1, 2. Saida mak Maromak halo iha Bíblia nia tempu? Ohin loron ema moras balu husu saida?

SE ITA moras todan, dala ruma ita hanoin: ‘Haʼu sei sai diʼak fali ka lae?’ Ka karik Ita-nia família ida moras no Ita hakarak hatene se sira sei sai diʼak fali ka lae. Ita ema sempre hakarak atu iha saúde diʼak. Bíblia mós konta kona-ba ema balu neʼebé hakarak hatene kona-ba sira-nia saúde. Porezemplu, Akabe no Jezabel nia oan, Liurai Akazias, hanoin se ninia kanek sei sai diʼak fali ka lae. No Liurai Ben-hadad husi Síria neʼebé moras todan, nia husu: “Haʼu sei sai isin-diʼak fali husi moras neʼe ka lae?”—2 Reis (Raja-Raja) 1:2; 8:7, 8.

² Iha tempu uluk, dala ruma Jeová halo milagre hodi kura ema moras. No liuhusi ninia profeta sira, nia mós fó moris-hiʼas ba ema balu neʼebé mate ona. (1 Reis [Raja-Raja] 17:17-24; 2 Reis [Raja-Raja] 4:17-20, 32-35) Ohin loron, ema neʼebé moras karik husu, ‘Maromak sei halo nafatin milagre ka lae?’

3-5. Jeová no Jesus iha kbiit atu halo saida? Pergunta saida deʼit mak ita sei koʼalia?

³ Jeová iha duni kbiit atu halo diʼak ema nia saúde. Dala ruma nia mós fó kastigu moras ba ema, hanesan Liurai Ejitu nian iha Abraão nia tempu, no mós Moisés nia biin Miriam.  (Gênesis [Kejadian] 12:17; Números [Bilangan] 12:9, 10; 2 Samuel 24:15) Nia mós fó kastigu moras ba ema Izraél bainhira sira la halo tuir nia. (Deuteronômio [Ulangan] 28:58-61) Maibé dala ruma mós Jeová proteje ninia povu husi moras. (Êxodo [Keluaran] 23:25; Deuteronômio [Ulangan] 7:15) Nia mós kura sira. Porezemplu, Job moras todan no hakarak atu mate deʼit maibé Jeová kura nia.—Jó (Ayub) 2:7; 3:11-13; 42:10, 16.

⁴ Ita fiar duni katak Jeová iha kbiit atu kura ema moras sira. Jesus mós bele kura ema moras. Bainhira nia iha rai, nia kura ema neʼebé moras hanesan lepra no bibi-maten. Nia halo ema matan-delek haree fali no nia kura mós ema isin-matek sira. (Lee Mateus 4:23, 24; João 9:1-7) Ita kontente lee kona-ba milagre sira-neʼe tanba neʼe hatudu buat neʼebé Jesus sei halo iha mundu foun. Iha tempu neʼebá, “la iha ema ida neʼebé hela iha rai sei dehan: ‘Haʼu moras.’”—Isaías (Yesaya) 33:24.

⁵ Maibé oinsá ho ohin loron? Ita bele hein katak Jeová no Jesus sei halo milagre ruma atu kura ita ka lae? No saida mak ita presiza hanoin bainhira ita atu hili ai-moruk no tratamentu ruma?

6. Bíblia hatete saida kona-ba milagre sira neʼebé ema kristaun sira halo iha tempu uluk?

⁶ Iha apóstolu sira-nia tempu, Maromak fó ninia espíritu santu ba ema kristaun balu atu halo milagre. (Apóstolu 3:2-7; 9:36-42) Balu bele kura ema no koʼalia língua oioin. (1 Korinto 12:4-11) Maibé milagre sira-neʼe para ona, hanesan Bíblia hatete nanis. (1 Korinto 13:8) Tan neʼe, ohin loron ita la bele hein katak Maromak sei kura ita ka ema seluk.

