Hanorin Ita-nia oan

Ó sente an mesak ka lae?

EMA ida sente mesak kuandu ema seluk lakohi sai kolega ho nia. Nia sente ida-neʼe tanba karik nia husi nasaun seluk, ka kór kulit la hanesan, ka koʼalia língua la hanesan, ka iha toman neʼebé la hanesan. Ó mós sente an hanesan neʼe ka lae?— *

Mai ita koʼalia kona-ba mane ida neʼebé sente an mesak. Nia naran mak Mefiboset. Mai ita haree tansá mak nia sente hanesan neʼe. Se ó sente an mesak, ó bele aprende buat barak husi Mefiboset nia istória.

Mefiboset mak Jónatas nia oan-mane, no Jónatas mak David nia belun diʼak. Antes Jónatas mate iha funu, nia hatete ba David: ‘Hatudu laran-diʼak ba haʼu-nia oan sira.’ Ikusmai David sai liurai. Tinan balu liutiha neʼe, nia hanoin-hetan kona-ba Jónatas nia liafuan neʼe, no Mefiboset deʼit mak sei moris. Kuandu nia sei kiʼik, nia hetan asidente. Tan neʼe, nia la bele laʼo ho diʼak iha ninia moris tomak. Ó bele komprende ka lae tansá mak nia sente an mesak?—

David hakarak halo buat neʼebé diʼak ba Jónatas nia oan neʼe. Nuneʼe, nia arranja hodi Mefiboset hela besik nia iha Jerusalém, no mós nia bele tuur atu han hamutuk iha David nia meza. David mós fó ba Mefiboset mane ida naran Ziba ho ninia oan sira no atan sira atu sai fali atan ba nia. Sin, David hafolin duni Jónatas nia oan-mane neʼe! Tuirmai, ó hatene saida mak akontese?—

David hetan susar iha ninia uma laran. David nia oan-mane, Absalão, kontra hasoru nia  aman no koko atu halo nia an sai fali liurai. David tenke halai atu salva nia moris. No ema barak mós halai tuir nia. David nia belun sira hatene katak David mak liurai neʼebé loos. Mefiboset mós hakarak tuir, maibé nia la bele bá tanba susar ba nia atu laʼo.

Depois neʼe, Ziba fó-hatene ba David katak Mefiboset la halai tuir nia tanba Mefiboset hakarak tebes atu sai liurai. David fiar ba lia-bosok neʼe! Tan neʼe, nia entrega ba Ziba buat hotu neʼebé Mefiboset nian. Liutiha neʼe, David manán funu hasoru Absalão no fila fali ba Jerusalém. Agora David husu tuir ba Mefiboset kona-ba buat neʼebé Ziba hatete atu hatene se Ziba nia liafuan neʼe loos ka lae. Ikusmai, David deside katak Mefiboset no Ziba tenke fahe ba rua rikusoin neʼebé nia fó tiha ba Ziba. Tuir ó-nia hanoin, saida mak Mefiboset halo kona-ba neʼe?—

Nia la hatete katak David nia desizaun neʼe la loos. Mefiboset hatene katak liurai neʼe presiza sente hakmatek hodi halaʼo ninia knaar ho diʼak. Nuneʼe, Mefiboset hatete katak Ziba bele simu rikusoin hotu. Buat neʼebé importante liu ba Mefiboset mak David, Maromak Jeová nia atan neʼe, mai fali ona Jerusalém nuʼudar liurai.

Mefiboset hasoru susar barak no nia sempre sente an mesak. Maibé Maromak Jeová hadomi no tau matan ba nia. Saida mak ita bele aprende husi nia?— Maski ita halo buat neʼebé loos, karik ema balu sei koʼalia bosok kona-ba ita. Jesus hatete: “Mundu odi imi karik, imi hatene bá katak nia odi haʼu uluk liu imi.” Ema mós oho Jesus! Ita bele fiar katak se ita halo buat neʼebé loos, Maromak neʼebé loos, Jeová, no ninia Oan-Mane, Jesus, sei hadomi ita.

Lee husi ó-nia bíblia

1 Samuel 20:15-17, 41, 42

2 Samuel 4:4; 9:1-10; 19:24-30

Joao 15:18

[Nota–rodapé]