Lee-naʼin nia pergunta . . .

Jesus mak arkanju Miguel ka lae?

▪ Resposta mak sin. Iha kultura barak, ema iha toman atu uza naran liu ida. Ida-neʼe mós hanesan ho ema nia naran iha Bíblia laran. Porezemplu Jacob iha naran seluk, neʼe mak Israel. (Gênesis 35:10) Apóstolu Pedro iha naran haat, neʼe mak Simão, Pedro, Cefas, Simão Pedro. (Mateus 10:2; 16:16; Joao 1:42; Apostolu 15:7, 14) Oinsá mak ita bele hatene ho klaru katak Miguel mak naran seluk ba Jesus? Hanoin toʼok buat neʼebé eskritura sira tuirmai hatete.

Bíblia konta kona-ba anju boot ida naran Miguel ba dala lima. Iha livru Daniel, naran neʼe mosu dala tolu. Iha Daniel 10:13, 21, ita lee kona-ba Miguel neʼebé salva anju ida seluk hodi anju neʼe bele halaʼo nia knaar. No Miguel neʼe mós hanaran “liurai-oan neʼebé naran-boot”, no “liurai-oan” ba Daniel nia povu. Tuirmai iha Daniel 12:1, ita aprende katak iha tempu nia rohan, “Miguel sei hamriik, liurai-oan boot, ida neʼebé hamriik daudauk ba ó-nia povu”.

Dala ida tan naran Miguel mosu iha Apokalipse 12:7, neʼebé esplika katak “Miguel ho nia anju sira” halo funu hasoru Diabu Satanás ho ninia anju aat sira no rezultadu mak soe tun sira ba rai.

Ita bele haree katak kuandu naran Miguel mosu iha Bíblia laran, nia mak anju ida neʼebé halo knaar nuʼudar funu-naʼin atu proteje Maromak nia povu, no mós halo funu hasoru Maromak Jeová nia inimigu boot, Satanás.

Judas versíkulu 9 bolu Miguel nuʼudar “arkanju”. Liafuan “ark” katak “ulun-naʼin” ka “xefe”, no iha Bíblia laran nunka hatete “arkanju sira” maibé temi deʼit “arkanju”. Apóstolu Paulo mós temi liafuan arkanju iha 1 Tesalonika 4:16. Iha versíkulu neʼe Paulo koʼalia kona-ba Jesus neʼebé moris hiʼas tiha ona: “Naʼi [Jesus] rasik sei tun mai husi lalehan ho lia makaʼas, ho arkanju nia lian, no ho Maromak nia trombeta.” (A Bíblia Sagrada, João Ferreira de Almeida) Nuneʼe, versíkulu neʼe hatudu katak Jesus Kristu mak arkanju, ka xefe ba anju sira.

Entaun, hodi hanoin fali informasaun sira iha leten, saida mak ita aprende? Jesus Kristu mak arkanju Miguel. Naran rua neʼe iha arti: Miguel katak “Sé mak Hanesan Maromak?” no Jesus katak “Jeová mak Salvasaun”. Jesus nia naran rua neʼe fó-hanoin kona-ba ninia knaar atu apoia Maromak nia direitu atu ukun. Filipe 2:9 hatete: “Maromak foti nia [Jesus neʼebé simu tiha glória iha lalehan] hodi fó ba nia naran ida neʼebé boot liu naran sira hotu.”

Importante mós atu hanoin-hetan katak Jesus iha ona antes nia moris nuʼudar ema iha mundu. Antes Jesus moris, anju ida vizita Maria no fó-hatene nia katak liuhusi espíritu santu nia kbiit, nia sei koʼus oan-mane ida no nia tenke hanaran oan neʼe Jesus. (Lucas 1:31) Durante Jesus halo nia knaar iha mundu, nia mós koʼalia kona-ba ninia moris antes toʼo mai mundu.—Joao 3:13; 8:23, 58.

Loos, arkanju Miguel mak naran seluk ba Jesus, naran neʼebé nia simu antes nia sai ema. Depois Jesus moris hiʼas no fila fali ba lalehan, nia serbí fali nuʼudar Miguel, xefe ba anju sira, “ba Aman Maromak nia glória”.—Filipe 2:11.