7. Oinsá mak Salmo (Mazmur) 41:3 fó laran-manas ba ita?

⁷ Maibé se Ita moras daudaun, Ita bele fiar katak Jeová sei fó kmaan no apoia Ita, hanesan nia halo ba ninia atan sira iha tempu uluk. Liurai David hakerek, dehan: “Haksolok ba ema neʼebé hatudu laran-diʼak ba ema kiʼik; iha loron terus nian Maromak Jeová sei salva nia. Jeová sei proteje no tau matan ba nia moris.” (Salmo [Mazmur] 41:1, 2) Ho liafuan sira-neʼe, David la dehan katak ema neʼebé hatudu laran-diʼak ba ema kiʼik ida sei nunka mate. Se nuneʼe, oinsá mak Jeová sei ajuda ema diʼak neʼe? David esplika: “Jeová sei fó forsa ba nia atu tahan kuandu nia moras no latan iha toba-fatin; nia toba-fatin tomak Ita sei troka iha tempu nia moras.” (Salmo [Mazmur] 41:3) Jeová hatene didiʼak ema diʼak ida nia terus no nia la haluha sira. Nia bele fó ba sira aten-brani no matenek. Jeová mós halo ita-nia isin iha dalan neʼebé bele hadiʼa an rasik.

8. Tuir Salmo (Mazmur) 41:4, saida mak David husu Jeová atu halo?

⁸ Iha Salmo (Mazmur) 41, David konta kona-ba tempu neʼebé nia moras todan no sente laran-taridu. Nia halo orasaun ba Jeová, dehan: “Oh, Jeová, hatudu laran-sadiʼa mai haʼu. Kura haʼu bá, tanba haʼu halo sala ona hasoru Ita.” (Salmo [Mazmur] 41:4) Karik David hakerek liafuan sira-neʼe kona-ba tempu neʼebé ninia oan Absalão koko atu hadau ninia ukun. David moras todan no la bele halo buat ida atu hapara Absalão. Nia mós la haluha ninia sala rasik neʼebé nia halo ho Batseba no rezultadu husi sala neʼe. (2 Samuel 12:7-14) Maski nuneʼe, David hatene katak Jeová fó ona  perdua ba ninia sala neʼe no nia sadere ba Jeová durante tempu nia moras. Maibé David hanoin katak Jeová sei kura duni nia ka lae?

9. (a) Saida mak Jeová halo ba Liurai Ezekias? (b) David hakarak saida husi Jeová?

⁹ Jeová dala ruma hili atu kura ema balu. Porezemplu, bainhira Liurai Ezekias “sai moras no besik atu mate”, Jeová kura nia no Ezekias moris ba tinan 15 tan. (2 Reis [Raja-Raja] 20:1-6) Maibé David la hein Jeová atu halo milagre ida ba nia. Tuir loloos, nia hakarak Jeová atu ajuda nia hanesan Jeová mós sei ajuda “ema neʼebé hatudu laran-diʼak ba ema kiʼik”. David nia relasaun ho Jeová metin, tan neʼe nia bele husu Jeová atu fó kmaan ba nia no apoia nia durante nia moras. Nia mós husu Jeová atu ajuda nia hodi nia isin bele sai diʼak rasik fali. Ita mós bele husu Jeová hanesan neʼe.—Salmo (Mazmur) 103:3.

10. Saida mak akontese ba Trófimo no Epafrodito, no ida-neʼe hanorin saida ba ita?

¹⁰ Apóstolu Paulo no ema seluk iha tempu neʼebá hetan kbiit atu kura ema nia moras, maibé laʼós ema kristaun hotu iha tempu neʼebá hetan kura ba sira-nia moras. (Lee Apóstolu 14:8-10.) Apóstolu Paulo kura ema ida naran Públio nia aman, neʼebé isin-manas no moras iha kabun, nia “halo orasaun, no tau liman ba nia no kura nia”. (Apóstolu 28:8) Maibé apóstolu Paulo la kura ema hotu neʼebé nia koñese. Trófimo mak ninia belun ida neʼebé laʼo hamutuk ho nia. (Apóstolu 20:3-5, 22; 21:29) Bainhira Trófimo sai moras, nia la bele kontinua nia viajen ho Paulo, no Paulo la halo milagre atu kura nia. Tan neʼe, Trófimo presiza hela iha sidade Mileto atu deskansa no sai isin-diʼak fali. (2 Timóteo 4:20) Paulo nia belun seluk, Epafrodito, nia mós moras no besik atu mate, maibé Bíblia la dehan katak Paulo kura nia.—Filipe 2:25-27, 30.

