Aprende husi Maromak nia Liafuan

Oinsá mak Maromak nia ukun-fuan sira lori buat diʼak ba ita?

Informasaun iha neʼe esplika kona-ba pergunta neʼebé karik Ita husu ona no ajuda Ita atu hetan resposta husi Ita rasik nia Bíblia. Testemuña ba Jeová sira kontente atu koʼalia hamutuk ho Ita kona-ba pergunta sira-neʼe.

1. Tanbasá mak ita tenke halo tuir Maromak?

Tanba Maromak mak kria ita, ita tenke halo tuir nia. Jesus mós sempre halo tuir Maromak. (Joao 6:38; Apokalipse 4:11) Maromak nia ukun-fuan sira fó oportunidade ba ita atu hatudu katak ita hadomi nia.—Lee 1 Joao 5:3.

Maromak Jeová nia ukun-fuan hotu ba ita-nia diʼak. Ninia ukun-fuan sira hanorin ita oinsá atu halaʼo moris neʼebé diʼak liu ohin loron, no mós hatudu oinsá ita bele hetan bensaun ba nafatin iha futuru.—Lee Salmo (Mazmur) 19:7, 11; Isaías (Yesaya) 48:17, 18.

2. Oinsá mak Maromak nia ukun-fuan sira diʼak ba ita-nia saúde?

Maromak nia ukun-fuan kona-ba la hemu tua toʼo lanu proteje ita husi moras oioin no asidente neʼebé bele hamate ita. Ema neʼebé hemu tua demais bele sai toman, no ida-neʼe book sira atu halo hahalok beik. (Provérbios [Amsal] 23:20, 29, 30) Maski Maromak Jeová la bandu ita atu hemu tua, maibé ita labele hemu demais.—Lee Salmo 104:15; 1 Korinto 6:10.

Maromak Jeová mós fó avizu ba ita kona-ba hahalok laran-moras, la kontrola hirus, no hahalok seluk neʼebé bele estraga ita. Se ita halo tuir ninia konsellu, ita bele hetan saúde neʼebé diʼak.—Lee Provérbios 14:30; 22:24, 25.

3. Oinsá mak Maromak nia ukun-fuan bele proteje ita?

Maromak nia ukun-fuan bandu ema atu labele halo relasaun seksuál ho ema neʼebé laʼós sira-nia kaben. (Ebreu 13:4) Kaben-naʼin sira neʼebé halo tuir ukun-fuan neʼe sente seguru no sira-nia oan mós sente kontente. Maibé sira neʼebé la halo tuir ukun-fuan neʼe bele hetan rezultadu neʼebé la diʼak hanesan hetan moras aat, soe malu, halo violénsia, sente estrese boot, no sira mesak presiza haboot oan.—Lee Provérbios 5:1-9.

Se ita hasees an husi situasaun neʼebé bele tenta ita atu halo sala-foʼer, ita bele proteje ita-nia relasaun ho Maromak. Ita mós sei la hakanek ema seluk.—Lee 1 Tesalonika 4:3-6.

  4. Hodi hafolin moris, neʼe lori buat diʼak saida ba ita?

Ema neʼebé hafolin moris nuʼudar prezente husi Maromak, bele hetan saúde neʼebé diʼak kuandu sira para fuma no husik sira-nia toman seluk neʼebé aat. (2 Korinto 7:1) Maromak hafolin bebé maski nia sei iha kabun laran. (Êxodo [Keluaran] 21:22, 23) Tan neʼe, ita labele oho ho neon bebé neʼebé sei iha kabun laran. No mós, sira neʼebé haree moris hanesan Maromak haree, kuidadu sira-nia uma, karreta no serbisu-fatin atu la lori perigu. (Deuteronômio [Ulangan] 22:8) Sira mós la hola parte iha atividade halimar nian neʼebé lori perigu ba sira-nia moris, tanba moris mak prezente husi Maromak.—Lee Salmo 36:9.

5. Raan mak sagradu, oinsá ida-neʼe lori buat diʼak mai ita?

Raan mak buat neʼebé sagradu tanba Maromak hatete katak ida-neʼe reprezenta ema ka animál nia moris. (Gênesis [Kejadian] 9:3, 4) Tuir Maromak nia ukun-fuan, raan nia folin hanesan ho moris nia folin. Liuhusi ukun-fuan neʼe, Maromak bele fó perdua ba ita-nia sala.—Lee Levítico (Imamat) 17:11-13; Ebreu 9:22.

Oinsá mak nia halo ida-neʼe? Nia haruka Ninia Oan mai rai atu salva ita liuhusi ninia raan. Jesus nia raan iha folin boot tanba nia mak ema sala-laek. Depois Jesus fó tiha ninia moris nuʼudar sakrifísiu, nia entrega ba Maromak folin husi ninia raan, neʼebé reprezenta ninia moris. (Ebreu 9:12) Raan neʼebé Jesus fakar, loke dalan ba ita atu hetan moris rohan-laek.—Lee Mateus 26:28; Joao 3:16.

Atu hetan informasaun liután, haree kapítulu 12 no 13 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová.