ITA mós dala ruma sente hanesan Jorge no Emília? Hanesan sira, inan-aman barak sente laran-susar kuandu haree sira-nia oan triste tanba hetan problema ruma, tan neʼe hakarak proteje sira. Maibé tuir loloos, situasaun rua neʼebé foin temi, fó oportunidade ba Jorge no Emília atu hanorin sira-nia oan lisaun neʼebé importante kona-ba oinsá atu kaer didiʼak responsabilidade. Klaru katak lisaun neʼebé labarik ho tinan 4 aprende la hanesan ho lisaun neʼebé joven ho tinan 13 aprende.

Tuir loloos, ita la bele proteje ita-nia oan husi problema hotu neʼebé nia sei hasoru iha ninia moris, tanba loron ida nia sei husik ninia aman no inan no “lori nia todan rasik”. (Galasia 6:5; Mateus 19:5) Atu oan sira bele sai ema boot neʼebé hatene tau matan ba sira-nia an rasik no hatene halo desizaun ho matenek, inan-aman presiza hakaʼas an atu hanorin sira atu la hanoin  deʼit sira-nia an, maibé hanoin mós ema seluk. Atu halo ida-neʼe la fasil!

Maski nuneʼe, inan-aman sira bele aprende husi Jesus nia ezemplu diʼak no dalan neʼebé nia hanorin ninia dixípulu sira. Maski Jesus la iha oan rasik, maibé razaun neʼebé nia hili hodi fó treinu ba ninia dixípulu sira mak atu sira hatene oinsá halaʼo nafatin serbisu bainhira Jesus la iha ona. (Mateus 28:19, 20) Nuneʼe, inan-aman mós hakarak atu fó treinu ba sira-nia oan hodi hanorin oan atu hatene kaer didiʼak sira-nia responsabilidade. Mai ita haree kona-ba ezemplu tolu neʼebé Jesus fó ba inan-aman sira.

Kuandu Jesus besik atu mate, nia hatete ba ninia dixípulu sira: “Haʼu fó ezemplu ba imi, atu, nuʼudar haʼu foin halo ba imi, imi mós banati-tuir.” (Joao 13:15) Nuneʼe mós, inan-aman presiza esplika ba sira-nia oan no hatudu liuhusi sira-nia hahalok oinsá atu kaer didiʼak responsabilidade.

Husu Ita-nia an: ‘Haʼu koʼalia kona-ba halaʼo haʼu-nia responsabilidade iha dalan neʼebé diʼak ka lae? Haʼu koʼalia kona-ba haksolok neʼebé haʼu sente kuandu haʼu halo serbisu ruma ba ema seluk ka lae? Ka, haʼu muramura no kompara haʼu-nia an ho ema neʼebé moris diʼak liu fali haʼu?’

Maski ita hotu halo sala no dala ruma sente todan tanba iha serbisu barak, maibé ezemplu neʼebé ita fó ba ita-nia oan sira mak dalan neʼebé diʼak liu hotu atu bele ajuda sira komprende katak importante atu hatudu hahalok diʼak.

Jesus hatene katak ninia dixípulu sira presiza tempu atu bele hatene kaer didiʼak knaar no responsabilidade neʼebé nia fó ba sira. Nia hatete ba sira: “Haʼu sei iha tan buat barak atu hateten ba imi, maibé oras neʼe imi la bele simu hotu.” (Joao 16:12) Jesus la husu kedas ba sira atu halo buat ruma mesak deʼit. Maibé, nia uza tempu barak atu hanorin sira kona-ba buat barak. Kuandu Jesus haree katak sira hatene buat barak ona mak nia haruka sira mesak.

Hanesan neʼe mós, diʼak atu inan-aman la husu oan atu halo buat ruma neʼebé nia seidauk bele halo. Maski nuneʼe, nuʼudar oan sai boot, inan-aman presiza haree didiʼak serbisu ka knaar hanesan saida mak nia bele halo. Porezemplu, inan-aman presiza hanorin oan atu tau matan ninia isin moos nafatin, atu hamoos kuartu, atu tuir oras, no atu uza osan didiʼak. Kuandu oan komesa eskola, inan-aman presiza ajuda nia atu komprende katak serbisu eskola nian mak importante tebes neʼebé nia rasik tenke halo.