11, 12. Tanbasá mak Lucas sai ajuda boot ida ba Paulo, no saida mak ita hatene kona-ba Lucas?

¹¹ Lucas mak doutór ida neʼebé laʼo hamutuk ho apóstolu Paulo. (Apóstolu 16:10-12; 20:5, 6; Koloso 4:14) Karik nia fó ajuda ba Paulo no ema seluk se sira sai moras bainhira halaʼo hela viajen ida. (Galásia 4:13) Hanesan Jesus hatete, “ema neʼebé moras” presiza doutór ida.—Lucas 5:31.

¹² Bíblia la hatete iha neʼebé ka bainhira mak Lucas simu treinu atu sai doutór. Karik nia tuir eskola ida iha Laodiseia, sidade ida besik Koloso tanba Paulo dehan katak Lucas fó kumprimentus ba ema iha Koloso. Maski ita la hatene kona-ba neʼe, maibé buat neʼebé ita hatene kona-ba Lucas mak nia doutór ida. Nia mak doutór neʼebé tuir ona eskola, laʼós ema neʼebé naran fó konsellu deʼit kona-ba saúde. Ita hatene ida-neʼe tanba bainhira nia hakerek Evanjellu Lucas no livru Apóstolu, nia uza liafuan médiku nian barak no nia mós koʼalia barak kona-ba Jesus kura ema nia moras.

13. Tanbasá mak ita tenke kuidadu antes atu rona ka fó sujestaun ruma kona-ba saúde?

¹³ Ohin loron, ita-nia maluk kristaun sira la bele halo milagre atu kura ita. Maibé ema balu tanba hakarak ajuda, fó konsellu ba ita, maski ita la husu. Sujestaun balu bele ajuda duni ita. Porezemplu, apóstolu Paulo fó sujestaun ba Timóteo atu hemu tua-uvas uitoan. Neʼe tanba Timóteo moras iha kabun, karik  tanba nia hemu bee neʼebé la moos. * (Haree nota iha kraik.) (Lee 1 Timóteo 5:23.) Maibé ita mós presiza kuidadu. Karik ita-nia maluk obriga ita hemu ai-moruk ruma, ai-tahan ka ai-abut ruma, ka atu han ka la bele han hahán ruma. Dala ruma ema fó sujestaun hanesan neʼe tanba sira dehan neʼe ajuda ona ema ruma iha sira-nia família neʼebé moras hanesan ita-nian. Maibé neʼe la dehan katak ida-neʼe mós sei ajuda ita. Ita presiza kuidadu tanba karik ai-moruk ka tratamentu neʼebé ema barak uza mós bele lori rezultadu neʼebé ladiʼak ba ita-nia saúde.—Lee Provérbios (Amsal) 27:12. *

14, 15. (a) Ema balu iha mundu neʼe halo saida hodi aproveita ema nia osan? (b) Saida mak ita bele aprende husi Provérbios (Amsal) 14:15?

¹⁴ Ita hotu hakarak saúde neʼebé diʼak atu bele goza moris no serbí Jeová ho forsa tomak. Maibé tanba ita sala-naʼin, ita hotu dala ruma sai moras. Ohin loron iha ai-moruk no tratamentu oioin neʼebé ita rasik iha direitu atu hili. Maibé ita presiza kuidadu tanba iha mundu neʼe bele aproveita ema nia moras atu manán osan. Karik ema ka kompañia balu bele lohi katak sira hetan ona tratamentu ruma, maibé neʼe atu buka osan deʼit. Se ita mak moras daudaun, karik ita hakarak koko buat sira-neʼe tanba ita hakarak sai diʼak no lakohi mate. Maibé hanoin-hetan nafatin liafuan iha Bíblia neʼebé dehan: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.”—Provérbios (Amsal) 14:15.

