1-3. (a) Tanbasá mak Maromak nia hanoin no kbiit língua nian aas liu ema nian? (b) Ita sei koʼalia kona-ba saida iha lisaun neʼe?

MAROMAK JEOVÁ kria anju no ema tanba nia hakarak sira mós bele goza moris no solok husi nia. (Salmo [Mazmur] 36:9; 1 Timóteo 1:11) Kriasaun primeiru neʼebé Jeová kria mak ida neʼebé apóstolu João bolu nuʼudar “Liafuan”. (João 1:1; Apokalipse 3:14) Maromak Jeová sempre koʼalia ho ninia Oan-Mane primeiru neʼe, Nia fahe Ninia hanoin no sentimentu ba nia. (João 1:14, 17; Koloso 1:15) Anju sira iha lalehan mós koʼalia ba malu, no lian neʼebé sira uza mak apóstolu Paulo bolu nuʼudar “anju nia lian”, lian neʼebé aas liu ema nia língua.—1 Korinto 13:1.

² Jeová koñese didiʼak anju no ema hotu. Tan neʼe mak bainhira ema rihun ba rihun halo orasaun ba nia ho língua oioin no iha tempu neʼebé hanesan, nia bele komprende no rona hotu orasaun sira-neʼe. Laʼós neʼe deʼit, iha tempu neʼebé hanesan mós nia koʼalia no fó matadalan daudauk ba anju sira iha lalehan. Jeová nia hanoin, kbiit língua nian, no kbiit koʼalia nian aas tebes, tan neʼe nia bele halo buat sira neʼebé ema nunka bele halo. (Lee Isaías [Yesaya] 55:8, 9. *) Ita bele fiar katak bainhira Jeová atu koʼalia ba ema, nia  uza dalan koʼalia neʼebé simples hodi ema bele komprende ninia liafuan sira.

³ Iha lisaun neʼe ita sei haree oinsá mak Jeová uza dalan neʼebé klaru hodi koʼalia ba ninia ema sira. Ita mós sei haree oinsá mak Jeová troka dalan nia koʼalia ba ninia ema tuir tempu no situasaun ida-idak.

4. (a) Língua saida mak Jeová uza hodi koʼalia ho Moisés, Samuel, no David? (b) Bíblia iha informasaun saida deʼit?

⁴ Iha jardín Eden, Jeová uza ema nia língua mak koʼalia ho Adão, no karik Jeová uza lia-ebraiku antigu nian mak koʼalia ho nia. Ikusmai Jeová mós koʼalia ba ema hanesan Moisés, Samuel, no David. Maski ema sira-neʼe uza lia-ebraiku no uza sira-nia jeitu rasik hodi hakerek fali liafuan sira neʼebé sira rona husi Jeová, maibé sira hakerek deʼit Jeová nia hanoin. Dala ruma sira hakerek liafuan ida-idak neʼebé Jeová fó sai ba sira, dala ruma tan kona-ba Jeová nia relasaun ho ninia povu, povu nia fiar, sira-nia domin, sira-nia sala, no oinsá sira la hatudu laran-metin. Informasaun sira-neʼe, ohin loron mós iha folin boot mai ita.—Roma 15:4.

5. Jeová hakarak koʼalia ba ninia ema ho lia-ebraiku deʼit ka lae? Esplika toʼok.

⁵ Jeová mós sempre uza língua neʼebé tuir tempu ida-idak hodi koʼalia ba ema, laʼós ho lia-ebraiku deʼit. Porezemplu, bainhira ema Izraél livre ona husi Babilónia, língua neʼebé ema barak uza loroloron mak lia-aramaiku. Karik tanba razaun neʼe mak Jeová leno profeta Daniel, Jeremias, no amlulik Esdras hodi uza lia-aramaiku atu hakerek parte balu husi eskritura sira. *—Haree nota iha kraik.

6. Tanbasá mak ema tradús Eskritura Lia-Ebraiku ba lia-gregu?

⁶ Iha tempu neʼebé Alexandre Boot mak domina hela mundu tomak, lia-gregu koine mak língua internasionál nian. Ema judeu barak mós aprende koʼalia língua neʼe, no ikusmai ema judeu naʼin-72 tradús fali Eskritura Lia-Ebraiku ba lia-gregu nian. Tradusaun neʼe mak bolu naran Septuajinta. Neʼe tradusaun Bíblia primeiru no tradusaun neʼe importante tebes. * (Haree nota iha kraik.) Tanba ema barak mak tradús, neʼe mós hamosu jeitu tradusaun oioin kona-ba tradusaun neʼe. Ema balu gosta tradús liafuan ida-idak, balu lakohi halo hanesan neʼe. Maski nuneʼe, ema judeu neʼebé koʼalia lia-gregu no ema kristaun sira fiar nafatin katak tradusaun Septuajinta mak Maromak nia Liafuan nafatin.