Maski inan-aman presiza fó knaar ruma ba sira-nia oan, maibé sira mós presiza ajuda oan atu halaʼo knaar sira ho didiʼak. Jorge, aman ida neʼebé temi uluk, komprende katak kuandu nia husu ninia oan Miguel atu haloot ninia brinkedu sira, nia oan sai hirus tanba ninia oan sente katak halo knaar neʼe susar tebes ba nia. Jorge hatete: “Duké hakilar ba Miguel atu haloot ninia brinkedu sira, haʼu hanorin nia oinsá atu halo serbisu neʼe.”

Nia halo saida loos? Jorge hatete: “Uluk hotu, haʼu marka oras ba kalan-kalan atu para halimar no atu komesa haloot brinkedu sira. Depois, haʼu serbisu hamutuk ho Miguel hodi haloot brinkedu sira husi parte ida iha uma laran toʼo fatin hotu iha uma laran. Haʼu halo serbisu neʼe sai hanesan halimar ida, no ami mós halai-taru atu haree sé mak lais liu. Lakleur, haʼu-nia oan toman atu halo ida-neʼe kalan-kalan. Haʼu promete ba Miguel katak se nia halo serbisu neʼe lalais, antes atu toba haʼu sei lee istória ida tan ba nia. Maibé, se nia kleur atu halo serbisu neʼe, entaun haʼu habadak tempu atu lee istória ba nia.”

Jesus, nuʼudar mestre diʼak, hatene katak dalan diʼak liu hotu atu aprende mak hodi halo tuir buat neʼebé ita aprende. Porezemplu, kuandu Jesus sente katak ninia dixípulu sira bele ona, nia haruka sira “rua-rua atu bá uluk iha sidade no fatin sira neʼebé nia atu bá”. (Lucas 10:1) Maibé, Jesus la husik sira mesak deʼit hodi la fó matadalan ba sira. Antes Jesus haruka sira, nia esplika ho klaru saida mak sira tenke halo. (Lucas 10:2-12) Kuandu Jesus nia dixípulu sira fila fali no fó-hatene nia kona-ba buat diʼak neʼebé akontese ba sira, nia gaba no fó laran-manas ba sira. (Lucas 10:17-24) Hodi nuneʼe, Jesus hatudu katak nia kontente ho buat neʼebé sira halo.

Saida mak Ita halo kuandu Ita-nia oan hasoru situasaun susar ruma neʼebé tuir loloos nia mak iha responsabilidade atu rezolve rasik? Ita mak halo buat neʼebé nia taʼuk atu halo, atu nia la moe ka atu nia la halo sala ruma? Karik iha Ita-nia laran, Ita hakarak “salva” nia ka Ita hakarak foti ninia todan.

Maibé, hanoin kona-ba ida-neʼe: Kuandu Ita lalais atu “salva” ka ajuda Ita-nia oan, ida-neʼe hanorin saida ba nia? Se Ita halo nuneʼe, Ita hatudu ba nia katak Ita ladún fiar nia bele halo buat ruma mesak, no katak Ita sei haree nia hanesan bebé neʼebé presiza Ita-nia ajuda ba buat hotu.

Porezemplu, oinsá mak Emília, neʼebé temi uluk, ajuda nia oan Jenny atu hasoru ninia problema? Duké mete iha situasaun neʼe, Emília ajuda ninia oan atu bá koʼalia rasik ho ninia mestra. Emília hamutuk ho Jenny hakerek pergunta balu atu Jenny lori ba eskola hodi husu ba mestra. Depois, sira prepara hamutuk didiʼak oinsá Jenny bele koʼalia ba ninia mestra no bainhira mak tempu neʼebé diʼak atu halo ida-neʼe. Emília hatete: “Ikusmai, Jenny sai brani atu koʼalia ba ninia mestra, no mestra gaba Jenny tanba nia halo ida-neʼe. Jenny kontente tebes ho buat neʼebé nia halo, no haʼu mós kontente.”

Se Ita sempre rezolve Ita-nia oan nia susar, Ita bele hanetik Ita-nia oan nia kapasidade atu rezolve rasik susar ruma neʼebé nia sei hasoru iha ninia moris. Importante atu hanorin Ita-nia oan sira atu simu no kaer didiʼak sira-nia responsabilidade. Halo ida-neʼe mak hanesan prezente folin-boot ida neʼebé Ita bele fó ba sira.