¹⁵ Se ita mak matenek, ita sei kuidadu tebes bainhira rona ema seluk nia konsellu, liuliu se ema neʼe seidauk simu treinu médiku nian. Husu ba ita-nia an: ‘Oinsá mak haʼu bele hatene loloos se ai-moruk ka tratamentu neʼe ajuda duni ema seluk ka lae? Maski ajuda ona sira, oinsá mak haʼu hatene ida-neʼe mós diʼak mai haʼu? Diʼak se haʼu buka-hatene liután kona-ba haʼu-nia moras no koʼalia ba doutór kona-ba neʼe ka lae?’—Deuteronômio (Ulangan) 17:6.

16. Saida mak ita presiza hanoin bainhira halo desizaun ruma kona-ba ita-nia saúde?

¹⁶ Bainhira ita atu deside kona-ba tratamentu ruma, ita presiza iha “hanoin neʼebé loos”. (Tito 2:12) Neʼe importante tebes liuliu se tratamentu neʼe la hanesan baibain. Diʼak atu buka-hatene pergunta sira-neʼe: Ema neʼebé fó tratamentu neʼe ba ita bele esplika didiʼak oinsá tratamentu neʼe bele ajuda ka lae? Ninia esplikasaun neʼe rona hanesan buat ruma la loos uitoan ka lae? Doutór barak konkorda katak ida-neʼe bele kura ema ka lae? (Provérbios [Amsal] 22:29) Karik ema ida dehan katak iha rai ida ema seluk hetan ona ai-moruk neʼebé bele kura moras ruma, maibé doutór sira seidauk hatene kona-ba neʼe. Tan neʼe, husu ba ita-nia an, ‘Ema nia koʼalia neʼe, iha ona prova ka lae?’ Iha tan ema seluk neʼebé dehan katak sira-nia ai-moruk halo husi ai-tahan ka ai-abut ruma no iha forsa ka kbiit espesiál neʼebé bele kura. Se ita rona neʼe ita presiza kuidadu tebes tanba Maromak fó avizu ba ita atu labele uza “forsa masonik nian” ka  “matan-dook” nia atividade.—Deuteronômio (Ulangan) 18:10-12; Isaías (Yesaya) 1:13.

17. Ita hotu hakarak iha saúde oinsá?

¹⁷ Grupu Administradór iha apóstolu sira-nia tempu haruka karta ba irmaun-irmán iha kongregasaun sira hodi fó-hatene buat balu neʼebé sira presiza sees. Iha karta neʼe nia rohan, sira hatete: “Se imi halo tuir buat sira-neʼe ho didiʼak, imi-nia moris sei sai diʼak. Adeus!” (Apóstolu 15:29) Iha língua orijinál, liafuan neʼebé tradús nuʼudar “Adeus” mós iha arti katak “Saúde diʼak ba imi”. Maski ida-neʼe dalan seluk atu fó adeus ema, maibé neʼe hatudu katak ita hotu hakarak saúde neʼebé diʼak.

18, 19. Saida mak ita bele hein iha mundu foun?

¹⁸ Tanba ita hotu sala-naʼin, moras mak buat ida neʼebé ita hotu tenke hasoru. Bainhira ita moras, ita la hein milagre ida husi Jeová atu kura ita. Maibé ita bele hein ba futuru bainhira Jeová sei kura moras hotu. Iha Apokalipse 22:1, 2, apóstolu João koʼalia kona-ba “bee moris nian” no “ai-hun moris nian” neʼebé sei kura ema hotu. Neʼe laʼós kona-ba ai-moruk ruma atu hemu agora ka iha mundu foun, maibé ida-neʼe koʼalia kona-ba buat hotu neʼebé Jeová fó ba ita liuhusi Jesus, hodi ita bele moris ba nafatin.—Isaías (Yesaya) 35:5, 6.

¹⁹ Ita hein namanas mundu foun. Maibé antes toʼo tempu neʼe, ita bele fiar katak Jeová hadomi tebes ita ida-idak no nia komprende ita-nia sentimentu bainhira ita terus. Hanesan David, ita hatene katak Jeová sei la husik ita iha tempu neʼebé ita moras. Nia sempre tau matan ba ema neʼebé laran-metin ba nia.—Salmo (Mazmur) 41:12.