Saida mak Jesus hanorin kona-ba Maromak nia Reinu?

“Nia laʼo husi sidade ida ba sidade seluk no husi knua ida ba knua seluk, hodi . . . haklaken lia-foun diʼak kona-ba Maromak nia reinu.”—LUCAS 8:1.

ITA gosta tebes koʼalia kona-ba buat neʼebé importante ba ita no neʼebé ita hafolin, loos ka lae? Hanesan Jesus rasik hatete: “Ibun fakar sai buat neʼebé rai hela iha laran.” (Mateus 12:34) Se ita hanoin kona-ba saida mak Jesus koʼalia beibeik kuandu nia haklaken, ita bele haree katak buat neʼebé importante tebes ba nia mak Maromak nia Reinu.

Saida mak Maromak nia Reinu? Liafuan “reinu” iha arti: governu ida neʼebé liurai mak ukun. Nuneʼe, Maromak nia Reinu mak governu ida neʼebé Maromak rasik harii. Mensajen neʼebé Jesus haklaken dala barak liu mak kona-ba Maromak nia Reinu. Liafuan Reinu temi dala 110 liu iha Evanjellu haat. Maibé Jesus la hanorin deʼit ho liafuan. Ninia hahalok mós hanorin buat barak kona-ba Maromak nia Reinu no saida mak Reinu neʼe sei halo.

Sé mak Liurai? Liurai ba Maromak nia Reinu laʼós ema mak hili. Liurai neʼe, Maromak rasik mak hili. Kuandu Jesus hanorin, nia fó sai katak nia mak ida neʼebé Maromak hili atu sai Liurai.

Jesus hatene katak Bíblia fó-hatene nanis Mesias neʼebé promete ona sei ukun Reinu neʼebé sei hela ba nafatin. (2 Samuel 7:12-14; Daniel 7:13, 14; Mateus 26:63, 64) Hanoin-hetan Jesus fó sai katak nia mak Mesias neʼebé promete nanis. Nuneʼe, Jesus rekoñese katak nia mak ida neʼebé Maromak hili nuʼudar Liurai. (Joao 4:25, 26) Entaun ita la hakfodak Jesus hatete dala barak liafuan “haʼu-nia reinu”.—Joao 18:36.

Jesus mós hanorin katak sei iha ema seluk neʼebé sei ukun hamutuk ho nia iha Reinu neʼe. (Lucas 22:28-30) Nia bolu sira “bibi luhan kiʼik”, tanba sira ema uitoan deʼit. Jesus hatete ba sira: “Imi-nia Aman hakarak haraik reinu ba imi.” (Lucas 12:32) Iha livru ikus iha Bíblia hatudu katak sei iha ema hamutuk naʼin-144.000 neʼebé sei hetan knaar espesiál atu ukun hamutuk ho Kristu.—Apokalipse 5:9, 10; 14:1.

Reinu neʼe iha neʼebé? Jesus hatete ba ukun-naʼin ida husi Roma naran Pónsiu Pilatos: “Haʼu-nia reinu laʼós raiklaran neʼe nian.” (Joao 18:36) Jesus sei ukun Maromak nia Reinu, maibé nia la ukun liuhusi ukun-naʼin sira iha rai. Jesus koʼalia beibeik kona-ba Maromak nia Reinu nuʼudar “reinu lalehan”. *  (Mateus 4:17; 5:3, 10, 19, 20) Nuneʼe, Maromak nia Reinu mak governu ida iha lalehan.

Jesus hatene katak nia sei fila fali ba lalehan depois nia halaʼo ninia serbisu iha rai. Jesus hatete katak iha lalehan, nia sei “hadiʼa fatin ba” sira neʼebé sei ukun hamutuk ho nia.—Joao 14:2, 3.

Saida mak Reinu neʼe sei halo? Jesus hanorin ema atu halo orasaun ba Maromak nuneʼe: “Halo Ita-nia reinu toʼo mai ami; halo tuir Ita-nia hakarak ba iha rai nuʼudar iha lalehan.” (Mateus 6:9, 10) Maromak halo daudaun ninia hakarak iha lalehan. Maromak sei uza Reinu neʼe atu troka buat barak iha mundu, hodi nia hakarak halaʼo iha rai nuʼudar iha lalehan.

