Maromak nia Ukun harii ba tinan atus ida ona!
“Maromak dame nian . . . fó ba imi buat diʼak hotu neʼebé imi presiza atu halo ninia hakarak.”—EBREU 13:20, 21.
1. Oinsá mak ita hatene katak haklaken mak importante ba Jesus?
JESUS gosta tebes koʼalia kona-ba Maromak nia Ukun. Bainhira nia moris iha rai, Jesus haklaken kona-ba Ukun neʼe barak liu duké tópiku seluk. Iha Bíblia, Jesus koʼalia kona-ba Maromak nia Ukun dala 100 liu. Husi neʼe ita haree katak Maromak nia Ukun mak buat neʼebé importante tebes ba nia.—Lee Mateus 12:34.
2. Bainhira Jesus fó ninia mandamentu iha Mateus 28:19, 20, karik ba sé, no oinsá mak ita hatene? (Haree mós nota.)
2 Bainhira Jesus hetan tiha moris-hiʼas, lakleur nia hasoru ho ema naʼin-500 liu. (1 Korinto 15:6) Karik iha tempu neʼe mak Jesus fó mandamentu atu haklaken ba “ema husi nasaun hotu”. * (Haree nota iha kraik.) Knaar neʼe laʼós fasil deʼit. Jesus hatete katak serbisu haklaken neʼe sei kontinua toʼo “mundu nia rohan”. Bainhira ita haklaken liafuan diʼak ohin loron, ita rasik hola parte atu kumpre Jesus nia liafuan sira-neʼe.—Mateus 28:19, 20.
3. Buat tolu saida mak ajuda ita atu haklaken liafuan diʼak?
3 Fó tiha mandamentu neʼe, Jesus hatete: “Haʼu sei hamutuk nafatin ho imi.” (Mateus 28:20) Ho ida-neʼe, Jesus hatudu katak nia mak sei dirije serbisu haklaken neʼebé sei halaʼo iha mundu tomak. Jeová mós hamutuk ho ita. Nia fó ba ita “buat diʼak hotu” neʼebé ita presiza hodi kumpre knaar neʼe. (Ebreu 13:20, 21) Iha lisaun neʼe, ita sei koʼalia kona-ba buat diʼak tolu: (1) sasán ka ekipamentu saida deʼit mak ita uza atu haklaken, (2) iha dalan saida deʼit mak ita halaʼo serbisu haklaken, no (3) treinu saida deʼit mak ita simu. Primeiru, mai ita koʼalia kona-ba sasán no ekipamentu neʼebé ita uza durante tinan 100 nia laran.
SASÁN NO EKIPAMENTU AJUDA MAROMAK NIA ATAN SIRA ATU HAKLAKEN
4. Tanbasá mak ita uza sasán no ekipamentu oioin iha serbisu haklaken?
4 Jesus kompara “liafuan kona-ba Maromak nia Ukun” hanesan fini diʼak neʼebé kari iha rai oioin. (Mateus 13:18, 19) Hanesan toʼos-naʼin neʼebé uza sasán ka ekipamentu oioin atu fila rai antes atu kuda fini, ita-nia Liurai mós fó ba ita sasán ka ekipamentu oioin neʼebé uza hodi prepara ema rihun ba rihun nia laran atu simu mensajen kona-ba Maromak nia Ukun. Ekipamentu balu ita uza ba tempu uitoan deʼit, ekipamentu seluk sei uza toʼo agora. Maibé buat hotu neʼebé ita uza husi uluk toʼo agora ajuda ita aumenta ita-nia matenek nuʼudar haklaken-naʼin.
