Ó GOSTA lee kona-ba Jesus ka lae?— * Ema balu hakfodak tan foin hatene katak Jesus rasik la hakerek livru ida iha Bíblia. Maibé, ema naʼin-ualu neʼebé hakerek livru balu iha Bíblia konta buat barak kona-ba Jesus. Sira hotu moris iha tempu neʼebé Jesus moris, no sira konta saida mak Jesus hanorin. Ó bele temi ema naʼin-ualu neʼe nia naran?— Sira balu mak Mateus, Marcos, Lucas, no João. Sira naʼin-haat seluk mak Pedro, Tiago, Judas, no Paulo. Saida mak ó hatene kona-ba hakerek-naʼin sira-neʼe?—

Ulukliu, mai ita koʼalia kona-ba ema naʼin-tolu husi Jesus nia apóstolu naʼin-12 neʼebé hakerek livru balu iha Bíblia. Ó hatene sira-nia naran?— Pedro, João, no Mateus. Pedro hakerek karta rua ba ninia maluk kristaun sira. Nia konta ba sira buat balu neʼebé nia hatene kona-ba saida mak Jesus halo no hatete. Loke toʼok Bíblia iha 2 Pedro 1:16-18, no lee saida mak Pedro hatete kona-ba tempu neʼebé nia rona Maromak Jeová koʼalia ba Jesus husi lalehan.—Mateus 17:5.

Apóstolu João hakerek livru lima iha Bíblia. Iha Jesus nia han-kalan ikus hamutuk ho ninia apóstolu sira, João mak ida neʼebé tuur besik liu sira-nia Mestre. João mós hamutuk ho Jesus kuandu Nia mate. (Joao 13:23-26; 19:26) Husi Evanjellu haat iha Bíblia neʼebé konta kona-ba Jesus nia moris, João hakerek ida. Nia mós hakerek livru Apokalipse neʼebé kona-ba vizaun sira neʼebé Jesus fó sai ba nia, no nia hakerek mós karta tolu seluk iha Bíblia neʼebé iha ninia naran. (Apokalipse 1:1) Ema ida seluk neʼebé hakerek livru ida iha Bíblia, no neʼebé mós sai Jesus nia apóstolu ida, mak Mateus, neʼebé uluk serbisu nuʼudar kobradór impostu, ka publikanu.

Ema naʼin-rua seluk neʼebé hakerek livru balu iha Bíblia hatene Jesus iha dalan espesiál. Sira mak Jesus nia alin-sorin, neʼebé mós José no Maria nia oan. (Mateus 13:55) Jesus nia alin sira-neʼe naran sá?— Ida naran Tiago, ida seluk naran Judas. Kuandu Jesus foin komesa ninia serbisu haklaken, sira seidauk sai Jesus nia dixípulu. Sira mós hanoin katak Jesus bulak uitoan tanba nia haklaken ho laran-manas. (Marcos 3:21) Maibé ikusmai, Tiago hakerek livru ida iha Bíblia naran Tiago. No Judas hakerek livru ida iha Bíblia naran Judas.—Judas 1.

Ema naʼin-rua seluk neʼebé hakerek kona-ba Jesus nia moris mak Marcos no Lucas. Marcos nia inan, naran Maria, iha uma boot ida iha Jeruzalein, iha neʼebé ema kristaun uza atu halibur hamutuk, inklui mós apóstolu Pedro. (Apostolu 12:11, 12) Kuandu Jesus selebra Páskua ikus hamutuk ho ninia apóstolu sira, karik Marcos tuir sira kuandu sira bá jardín Jetsémani. Depois, kuandu ema mai atu kaer Jesus, soldadu sira mós kaer Marcos, maibé nia konsege halai.—Marcos 14:51, 52.

Lucas mak doutór ida neʼebé eskola-boot neʼebé sai Jesus nia dixípulu karik depois Jesus mate. Nia estuda didiʼak kona-ba Jesus nia moris no hakerek ho loos no momoos kona-ba neʼe. Ikusmai, Lucas akompaña apóstolu Paulo atu laʼo rai, no Lucas  mós hakerek livru iha Bíblia naran Apostolu.—Lucas 1:1-3; Apostolu 1:1.

Paulo mós hakerek livru balu iha Bíblia kona-ba Jesus. Uluk, Paulo iha naran Saul, no nia estuda no aprende ho ema naran-boot ida naran Gamaliel neʼebé matenek kona-ba lei. Tanba ema farizeu mak haboot no hanorin Paulo, nia odi ema kristaun no hola parte atu oho sira. (Apostolu 7:58–8:3; 22:1-5; 26:4, 5) Ó hatene oinsá mak Paulo aprende lia-loos kona-ba Jesus?—

Kuandu Paulo laʼo iha dalan atu bá Damasku atu kaer Jesus nia dixípulu sira, derrepente naroman boot husi lalehan mosu no halo nia matan-delek. Nia rona lia ida neʼebé husu nia: “Saul, Saul, tansá ó halo aat mai haʼu?” Lia neʼe husi Jesus rasik! Depois, Jesus haruka Paulo bá Damasku atu hasoru dixípulu ida naran Ananias, no ikusmai Paulo mós sai Jesus nia dixípulu. (Apostolu 9:1-18) Paulo hakerek livru 14 iha Bíblia, komesa ho livru Roma toʼo livru Ebreu.

Ó komesa ona atu lee livru sira iha Bíblia neʼebé konta kona-ba Jesus ka ema ida lee tiha ona ba ó ka lae?— Buat ida neʼebé kapás tebes atu halo iha ó-nia moris mak komesa agora nuʼudar joven atu aprende saida mak Bíblia hanorin kona-ba Jesus.