Saida mak Reinu sei halo iha rai? Jesus hanorin katak Maromak nia Reinu sei halakon ema hotu neʼebé nafatin hakarak halo aat. (Mateus 25:31-34, 46) Rezultadu mak korrupsaun no buat aat hotu sei la iha tan. Jesus hanorin katak rai sei nakonu ho ema neʼebé loos, “laran-kmaus”, laran-luak, “laran moos”, no neʼebé buka dame.—Mateus 5:5-9.

Ema fiar-naʼin sira-neʼe sei moris iha rai neʼebé nakonu ho poluisaun ka lae? Lae duni! Bíblia fó-hatene nanis katak Kristu nuʼudar Liurai neʼebé promete ona sei halo rai neʼe sai fali jardín furak no hakmatek hanesan iha jardín Eden. (Isaías 11:1-9) Sin, Maromak nia Reinu sei halo mundu tomak sai jardín neʼebé furak tebes.

Saida tan mak Reinu neʼe sei halo ba ema? Jesus la promete deʼit saida mak Maromak nia Reinu sei halo, maibé nia mós hatudu saida mak Reinu neʼe sei halo. Hodi halo milagre Jesus kura ema barak, no ida-neʼe hatudu saida mak nia sei halo bainhira nia ukun Reinu neʼe. Evanjellu ida konta  kona-ba Jesus hodi hatete: “Nia hahú laʼo-lemo Galileia tomak hodi hanorin iha sira-nia sinagoga sira, haklaken liafuan diʼak reinu nian no fó isin-diʼak ba moras sira iha povu nia leet.”—Mateus 4:23.

Jesus kura ema neʼebé iha moras oioin. Nia “loke matan ba ema neʼebé matan-delek hori loron nia moris”. (Joao 9:1-7, 32, 33) Ho laran-diʼak, Jesus kura ema ida neʼebé iha moras-lepra. (Marcos 1:40-42) Kuandu ema lori ba Jesus “ema tilun-diuk no monok”, Jesus hatudu katak nia bele halo “tilun-diuk sira rona, monok sira mós koʼalia”.—Marcos 7:31-37.

Jesus, neʼebé Maromak hili nuʼudar Liurai, mós iha kbiit atu halo ema mate moris hiʼas fali. Bíblia konta kona-ba ema mate naʼin-tolu neʼebé Jesus halo moris hiʼas. Nia fó moris-hiʼas ba feto-faluk nia oan-mane mesak, labarik feto tinan 12, no ninia belun Lázaro.—Lucas 7:11-15; 8:41-55; Joao 11:38-44.

Liuhusi apóstolu João, Jesus fó-hatene nanis kona-ba situasaun diʼak neʼebé sei mosu iha rai bainhira Maromak nia Reinu ukun. João hakerek: “Ó haree sidade neʼe? Neʼe mak Maromak nia horik fatin iha ema sira leet. Nia sei halo nia uma iha sira leet; sira sei sai nia povu no Nia sei hela ho sira no sai sira-nia Maromak. Nia sei hamaran sira-nia matan-been husi sira-nia matan; mate la iha ona, no ema sei la tanis tan eh laran-susar, basá sasán raiklaran uluk nian liu tiha ona.” (Apokalipse 1:1; 21:3, 4) Hanoin toʼok, ita bele hela iha mundu neʼebé la iha ona ema neʼebé tanis, terus no laran-susar, no mate mós sei la iha ona! Sin, orasaun atu Maromak halo ninia hakarak iha rai nuʼudar iha lalehan sei sai loos duni.

Bainhira mak Maromak nia Reinu sei mai? Jesus hanorin katak nia sei “hiʼit an mai” atu ukun nuʼudar liurai iha lalehan. Nia fó-hatene nanis kona-ba saida mak sei hatudu katak nia hahú ona atu ukun. Iha tempu neʼebé Jesus komesa atu ukun, iha mundu tomak sei iha susar barak, inklui mós funu, hamlaha, rai-nakdoko, moras-peste, no hahalok aat sai barak liután. (Mateus 24:3, 7-12; Lucas 21:10, 11) Buat hirak-neʼe no buat seluk tan neʼebé Jesus fó-hatene nanis komesa sai loos iha tinan 1914, kuandu Funu Mundiál Primeiru hahú. Nuneʼe, agora Jesus ukun daudaun ona nuʼudar Liurai. Lakleur tan Maromak nia Reinu sei mai no sei halaʼo Maromak nia hakarak iha rai. *

Maromak nia Reinu besik ona mai, neʼe katak sá ba Ita? Ida-neʼe depende ba Ita se Ita simu ka la simu Jesus nia mensajen.

[Nota–rodapé]