5. Saida mak kartaun sasin nian, no oinsá mak haklaken-naʼin sira uza ida-neʼe?
5 Husi tinan 1933, haklaken-naʼin sira uza buat ida neʼebé ajuda sira atu komesa haklaken. Sira lori kartaun sasin nian. Neʼe mak kartaun kiʼik ida neʼebé hakerek ho mensajen badak no simples husi Bíblia. Liutiha tempu uitoan, sira sempre simu fali kartaun foun ho mensajen foun atu uza. Dala primeiru irmaun Erlenmeyer haklaken iha dalan hanesan neʼe mak bainhira nia foin tinan sanulu. Nia hatete: “Ami koʼalia simples deʼit. Ami hatete, ‘Favór ida, Ita-Boot bele lee lai kartaun neʼe?’ Bainhira uma-naʼin lee tiha mensajen neʼe, ami mós fó livru sira depois mak ami foin sai husi uma neʼe.”
6. Oinsá mak kartaun sasin nian ajuda haklaken-naʼin sira?
6 Kartaun sasin nian neʼe ajuda iha dalan oioin. Porezemplu, haklaken-naʼin balu moe, no maski sira hakarak tebes atu haklaken, maibé sira la hatene atu koʼalia saida. Seluk fali, aten-brani tebes maibé koʼalia barak demais no ladún uza matenek. Tan neʼe, ho kartaun sasin nian, maski brani ka moedór, sira hotu bele hatoʼo mensajen neʼebé simples no klaru.
7. Susar saida deʼit mak irmaun-irmán sira hasoru bainhira lori kartaun sasin nian?
7 Maibé dala ruma haklaken-naʼin sira mós hasoru susar bainhira lori kartaun neʼe. Irmán Grace Estep hatete: “Dala ruma ema husu ba ami, ‘Neʼe dehan saida? Tansá la esplika deʼit mai haʼu?’” Problema ida tan mak uma-naʼin balu la bele lee saida mak hakerek iha kartaun neʼe. Balu tan hanoin katak kartaun neʼe atu fahe deʼit ba sira, entaun sira simu, depois taka odamatan. No ema balu neʼebé hirus, sira lees hotu kartaun neʼe toʼo pedasuk didiʼak. Maski sira hasoru susar sira-neʼe, maibé ho kartaun neʼe, ita-nia irmaun-irmán sira aprende atu haklaken no identifika sira-nia an nuʼudar haklaken-naʼin sira ba Maromak nia Ukun.
8. Esplika toʼok oinsá mak ema uza fonógrafu. (Haree foto iha pájina 26.)
8 Sasán ida tan neʼebé ita-nia irmaun-irmán sira uza komesa liutiha tinan 1930 mak mákina ida naran fonógrafu. Bainhira uma-naʼin fó lisensa, haklaken-naʼin uza fonógrafu hodi loke diskursu ho lian deʼit ba minutu haat ho balun, depois hatudu livru sira. Irmaun-irmán balu fó naran “Aarão” ba mákina neʼe, tanba mákina neʼe mak hanesan koʼalia ba sira. (Lee Êxodo [Keluaran] 4:14-16. *) Dala ruma, família tomak halibur atu rona gravasaun kona-ba mensajen husi Bíblia. Iha tinan 1934, ita-nia organizasaun mak halo rasik fonógrafu sira liuliu atu uza ba haklaken. Ikusmai, iha gravasaun hamutuk 92 kona-ba tópiku oioin.
9. Uza fonógrafu iha serbisu haklaken lori rezultadu saida?
9 Uma-naʼin ida naran Hillary Goslin, bainhira nia rona tiha diskursu ida, nia husu atu empresta fonógrafu neʼe ba semana ida atu nia bele fahe mensajen neʼe ho ninia viziñu sira. Rezultadu mak Hillary Goslin no ema barak neʼebé interese ba lia-loos sai ita-nia irmaun-irmán. Ikusmai irmaun Hillary nia oan-feto rua tuir eskola Gilead no sai misionária. Hanesan ho kartaun sasin nian, fonógrafu mós ajuda ema barak atu komesa haklaken. Liutiha tinan balu, Jesus treinu sira kona-ba oinsá atu haklaken, liuhusi Eskola Serbisu Kristaun.
UZA DALAN OIOIN ATU HAKLAKEN BA EMA
10, 11. Oinsá mak irmaun-irmán sira uza jornál no rádiu atu habelar lia-loos, no tanbasá mak dalan sira-neʼe diʼak?
