Maromak halo duni “buat barak neʼebé boot” oinsá mak haʼu hatene kona-ba neʼe?

Esperiénsia husi Maurice Raj

Durante Funu Mundiál Segundu, haʼu ho haʼu-nia família hamutuk ho ema rihun ba rihun halai-sees husi violénsia makaʼas neʼebé mosu iha rai-Birmánia. Ami laʼo iha ai-laran ba loron barak, no iha kalan ami toba iha ai okos. Iha tempu neʼebá haʼu tinan sia deʼit. Haʼu lori sasán hotu neʼebé haʼu iha, falun ho hena kiʼik no tara ba haʼu-nia kotuk. Maibé, buat neʼebé akontese mai haʼu laʼós toʼo neʼe deʼit.

IDA-NEʼE akontese iha tinan 1942. Tempu neʼebá nasaun barak tuir funu, no ami halai husi tropa Japaun neʼebé foin tama iha Birmánia, neʼebé agora bolu Myanmar. Tropa Japaun domina área neʼebé iha mina barak iha rai okos, besik sidade Yenangyaung. Maibé antes ami toʼo fronteira rai-Índia nian, tropa Japaun toman ami no obriga ami atu fila fali.

Kuandu haʼu sei kiʼik ami hela iha Yenangyaung. Iha fatin neʼe haʼu-nia aman serbisu ho Kompañia Mina Birmánia. Depois tropa Japaun tama ona, aviaun husi tropa Inglaterra nian hatún bomba barak iha área neʼebé iha mina barak iha Yenangyaung. Dala ida, sira hatún bomba barak haleʼu ami, no ami tenke subar iha rai-kuak ba loron tolu. Ikusmai, ami halai ho ró ba Sale, sidade kiʼik besik Mota Ayeyarwady, ka Irrawaddy. Ami kontente tanba ami sei moris, no ami hela iha fatin neʼe toʼo funu ramata.

Trajédia lori ba lia-loos

Haʼu-nia alin-mane moris iha tinan 1945, kuandu Funu Mundiál Segundu ramata. Haʼu-nia aman kontente tebes tanba nia iha oan ida tan maski nia katuas ona. Maibé ninia kontente la tahan ba tempu kleur. Fulan tolu liu tiha, haʼu-nia alin neʼe mate. Lakleur, haʼu-nia aman mós mate tanba laran-triste.

Kolega sira neʼebé mai fó konsola haʼu hatete katak Maromak foti tiha haʼu-nia aman no alin atu hamutuk ho Nia iha lalehan. Haʼu mós hakarak tebes atu hamutuk ho sira! Haʼu-nia família tuir igreja katóliku, no haʼu tuir klase neʼebé hanorin doutrina igreja nian. Igreja hanorin katak padre no madre sira bá kedas lalehan, maibé ema seluk sei tama ba purgatóriu, fatin neʼebé ema hetan terus ba tempu uitoan atu hamoos sira-nia sala. Tanba haʼu hakarak tebes atu hamutuk fali ho haʼu-nia aman no alin, haʼu deside atu tama semináriu katóliku iha Maymyo, neʼebé agora bolu Pyin Oo Lwin, maizumenus dook kilómetru 210 husi ami-nia hela-fatin.

Maibé semináriu neʼe la simu haʼu tanba simu deʼit estudante neʼebé halo ramata ninia eskola. Tanba haʼu mai husi rai seluk, haʼu bá eskola ba tinan rua deʼit. No mós, durante funu eskola hotu taka. Maski ikusmai eskola loke fali, maibé haʼu-nia família nia ekonomia susar tebes. Haʼu-nia inan laʼós deʼit tau matan ba ninia oan-mane naʼin-tolu, maibé nia mós tau matan ba oan naʼin-tolu husi ninia alin-feto neʼebé mate ona. Nuneʼe nia la iha osan atu selu ba ami-nia eskola.

Haʼu-nia maun halo serbisu atu manán osan, maibé tanba haʼu tinan 13 deʼit no haʼu la bele halo buat ida atu ajuda. Haʼu-nia aman nia alin-mane, naran Manuel Nathan, hela iha Chauk, sidade kiʼik  ida besik Sale. Haʼu hanoin: ‘Se haʼu husik uma, ida-neʼe bele hamenus haʼu-nia inan nia todan.’ Entaun haʼu bá Chauk hodi hela ho haʼu-nia tiu.

