Tansá perigu atu halo matan-dook nia atividade?

Husi tempu joven kedas, Barbara * haree vizaun, rona lian sira, no nia fiar katak nia bele koʼalia ho nia família neʼebé mate ona. Barbara ho nia laʼen, Joachim, lee livru sira kona-ba matan-dook no sira sai matenek atu fihir kartaun hodi siʼik futuru. Dala ida, kartaun sira-neʼe hatudu katak sira sei manán osan barak, no liuhusi sira-nia negósiu, sira manán duni osan barak. Loron ida, kartaun sira-neʼe fó avizu ba sira katak ema aat sira sei mai iha sira-nia uma, no mós fó-hatene oinsá sira bele proteje sira-nia an.

MASKI ema balu iha mundu ladún fiar ona kona-ba matan-dook nia atividade, maibé sei iha ema barak neʼebé iha interese ba ida-neʼe. Ema barak uza buat oioin atu proteje sira-nia an husi buat aat, ka sira husu matan-dook atu siʼik sira-nia futuru. Jornál ida husi rai-Alemaña naran Focus iha informasaun ho títulu “Laptop and Lucifer”, neʼebé hatete: “Internét halo ema barak liu iha interese ba matan-dook nia atividade.”

Ita hatene ka lae, katak Bíblia koʼalia kona-ba matan-dook nia atividade sira? Karik buat neʼebé Bíblia hatete kona-ba ida-neʼe sei halo ita hakfodak.

Saida mak Bíblia hanorin kona-ba matan-dook nia atividade?

Ukun-fuan neʼebé Maromak fó ba nasaun Israel hatete: “Iha imi-nia leet, labele iha ema ruma neʼebé . . . uza sasiʼik, ema neʼebé uza masonik, ka ema ruma neʼebé buka sinál, ka matan-dook, ka ema neʼebé fekit ema seluk, ka ema ruma neʼebé bá hasoru matan-dook, ka siʼikdór kona-ba akontesimentu sira, ka ema ruma neʼebé husu ba ema mate. Tanba Jeová hakribi ema hotu neʼebé halo buat hirak-neʼe.” (Deuteronômio [Ulangan] 18:10-12) Tanbasá mak Maromak nia ukun-fuan bandu makaʼas buat sira-neʼe?

Hanesan esperiénsia iha leten hatudu, ema barak fiar katak ema moris bele koʼalia ho ema mate, no katak informasaun neʼebé ema hetan liuhusi matan-dook mai husi ema mate. Fiar sira-neʼe mai husi buat neʼebé relijiaun barak hanorin. Sira hanorin katak kuandu ema mate, nia bá mundu espíritu nian. Maibé, Bíblia nia hanorin la hanesan, Bíblia hatete ho klaru katak “ema neʼebé mate ona, sira la hatene buat ida”. (Eclesiastes [Pengkhotbah] 9:5) Bíblia mós hatudu katak ema neʼebé mate ona  hanesan toba dukur, no sira la hatene saida mak akontese haleʼu sira. * (Mateus 9:18, 24; Joao 11:11-14) Karik Ita husu Ita-nia an: Se ida-neʼe loos, oinsá mak bele esplika ema nia esperiénsia kona-ba koʼalia ho ema mate? Saida mak hun ba buat sira-neʼe?

Koʼalia ho anju sira

Istória sira husi Evanjellu hatudu katak kuandu Jesus iha rai, nia koʼalia ho anju sira. Marcos 1:23, 24 hatete katak “mane ida ho diabu iha nia laran” koʼalia ba Jesus hodi hatete: “Haʼu hatene ó sé loos.” Sin, anju sira mós hatene kona-ba ita. Maibé ita hatene sira ka lae?

Antes Maromak kria ema, nia kria uluk ninia oan espíritu sira, neʼe mak anju rihun ba rihun. (Jó [Ayub] 38:4-7) Anju sira mak kriatura neʼebé boot liu fali ema. (Ebreu 2:6, 7) Sira matenek tebes no iha forsa boot, no Maromak kria sira atu halo ninia hakarak. Ema neʼebé hakerek salmu ida hatete: “Fó glória ba Jeová, oh imi, ninia anju sira neʼebé iha forsa boot, neʼebé halo tuir ninia liafuan.”—Salmo (Mazmur) 103:20.

Bíblia hatudu katak anju balu komesa envolve an ho ema maski Maromak la fó lisensa ba sira atu halo nuneʼe. Saida mak sira-nia hakarak? Anju primeiru neʼebé halo ida-neʼe, lohi Adão no Eva no book sira atu fila kotuk ba sira-nia Kriadór. Hodi halo nuneʼe, anju neʼe halo nia an sai Diabu Satanás, katak ida neʼebé koʼalia bosok no kontra hasoru Maromak.—Gênesis (Kejadian) 3:1-6.

Liutiha tempu balu, anju seluk “husik sira-nia kadunan”, ka hela-fatin iha lalehan, nakfila an nuʼudar ema no komesa hola feto bonita sira iha rai. (Judas 6; Gênesis 6:1, 2) Anju aat sira-neʼe no sira-nia oan neʼebé hanesan jigante fó-terus ba ema toʼo halo mundu “nakonu ho violénsia”. Karik ita mós hatene istória husi Bíblia kona-ba oinsá Maromak halakon buat aat iha mundu liuhusi Rai-Nabeen iha Noé nia tempu.—Gênesis 6:3, 4, 11-13.

Tanba rai-nabeen, anju sira neʼebé tun mai iha rai tenke nakfila an sai fali anju hodi fila ba lalehan. Maibé sira-nia Kriadór la husik sira atu fila fali ba sira-nia hela-fatin uluk nian. Maromak kastigu sira hodi la simu tan sira iha ninia família no sira-nia kondisaun bele kompara hanesan sira iha “kuak nakukun nian”. (2 Pedro 2:4, 5) Bíblia koʼalia kona-ba anju sira neʼebé la halo tuir Maromak nuʼudar “diabu sira”, ka anju aat sira. (Tiago 2:19) Anju aat sira-neʼe mak fó forsa ba matan-dook nia atividade.

Anju aat sira-nia hakarak mak saida?

Primeiru, anju aat sira neʼebé koʼalia ho ema hakarak hapara ema atu adora Maromak loos, Jeová. Tan neʼe, kuandu ema balu hatete katak sira iha kbiit espesiál ruma, tuir loloos anju aat sira mak fó kbiit neʼe atu dada ema nia atensaun hodi sira la bele aprende kona-ba Maromak no haburas relasaun ho nia.

Segundu, anju aat sira hakarak ema atu adora sira. Ita bele hatene sira-nia hakarak neʼe husi buat neʼebé sira-nia ulun-naʼin, Satanás, koko atu halo ba Jesus. Satanás tenta Jesus hodi promete atu fó “reinu hotu-hotu ho nia glória”. Saida mak Satanás hakarak se Jesus simu ida-neʼe? Satanás hatete: “Ó hakneʼak hodi adora haʼu.” Maibé Jesus la monu ba tentasaun neʼe no nia nunka husik Maromak no adorasaun neʼebé loos.—Mateus 4:8-10.

Ohin loron, anju aat sira baibain la koʼalia ba ema hanesan Satanás koʼalia ba Jesus. Duké  halo ida-neʼe, sira koko lohi ema atu halo matan-dook nia atividade sira. Porezemplu, sira book ema atu buka-hatene kona-ba futuru liuhusi haree animál nia aten, batar musan, uza kartaun, no astrolojia. Sira mós book ema atu uza ai-moruk hodi fekit ema, no tara buat oioin iha uma laran atu proteje sira husi buat aat. Maibé ita labele husik anju aat sira lohi ita! Tuir loloos, buat sira-neʼe laʼós dalan atu buka-hatene kona-ba futuru, no atu hetan protesaun husi buat aat. Anju aat sira uza atividade sira-neʼe atu lasu ema hodi hadook sira husi Maromak, no atu sira la bele adora Maromak Jeová. Se atividade sira-neʼe la kumpre anju aat sira-nia hakarak, baibain sira fó-terus ba ema neʼebé envolve an tiha ona iha atividade sira-neʼe. Se ida-neʼe akontese ba Ita, saida mak Ita bele halo atu sai livre husi sira?

Oinsá mak ita bele sai livre husi anju aat sira?