7. Karik língua saida mak Jesus uza hodi hanorin ninia dixípulu sira?

⁷ Bainhira Jesus moris iha rai, karik nia koʼalia no hanorin ema ho lia-ebraiku. (João 19:20; 20:16; Apóstolu 26:14) Iha Jesus nia tempu, karik lia-ebraiku kahur ona ho lia-aramaiku, tan neʼe, karik Jesus mós uza lia-aramaiku balu. Ita mós bele fiar katak Jesus komprende kona-ba lia-ebraiku antigu neʼebé Moisés no profeta seluk uza, tanba ema uza língua neʼe mak lee iha sinagoga sira semana-semana. (Lucas 4:17-19; 24:44, 45; Apóstolu 15:21) Iha Jesus nia tempu, ema mós koʼalia lia-gregu no latín iha Izraél, maibé eskritura sira la temi kona-ba Jesus koʼalia ka lae língua sira-neʼe.

8, 9. Tanbasá mak iha apóstolu sira-nia tempu ema kristaun barak koʼalia lia-gregu, no ida-neʼe hanorin ita saida kona-ba Jeová?

⁸ Jerasaun primeiru husi Jesus nia dixípulu hatene koʼalia lia-ebraiku, maibé bainhira Jesus mate tiha, dixípulu sira seluk mós  koʼalia língua seluk tan. (Lee Apóstolu 6:1.) Iha tempu neʼebé haklaken habelar daudauk ba fatin oioin, ema kristaun sira iha tempu neʼebá uza lia-gregu. Tan neʼe mak Evanjellu husi Mateus, Marcos, Lucas, no João neʼebé ema hetan iha tempu neʼebá, hakerek ho lia-gregu. * (Haree nota iha kraik.) Nuneʼe mós eskritura seluk no karta sira neʼebé apóstolu Paulo hakerek, hakerek ho lia-gregu.

⁹ Bainhira hakerek-naʼin Bíblia sira atu hakerek Eskritura Lia-Gregu nian no se sira presiza temi eskritura husi Eskritura Lia-Ebraiku ruma, baibain sira foti husi Septuajinta. Maski liafuan sira husi Septuajinta la hanesan uitoan ho liafuan orijinál husi lia-ebraiku nian, maibé Jeová simu nafatin liafuan sira-neʼe hodi sai parte ida ba Bíblia. Tan neʼe mak, maski ema la perfeitu mak tradús eskritura sira-neʼe, maibé Maromak simu nuʼudar ninia Liafuan. Ida-neʼe hatudu duni katak Jeová nunka haree katak língua ida ka kultura ida mak diʼak liu fali seluk.—Lee Apóstolu 10:34.

10. Husi dalan neʼebé Jeová koʼalia ba ema, ita aprende saida kona-ba nia?

¹⁰ Loos duni, Jeová koʼalia ba ema tuir tempu no situasaun ida-idak. Jeová nunka obriga ita atu aprende língua foun ida mak foin bele koñese nia ka foin bele hatene ninia hakarak sira. (Lee Zacarias [Zakharia] 8:23 *; Apokalipse 7:9, 10.) Maski nia mak leno ema hodi hakerek Bíblia, maibé nia husik ema uza sira-nia dalan hakerek hodi hakerek sai ninia hanoin.

11. Oinsá mak ita hatene katak língua la bele hanetik Jeová atu koʼalia ba ema?

¹¹ Maski iha língua oioin no ema la perfeitu mak tradús eskritura sira, maibé neʼe la sai problema ba Jeová atu koʼalia ba ema. Porezemplu, bainhira ita lee Bíblia, ita bele lee liafuan balu deʼit neʼebé Jesus koʼalia iha lia orijinál. (Mateus 27:46; Marcos 5:41; 7:34; 14:36) Maski nuneʼe, Jeová kontrola didiʼak nafatin hodi ema la bele falta atu tradús Jesus nia liafuan sira ba língua gregu ka língua seluk tan. Ikusmai, tanba atu proteje hodi Maromak nia Liafuan la bele lakon, ema judeu no ema kristaun barak kopia manuskritu sira beibeik. No manuskritu sira-neʼe mós tradús fali ba língua barak. Liutiha tinan 400 hanesan neʼe husi Jesus nia tempu, ema ida naran John Chrysostom hatete katak ema mós tradús ona Jesus nia hanorin iha língua ba rai hanesan Síria, Ejitu, Pérsia, Índia, Etiópia, no seluk tan.

