Orasaun

1 Tansá mak ita halo orasaun?

ORASAUN. Ema barak hakarak hatene liután kona-ba neʼe. Agora mai ita hanoin kona-ba pergunta hitu neʼebé ema baibain husu, no saida mak Bíblia hatete kona-ba neʼe. Informasaun iha livru neʼe sei ajuda ita hotu. Se Ita la iha toman atu halo orasaun, informasaun neʼe sei fó laran-manas ba Ita atu halo orasaun. Ka, se Ita toman ona halo ida-neʼe, diʼak atu buka-hatene oinsá mak Ita bele hadiʼa liután Ita-nia orasaun.

IHA mundu tomak, ema husi kultura no relijiaun oioin halo orasaun. Sira halo orasaun mesak, ka hamutuk ho ema seluk. Sira halo orasaun iha igreja, iha templu, iha sinagoga, iha meskita, ka iha pura. Karik sira mós uza buat oioin hanesan tapete orasaun nian, tersu, roda orasaun nian, imajen, livru orasaun, ka ai-kabelak neʼebé hakerek orasaun ruma.

Orasaun mak buat ida neʼebé halo ema la hanesan ho animál sira. Tuir loloos, iha buat barak neʼebé hanesan entre ita ema no animál sira. Ita no animál hotu presiza ai-han, bee, no anin. Ita no animál mós moris, sai boot, no ikusmai mate. (Eclesiastes [Pengkhotbah] 3:19) Maibé ita ema deʼit mak halo orasaun. Tanbasá?

Resposta mak tanba ita hotu nuʼudar ema presiza halo duni nuneʼe. Ema barak hatene katak orasaun mak dalan ida atu hakbesik ba Maromak ka buat ruma neʼebé santu, no buat neʼebé la iha rohan. Bíblia hatudu katak Maromak kria ema ho hakarak atu buka buat sira-neʼe. (Eclesiastes [Pengkhotbah] 3:11) Jesus Kristu mós hatete: “Ksolok ba ema sira neʼebé kiak iha laran.”—Mateus 5:3.

Ema barak sente “kiak iha laran”, ka sente katak sira kuran buat ruma iha sira-nia laran. Tan neʼe mak iha mundu tomak iha uma orasaun oioin, no ema barak halo orasaun, loos ka lae? Ema balu sadere ba sira-nia an rasik ka buka ajuda husi ema seluk atu hetan buat neʼebé sira kuran iha sira-nia laran. Maibé, tuir loloos, ema nia matenek no forsa latoʼo. Ita ema fraku no bele mate iha tempu naran deʼit. Tan neʼe, ita presiza sadere ba ida neʼebé iha matenek no forsa liu ita, no mós la bele mate. Entaun, buat saida deʼit mak book ita atu sente “kiak iha laran” no hakarak halo orasaun?

Hanoin toʼok: Ita dala ruma sente katak Ita presiza hetan matadalan ba Ita-nia moris ka hakarak hetan resposta ba pergunta ruma neʼebé susar, loos ka lae? Ita mós karik hasoru susar boot ruma no presiza duni atu simu kmaan, ka tenke foti desizaun boot ruma no buka dalan atu hetan matenek. Ka karik Ita hakarak hetan perdua ba sala ruma neʼebé Ita halo, loos ka lae?

Tuir Bíblia, ita bele halo orasaun kona-ba buat sira-neʼe hotu. Bíblia fó matadalan neʼebé diʼak liu kona-ba oinsá atu halo orasaun, no mós iha ezemplu barak kona-ba orasaun neʼebé feto no mane fiar-naʼin sira hatoʼo. Sira husu kmaan, matadalan, perdua, no sira mós husu pergunta sira neʼebé la fasil.—Salmo (Mazmur) 23:3; 71:21; Daniel 9:4, 5, 19; Habacuque (Habakuk) 1:3.

Sin, Bíblia konta kona-ba ema oioin nia orasaun. Maski ema sira-neʼe iha moris neʼebé la hanesan, maibé sira hotu halo buat ida neʼebé hanesan duni. Sira hatene buat neʼebé ema barak ohin loron la hatene. Sira hatene atu halo orasaun ba sé.

[Dezeñu iha pájina 3]