▪ Tuir ema barak, doutrina Trindade hanorin katak Aman mak Maromak, Oan mak Maromak, no espíritu santu mós Maromak, maibé sira hotu Maromak ida deʼit. Sira dehan katak Aman, Oan no espíritu santu iha ba nafatin, sira ida-idak forsa boot liu hotu, no ida la boot liu fali ida seluk. Maibé ida-neʼe mak buat neʼebé Bíblia hanorin ka lae?

Ema balu uza Mateus 28:19 atu apoia doutrina Trindade. Eskritura neʼe hatete: “Neʼe duni, laʼo bá, hanorin nasaun hotu-hotu; sarani sira hodi Aman, Oan no espíritu santu nia naran.” Maski eskritura neʼe temi kona-ba Aman, Oan, no espíritu santu, maibé la temi katak Aman, Oan, no espíritu santu mak ida deʼit. Tuir loloos iha eskritura neʼe, Jesus haruka ninia dixípulu sira neʼebé ema judeu atu bá hanorin no sarani ema hodi Aman, Oan no espíritu santu nia naran. Nuʼudar nasaun, saida mak ema judeu sira-nia fiar?

Maromak fó aliansa Ukun-Fuan nian ba nasaun Israel. Ikusmai Ukun-Fuan sira-neʼe sai nuʼudar parte iha Bíblia. Maromak nia ukun-fuan ida ba ema Israel hatete: “Imi labele iha maromak seluk duké haʼu.” (Deuteronômio [Ulangan] 5:7) Maromak naʼin-hira mak hatete liafuan neʼe? Deuteronômio 6:4 fó-hatene ho klaru hodi hatete: “Rona bá, oh, Israel: Jeová ita-nia Maromak mak Jeová mesak ida deʼit.” Klaru katak iha Maromak mesak ida deʼit, laʼós tolu. Kuandu Maromak fó ukun-fuan neʼe ba ema Israel, sira foin sai livre husi rai-Egiptu. Ema Egiptu sira adora maromak Trindade barak, ida mak Osiris, Isis, no Horus (haree foto iha sorin karuk). Tanba ida-neʼe mak Maromak fó ukun-fuan ba ema Israel atu adora Maromak mesak ida deʼit. Importante ba sira atu halo tuir ukun-fuan neʼe ka lae? Tuir ulun-naʼin ida husi relijiaun judeu naran J. H. Hertz fó komentáriu kona-ba eskritura iha Deuteronômio 6:4, nia hatete: “Liafuan importante sira-neʼe neʼebé apoia hanorin adora Maromak ida deʼit, kontra hanorin kona-ba adora maromak oioin . . . Shema [orasaun ida] la simu hanorin trindade husi ema kristaun uluk tanba ida-neʼe kontra hanorin kona-ba adora maromak mesak ida deʼit.” *

Tanba Jesus ema judeu ida, nia mós presiza halo tuir ukun-fuan neʼe. Kuandu Satanás tenta Jesus depois nia hetan batizmu, Jesus hatán ba Satanás: “Dook tiha, Satanás, basá hakerek ona: ‘Ó sei adora ó-nia Naʼi, ó-nia Maromak; Nia deʼit mak ó sei hanaʼi.’” (Mateus 4:10; Deuteronômio 6:13) Ita bele aprende buat rua husi ida-neʼe. Primeiru, Satanás tenta Jesus atu adora nia duké Maromak Jeová, maibé oinsá mak Satanás bele halo ida-neʼe se Jesus mak parte husi Maromak? Nia la bele, loos ka lae? Segundu, kuandu Jesus hatete “Nia deʼit”, Jesus hatete ho klaru katak iha Maromak ida deʼit neʼebé ema tenke adora. Se Jesus parte husi Trindade, nia sei hatete “ami” iha eskritura neʼe, loos ka lae?

Se nuneʼe, oinsá mak ita bele komprende eskritura iha Mateus. Kuandu ema hatene ona buat barak kona-ba Maromak no deside atu serbí nia, sira hetan batizmu “hodi Aman, Oan no espíritu santu nia naran”. (Mateus 28:19) Neʼe hatudu katak sira komprende no simu Maromak Jeová nia kbiit no ukun, no sira rekoñese oinsá mak Jeová uza Jesus atu halaʼo ninia hakarak. (Salmo [Mazmur] 83:18; Mateus 28:18) Sira mós komprende oinsá Maromak uza ninia espíritu santu, ka ninia forsa.—Gênesis (Kejadian) 1:2; Galasia 5:22, 23; 2 Pedro 1:21.

Doutrina kona-ba Trindade halo ema barak konfuzaun ba tinan atus ba atus ona. Iha parte seluk, Jesus hanorin ninia dixípulu sira no haruka sira atu adora “Maromak loos mesak deʼit”, Jeová.—Joao 17: 3.

[Nota–rodapé]

[Dezeñu iha pájina 31]

Musée du Louvre, Paris