Ita la iha dúvida katak anju aat sira neʼebé koʼalia ho ema mak Maromak nia inimigu duni, no ikusmai Maromak sei halakon sira. (Judas 6) Sira bosok-teen no finje sai fali hanesan ema neʼebé mate ona. Ita sente oinsá se Ita foin hatene katak Ita-nia kolega mak bosok-teen ida, no lakohi atu Ita hetan buat diʼak iha Ita-nia moris? Ita sei halo saida se Ita hatene katak Ita sai kolega ho ema aat iha internét? Tuir loloos, envolve an ho anju aat sira mak perigu liu fali buat sira-neʼe. Ita presiza halo buat hotu neʼebé ita bele atu sai livre husi anju aat sira. Maibé oinsá mak ita bele halo ida-neʼe?

Kuandu ema iha Efeso antigu aprende saida mak Bíblia hanorin kona-ba matan-dook sira-nia atividade, sira hatene katak sira presiza halakon livru sira kona-ba neʼe. Maski livru sira-neʼe karun tebes, maibé sira “sunu tiha sira iha ema hotu nia oin”. (Apostolu 19:19, 20) Ohin loron, sasán sira kona-ba matan-dook nia atividade laʼós deʼit livru, korrente, no sasán seluk tan, maibé inklui mós buat neʼebé bele hetan iha internét, filme no vídeo game. Ita presiza hasees an husi buat naran deʼit neʼebé iha ligasaun ho matan-dook nia atividade.

Hanoin toʼok kona-ba kaben-naʼin neʼebé foin ita koʼalia. Sira-nia kartaun fó avizu ba sira katak feto perigu naʼin-rua sei mai iha sira-nia uma, no katak sira labele rona no labele simu buat ida husi ema aat sira-neʼe. Kuandu Testemuña ba Jeová naʼin-rua naran Connie no Gudrun toʼo iha kaben-naʼin neʼe nia uma, sira fó-hatene ba kaben-naʼin neʼe katak sira lori liafuan diʼak kona-ba Maromak. Joachim no Barbara deside atu rona ba sira. Nuʼudar sira koʼalia hamutuk, sira mós koʼalia kona-ba matan-dook nia atividade, no Connie no Gudrun hatudu ba kaben-naʼin neʼe saida mak Bíblia hanorin kona-ba neʼe. Ikusmai Joachim no Barbara komesa estuda Bíblia ho Testemuña sira.

Lakleur, Joachim no Barbara foti desizaun atu hakotu sira-nia relasaun ho anju aat sira. Testemuña sira esplika katak, hodi halo nuneʼe, anju aat sira sei sai hirus. Joachim no Barbara hasoru susar no hetan terus tanba anju aat ataka sira. Ba tempu balu, Joachim no Barbara sempre taʼuk iha kalan toʼo sira muda uma no hetan kmaan uitoan. Durante sira-nia tempu susar neʼe, sira fiar metin nafatin ba liafuan iha Filipe 4:13 neʼebé hatete: “Haʼu bele halo buat hotu iha Nia neʼebé fó kbiit mai haʼu.” Jeová fó bensaun ba sira-nia hakaʼas-an no ikusmai, anju aat sira la fó-terus tan ba sira. Ohin loron, Joachim no Barbara kontente hodi serbí Maromak neʼebé loos, Jeová.

Bíblia hatete ba sira neʼebé hakarak atu hetan Maromak Jeová nia bensaun: “Hakruʼuk ba Maromak . . . Halo funu hasoru Diabu no nia sei halai husi imi. Hakbesik ba Maromak, no nia sei hakbesik imi.” (Tiago 4:7, 8) Se Ita hakarak duni atu sai livre husi anju aat sira, Maromak Jeová sei ajuda Ita. Joachim no Barbara hanoin fila fali oinsá sira sai livre husi anju aat sira, sira fiar ho laran tomak liafuan iha Salmo 121:2 neʼebé hatete: “Haʼu-nia ajuda mai husi Jeová.”

[Nota–rodapé]

[Liafuan neʼebé foti husi pájina 29]

Envolve an ho matan-dook nia atividade hanetik ema atu sira la bele haburas relasaun diʼak ho Maromak

[Liafuan neʼebé foti husi pájina 30]

“Hakbesik ba Maromak, no nia sei hakbesik imi.”—TIAGO 4:8