Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

Sé mak Gog husi rai-Magog neʼebé temi iha livru Ezequiel?

Neʼe laʼós Satanás, maibé neʼe refere ba nasaun sira husi mundu tomak neʼebé koko atu halakon Maromak nia povu bainhira terus boot hahú ona.​—15/5, p. 29-30.

Oinsá mak Jesus nia milagre sira hatudu katak nia laran-luak?

Iha festa kazamentu ida iha Kaná Jesus halo bee maizumenus litru 380 nakfila sai tua diʼak. Nia mós fó-han ba ema naʼin-5.000 liu. (Mateus 14:14-21; João 2:6-11) Milagre rua neʼebé nia halo neʼe hatudu katak nia banati-tuir ninia Aman nia laran-luak.​—15/6, p. 4-6.

Oinsá mak ita hatene katak ita ema sala-naʼin bele halo Maromak kontente?

Mane sira husi Bíblia hanesan Job, Lot, no Liurai David, sira hotu halo sala. Maibé sira hakarak halo tuir Maromak ho laran tomak. Sira hakribi sira-nia sala no troka sira-nia hahalok. Maromak simu sira no nia mós sei simu ita.​—1/10, p. 10-12.

Bainhira Babilónia Boot lakon ona, neʼe katak ema hotu neʼebé mai husi relijiaun falsu mós sei mate dala ida deʼit ka lae?

Lae. Zacarias (Zakharia) 13:4-6 hatudu katak relijiaun nia ulun-naʼin balu mós sei finje katak sira la iha relijiaun no nega sira la mai husi relijiaun falsu.​—15/7, p. 15-16.

Ema kristaun ida bele hanoin kleʼan kona-ba saida deʼit?

Ita bele hanoin kleʼan kona-ba Jeová nia kriasaun, ninia Liafuan, Bíblia, orasaun, no Jesus nia sakrifísiu.​—15/8, p. 10-13.

Oinsá mak liafuan ‘keta ransu ho ema aat’ mós kona ho hili namora?

Ita hakarak hatudu laran-diʼak ba ema hotu, maibé sala atu Testemuña ba Jeová ida neʼebé klosan, namora ho ema neʼebé seidauk dedika an no batizmu, no la hatudu laran-metin ba Jeová no la respeitu Maromak nia matadalan. (1 Korinto 15:33)​—15/8, p. 25.

Saida mak ita bele halo agora atu prepara ba moris iha mundu foun?

Ita presiza tuir arranju husi Jeová nia organizasaun, rona ba sira neʼebé dirije ita, simu ho laran knaar foun neʼebé ita hetan, hatudu pasiénsia, no fó perdua ba malu.—15/8, p. 20-21.

Saida mak halo Pedro lakon ninia fiar, no oinsá mak nia hetan fali ninia fiar?

Ho fiar neʼebé metin Pedro tun husi ró no laʼo ba Jesus husi bee leten. (Mateus 14:24-32) Maibé kuandu nia haree anin-boot, nia sai taʼuk. Depois, nia hateke fali ba Jesus no husu Jesus atu ajuda nia.​—15/9, p. 16-17.

Iha dalan haat saida mak Jeová hatudu ninia domin mai ita?

(1) Nia tau matan ita-nia moris ho domin, (2) nia hanorin lia-loos ba ita, (3) nia fó konsellu no dixiplina ba ita, no (4) nia proteje ita.​—15/9, p. 19-22.

Saida mak ita aprende husi Marta neʼebé okupadu ho serbisu barak?

Marta okupadu hodi prepara teʼin hahán diʼak. Jesus dehan katak Maria hili buat neʼebé diʼak tanba nia rona ba Jesus. Ita presiza kuidadu atu la husik buat ruma dada ita-nia atensaun hodi hanetik ita atu halo buat neʼebé importante liu, neʼe mak ita-nia adorasaun ba Jeová.​—15/10, p. 18-20.