“Nia haree ema nia laran”
Hakbesik ba Maromak
“Nia haree ema nia laran”
BUAT neʼebé ita haree kona-ba ema husi liʼur, dala ruma la hanesan ho buat neʼebé iha laran. Dala barak ema hanoin diʼak ka hanoin aat kona-ba ema seluk tuir buat neʼebé sira haree husi liʼur deʼit. Maibé, Maromak Jeová la hanesan neʼe, nia haree ema nia laran. Liafuan iha 1 Samuel 16:1-12 hatudu ida-neʼe ho klaru.
Hanoin toʼok kona-ba situasaun tuirmai neʼe. Maromak Jeová atu hili liurai ida foun ba nasaun Izraél. Maromak hatete ba profeta Samuel: “Haʼu sei haruka ó ba Jessé, ema Belein, tanba haʼu hili ona liurai ida husi ninia oan sira ba haʼu-nia an rasik.” (Versíkulu 1) Maromak Jeová la fó-hatene ema neʼe nia naran maibé hatete deʼit ema neʼebé nia hili mak Jessé nia oan ida. Karik, nuʼudar Samuel bá Belein, nia hanoin: ‘Oinsá mak haʼu bele hatene Jessé nia oan ida neʼebé mak Maromak Jeová hili ona?’
Toʼo tiha Belein, Samuel prepara atu han hamutuk ho Jessé no ninia oan-mane sira. Kuandu oan-boot Eliab mai, Samuel hakfodak atu haree katak Eliab bonitu tebes. Tanba Eliab mós ain-aas no isin-forte, Samuel hanoin katak Eliab mak diʼak atu sai liurai, no hatete ba nia an: “Tebes duni, ida neʼebé Maromak Jeová kose mina iha ninia oin ona.”—Versíkulu 6.
Maibé, Maromak Jeová la hanoin hanesan neʼe. Nia hatete ba Samuel: “Labele haree ba buat neʼebé ó haree husi liʼur kona-ba nia ka nia ain-aas oinsá, tanba haʼu la simu nia.” (Versíkulu 7) Maromak Jeová la haree ba Eliab nia aas ka bonitu nuʼudar buat neʼebé importante. Maromak Jeová haree buat hotu kona-ba ema, maibé nia haree liuliu ba buat neʼebé furak liu iha ema nia laran.
Maromak Jeová esplika ba Samuel: “Basá dalan neʼebé ema haree, la hanesan ho dalan neʼebé Maromak haree, tanba ema haree deʼit buat neʼebé matan bele haree; maibé kona-ba Jeová, nia haree ema nia laran.” (Versíkulu 7) Loos, buat neʼebé importante liu ba Maromak Jeová mak ema nia laran, neʼe mak sira ema oinsá, sira-nia hanoin, sira-nia hahalok, no sira-nia sentimentu. Maromak, nuʼudar “ida neʼebé buka-hatene ema nia laran”, la simu Eliab, no nia mós la simu Jessé nia oan-mane naʼin-neen seluk neʼebé Samuel hasoru.—Provérbios 17:3.
Maibé, Jessé iha oan-mane ida tan, neʼe mak David, oan ikun neʼebé “hein bibi hela”. (Versíkulu 11) Nuneʼe, ema bolu David mai atu hasoru Samuel. Depois Maromak Jeová hatete ba Samuel: “Hamriik bá, kose mina ba nia, tanba nia mak ema neʼe!” (Versíkulu 12) Maski David mak “joven mane ida neʼebé iha matan furak no oin bonitu”, maibé buat neʼebé halo nia haree kapás tebes iha Maromak nia oin mak ninia laran.—1 Samuel 13:14.
Tanba iha mundu neʼe ema hafolin liu mak buat neʼebé sira haree husi liʼur kona-ba ema, hanesan se ema bonita ka bonitu, ita bele sente kontente atu hatene katak ida-neʼe la hanesan ho buat neʼebé Maromak Jeová haree kona-ba ema. Ba nia la iha buat ida se ita badak ka ain-aas, ka se ema seluk haree ita nuʼudar bonita ka bonitu. Ba Maromak Jeová buat neʼebé importante liu mak buat neʼebé iha ita-nia laran. Hatene kona-ba ida-neʼe book ita atu hakarak haburas hahalok diʼak neʼebé sei halo ita furak iha Maromak nia oin, loos ka lae?
