Resposta ba pergunta neʼe importante ka lae?

“Kuandu haʼu tinan sanulu haʼu komesa atu namora. Foufoun, ami kaer liman no reʼi malu deʼit. Maibé lakleur, ami kaer malu iha dalan seksuál. Kuandu haʼu tinan 15, haʼu komesa serbisu no iha serbisu-fatin mane sira sempre hakbesik haʼu no hakarak haʼu atu toba hamutuk ho sira. Haʼu hakarak halo buat naran deʼit neʼebé haʼu-nia kolega sira halo. Tanba haʼu hakarak sira atu simu haʼu, ida-neʼe book haʼu atu sai brani hodi halo relasaun seksuál oioin.”—SARAH, * RAI-AUSTRÁLIA.

KARIK ita sei hakfodak atu hatene katak Sarah boot iha família neʼebé adora Maromak. Ninia inan-aman koko atu haboot nia hodi moris tuir Bíblia nia matadalan kona-ba buat morál nian. Maibé Sarah hili rasik atu tuir dalan seluk.

Ema barak iha hanoin hanesan Sarah. Sira fiar katak buat neʼebé Bíblia hatete kona-ba seks, ka relasaun seksuál, la iha folin ona ba tempu modernu. Ema seluk sente katak maski sira adora Maromak, maibé sira mós bele halo relasaun seksuál tuir deʼit sira-nia hakarak.

Maibé importante ka lae, atu ita hatene no moris tuir Bíblia nia hanorin kona-ba seks? Bíblia hatete katak “Maromak leno Eskritura hotu; nia diʼak atu hanorin”. (2 Timoteo 3:16) Se ita fiar katak Maromak mak kria ema no Bíblia mak Maromak nia Liafuan, importante mós ba ita atu hatene saida mak Bíblia hatete kona-ba seks.

Maibé, ema barak konfuzaun kona-ba Bíblia nia hanorin kona-ba seks. Maski ulun-naʼin relijiaun sira dehan katak sira halo tuir Bíblia, maibé sira hanorin fali buat neʼebé la tuir Bíblia nia matadalan. Tuir loloos, ida-neʼe hamosu problema entre igreja barak no halo sira haketak malu.

Duké tau fiar ba buat neʼebé ema seluk hatete, diʼak liu se ita rasik mak buka-hatene saida mak Bíblia hanorin kona-ba relasaun seksuál nian. Informasaun tuirmai sei koʼalia kona-ba pergunta sanulu neʼebé ema barak husu kona-ba saida mak Bíblia hatete kona-ba seks. Ita sei hetan resposta neʼebé klaru tebes husi Bíblia kona-ba neʼe. Parte terseiru husi informasaun neʼe sei koʼalia kona-ba tansá dalan neʼebé ita hili mak importante duni.

[Nota–rodapé]