12. Iha dalan saida mak ema koko atu halakon Bíblia?

¹² Maizumenus tinan 300 liu tiha husi tempu  neʼebé Jesus moris, liurai Roma ida naran Diocleciano fó orden hodi ema halakon hotu eskritura sira. Maibé tanba ema tradús ona Bíblia ba língua oioin, entaun ninia hakarak neʼe la bele sai susesu. Ikusmai iha mós ema barak mak koko makaʼas atu halakon Maromak nia Liafuan no koko hanetik ema seluk atu la bele tradús ka fahe fali Bíblia ba ema seluk. Ezemplu ida mak tinan 1.500 liu tiha husi tempu neʼebé Jesus moris, William Tyndale deside atu tradús Bíblia husi lia-ebraiku no lia-gregu ba fali inglés. Nia hatete katak, se Maromak mak fó nia moris naruk, nia fiar katak nia sei halo toos-naʼin nia oan ida mós bele hatene Bíblia liu fali amlulik. Maibé tanba ema atu haterus nia, nia presiza halai husi Inglaterra ba rai-Europa hodi kontinua tradús no halo Bíblia. Maski ulun-naʼin relijiaun sira koko makaʼas atu sunu Bíblia hotu, maibé Bíblia tradusaun Tyndale nian ema fahe nafatin. Ikusmai tanba ema trai Tyndale, sira kaer nia no kesi ninia kakorok toʼo mate, depois sunu iha ai-riin. Maski nia mate, ninia tradusaun sei uza toʼo agora. No bainhira ema prepara atu halo Bíblia tradusaun King James nian, ema uza duni ninia tradusaun neʼe hodi halo preparasaun sira.—Lee 2 Timóteo 2:9.

13. Manuskritu antigu sira hatudu saida kona-ba Bíblia ohin loron?

¹³ Bainhira matenek-naʼin sira estuda Bíblia tuan ka antigu, sira hetan duni sala balu no iha fatin balu la hanesan, maibé neʼe kiʼik tebes. Matenek-naʼin sira estuda manuskritu rihun ba rihun no tradusaun antigu oioin hodi kompara ida-idak. Kompara tiha, sira haree duni katak, maski versíkulu balu mak la hanesan, maibé informasaun sira sei hanesan nafatin. Manuskritu antigu sira-neʼe halo ita fiar ho laran tomak katak Bíblia neʼebé ita iha ohin loron mak Jeová nia Liafuan duni.—Isaías (Yesaya) 40:8. * (Haree nota iha kraik.)

14. Bíblia tradús ona ba língua hira, no iha fatin neʼebé deʼit mak ita bele hetan Bíblia?

¹⁴ Maski inimigu sira kontra makaʼas, maibé Jeová proteje nafatin ninia Liafuan hodi ema iha mundu tomak bele lee nafatin. Ohin loron Bíblia tradús ona ba língua 2.800 liu. La iha livru seluk mak bele kompara ho Bíblia. Bíblia mak livru neʼebé ema fahe barak liu no ema bele hetan iha fatin ka língua oioin. Maski iha tradusaun balu ladún moos no iha sala uitoan, maibé kuaze husi tradusaun Bíblia hotu ema sei nafatin bele aprende lia-loos hodi bele hetan esperansa no salvasaun.

15. (a) Komesa husi tinan 1919, iha mudansa saida deʼit? (b) Tanbasá mak uza inglés hodi fahe ai-han espirituál nian?

¹⁵ Iha tinan 1919, grupu estudante Bíblia ida simu knaar hodi serbí nuʼudar “atan laran-metin no matenek”. Iha tempu neʼebá, bainhira atan neʼe atu hatoʼo liafuan ruma ba “Naʼi nia atan sira seluk”, língua neʼebé atan laran-metin uza mak inglés. (Mateus 24:45)  Hanesan lia koine iha tempu uluk, ohin loron inglés mak língua neʼebé ema barak uza ba kontratu no eskola. Tan neʼe mak ita tradús ita-nia livru sira husi lia-inglés. Ohin loron, “atan” neʼe halo ona livru ho língua barak hodi fahe ai-han espirituál nian ba ema seluk, língua sira-neʼe agora aumenta toʼo 700 liu.