10 Tanba ita-nia Liurai mak dirije, Maromak nia povu uza dalan oioin atu haklaken ba ema barak liu. Dalan sira-neʼe importante tebes iha tempu neʼebá tanba “serbisu-naʼin uitoan deʼit”. (Lee Mateus 9:37.) Porezemplu, uluk ita mós uza jornál sira atu habelar liafuan diʼak. Semana-semana irmaun Russell haruka diskursu ida ba asosiasaun notísias nian, no sira haruka fali ba jornál sira iha rai-Kanadá, Europa no Estadus Unidus. Toʼo tiha tinan 1913, irmaun Russell nia diskursu sira sai iha jornál oioin hamutuk 2.000 no maizumenus ema naʼin-15.000.000 mak lee!
11 Ita-nia irmaun-irmán sira mós aproveita uza rádiu atu haklaken liafuan diʼak. Iha loron 16 Abríl 1922, irmaun Rutherford hatoʼo diskursu ida iha rádiu, no ema maizumenus naʼin-50.000 mak rona. Lakleur ita-nia organizasaun mós komesa uza ita-nia estasaun rádiu rasik naran WBBR, no programa primeiru mak iha loron 24 Fevereiru 1924. The Watch Tower (Livru Haklaken) 1 Dezembru 1924 hatete: “Ami fiar katak, toʼo agora, rádiu mak dalan neʼebé diʼak liu atu habelar mensajen kona-ba lia-loos, tanba la karun no ema barak bele rona.” Hanesan jornál sira, rádiu mós sai nuʼudar buat diʼak ida atu ajuda ema barak rona kona-ba lia-loos iha fatin neʼebé haklaken-naʼin sira ladún barak.
Irmaun-irmán barak hola parte iha haklaken públiku nian no gosta hatudu ita-nia sítiu, jw.org (Haree parágrafu 12, 13)
12. (a) Haklaken públiku iha dalan saida mak Ita rasik gosta liu? (b) Saida mak bele ajuda ita atu hakaʼas an haklaken iha dalan públiku maski ita sente taʼuk?
12 Ohin loron, haklaken públiku mak dalan ida neʼebé diʼak atu fahe Bíblia nia mensajen ba ema. Ita hakaʼas an atu koʼalia ho ema iha terminál sira, karreta para fatin no merkadu sira. Ita sente taʼuk atu haklaken iha dalan sira-neʼe ka lae? Se taʼuk, halo orasaun atu husu ajuda, no hanoin kona-ba liafuan husi katuas neʼebé vizita kongregasaun naran Angelo Manera hatete. Nia dehan: “Bainhira simu matadalan kona-ba dalan foun atu haklaken, ami simu ida-neʼe nuʼudar dalan ida tan atu serbí Jeová. Ami haree ida-neʼe hanesan oportunidade ida tan atu hatudu ami-nia laran-metin ba nia, no ami prontu atu serbí nia iha dalan saida deʼit neʼebé nia hakarak.” Se ita hakaʼas an atu haklaken iha dalan foun, maski ita sente taʼuk, ita hametin ita-nia fiar ba Jeová no ita sai haklaken-naʼin neʼebé diʼak liu.—Lee 2 Korinto 12:9, 10.
13. (a) Oinsá mak uza ita-nia sítiu lori rezultadu diʼak? (b) Esperiénsia diʼak saida deʼit mak Ita rasik hetan ona bainhira uza ita-nia sítiu?
13 Haklaken-naʼin barak gosta fó-hatene ema kona-ba ita-nia sítiu jw.org, tanba iha sítiu neʼe sira bele lee no download informasaun kona-ba Bíblia iha língua hamutuk 700 liu. Loroloron, ema naʼin-1.600.000 liu mak loke ita-nia sítiu. Hanesan uluk rádiu mak ajuda ema iha fatin dook atu rona liafuan diʼak, ohin loron ita-nia sítiu mós hanesan.
