Buat neʼebé ita aprende husi Jesus

Kona-ba oinsá atu halo tuir nia

Kuandu ema tau fiar ba Jesus, nia hatete ba sira: “Tuir haʼu mai!” (Mateus 9:9; 19:21) Oinsá mak ita bele hatudu katak ita tuir Kristu ka ita ema kristaun neʼebé loos? Mai ita haree resposta ba pergunta importante tolu.

Tansá ita hatudu hahalok diʼak ba ema seluk?

▪ Ema neʼebé tuir Jesus presiza halo tuir ninia liafuan kona-ba oinsá atu hatudu hahalok diʼak ba ema seluk. Porezemplu, Jesus hatete: “Neʼe duni, buat hotu neʼebé imi hakarak ema halo ba imi, imi mós halo ba sira.” Maibé, oinsá se ema ida halo ita sente laran-kanek? Jesus hatete: “Buka dame malu lalais ho ema neʼebé kontra ó.” Jesus mós hatete: “Imi la perdua karik ema seluk, imi-nia Aman mós sei la perdua imi-nia sala sira.”—Mateus 5:25; 6:15; 7:12.

Ba ema kaben-naʼin sira, Jesus fó konsellu neʼe: “Imi rona ema dehan; ‘Ó keta sala ho ema nia kaben.’ Maibé haʼu dehan ba imi; ‘Ema neʼebé hateke ba feto ida hodi kaan nia, nia halo ona sala-foʼer ho nia iha nia laran.’” Ema kristaun neʼebé loos husik Jesus nia hanorin kona sira-nia hanoin no book sira-nia laran.—Mateus 5:27, 28.

Jesus la buka deʼit nia rasik nia diʼak, maibé nia sempre prontu atu ajuda ema seluk. Tan neʼe ema kristaun neʼebé loos mós halo hanesan. Porezemplu, loron ida Jesus no ninia apóstolu sira kole tanba haklaken kleur ona no la iha tempu atu han. Nuneʼe, Jesus lori sira saʼe ró ba fatin hakmatek ida atu bele deskansa. Maibé, ema barak hatene nia atu bá neʼebé no sira halai hodi toʼo ulukliu nia iha fatin neʼebá. Bíblia hatete: “Wainhira Jesus tun husi ró, nia hetan ema-lubun boot ida. Nia hanoin ema sira-neʼe tebetebes, basá sira hanesan bibi neʼebé bibi-atan la iha. Nia hahú hanorin sira buat barak.” (Marcos 6:30-34) Ita bele halo tuir Jesus hodi halo buat neʼebé Maromak hakarak, maski dala ruma susar ba ita.

 Tansá diʼak atu fó-hatene ema seluk kona-ba lia-foun diʼak?

▪ Jesus hanorin ema neʼebé tuir nia atu haklaken lia-foun diʼak. Nia hatete ba ninia apóstolu sira: “Tuir dalan, haklaken bá katak reinu lalehan besik ona.” (Mateus 10:7) Ema sira neʼebé tuir Jesus iha mensajen neʼebé folin boot atu hatoʼo. Jesus hatete: “Neʼe mak moris rohan-laek: hatene Ita nuʼudar Maromak loos mesak deʼit, no Jesus Kristu neʼebé Ita haruka mai.”—Joao 17:3.

Jesus fó-hatene nanis katak ema rihun ba rihun neʼebé tuir nia sei hola parte iha serbisu haklaken. Nia hatete: “Lia-foun reinu nian neʼe, ema sei haklaken iha mundu tomak hodi fó sasin ba povu hotu.” (Mateus 24:14) Se ita aprende tiha ona kona-ba Maromak nia Reinu no fiar buat neʼebé Bíblia hatete, karik ita sei kontente atu fó-hatene ema seluk buat neʼebé ita hatene ona. Ema barak neʼebé tuir Jesus komesa atu fó-hatene ema seluk kona-ba Maromak nia Reinu hodi koʼalia uluk ba sira-nia família.—Joao 1:40, 41.

Tansá ita presiza hetan batizmu?

▪ Kuandu Jesus hetan batizmu iha mota Jordaun, nia hatete ba nia Aman: “Maromak, haʼu mak neʼe! Haʼu mai atu halo tuir Ita-nia hakarak.” (Ebreu 10:7) Se ita hakarak halo Maromak nia hakarak, ita mós presiza hetan batizmu. Jesus hatete: “Hanorin nasaun hotu-hotu; sarani sira.”—Mateus 28:19.

Hodi hetan batizmu, ita iha responsabilidade saida no buat diʼak saida mak ita bele hetan? Ema kristaun neʼebé hetan batizmu serbí Maromak ho laran tomak. Jesus temi Maromak nia Ukun-Fuan, neʼebé hatete: “Ó sei hadomi Naʼi, ó-nia Maromak ho neon ho laran, ho ó-nia klamar tomak.” (Mateus 22:37) Jesus mós hatete: “Ema ruma hakarak tuir haʼu karik, nia sei hewai nia an rasik.” (Mateus 16:24) Batizmu hatudu katak ema halo tiha desizaun atu hewai nia an rasik ka la buka ninia hakarak rasik maibé atu sai Maromak ninian. Ema sira neʼebé iha relasaun diʼak ho Maromak tanba hetan batizmu ona, bele husu nia atu perdua sira-nia sala hodi sira bele iha laran ka konxiénsia neʼebé moos.—1 Pedro 3:21.

Atu hetan informasaun liután, haree kapítulu 18 husi livru Tuir Loloos, Saida mak Bíblia Hanorin?. Livru neʼe husi Testemuña ba Jeová.