Bíblia troka ema nia moris

EMA ida neʼebé uluk hola parte iha grupu aat no uza droga, nia halo saida deʼit atu husik ninia toman aat? Tanba saida mak ema ida neʼebé halo parte iha banda neʼebé toka múzika rock makaʼas tesi ninia fuuk no husik múzika neʼebé nia hadomi tebes? Saida mak book mane ida neʼebé uluk la simu relijiaun no governu nia ukun atu halo Maromak nia serbisu? Haree toʼok saida mak ema sira-neʼe hatete.

“Haʼu husik haʼu-nia toman aat.”—PETER KAUSANGA

TINAN: 32

HUSI RAI: NAMÍBIA

MORIS ULUK NIAN: HOLA PARTE IHA GRUPU AAT NO TOMAN HO DROGA

HAʼU-NIA MORIS ULUK: Haʼu boot iha bairru ida naran Kehemu iha sidade Rundu. Ema iha-neʼe buka moris hodi faʼan ai-fuan, ai-maran, no anar.

Kuandu haʼu tinan rua deʼit, haʼu-nia inan mate, nuneʼe haʼu-nia avó-feto mak hakiak haʼu. Ami moris simples deʼit. Maski haʼu laʼós ema neʼebé kontra ema seluk, maibé tanba kolega sira obriga haʼu, haʼu hetan problema. Iha eskola haʼu sai parte iha grupu aat ida. Ida-neʼe halo haʼu hola parte atu baku ema, naʼok, lori subar fatuk-murak neʼebé naʼok atu faʼan fali, no iha toman aat ho tua no droga. Tanba naʼok, haʼu tama kadeia dala rua.

Haʼu para eskola kuandu haʼu tinan 18, no ikusmai muda ba fatin dook husi haʼu-nia moris fatin no husi grupu aat neʼe. Haʼu hakarak komesa moris hodi dook husi ema neʼebé book haʼu atu halo hahalok aat. Maibé, haʼu nafatin iha toman aat ho droga. Dala ruma haʼu laʼo kilómetru barak tan deʼit atu hetan droga.

OINSÁ BÍBLIA TROKA HAʼU-NIA MORIS: Iha tinan 1999, haʼu hasoru ema balu husi Testemuña ba Jeová neʼebé fahe sira-nia livru ba ema neʼebé laʼo iha dalan. Sira koʼalia mai haʼu ho respeitu, no ida-neʼe book haʼu-nia laran. Mensajen neʼebé haʼu lee iha livru sira neʼebé haʼu simu, halo haʼu fiar katak haʼu hetan ona relijiaun neʼebé loos. Depois, haʼu komesa estuda Bíblia ho badinas no lakleur haʼu komprende katak haʼu presiza troka haʼu-nia moris se haʼu hakarak halo kontente Maromak Jeová.

Haʼu marka loron atu para uza droga no mós atu para fuma sigarru, depois haʼu soe buat hotu kona-ba droga no fuma. Haʼu mós hatete ba haʼu-nia kolega sira atu labele fó sigarru mai haʼu no husu sira atu labele fuma besik haʼu. Maski nuneʼe, buat hotu la sai tuir buat neʼebé haʼu hakarak. Haʼu monu ba haʼu-nia toman atu  uza droga no fuma sigarru dala rua fali. Maibé, ida-neʼe la halo haʼu laran-tun. Haʼu hanoin nafatin kona-ba matadalan iha Provérbios 24:16, neʼebé hatete: “Ema laran loos ida karik monu ba dala hitu, maski nuneʼe nia sei hamriik fali.” Neineik-neineik, haʼu husik haʼu-nia toman aat neʼe.