16, 17. (a) Maromak nia povu sira sente sira presiza tebes saida? (b) Saida mak sira simu? (c) Irmaun Knorr iha hakarak saida ho Tradusaun Mundu Foun nian?

¹⁶ Ai-han espirituál nia hun mak Bíblia. Uluk, Maromak nia atan sira uza tradusaun King James nian neʼebé halo iha tinan 1611. Maibé língua neʼebé sira uza iha tradusaun neʼe antigu ona no ema ladún komprende ona. Tuir loloos iha manuskritu antigu, Maromak nia naran mosu dala barak, maibé iha tradusaun King James nian, sira uza Maromak nia naran uitoan deʼit. Iha tradusaun neʼe, buat balu mós ladún loos no versíkulu balu sira aumenta deʼit. Tradusaun Bíblia inglés barak mós iha problema neʼebé hanesan.

¹⁷ Tan neʼe mak Maromak nia povu sira presiza duni tradusaun foun ida neʼebé uza liafuan neʼebé ema bele komprende, no mós iha informasaun neʼebé hanesan ho Bíblia orijinál nian. Hodi nuneʼe mak ita-nia irmaun sira forma grupu ida atu tradús Bíblia, bolu naran Komisaun Bíblia Tradusaun Mundu Foun. Komesa husi tinan 1950 toʼo 1960 nia laran, sira tradús Bíblia parte ida-idak hamutuk volume 6. Volume primeiru fó sai iha 2 Agostu 1950 iha reuniaun boot ida. Iha reuniaun neʼe, irmaun Nathan Knorr koʼalia ba rona-naʼin sira katak Maromak nia povu presiza tebes tradusaun Bíblia modernu ida neʼebé loos no fasil atu komprende. Tradusaun neʼebé bele ajuda ema aprende lia-loos iha dalan neʼebé moos liután. No tenkesér uza mós língua neʼebé simples no moos atu ema baibain mós bele komprende. Irmaun Knorr mós iha hakarak katak ho Tradusaun Mundu Foun neʼe, ema rihun ba rihun tan bele hatene kona-ba Jeová.

18. Arranju saida mak ajuda ona tradusaun Bíblia nian?

¹⁸ Buat neʼebé irmaun Knorr hakarak haree sai loos duni iha tinan 1963. Iha tempu neʼebá sira fó sai Tradusaun Mundu Foun husi Eskritura Lia-Gregu iha língua neen tan, língua sira-neʼe mak lia-olandés, fransés, alemaun, italianu, portugés no españól. No iha tinan 1989, Grupu Administradór husi Testemuña ba Jeová arranja departamentu foun ida iha sede-jerál hodi fó ajuda ba tradusaun Bíblia nian. Tuirmai, iha tinan 2005, rai sira neʼebé tradús ona sira rasik nia Livru Haklaken hetan lisensa atu tradús mós Bíblia ba sira-nia língua. Hodi nuneʼe mak ohin loron Bíblia Tradusaun Mundu Foun kompletu no la kompletu halo ona ba língua hamutuk 130 liu.

19. Tanbasá tinan 2013 mak tinan neʼebé importante tebes, no iha lisaun tuirmai ita sei koʼalia kona-ba saida?

¹⁹ Nuʼudar tempu liu daudauk, inglés mós iha mudansa barak. Tan neʼe Bíblia Tradusaun Mundu Foun inglés nian mós presiza hafoun hodi liafuan sira tuir nafatin lia-inglés neʼebé ema baibain uza. Iha loron 5 no 6 Outubru 2013, ema barak tuir reuniaun boot tinan nian. Neʼe mak reuniaun ba dala 129 husi Watch Tower Bible and Tract Society of Pennsylvania. Ema balu bá duni reuniaun neʼe, balu tan rona ka haree liuhusi internét deʼit husi sira-nia rai. Sura hamutuk ema naʼin-1.413.676 husi nasaun 31 mak asiste reuniaun neʼe. Iha reuniaun neʼe, membru husi Grupu Administradór ida fó sai Bíblia Tradusaun Mundu Foun iha inglés, edisaun revizaun nian. Ema barak tanis bainhira sira simu Bíblia edisaun foun neʼe. Bainhira oradór sira esplika versíkulu balu husi edisaun revizaun nian, rona-naʼin barak haree duni katak lia-inglés neʼebé sira uza iha edisaun neʼe diʼak liu uluk nian. Iha lisaun tuirmai, ita sei koʼalia liután kona-ba edisaun revizaun neʼe, no oinsá mak sira mós tradús ona ba língua seluk tan.