Haʼu la hatene katak haʼu-nia tiu foin koñese Testemuña ba Jeová no nia hakarak tebes atu fahe buat neʼebé nia aprende husi Bíblia. Nia hahú fahe buat neʼebé nia hatene hodi esplika kona-ba orasaun Ami Aman. Orasaun neʼe komesa ho liafuan: “Ami Aman iha lalehan, tulun ami atu hahiʼi Ita naran.”—Mateus 6:9, 10, Liafuan diak ba imi, primeira edisaun.

Haʼu-nia tiu hatete: “Entaun Maromak iha naran. No nia naran mak Jeová.” Tuirmai nia hatudu Maromak nia naran iha Bíblia. Ida-neʼe halo haʼu hakarak atu hatene liután. Maibé, haʼu ladún hatene lee, ida-neʼe inklui lee iha haʼu-nia lian rasik, lia-tamil. Haʼu-nia tiu iha Bíblia no livru sira neʼebé esplika kona-ba Bíblia, maibé iha lia-inglés, no haʼu mós ladún komprende. Maski haʼu eskola kiʼik, neineik-neineik haʼu komprende buat neʼebé Bíblia hanorin. (Mateus 11:25, 26) Haʼu bele haree katak doutrina barak neʼebé haʼu aprende tiha ona la tuir Bíblia nia hanorin. Ikusmai, haʼu hatete: “Tiu, neʼe mak lia-loos!”

Kuandu haʼu tinan 16, haʼu komesa fahe ba ema seluk buat neʼebé haʼu aprende ona. Iha tempu neʼebá, rai-Myanmar iha Testemuña ba Jeová naʼin-77 deʼit. Lakleur neʼe, Testemuña ida neʼebé serbí nuʼudar misionáriu, naran Robert Kirk, neʼebé hela iha sidade kapitál, Rangún, agora bolu Yangon, vizita haʼu-nia tiu iha Chauk. Haʼu fó-hatene irmaun Robert katak haʼu halo promete ona ba Maromak Jeová atu uza haʼu-nia moris tomak hodi serbí nia. Entaun iha loron 24 Dezembru 1949, haʼu hetan batizmu iha Mota Ayeyarwady, atu hatudu katak haʼu halo promete ona atu serbí Maromak.

Tahan hasoru susar oioin

Depois neʼe, haʼu muda ba Mandalay atu hetan serbisu. Haʼu iha planu atu sai pioneiru, neʼe katak Testemuña ba Jeová ida neʼebé uza tempu barak liu iha serbisu haklaken. Loron ida, kuandu haʼu haree ema tebe bola, derrepente deʼit haʼu monu ba rai no haʼu-nia isin doko an makaʼas. Haʼu kona moras bibi-maten no tan neʼe haʼu tenke fila fali ba haʼu-nia família hodi sira bele tau matan haʼu.

Durante tinan ualu, moras neʼe mosu no lakon fali. Kuandu haʼu-nia saúde sai diʼak uitoan, haʼu komesa fali halo serbisu. Maski haʼu-nia inan hanoin haʼu-nia saúde no koko atu hapara haʼu atu aumenta haʼu-nia serbisu haklaken, maibé loron ida haʼu fó-hatene ba nia: “Haʼu la bele hein tan. Haʼu hakarak sai pioneiru. Maromak Jeová sei tau matan haʼu.”

Iha tinan 1957, haʼu muda ba Yangon no komesa serbí nuʼudar pioneiru. Haʼu kontente tebes tanba durante tinan 50 haʼu-nia moras la mosu fali. Maski haʼu hetan fali moras neʼe iha tinan 2007, maibé ohin loron haʼu hemu ai-moruk atu kontrola moras neʼe. Iha tinan 1958, haʼu simu knaar atu serbí nuʼudar pioneiru ba tempu-tomak, neʼe katak uza oras 150 fulan-fulan atu halo serbisu haklaken.

Fatin primeiru neʼebé haʼu serbí mak iha Kyonsha, knua ida neʼebé dook kilómetru 110 husi Yangon, iha parte norte. Ema balu iha fatin neʼe hetan ona livru sira neʼebé esplika kona-ba Bíblia no hakarak atu hatene liután. Kuandu irmaun Robert no haʼu toʼo iha neʼebá, ema-lubun boot halibur ho ami. Ami hatán pergunta barak neʼebé sira husu kona-ba Bíblia no ami mós hatudu sira oinsá halaʼo reuniaun atu estuda Bíblia. Lakleur deʼit sira balu komesa laʼo hamutuk ami hodi halo serbisu haklaken. Haʼu simu knaar atu hela no serbí iha knua neʼe. Liutiha fulan balu, grupu kiʼik neʼe sai kongregasaun ida. Ohin loron, iha Testemuña naʼin-150 iha área neʼe.

