IHA sidade París, iha salaun naran-boot ba konsertu nian naran Pleyel, ema ho hatais furak toʼo mai ho taksi boot sira no halo nakonu salaun neʼe. Iha maizumenus ema naʼin-3.000 husi rai hamutuk 23. Neʼe mak iha tinan 1931, sira mai laʼós atu rona konsertu maibé atu rona Joseph Rutherford neʼebé dirije serbisu haklaken iha tempu neʼebá. Diskursu sira neʼebé nia hatoʼo ho kbiit, ema tradús ba lia-fransés, alemaun, no polaku.

Iha reuniaun boot neʼe irmaun Rutherford fó laran-manas ba rona-naʼin hotu, liuliu joven kristaun sira, atu serbí nuʼudar pioneiru iha rai-Fransa. Irmaun joven ida husi rai-Inglaterra naran John Cooke, dehan nia sei nunka haluha irmaun Rutherford nia liafuan neʼebé nia hatoʼo atu book ema nia laran. Nia dehan: “Keta husik buat ida atu hapara ita foti serbisu pioneiru!” *

Irmaun Rutherford nia konvite neʼe hanesan bainhira apóstolu Paulo simu konvite atu ba rai-Masedónia. (Apóstolu 16:9, 10) Iha tempu neʼebá, ema barak simu konvite neʼe hodi foti pioneiru, inklui mós John Cooke, neʼebé ikusmai sai misionáriu ida. Durante tinan ida nia laran, pioneiru sira aumenta barak. Iha tinan 1930, iha naʼin-27 maibé toʼo tiha tinan 1931 iha pioneiru naʼin-104! Husi pioneiru sira-neʼe, barak la hatene lia-fransés, entaun oinsá mak sira bele hasoru susar neʼe, ho tan moris ho osan uitoan deʼit no hela dook husi sira-nia maluk sira?

Pioneiru sira neʼebé la hatene lia-fransés, baibain sira fó deʼit kartaun ida ba uma-naʼin lee mensajen husi Bíblia. Irmaun ida husi Alemaña neʼebé haklaken ho aten-brani iha París hatete: “Ami hatene ami-nia Maromak mak Maromak forsa nian. Maibé se ami laran-taridu, neʼe laʼós tanba ami taʼuk ema, maibé tanba ami taʼuk karik ami sei haluha fraze kiʼik neʼe: ‘Voulez-vous lire cette carte, s’il vous plaît? [Favór ida, bele lee mensajen neʼe?]’ Ami hatene katak ami-nia serbisu neʼe importante tebes.”

Dala ruma, bainhira haklaken iha apartamentu sira, serbisu-naʼin sira neʼebé tau matan ba uma neʼe mak duni sai sira. Iha irmán naʼin-rua husi Inglaterra, sira ladún hatene lia-fransés. Serbisu-naʼin ida hirus no hakarak hatene sira mai vizita sé. Irmán ida koko halo kalma serbisu-naʼin neʼe. Nia haree letra balu bahat iha odamatan no hanoin neʼe mak uma-naʼin nia naran. Nia hatete: “Ami mai atu vizita señora Tournez le bouton.” Nia la hatene katak tuir loloos liafuan sira-neʼe dehan, “Buti bell odamatan nian.” Hodi hamnasa deʼit bainhira halo sala kona-ba língua, neʼe ajuda tebes pioneiru sira.

Iha tempu neʼebá, ema iha rai-Fransa moris simples tanba osan uitoan deʼit. Pioneiru sira mós hanesan neʼe. Irmán ida husi Inglaterra naran Mona Brzoska konta esperiénsia kona-ba buat neʼebé nia no ninia maluk pioneiru hasoru. Nia dehan: “Ami-nia uma simples liu, no problema boot ida mak tempu malirin. Ami-nia kuartu malirin para mate no iha dadeer, bee neʼebé ami uza atu hariis sai tiha jelu fatuk!” Pioneiru sira iha tempu neʼebá sai laran-tun tanba la iha sasán diʼak iha sira-nia uma ka lae? Lae duni. Irmaun ida hatete: “Maski ami-nia sasán la barak, maibé ami la falta buat ida.”—Mateus 6:33.

Pioneiru sira-neʼe neʼebé aten-brani tebes mós iha susar ida tan atu hasoru. Neʼe mak hela dook husi sira-nia maluk sira seluk. Iha tinan 1930, haklaken-naʼin sira iha rai-Fransa maizumenus naʼin-700 deʼit, no sira barak hela namkari iha rai neʼe. Saida mak ajuda sira kontente nafatin? Mona esplika: “Ami tahan hasoru ida-neʼe hodi estuda hamutuk ita-nia livru sira kona-ba Bíblia. Iha tempu neʼebá, ita seidauk hahú arranju atu halo vizita fali no estuda ho ema, entaun iha loraik ami iha tempu atu hakerek karta ba família no liuliu pioneiru sira seluk, atu fahe esperiénsia sira no fó laran-manas ba malu.”—1 Tesalónika 5:11.

Pioneiru sira-neʼe hanoin pozitivu nafatin, maski hasoru susar oioin. Ita hatene ida-neʼe liuhusi surat sira neʼebé sira haruka ba sukursál bainhira sira serbí tiha ba tinan barak iha rai-Fransa. Annie Cregeen, irmán kose-mina ida, hamutuk ho ninia laʼen, haklaken iha rai-Fransa tomak husi tinan 1931 toʼo 1935. Nia hakerek dehan: “Ami-nia moris iha tempu neʼebá kontente tebes! Ami pioneiru sira mak belun neʼebé besik ba malu. Hanesan apóstolu Paulo hatete, ‘Haʼu kuda, Apolo rega, maibé Maromak mak halo moris.’ Ba ami neʼebé iha oportunidade atu ajuda ema barak iha tempu neʼebá, ami kontente tebes hodi haree katak liafuan sira-neʼe mak loos.”—1 Korinto 3:6.

Ba ema seluk neʼebé hakarak aumenta sira-nia haklaken, pioneiru sira-neʼe hatudu ezemplu diʼak kona-ba laran-manas no tahan hasoru situasaun oioin. Ohin loron iha pioneiru naʼin-14.000 neʼebé serbí iha rai-Fransa. Barak husi sira-neʼe mak serbí iha kongregasaun ka grupu neʼebé uza língua seluk. * Hanesan pioneiru sira neʼebé uluk, sira mós la husik buat ida hapara sira!—Husi ita-nia arkivu iha Fransa.