FÓ TREINU ATU HAKLAKEN LIAFUAN DIʼAK
14. Haklaken-naʼin sira iha tempu neʼebá presiza treinu kona-ba saida, no eskola saida mak ajuda sira?
14 Sasán, ekipamentu no dalan haklaken neʼebé ita foin koʼalia mak diʼak tebes no hetan rezultadu diʼak. Maibé oinsá se uma-naʼin la konkorda ho buat neʼebé sira rona husi fonógrafu? Ka haklaken-naʼin bele halo saida se ema hatudu interese ba buat neʼebé nia lee iha kartaun sasin nian? Irmaun-irmán sira presiza buat ida tan atu ajuda sira iha haklaken. Neʼe mak treinu atu koʼalia ba ema. Sira presiza hatene atu koʼalia oinsá se hasoru uma-naʼin neʼebé hirus, no oinsá atu hanorin ho matenek ema neʼebé interese. Irmaun Nathan Knorr haree katak importante tebes haklaken-naʼin sira hatene oinsá atu koʼalia ba ema bainhira bá haklaken. Tan neʼe, iha tinan 1943, kongregasaun sira hahú Eskola Serbisu Kristaun neʼebé ajuda ema barak atu hanorin Bíblia ho diʼak. Ita bele fiar katak mudansa neʼe Jeová nia espíritu mak dirije.
15. (a) Konta toʼok ema nia esperiénsia balu bainhira sira hatoʼo diskursu iha Eskola Serbisu Kristaun. (b) Oinsá mak Jeová nia promete iha Salmo 32:8 ajuda ona Ita?
15 Iha tempu neʼebá, ema barak la toman atu koʼalia iha ema barak nia oin. Julio Ramu hanoin-hetan ninia diskursu primeiru iha tinan 1944. Ninia tópiku mak kona-ba mane ida iha Bíblia naran Doeg. Nia hatete: “Haʼu-nia liman, ain no ibun nakdedar hotu.” Nia hatutan tan, dehan: “Neʼe mak dala primeiru haʼu fó diskursu iha ema nia oin hanesan neʼe, maibé haʼu la rende an.” Labarik sira mós hatoʼo diskursu iha eskola neʼe, maski susar ba sira. Irmaun Manera hanoin-hetan bainhira labarik-mane ida hatoʼo ninia diskursu primeiru. Nia hatete: “Labarik neʼe nakdedar tebes toʼo nia komesa tanis. Maibé tanba nia hakarak tebes hatoʼo ninia diskursu neʼe, nia kontinua deʼit no tanis durante ninia diskursu tomak.” Oinsá ho Ita? Karik Ita moe ka sente Ita la iha matenek atu fó komentáriu ka hola parte iha reuniaun. Se nuneʼe, husu ba Jeová atu ajuda Ita. Nia sei ajuda Ita hanesan nia mós ajuda ita-nia irmaun-irmán sira iha tempu uluk.—Lee Salmo (Mazmur) 32:8. *
16. (a) Bainhira Eskola Gilead hahú iha tinan 1943, eskola neʼe nia objetivu atu fó treinu ba sé? (b) Husi tinan 2011, eskola neʼe nia objetivu atu fó treinu ba sé?
16 Maromak nia organizasaun mós fó treinu ba ema barak liuhusi Eskola Gilead. Objetivu ida ba eskola ida-neʼe mak atu ajuda estudante sira haburas hakarak neʼebé forte atu haklaken liafuan diʼak. Eskola Gilead hahú iha tinan 1943, no husi tempu neʼebá eskola neʼe fó treinu ba haklaken-naʼin neʼebé serbí iha rai seluk no eskola neʼe fó treinu ona ba ema naʼin-8.500 neʼebé bá serbí iha rai 170. Husi tinan 2011, ema neʼebé hetan konvite ba eskola neʼe mak sira neʼebé serbí ona nuʼudar pioneiru tempu-tomak, katuas sira neʼebé vizita kongregasaun, ema neʼebé serbí iha Betel, ka misionáriu sira neʼebé seidauk tuir eskola neʼe.
