Lee-naʼin nia pergunta . . .

Haʼu tenke sai membru ba relijiaun ida ka lae?

▪ Ita sente laran-rua atu sai membru ba relijiaun ida ka lae? Karik Ita sente hanesan neʼe tanba Ita haree katak la iha dame entre membru husi igreja sira no Ita la gosta duni hahalok laran-makerek neʼebé sira no sira-nia ulun-naʼin hatudu. Se nuneʼe, karik Ita konkorda ho lia-dadolin husi rai-Fransa neʼebé hatete: “Ema neʼebé besik ba igreja baibain dook husi Maromak.”

Karik Ita hafolin Bíblia no sente katak governu no ema ida-idak tenke respeitu ema seluk nia direitu atu sai membru ba relijiaun ida. Maibé, dala ruma Ita hanoin: ‘Tuir loloos Maromak haruka ema atu sai membru ba relijiaun ida atu nia simu sira-nia adorasaun ka lae?’

Resposta badak mak “sin”. Oinsá mak ita bele hatene kona-ba neʼe? No Maromak simu relijiaun naran deʼit ka lae?

Mai ita hanoin kona-ba Jesus nia ezemplu. Nia sai membru ba relijiaun ida ka lae? Kuandu nia sei kiʼik, nia toman atu bá templu iha Jerusalém hamutuk ho ninia família no ema seluk hodi tuir adorasaun relijiaun judeu nian. (Lucas 2:41-43) Bainhira Jesus boot ona, nia ho ninia maluk ema judeu sira bá sinagoga atu adora Maromak. (Lucas 4:14-16) Kuandu Jesus koʼalia ba feto ida neʼebé fiar la hanesan, Jesus hatete: “Ami adora buat neʼebé ami hatene.” (Joao 4:22) Hodi hatete nuneʼe, Jesus hatudu ho klaru katak nia mak membru ida husi relijiaun judeu nian.

Depois neʼe, Jesus hatete katak Maromak la simu tan ema judeu sira-nia adorasaun, tanba sira nuʼudar nasaun la simu Jesus. (Mateus 23:33–24:2) Maibé, nia mós hatudu katak ema neʼebé hakarak adora Maromak iha dalan neʼebé loos tenke halo parte iha relijiaun ida. Nia hatete ba ninia dixípulu sira: “Nuneʼe mak ema hotu sei hatene katak imi haʼu-nia eskolante sira: wainhira imi hadomi malu.” (Joao 13:35) Sin, ema neʼebé sai Kristu nia dixípulu tenke halibur hamutuk ho sira-nia maluk fiar-naʼin atubele hatudu domin ba malu. Liután neʼe, Jesus esplika katak tuir loloos ema adora Maromak iha dalan rua deʼit. Ida mak “dalan luan” neʼebé “lori ema atu lakon an”, katak mate. Maibé, kona-ba dalan ida seluk nia hatete: “Odamatan kloot tebes no dalan kiʼik duni mak lori ema ba moris, no ema uitoan deʼit mak hetan nia.”—Mateus 7:13, 14.

Entaun, klaru katak Maromak la simu relijiaun naran deʼit. Bíblia fó avizu mai ita atu la ransu ho ema neʼebé “halo hahalok diʼak relijiaun nian iha liʼur, maibé iha laran sira sei hewai relijiaun nia kbiit loloos”. Liután neʼe, Maromak nia Liafuan haruka ita atu “hadook an husi ema sira hanesan neʼe”. (2 Timoteo 3:5) Iha parte seluk, ita sei hetan bensaun barak kuandu ita buka atu halibur ho sira neʼebé laʼo iha dalan neʼebé sei lori ba moris. Hodi halibur ho ema hanesan neʼe, ita bele fó laran-manas no ajuda malu, no mós ita iha esperansa neʼebé furak kona-ba futuru.—Ebreu 10:24, 25.

Oinsá mak Ita bele hatene loloos relijiaun ida neʼebé laʼo tuir dalan kiʼik? Ita bele hetan resposta husi Bíblia hodi lee informasaun iha livru Tuir Loloos, Saida mak Bíblia Hanorin?, iha kapítulu 15. * Informasaun neʼe sei ajuda Ita atu foti desizaun neʼebé loos kona-ba relijiaun ida neʼebé mak Ita tenke hili atu hola parte.

[Nota–rodapé]