DALA ruma inan-aman haruka ó atu laran-metin ba buat ruma ka lae?— * Laran-metin ba buat ruma katak ita hanoin buat neʼe importante. Bíblia koʼalia kona-ba ema ida neʼebé “nafatin laran-metin ba Jeová”, Maromak neʼebé loos. Mai ita koʼalia kona-ba nia, ninia naran mak Ezequias. Mai ita haree saida mak ita bele aprende husi ninia ezemplu.

Ezequias nia moris husi tempu kiʼik ladún kontente. Ninia aman Acaz, liurai husi Judá, la kontinua atu serbí Jeová. Acaz komesa adora maromak falsu sira kuandu Ezequias sei kiʼik. Acaz mós halo hahalok neʼebé aat tebes, nia oho ninia oan-mane sira, neʼe mak Ezequias nia maun-alin rasik, no hasaʼe sira nuʼudar sakrifísiu ba ninia maromak falsu.

Maski Acaz kontinua halo hahalok aat, maibé Ezequias nafatin halo tuir Jeová. Tuir ó-nia hanoin, neʼe susar ba nia ka lae?— Sin, karik susar duni. Maski nuneʼe, Ezequias la rende an! Mai ita aprende saida mak ajuda nia atu nafatin laran-metin ba Jeová, no oinsá mak ita bele halo tuir ninia ezemplu.

Ezequias aprende kona-ba ema balu neʼebé nafatin laran-metin ba Jeová. Ida mak David. Maski David moris tinan atus ba atus antes Ezequias moris, maibé Ezequias bele aprende husi eskritura sira kona-ba David nia ezemplu. David hakerek: “Se haʼu-nia aman rasik no inan rasik husik haʼu, Jeová rasik sei simu haʼu.”

Ó hatene saida mak ajuda David atu nafatin laran-metin ba Jeová?— Ninia fiar! David fiar katak se nia halo tuir Maromak Jeová, Jeová  sei ajuda nia. David la duvida kona-ba neʼe! Hodi hanoin kona-ba David nia ezemplu, neʼe ajuda mós Ezequias atu nafatin laran-metin hodi halo tuir Jeová. Ó mós bele fiar katak Jeová sei ajuda ó se ó nafatin laran-metin hodi halo tuir Jeová.

Maibé, oinsá se ó-nia aman ka inan la adora Jeová?— Maromak haruka labarik sira atu halo tuir inan-aman, tan neʼe ó mós presiza halo tuir ó-nia inan-aman. Maibé, se ó-nia inan-aman haruka ó atu halo buat ruma neʼebé Maromak bandu, ó bele esplika ba sira tanbasá ó labele halo ida-neʼe. Ó labele bosok, naʼok, ka halo buat naran deʼit neʼebé Maromak hatete katak sala, maski ema sé deʼit hatete ba ó atu halo ida-neʼe. Se ó halo tuir Maromak, ó halo buat neʼebé loos.

Ita mós bele hetan ezemplu diʼak seluk tan iha Bíblia laran. Ezequias la aprende deʼit husi David nia ezemplu, maibé nia mós aprende husi ninia avó-mane, naran Jotam. Maski Jotam mate antes Ezequias moris, maibé Ezequias bele aprende kona-ba ninia ezemplu, hanesan ita mós bele aprende kona-ba nia hodi lee Bíblia. Ó bele hanoin kona-ba ema balu husi Bíblia neʼebé ita bele halo tuir?—

Klaru katak kuandu ita lee Bíblia, ita mós bele haree kona-ba sala balu neʼebé Ezequias, David, Jotam, no ema seluk halo tanba sira ema sala-naʼin. Maski nuneʼe, ema sira-neʼe hadomi Jeová, sira la subar sira-nia sala, no sira hakaʼas an atu halo buat neʼebé loos. La haluha katak Maromak nia Oan Jesus deʼit mak ema neʼebé la iha sala. Entaun, mai ita aprende kona-ba Jesus no hakaʼas an atu halo tuir ninia ezemplu.