 Tinan balu liu tiha, haʼu simu knaar atu vizita kongregasaun sira iha Myanmar tomak, inklui mós grupu kiʼik neʼebé dook husi kongregasaun. Haʼu halo viajen liu dalan rai-rahun, hodi saʼe truk neʼebé nakonu ho sasán, laʼo ain liu ai laran, hakur mota ho bero, no laʼo tun-saʼe foho. Maski haʼu-nia isin ladún forte, haʼu sente katak Maromak Jeová fó forsa mai haʼu atubele kontinua halo haʼu-nia knaar.—Filipe 4:13.

“Maromak Jeová sei ajuda Ita”

Iha tinan 1962, haʼu simu fali knaar atu serbí iha sukursál husi Testemuña ba Jeová iha Yangon, no iha neʼebá irmaun Robert komesa fó treinu haʼu. Maibé derrepente deʼit estadu haruka misionáriu sira husi rai liʼur atu sai husi Myanmar, no iha semana balu nia laran, sira hotu bá. No haʼu hakfodak kuandu haʼu hetan knaar atu tau matan ba sukursál.

Haʼu hanoin: ‘Oinsá mak haʼu bele halo knaar neʼe? Haʼu la eskola boot no ladún iha esperiénsia.’ Irmaun sira balu neʼebé idade liu haʼu haree katak haʼu hanoin barak, no sira hatete: “Keta hanoin demais, Maurice. Maromak Jeová sei ajuda Ita. No ami hotu sei apoia Ita.” Sira-nia liafuan neʼe halo haʼu sente kmaan duni! Fulan balu liutiha neʼe, haʼu tenke halibur relatóriu tinan nian kona-ba serbisu haklaken iha Myanmar neʼebé sei fó sai iha livru 1967 Yearbook of Jehovahʼs Witnesses (livru kona-ba atividade husi Testemuña ba Jeová durante tinan ida nian). Ba tinan 38, haʼu iha knaar atu halibur relatóriu tinan-tinan ba rai ida-neʼe. Buat barak neʼebé akontese iha rai ida-neʼe, fó fiar mai haʼu katak Maromak Jeová mak dirije serbisu haklaken.

Porezemplu, kuandu haʼu hakarak sai sidadaun Myanmar, haʼu presiza osan kyat 450 * atu selu kartaun neʼe, tan neʼe haʼu deside atu la halo ida-neʼe. Loron ida, kuandu haʼu laʼo liu fatin neʼebé uluk haʼu serbisu, haʼu-nia patraun uluk nian haree haʼu. Nia bolu: “Hei, Raj, mai no foti ó-nia osan. Ó haluha atu foti ó-nia osan pensaun.” Osan neʼe hamutuk kyat 450.

Kuandu haʼu simu tiha osan neʼe, haʼu hanoin kona-ba buat barak neʼebé haʼu bele halo ho osan kyat 450. Maibé tanba osan neʼe natoon kyat 450 neʼebé haʼu presiza atu hetan kartaun sidadaun nian, haʼu sente katak Maromak Jeová nia hakarak mak atu haʼu uza osan neʼe atu hetan kartaun neʼe. No haʼu-nia desizaun neʼe lori rezultadu diʼak. Nuʼudar sidadaun, haʼu bele hela iha rai neʼe, halo viajen, hetan lisensa atu hatama livru husi rai liʼur, no halaʼo knaar importante sira seluk neʼebé fó apoiu ba serbisu haklaken iha Myanmar.

Reuniaun boot dook husi Rangún

Testemuña sira komesa sai barak iha sidade Myitkyina iha parte norte iha Myanmar. Tan neʼe, iha tinan 1969 ami deside atu halaʼo reuniaun boot iha sidade neʼe. Maibé, problema mak oinsá atu prepara transporte ba Testemuña sira hotu neʼebé hela iha parte súl atu toʼo fatin neʼe. Ami halo orasaun kona-ba neʼe no hatama surat ba estasaun komboiu atu husu se ami bele hetan karruajen, ka fatin pasajeiru neen. Ami hakfodak tebes bainhira sira simu buat neʼebé ami husu.

