedro hanoin mak sala. Oinsá mak Jesus ajuda nia no mós dixípulu sira seluk? Primeiru, nia korrije Pedro. Depois nia esplika saida mak sei akontese ba ema neʼebé la halo Maromak nia hakarak tanba hasoru situasaun susar. Jesus mós dehan katak Jeová sei fó bensaun ba ema neʼebé la hanoin an deʼit. (Mateus 16:21-27) Pedro aprende duni husi buat neʼebé Jesus hanorin.—1 Pedro 2:20, 21.

13, 14. (a) Saida mak bele hatudu katak Ita-nia oan joven presiza hametin ninia fiar? (b) Saida mak Ita bele halo atu hatene oinsá bele ajuda Ita-nia oan?

¹³ Halo orasaun ba Jeová atu fó ba Ita matenek atu komprende saida mak Ita-nia oan joven presiza. (Salmo [Mazmur] 32:8) Karik Ita haree katak nia ladún kontente ona hanesan uluk, ka nia kritika irmaun-irmán sira iha kongregasaun. Karik Ita sente iha buat ruma neʼebé nia subar husi Ita. Se nuneʼe, la bele deskonfia kedas katak nia halo sala daudaun. * (Haree nota iha kraik.) Maibé, Ita mós la bele husik deʼit no hein katak problema neʼe sei rezolve rasik, tanba karik Ita presiza ajuda nia hametin ninia fiar.

¹⁴ Ho laran-diʼak no respeitu, husu pergunta sira ba Ita-nia oan atu hatene oinsá Ita bele ajuda nia. Ita bele kompara hanesan kuru bee husi bee-matan. Se Ita kuru ho ansi liu, bee balu sei fakar no ita sei hetan bee uitoan deʼit. Hanesan neʼe mós se Ita la iha pasiénsia ho Ita-nia oan no obriga nia atu koʼalia ho Ita, Ita bele lakon  oportunidade atu hatene buat neʼebé nia hanoin no sente iha laran. (Lee Provérbios [Amsal] 20:5. *) Ilaria dehan katak bainhira nia sei joven, nia hakarak tebes ransu beibeik ho ninia kolega eskola sira, maibé nia mós hatene katak ida-neʼe sala. Ninia inan-aman nota katak ninia hahalok la hanesan baibain. Ilaria hatete: “Kalan ida, sira dehan katak foin daudauk sira haree haʼu triste uitoan no sira husu se iha problema ruma. Haʼu tanis kedas. Haʼu esplika haʼu-nia problema no husu sira-nia ajuda. Sira hakoʼak haʼu, dehan katak sira komprende haʼu no promete atu ajuda.” Ilaria nia inan-aman ajuda nia atu buka belun sira neʼebé diʼak husi kongregasaun laran.

15. Iha dalan saida tan mak Jesus hatudu matenek?

¹⁵ Jesus mós hatudu matenek tanba nia haree ba ninia dixípulu sira-nia hahalok diʼak. Porezemplu, bainhira Natanael rona katak Jesus mak husi Nazaré, nia hatete: “Ema diʼak ida bele mai husi Nazaré ka?” (João 1:46) Tuir Ita-nia hanoin, Natanael nia liafuan neʼe hatudu katak nia fihir ema no la iha fiar ka lae? Jesus la hanoin hanesan neʼe. Jesus hatudu matenek hodi buka buat neʼebé diʼak husi Natanael. Jesus bolu nia “ema Izraél neʼebé la iha lia-bosok iha nia”. (João 1:47) Jesus bele haree ema nia laran no nia uza ida-neʼe hodi haree ba ema nia hahalok diʼak sira.

16. Oinsá mak Ita bele ajuda Ita-nia oan joven atu haburas hahalok diʼak sira?

¹⁶ Maski Ita la bele hatene ema nia laran hanesan Jesus, maibé Jeová bele ajuda Ita hatudu matenek hodi haree ba Ita-nia oan nia hahalok diʼak sira. Se Ita la kontente ho buat ruma neʼebé Ita-nia oan joven halo, labele dehan ka hanoin katak nia “beik-teen”. Fó-hatene nia katak nia iha hahalok diʼak barak, no katak Ita hatene nia loloos hakarak halo buat neʼebé diʼak. Se nia hadiʼa ninia hahalok, maski uitoan deʼit, gaba nia. Ajuda nia atu haburas ninia hahalok diʼak sira hodi fó ba nia responsabilidade tan, se bele. Jesus halo hanesan neʼe ho ninia dixípulu sira. Tinan ida ho balu liutiha tempu neʼebé Jesus foin hasoru Natanael (neʼebé mós iha naran Bartolomeu), Jesus fó ba nia responsabilidade boot ida, neʼe mak atu sai Jesus nia apóstolu ida. Ho laran-metin, Natanael halo serbisu neʼebé Jesus fó ba nia. (Lucas 6:13, 14; Apóstolu 1:13, 14) Tan neʼe, duké halo Ita-nia oan sente katak ninia hahalok nunka monu ba Ita-nia laran, gaba nia no fó laran-manas ba nia. Tanba se Ita halo hanesan neʼe, nia sei sente katak nia bele duni halo Ita no Jeová kontente, no katak nia bele uza ninia kbiit atu serbí Jeová.

17, 18. Se Ita hakaʼas an nafatin atu ajuda Ita-nia oan serbí Jeová, neʼe bele lori rezultadu saida?

¹⁷ Nuʼudar Ita haboot Ita-nia oan, karik Ita sei sente hanesan apóstolu Paulo. Hanesan aman neʼebé hadomi nia oan, apóstolu Paulo hadomi sira neʼebé nia ajuda atu aprende kona-ba Jeová. Tan neʼe nia sente triste atu hanoin katak karik sira balu sei la tuir lia-loos. (1 Korinto 4:15; 2 Korinto 2:4) Victor, neʼebé iha oan naʼin-tolu hatete: “Tempu neʼebé ami-nia oan sira sai joven laʼós fasil deʼit. Maski nuneʼe, tempu diʼak sira mak barak liu fali tempu susar. Ho Jeová nia ajuda ami iha relasaun neʼebé besik ho ami-nia oan sira.”

¹⁸ Inan-aman, hakaʼas an nafatin atu treinu imi-nia oan. Hatudu imi-nia domin ba sira no keta rende an. Hanoin kona-ba solok neʼebé imi sei hetan bainhira sira foti desizaun atu serbí Maromak no “kontinua laʼo iha lia-loos”.—3 João 4.