Hanorin Ita-nia oan

Ukun neʼebé sei lori bensaun ba mundu tomak

Ó HATENE ka lae, sé-nia Ukun mak sei lori bensaun ba mundu tomak?— * Jesus hanorin ita atu halo orasaun kona-ba Ukun neʼe. Nia hanorin ita atu husu Maromak: “Halo Ita-nia reinu [ka, ukun] toʼo mai ami.” (Mateus 6:9, 10) Husi maizumenus tinan 2.000 liubá toʼo ohin loron, sira neʼebé halo tuir Jesus halo orasaun hodi husu atu Maromak nia Ukun toʼo mai. Ó mós halo orasaun kona-ba neʼe ka lae?—

Hanesan governu ida-idak ukun sira ida-idak nia rai, Maromak nia Ukun mak governu neʼebé sei ukun mundu tomak. Kuandu Maromak nia Ukun mai toʼo mundu, ema hotu neʼebé hakruʼuk ba Ukun neʼe sei haksolok hodi simu bensaun.

Maromak nia Ukun mak governu neʼebé harii iha lalehan. Bíblia fó-hatene kona-ba Ukun-Naʼin ba governu neʼe. Profeta Isaías hatete: “Oan-mane ida moris tiha mai ita, . . . no ukun nuʼudar liurai-oan iha ninia kabaas. No nia sei iha naran . . . Liurai-Oan Dame nian.”—Isaías (Yesaya) 9:6.

Ó hatene saida mak liurai-oan nia knaar?— Nia ajuda nia aman liurai atu ukun rai ida. Sé mak Liurai iha lalehan neʼebé boot liu hotu?— Se ó dehan Maromak Jeová, neʼe loos duni. Bíblia bolu nia nuʼudar “Maromak Aas Liu Hotu iha mundu tomak”. (Salmo [Mazmur] 83:18) Dala barak Bíblia bolu Jesus nuʼudar “Maromak nia Oan”. Neʼe tanba Maromak Jeová mak fó moris ba Jesus. Maromak Jeová mak Jesus nia Aman neʼebé loos.—Lucas 1:34, 35; Joao 1:34, 49; 3:17; 11:27; 20:31; Apostolu 9:20.

Kuandu Jesus haruka ita atu halo orasaun kona-ba Maromak nia Ukun, nia koʼalia kona-ba governu ida neʼebé espesiál tebes. Hanesan ita lee tiha iha Isaías 9:6, liurai-oan mak sei ukun governu neʼe. Loos, Maromak Jeová halo ninia Oan, Jesus, nuʼudar Ukun-Naʼin ba ninia Ukun. Maibé ó hatene ka lae, iha mós ema seluk neʼebé atu ukun hamutuk ho Jesus iha ninia Aman nia governu?— Mai ita koʼalia kona-ba sira.

Antes Jesus mate, nia fó-hatene ba ninia apóstolu sira katak nia sei bá nia Aman “nia uma” iha lalehan. Nia hatete: “Haʼu bá hadiʼa fatin ba imi . . . nuneʼe, iha fatin neʼebé haʼu hela, imi mós sei hela bá.” (Joao 14:1-3) Ó hatene ka lae, saida mak apóstolu sira no ema seluk neʼebé Maromak hili sei halo iha lalehan hamutuk ho Jesus?— Sira sei “ukun hamutuk ho nia”. Bíblia mós fó-hatene  ema naʼin-hira mak sei sai liurai hamutuk ho Jesus. Sira hamutuk ema naʼin-144.000.—Apokalipse 14:1, 3; 20:6.

Tuir ó-nia hanoin, kuandu Liurai-Oan Dame nian no sira naʼin-144.000 mak ukun mundu neʼe, ema nia moris sei sai oinsá?— Ema nia moris sei sai kapás tebes! Funu sei la iha tan. Animál fuik sei sai maus no ema sei la taʼuk sira. Sei la iha ema ida neʼebé sai moras ka mate. Ema matan-aat sei haree fali, ema tilun-diuk sei rona fali, ema ain-aat sei halai no haksoit hanesan bibi-rusa. Sei iha ai-han barak ba ema hotu-hotu iha rai. No ema hotu sei hadomi malu hanesan Jesus hanorin ninia dixípulu sira. (Joao 13:34, 35) Mai ita loke eskritura sira husi livru Isaías neʼebé hakerek iha kraik no lee kona-ba buat furak neʼebé sei akontese iha rai.—Isaías (Yesaya) 2:4; 11:6-11; 25:8; 33:24; 35:5, 6; 65:21-24.

Maizumenus tinan 2.000 liubá, Jesus hanorin ema atu harohan: “Halo Ita-nia reinu [ka, ukun] toʼo mai ami.” Husi tempu neʼebá toʼo agora ema rihun ba rihun aprende ona kona-ba Ukun neʼe. No buat neʼebé sira aprende book sira atu troka sira-nia moris. Lakleur tan, Maromak nia Ukun sei toʼo mai no halakon ema nia governu hotu iha mundu neʼe. Ema hotu neʼebé moris iha tempu neʼebá mak sira neʼebé serbí Maromak Jeová no Ukun-Naʼin neʼebé nia hili, Jesus Kristu, no sira sei iha saúde neʼebé diʼak no moris haksolok iha dame laran.—Joao 17:3.

[Nota–rodapé]

PERGUNTA:

▪ Sé mak sei sai Ukun-Naʼin ba Maromak nia Ukun?

▪ Sé mak sei ukun hamutuk ho Jesus iha ninia Aman nia governu?

▪ Kuandu Jesus ukun mundu neʼe, ema nia moris sei sai oinsá?

[Dezeñu iha pájina 23]