Nuʼudar haʼu aprende liután kona-ba Maromak Jeová, ida-neʼe book haʼu atu halo nia sai haʼu-nia belun neʼebé besik liu. Eskritura ida husi Bíblia neʼebé book haʼu-nia laran mak Salmo 27:10, neʼebé hatete: “Se haʼu-nia aman rasik no inan rasik husik haʼu, Maromak Jeová rasik sei simu haʼu.” Nuʼudar haʼu kontinua estuda Bíblia kleʼan liután, haʼu haree katak liafuan sira-neʼe mak loos duni. Haʼu sente katak Maromak Jeová sai duni haʼu-nia Aman neʼebé tau matan haʼu.

Haʼu mós halibur beibeik ho ema neʼebé Testemuña ba Jeová. Iha sira-nia leet, haʼu bele haree katak sira iha relasaun diʼak nuʼudar belun ba malu no katak sira hatudu domin neʼebé loos ba malu. Haʼu nunka sente hanesan neʼe uluk.

BUAT DIʼAK NEʼEBÉ HAʼU HETAN: Ho Maromak Jeová nia ajuda no maluk Testemuña ba Jeová, haʼu troka dalan neʼebé haʼu hatais no hadiʼa an, haʼu-nia hahalok, no dalan neʼebé haʼu koʼalia. Kuandu haʼu hanoin-hikas, haʼu haree katak haʼu-nia moris troka hanesan ular neʼebé haree aat nakfila an atu sai borboleta neʼebé haree furak. Haʼu-nia família kontente katak haʼu troka haʼu-nia moris hanesan neʼe, no agora sira tau fiar mai haʼu. Agora, haʼu kaben ona no hakaʼas an atu sai laʼen neʼebé diʼak ba haʼu-nia feen no atu sai aman neʼebé tau matan didiʼak ba haʼu-nia oan sira.

“Haʼu hetan buat neʼebé importante liu.”—MARCOS PAULO DE SOUSA

TINAN: 29

HUSI RAI: BRAZÍL

MORIS ULUK NIAN: HALO PARTE IHA BANDA MÚZIKA ROCK MAKAʼAS

HAʼU-NIA MORIS ULUK: Haʼu-nia família hela iha bairru naran Jaguariuna, iha sidade São Paulo. Haʼu-nia inan-aman metin ba relijiaun Katólika, no kuandu haʼu sei kiʼik haʼu serbí nuʼudar akólitu. Tan neʼe, haʼu-nia kolega sira iha eskola bolu haʼu “Padre”. Maibé, kuandu haʼu tinan 15, haʼu komesa gosta múzika rock makaʼas. Depois, haʼu habelun ho ema neʼebé kanta múzika neʼe. Haʼu mós husik haʼu-nia fuuk sai naruk. Iha tinan 1996, haʼu-nia aman ajuda haʼu atu sosa tambór.

Iha tinan 1998, haʼu komesa toka hamutuk ho banda ida neʼebé toka múzika rock makaʼas. Múzika neʼebé ami toka no kanta mak kona-ba halo hahalok aat no kona-ba buat neʼebé foʼer. Múzika neʼe fó hahiʼi ba violénsia. Tanba múzika neʼe book haʼu-nia hanoin no hahalok, haʼu sai ema neʼebé hanoin aat kona-ba buat hotu no ema neʼebé nervozu aat.

OINSÁ BÍBLIA TROKA HAʼU-NIA MORIS: Haʼu foin hasoru ema neʼebé Testemuña ba Jeová iha tinan 1999. Sira husu se haʼu hakarak estuda Bíblia ho sira, no haʼu simu maski haʼu ladún hakarak. Maibé, buat neʼebé haʼu aprende husi Bíblia halo haʼu troka haʼu-nia haree kona-ba moris.

Uluk haʼu kontente katak ema koñese haʼu nuʼudar “mane fuuk naruk”, “fitun rock”, ka  “baterista”. Maibé, haʼu komesa atu komprende katak toka múzika ho banda neʼe halo haʼu hanoin deʼit haʼu-nia an no sempre hakarak atu sai diʼak liu fali ema seluk, no haʼu sai la kontente ona kona-ba oinsá ema haree haʼu. Haʼu mós haree katak artista neʼebé haʼu gosta tebes, sira seidauk hetan buat ida neʼebé importante tebes iha sira-nia moris. Neineik-neineik haʼu komprende katak atubele halo kontente Maromak Jeová, haʼu presiza husik múzika rock neʼe no husik hahalok imorál.

