DALA ruma Ita sente susar atu halo tuir ka lae?— * Se Ita sente hanesan neʼe, ida-neʼe laʼós buat neʼebé foun. Ita hotu dala ruma sente susar atu halo tuir. Tuir Ita-nia hanoin, Jesus mós presiza aprende atu halo tuir ka lae?—

Labarik sira presiza halo tuir sé?— Aman no inan. Bíblia hatete: “Oan sira, halo tuir imi-nia aman inan sira-nia hakarak.” (Efeso 6:1) Jesus nia aman mak sé?— Maromak Jeová, no Maromak Jeová mós ita hotu nia Aman. (Mateus 6:9, 10) Maibé se Ita hatán katak Jesus nia aman mak José no nia inan mak Maria, Ita-nia resposta mós loos. Ita hatene oinsá mak sira sai Jesus nia inan-aman?—

Anju Gabriel fó-hatene Maria kona-ba oinsá mak nia sei koʼus oan maski nia seidauk kaben. Maromak Jeová mak halo milagre boot neʼe. Anju Gabriel esplika ba Maria: “Naʼi Aas Liu Hotu nia kbiit sei hamahan ó. Tan neʼe santu neʼebé atu moris sei hanaran an ‘Maromak nia Oan.’”—Lucas 1:30-35.

Maromak muda ninia oan nia moris iha lalehan hodi tau fali iha Maria nia knotak. Tuirmai, moris neʼe sai boot iha Maria nia knotak, hanesan bebé sira seluk. Maizumenus fulan sia liu tiha, Jesus moris. Durante tempu neʼe, José kaben ho Maria, tan neʼe ema barak hanoin katak José mak Jesus nia aman rasik. Maibé tuir loloos, nia Jesus nia aman-hakiak. Tan neʼe, ita bele hatete katak Jesus iha aman rua!

Kuandu Jesus tinan 12, nia halo buat ida neʼebé hatudu katak nia hadomi tebes ninia Aman iha lalehan, Maromak Jeová. Iha tempu neʼebá, hodi tuir sira-nia toman, Jesus ho nia família laʼo dook toʼo Jeruzalein atu tuir festa Páskua. Depois neʼe, kuandu fila fali ba Nazaré, José no Maria la hatene katak Jesus la laʼo hamutuk ho sira. Tuir Ita-nia hanoin, tansá mak sira haluha?—

Karik, iha tempu neʼebá José no Maria iha ona oan seluk. (Mateus 13:55, 56) Liután neʼe, karik sira mós laʼo ho parente sira seluk, hanesan Tiago no João hamutuk ho sira-nia aman Zebedeu, no inan Salomé, neʼebé karik biin-alin ho Maria. Tan neʼe, karik Maria hanoin katak Jesus laʼo hamutuk ona ho parente sira.—Mateus 27:56; Marcos 15:40; Joao 19:25.

Kuandu José ho Maria hatene katak Jesus la laʼo hamutuk ho sira, sira fila fali kedas ba Jeruzalein. Sira buka sira-nia oan ho laran-susar. Liutiha loron tolu, sira hetan fali nia iha templu. Maria hatete ba nia: “Tansá ó halo nuneʼe mai ami? Ó-nia aman ho haʼu neon susar tebetebes hodi buka ó.” Maibé, Jesus hatán: “Tansá imi buka haʼu? Imi la hatene katak haʼu sei hela iha haʼu Aman nia uma?”—Lucas 2:45-50.

Tuir Ita-nia hanoin, Jesus nia resposta neʼe la hatudu respeitu ba nia inan ka  lae?— Ninia inan-aman hatene ona katak nia gosta tebes atu adora Maromak iha Maromak nia uma. (Salmo 122:1) Tan neʼe, tuir loloos ninia inan-aman presiza buka uluk iha Maromak nia templu no la presiza buka iha fatin seluk, loos ka lae?— Maria rai hela Jesus nia liafuan sira-neʼe iha ninia laran.

Jesus halo tuir José no Maria ka lae?— Bíblia hatete: “Jesus tun fali hamutuk ho sira ba Nazaré, hodi halo tuir sira-nia hakarak.” (Lucas 2:51, 52) Saida mak Ita bele aprende husi Jesus nia ezemplu?— Ita mós presiza halo tuir Ita-nia inan-aman.

Maski nuneʼe, laʼós katak sempre fasil ba Jesus atu halo tuir, inklui mós halo tuir ninia Aman iha lalehan.

Kalan antes Jesus mate, nia husu Aman Jeová atu troka ninia hanoin kona-ba buat neʼebé nia hakarak Jesus atu halo. (Lucas 22:42) Maibé Jesus halo tuir nafatin ninia Aman, maski susar. Bíblia hatete: “Nia aprende atu halo tuir husi buat neʼebé nia terus.” (Ebreu 5:8) Ita mós bele halo tuir Jesus nia ezemplu neʼe ka lae?—