17. Fó toʼok ezemplu oinsá Eskola Gilead lori rezultadu diʼak.
17 Eskola Gilead neʼe lori rezultadu diʼak ka lae? Hanoin toʼok kona-ba neʼe. Iha fulan-Agostu 1949, haklaken-naʼin iha rai-Japaun la toʼo sanulu. Toʼo tiha tinan neʼe nia rohan, misionáriu naʼin-13 neʼebé hetan treinu husi Eskola Gilead mak muda ba neʼebá atu ajuda. Ohin loron, iha haklaken-naʼin maizumenus 216.000 iha Japaun, no porsentu 42 mak serbí nuʼudar pioneiru.
18. Ita iha eskola saida tan neʼebé ajuda Testemuña sira?
18 Ita-nia organizasaun mós iha eskola barak tan hanesan, Eskola ba Katuas no Atan ba Kongregasaun, Eskola Serbisu Pioneiru, Eskola ba Haklaken-Naʼin Tempu-Tomak, Eskola ba Katuas Área ho Sira-nia Feen, no Eskola ba Grupu Koordenadór ba Sukursál ho Sira-nia Feen. Treinu sira neʼebé hetan iha eskola sira-neʼe, hametin irmaun-irmán sira-nia fiar no ajuda sira hetan rezultadu diʼak iha serbisu haklaken. Ita haree ho momoos katak ita-nia Liurai Jesus kontinua fó treinu ba ninia povu.
19. Irmaun Russell dehan saida kona-ba haklaken, no oinsá mak ida-neʼe sai loos?
19 Durante tinan 100 husi tempu neʼebé Maromak nia Ukun harii iha lalehan, ita-nia Liurai Jesus Kristu kontinua dirije serbisu haklaken. Iha tinan 1916, irmaun Russell fiar katak haklaken neʼe sei halaʼo iha mundu tomak. Nia hatete: “Serbisu neʼe aumenta lalais deʼit, no sei kontinua atu aumenta, tanba evanjellu neʼe tenke habelar toʼo mundu nia rohan.” (Faith on the March, husi A. H. Macmillan, pájina 69) Serbisu neʼebé irmaun Russell koʼalia mak agora halaʼo daudaun iha mundu tomak. Ita agradese ba Jeová, Maromak dame nian, tanba nia fó ba ita buat hotu neʼebé ita presiza atu kumpre ninia hakarak!
^ par. 2 Karik ema barak husi grupu neʼe sai ema kristaun tanba apóstolu Paulo bolu sira “maun-alin naʼin-500”. Nia mós hatete: “Sira barak sei hamutuk hela ho ita, maski balu mate ona.” Husi neʼe ita haree katak, karik apóstolu Paulo no ema kristaun seluk koñese ema barak neʼebé rona Jesus nia mandamentu neʼe.
^ par. 8 Êxodo 4:14-16: “14 Ho ida-neʼe Jeová sai hirus tebes ba Moisés, no dehan: ‘Oinsá ho ó-nia maun Aarão ema Levi neʼe? Haʼu hatene katak nia bele koʼalia ho moos. No agora nia mai daudaun atu hasoru ó. Bainhira nia haree ó, ninia laran sei haksolok. 15 Entaun ó tenke koʼalia ba nia no tau liafuan sira-neʼe iha ninia ibun, no haʼu sei hamutuk ho ó no nia nuʼudar imi koʼalia, no haʼu sei hanorin imi naʼin-rua buat neʼebé imi tenke halo. 16 Nia sei reprezenta ó hodi koʼalia ba povu no nia sei hatoʼo ó-nia liafuan, no ó mak sei sai fali hanesan Maromak ba nia.”
^ par. 15 Salmo 32:8: “Haʼu sei halo ó sai matenek no hanorin ó kona-ba dalan neʼebé ó tenke tuir. Haʼu sei fó konsellu hodi tau matan ba ó.”