Haʼu gosta tebes múzika neʼe no haʼu-nia fuuk neʼebé naruk. Haʼu duvida se haʼu bele moris la ho buat sira-neʼe ka lae. Haʼu mós hirus lalais no haʼu hatene katak haʼu tenke kontrola hahalok aat neʼe. Maibé, hodi estuda Bíblia, haʼu aprende kona-ba Maromak nia domin, pasiénsia, no laran-diʼak. Ida-neʼe halo haʼu-nia domin ba Maromak Jeová aumenta liután. Haʼu harohan ba Maromak Jeová atu ajuda haʼu troka haʼu-nia moris, no nia ajuda haʼu duni. Haʼu aprende katak liafuan iha Ebreu 4:12 mak loos duni. Eskritura neʼe hatete: “Maromak nia liafuan moris no book makaʼas.”

Kuandu haʼu komesa atu halibur hamutuk ho ema neʼebé Testemuña ba Jeová, haʼu haree katak sira la hanesan ho ema seluk. Ba dala primeiru iha haʼu-nia moris, haʼu haree ema hatudu domin neʼebé loos ba malu. Haʼu mós haree domin neʼe iha reuniaun boot sira neʼebé sira halaʼo. Haʼu hakfodak atu haree oinsá sira barak halo serbisu voluntáriu ho laran-manas hodi bele ajuda ema seluk.

BUAT DIʼAK NEʼEBÉ HAʼU HETAN: Ho Maromak Jeová nia ajuda, agora haʼu bele kontrola haʼu-nia hirus. Haʼu mós sente katak agora haʼu la hanoin deʼit haʼu-nia an no la foti-an ona.

Maski uluk haʼu sei hanoin haʼu-nia moris uluk nian, maibé agora la hanoin ona. Agora haʼu hetan buat neʼebé importante liu iha haʼu-nia moris. Haʼu kontente katak haʼu aprende atu hanoin kona-ba ema seluk nia diʼak.

“Haʼu haksolok atu ajuda ema seluk.”—GEOFFREY NOBLE

TINAN: 59

HUSI RAI: ESTADUS UNIDUS

MORIS ULUK NIAN: LA SIMU RELIJIAUN NO GOVERNU NIA UKUN

HAʼU-NIA MORIS ULUK: Haʼu sai boot iha estadu Massachusetts, iha rai ida besik tasi-ibun naran Ipswich. Maibé, kuandu haʼu boot ona, haʼu bá hela iha fatin dook ida iha ai-laran iha estadu Vermont. Kompara ho ema seluk iha Amérika, haʼu ho haʼu-nia namorada moris simples deʼit. Ami la iha eletrisidade, nuneʼe ami teʼin hodi sunu ai-maran neʼebé ami hili iha ai-laran, no ida-neʼe mós halo ami-nia uma manas. Ami iha sentina iha uma liʼur no besik tinan tomak bee husi torneira maran.  Ami lakohi atu moris hanesan ema seluk, no tanba ami moris fuik, dalan neʼebé ami hadiʼa an no hatais hatudu katak ami fuik. Iha tempu neʼebá, haʼu sente kontente katak haʼu konsege atu la sui haʼu-nia fuuk durante fulan neen.

Iha tempu neʼebá, Estadus Unidus hola parte iha funu iha rai-Vietname. Ida-neʼe halo haʼu la simu ema nia ukun. Haʼu haree katak relijiaun no governu laran-makerek. Haʼu sente katak sira la bele ajuda ema no katak ema ida-idak mak tenke deside ba nia an rasik saida mak loos no saida mak laloos. Tan neʼe, haʼu hanoin katak la sala atu naʼok buat neʼebé haʼu presiza.