Ikusmai, ami halo prontu ona buat hotu neʼebé presiza atu halaʼo reuniaun boot neʼe. Iha loron neʼebé Testemuña sira atu mai, ami bá estasaun komboiu iha meiudia atu hein komboiu neʼebé atu toʼo iha tuku 2.30 lokraik. Kuandu ami sei hein daudauk, funsionáriu neʼebé tau matan ba estasaun neʼe fó ami telegrama neʼebé hatete: “Ami hakotu ona karruajen neen neʼebé Watch Tower Society  uza.” Funsionáriu neʼe hatete katak komboiu la bele dada karruajen sira-neʼe atu saʼe foho.

Ami sei halo saida? Primeiru, ami hanoin atu muda loron ba reuniaun boot neʼe. Maibé se nuneʼe, neʼe katak ami presiza hatama fali surat atu husu lisensa husi estadu, no karik presiza semana barak atu hetan lisensa. Nuʼudar ami harohan makaʼas ba Maromak Jeová kona-ba problema neʼe, komboiu tama daudauk estasaun. Ami la bele fiar buat neʼebé ami haree ho ami-nia matan rasik, karruajen neen nakonu ho Testemuña sira mak toʼo mai! Sira oin kontente no hiʼit liman ba ami. Kuandu ami husu ba sira saida mak akontese, sira ida esplika: “Sira hakotu duni karruajen neen, maibé laʼós karruajen ami-nian!”

Husi tinan 1967 toʼo tinan 1971, Testemuña sira iha Myanmar aumenta dala rua toʼo atu besik ema naʼin-600. Depois neʼe iha tinan 1978, Testemuña sira-nia sukursál muda ba uma andár rua. Tinan ruanulu liu tiha, Testemuña sira aumenta tan toʼo ema naʼin-2.500 liu. Tan neʼe, presiza duni atu halo serbisu hodi haboot liután sukursál neʼe. Iha loron 22 Janeiru 2000, irmaun John E. Barr, membru husi Grupu Administradór ba Testemuña ba Jeová, mai husi Estadus Unidus atu hatoʼo diskursu hodi dedika ba Maromak uma andár tolu neʼebé uza nuʼudar serbisu-fatin no hela-fatin. Toʼo ohin loron ami sei uza fatin neʼe.

Hanoin fali ba bensaun sira

Ohin loron, iha ema naʼin-52 neʼebé halo serbisu voluntáriu no hela iha sukursál iha Yangon. No iha rai neʼe tomak, iha Testemuña maizumenus naʼin-3.500 ho kongregasaun 74 no mós grupu kiʼik sira. Buat ida tan neʼebé halo haʼu kontente tebes mak iha tinan 1969 antes haʼu-nia inan mate, nia mós sai Testemuña ba Jeová.

Maizumenus tinan 1965, pioneiru ida naran Doris Ba Aye, komesa halo serbisu tradusaun iha sukursál. Antes neʼe, iha tinan 1959, nia tuir klase iha Watchtower Bible School of Gilead neʼebé halaʼo ba dala 32, neʼe mak eskola ida neʼebé treinu Testemuña ba Jeová atu sai misionáriu. Haʼu laran monu ba nia tanba nia bonita, ema neʼebé kontente, no hadomi tebes Maromak Jeová. Ami kaben iha tinan 1970. Toʼo ohin loron, ami laran-metin ba Maromak Jeová no ba malu.

Durante tinan neenulu liu, haʼu haree duni oinsá Maromak lolo nia liman atu ajuda ninia Testemuña sira atu halaʼo serbisu haklaken iha rai neʼe. Loos duni, nia mak Maromak neʼebé boot no ba nia deʼit mak ita fó glória. Sin, hanesan haʼu haree tiha ona iha haʼu-nia moris tomak, nia mak “Ida neʼebé halo buat barak neʼebé boot”.—Salmo (Mazmur) 106:21.

[Nota–rodapé]

[Dezeñu iha pájina 19]

Halo serbisu haklaken iha Rangún, Birmánia, maizumenus tinan 1957

[Dezeñu iha pájina 20]

Halo viajen atu tuir reuniaun boot iha Kaleymo, Birmánia, maizumenus tinan 1978

[Dezeñu iha pájina 21]

Ami-nia uma sukursál foun neʼebé furak, neʼebé dedika iha tinan 2000

[Dezeñu iha pájina 21]

Hamutuk ho Doris ohin loron

[Dezeñu iha pájina 21]

Hamutuk halo serbisu haklaken uma ba uma