Lee-naʼin nia pergunta . . .

Mundu sei lakon duni iha tinan 2012 ka lae?

▪ Notísias husi telejornál BBC dehan: “Ema barak neʼebé fiar katak mundu sei lakon halibur an daudaun iha suku ida iha rai-Fransa . . . Sira fiar katak mundu neʼe sei lakon iha loron 21 fulan-Dezembru tinan 2012, tanba tuir ema Maya antigu, loron neʼe mak loron ikus husi tinan 5.125 iha sira-nia kalendáriu.”

Maski ulun-naʼin relijiaun balu, no ema balu neʼebé bolu sira-nia an nuʼudar sientista, no mós siʼikdór balu hatete katak mundu neʼe sei lakon, maibé ita bele fiar katak ida-neʼe sei la akontese. Sin, mundu sei la lakon iha tinan 2012. Tuir loloos, mundu neʼe sei hela ba nafatin.

Bíblia hatete: “Jerasaun ida mai no jerasaun ida bá, maibé mundu sei hela ba tempu neʼebé la bele sura.” (Eclesiastes [Pengkhotbah] 1:4) No mós iha Isaías (Yesaya) 45:18, hatete: “Neʼe mak buat neʼebé Jeová hatete ona, . . . Nia mak Ida neʼebé kria mundu no Ida neʼebé halo mundu, Nia mak Ida neʼebé hametin mundu, nia la kria ho saugati deʼit, nia halo mundu hodi ema hela iha mundu neʼe. ‘Haʼu mak Jeová, no la iha ida seluk.’”

Se aman ida uza oras barak atu halo brinkedu ba ninia oan hodi halo nia oan sente kontente, aman neʼe sei estraga fali brinkedu neʼebé nia fó tiha ona ba ninia oan ka lae? Klaru katak lae, tanba se nia halo ida-neʼe, neʼe katak nia mak aman neʼebé aat tebes. Nuneʼe mós, Maromak kria rai neʼe liuliu hodi ema bele hela ho kontente. Maromak hatete ba ema primeiru, Adão no Eva, dehan: “Iha oan no bei-oan bá no sai barak, no halo mundu nakonu, no haburas mundu tomak.” No tuirmai, “Maromak haree buat hotu neʼebé nia halo no haree! neʼe diʼak tebes”. (Gênesis [Kejadian] 1:27, 28, 31) Maromak nia hakarak ba mundu la troka, nuneʼe nia sei la husik mundu neʼe atu lakon. Kona-ba liafuan sira neʼebé Maromak Jeová promete ona, nia dehan: “Ida-neʼe sei la fila fali ba haʼu la ho rezultadu, maibé ida-neʼe sei halo duni tuir buat neʼebé haʼu hakarak, no ida-neʼe sei hetan susesu duni tuir buat neʼebé haʼu hatete tiha ona.”—Isaías 55:11.

Maibé, Maromak Jeová nia hakarak mak atu halakon “sira hotu neʼebé halo aat raiklaran neʼe”. (Apokalipse 11:18) Iha ninia Liafuan, nia promete hodi dehan: “Ema neʼebé laran loos mak sira neʼebé sei hela iha rai, no ema neʼebé la halo aat mak sira neʼebé sei hela iha neʼebá. Kona-ba ema aat, sira sei halakon tiha husi rai, no kona-ba traidór sira, sei fokit sai tiha husi neʼebá.”—Provérbios (Amsal) 2:21, 22.

Bainhira mak ida-neʼe sei akontese? Jesus dehan: “Kona-ba loron eh oras, ema ida la hatene; anju sira mós iha lalehan no Oan-Mane rasik la hatene. Aman deʼit mak hatene.” (Marcos 13:32) Tan neʼe, Testemuña ba Jeová la koko atu siʼik kona-ba bainhira mak Maromak sei halakon ema aat. Maibé sira komprende katak agora ema hotu moris iha tempu neʼebé Bíblia bolu “loron ikus sira” no haree “sinál” sira neʼebé hatudu kona-ba neʼe. Maski nuneʼe, sira la hatene bainhira loos “rohan” neʼe sei toʼo mai. (Marcos 13:4-8, 33; 2 Timoteo 3:1) Sira komprende katak Aman iha lalehan no ninia Oan-Mane deʼit mak hatene kona-ba tempu neʼebé buat sira-neʼe sei mosu.

Antes loron neʼe toʼo mai, Testemuña ba Jeová uza didiʼak sira-nia tempu hodi haklaken lia-foun diʼak kona-ba Maromak nia Ukun, neʼebé sei halo rai neʼe sai hanesan jardín furak ida, no ‘ema loos rasik sei simu rai neʼe no sira sei moris ba nafatin iha neʼebá’.—Salmo (Mazmur) 37:29.

[Dezeñu iha pájina 20]

Image Science and Analysis Laboratory, NASA-Johnson Space Center