OINSÁ BÍBLIA TROKA HAʼU-NIA MORIS: Haʼu ho haʼu-nia namorada komesa atu lee Bíblia, maibé ami la komprende buat ida neʼebé ami lee. Maski haʼu uza droga, haʼu hakaʼas an atu husik ida-neʼe. Haʼu-nia namorada hakarak ami atu kaben no iha oan. Iha tempu neʼe mak ema ida neʼebé Testemuña ba Jeová mai ami-nia uma, no nia komesa estuda Bíblia ho ami.

Lakleur, haʼu husik haʼu-nia toman aat. Maibé, susar liu ba haʼu mak atu simu ema nia ukun tanba haʼu duvida ba buat hotu. No mós, tanba haʼu moris hodi halo deʼit buat neʼebé haʼu hakarak, susar ba haʼu atu simu katak agora haʼu tenke moris tuir ema seluk nia ukun-fuan.

Haʼu sempre fiar katak Maromak iha, maibé haʼu-nia hanoin kona-ba nia ladún klaru. Maibé, nuʼudar haʼu estuda Bíblia, haʼu komprende ho klaru kona-ba Maromak Jeová nia hahalok sira. Haʼu aprende saida loos mak nia hakarak haʼu atu halo. Haʼu mós aprende kona-ba ninia hakarak atu halo mundu neʼe sai paraízu, hanesan jardín kapás. (2 Pedro 3:13) Lia-loos sira-neʼe book haʼu atu hakarak troka haʼu-nia moris hodi Maromak bele simu haʼu atu serbí nia.

Buat ida neʼebé haʼu gosta tebetebes kona-ba Testemuña ba Jeová mak sira lakohi atu hola parte iha funu. Iha mundu tomak haʼu seidauk hetan relijiaun seluk neʼebé kaer metin ba Bíblia nia hanorin hanesan neʼe.

Haʼu hatene katak atubele serbí Maromak Jeová, haʼu mós presiza troka dalan neʼebé haʼu hadiʼa an no hatais. Foufoun, haʼu sente ladún diʼak atu hatais hanesan Testemuña ba Jeová hatais. Haʼu no haʼu-nia kolega sira la iha kamiza diʼak, kalsa diʼak, ka sapatu diʼak; sá tan gravata! Maibé, haʼu tesi haʼu-nia fuuk no troka dalan neʼebé haʼu hatais no hadiʼa an. Maski nuneʼe, haʼu hanoin-hetan dala primeiru neʼebé haʼu bá haklaken uma ba uma, no kuandu haʼu haree haʼu-nia an tomak iha vidru boot ida, haʼu hanoin: ‘Haʼu halo saida ba haʼu-nia an neʼe?’ Neineik-neineik, haʼu sai kontente ho dalan foun neʼebé haʼu hatais no hadiʼa an.

BUAT DIʼAK NEʼEBÉ HAʼU HETAN: Ikusmai haʼu kaben ho haʼu-nia namorada, no ami kontente tebes. Ami naʼin-rua haboot ami-nia oan naʼin-tolu atu hadomi no atu serbí Maromak Jeová. Haʼu mós kontente atu ajuda ema seluk atu hatene kona-ba lia-loos husi Bíblia neʼebé ajuda haʼu mós atu troka haʼu-nia moris.

Uluk haʼu kontente atu halo haʼu-nia hakarak deʼit hodi la simu ema seluk nia hanoin. Maibé agora haʼu haksolok atu ajuda ema seluk no katak iha ema seluk neʼebé hanoin haʼu.

[Liafuan neʼebé foti husi pájina 28]

“Haʼu laʼo kilómetru barak tan deʼit atu hetan droga”

[Liafuan neʼebé foti husi pájina 30]

“Buat neʼebé haʼu aprende husi Bíblia halo haʼu troka haʼu-nia haree kona-ba moris”

[Liafuan neʼebé foti husi pájina 31]

“Haʼu sente ladún diʼak atu hatais hanesan Testemuña ba Jeová”