Maromak Jeová loke haʼu-nia matan

Esperiénsia Husi Patrice Oyeka

Dala ida tan haʼu tuur deʼit iha nakukun laran. Haʼu matan-delek, sente mesamesak, no tuur bilán hodi rona rádiu. Haʼu hakarak hakotu deʼit haʼu-nia moris neʼebé triste. Haʼu kahur venenu iha haʼu-nia bee no hatuur iha haʼu-nia oin. Maibé antes haʼu hemu ida-neʼe, haʼu hakarak atu hariis no hatais roupa diʼak. Tanbasá mak haʼu hakarak mate deʼit? No oinsá mak haʼu moris hela atu konta haʼu-nia istória neʼe?

H AʼU moris iha loron 2 Fevereiru 1958, iha distritu Kasaï Orientál, iha Repúblika Demokrátika Kongu. Haʼu-nia aman mate kuandu haʼu tinan sia, no haʼu-nia maun mak tau matan ba haʼu.

Depois haʼu ramata eskola, haʼu hetan serbisu iha plantasaun borraxa nian. Iha dadeer ida iha tinan 1989, kuandu haʼu iha eskritóriu prepara haʼu-nia relatóriu, derrepente deʼit haʼu la bele haree buat ida. Foufoun, haʼu hanoin neʼe tanba ahi mate, maibé haʼu bele rona jeradór nia lian no iha tempu neʼe dadeer-saan hela. Haʼu taʼuk tebetebes, haʼu la bele haree buat ida, maski surat-tahan iha haʼu-nia oin.

Nuneʼe, haʼu bolu kedas maluk serbisu-naʼin, no husu nia atu lori haʼu ba doutór iha serbisu-fatin. Doutór neʼe hatete katak karik diʼak liu se sira lori haʼu ba doutór neʼebé iha esperiénsia liu kona-ba problema neʼe. No kuandu nia haree katak haʼu-nia situasaun aat liu, nia haruka haʼu ba sidade boot, naran Kinxasa.

Haʼu-nia moris iha Kinxasa

Iha Kinxasa, haʼu konsulta ho espesialista barak, maski nuneʼe sira la bele halo buat ida atu ajuda haʼu. Depois loron 43 neʼebé haʼu iha ospitál, doutór sira dehan katak iha haʼu-nia moris tomak haʼu sei nunka haree fali. Tan neʼe, haʼu-nia família lori haʼu ba igreja oioin hodi buka ema ida neʼebé bele kura haʼu ho milagre, maibé sira-nia hakaʼas-an la hetan susesu.

Ikusmai, haʼu lakon ona esperansa atu bele haree fali. Buat hotu iha haʼu-nia moris sai nakukun no triste. Haʼu la bele haree, no haʼu lakon haʼu-nia serbisu. Haʼu mós lakon haʼu-nia feen, tanba nia husik haʼu no lori ami-nia sasán hotu iha uma. Haʼu sente moe atu ransu ho ema seluk. Haʼu hadook haʼu-nia an husi ema seluk no haʼu hela deʼit iha uma laran. Haʼu sente katak haʼu-nia moris la iha folin.

Dala rua haʼu koko atu oho an. Dala segundu mak haʼu foin konta iha leten. Iha tempu neʼebá, haʼu la konsege oho an tanba labarik ida iha haʼu-nia família fakar venenu neʼe kuandu haʼu hariis hela. Diʼak nia la hemu venenu neʼe. Maibé haʼu estrese tanba haʼu la bele hetan fali kopu. Depois neʼe, haʼu fó-hatene ba haʼu-nia família tanbasá haʼu buka kopu, no haʼu esplika ba sira buat neʼebé haʼu hakarak halo.

Haʼu agradese ba Maromak no ba haʼu-nia família tanba tau matan mai haʼu. Ho sira-nia ajuda, haʼu-nia planu atu oho an la hetan susesu.

Haʼu hetan fali moris neʼebé kontente

Iha loron-domingu ida, iha tinan 1992, kuandu haʼu tuur iha uma no fuma hela, Testemuña  ba Jeová naʼin-rua neʼebé haklaken iha ami-nia área, haklaken mai haʼu. Tanba sira haree haʼu matan-delek, sira lee ba haʼu eskritura iha Isaías (Yesaya) 35:5 neʼebé dehan: “Tempu neʼebá, matan-delek sira-nia matan sei loke, no tilun-diuk sira-nia tilun sei nakloke duni.” Kuandu haʼu rona liafuan neʼe, haʼu-nia laran sente haksolok tebes. La hanesan ho igreja sira seluk, Testemuña sira la promete katak sira bele kura haʼu. Maibé, sira esplika katak, se haʼu hatene kona-ba Maromak, haʼu bele haree filafali iha mundu foun neʼebé Maromak promete. (Joao 17:3) Haʼu komesa kedas atu estuda Bíblia ho Testemuña sira. Haʼu mós komesa atu tuir sira-nia reuniaun hotu no halo mudansa iha haʼu-nia moris, hanesan haʼu para fuma.

Maibé tanba haʼu matan-delek, neʼe hanetik haʼu atu laʼo ba oin atu aprende buat barak liután kona-ba Maromak. Tan neʼe, haʼu tuir eskola ba ema matan-delek hodi haʼu bele lee no hakerek ho letra braile. Ida-neʼe ajuda haʼu atu hola parte iha eskola neʼebé Testemuña sira halaʼo iha Reuniaun-Fatin. Eskola neʼe fó treinu mai haʼu, no haʼu komesa haklaken haʼu-nia fiar ba ema seluk. Lakleur, haʼu sente kontente fali. Haʼu kontinua laʼo ba oin no haʼu dedika haʼu-nia moris ba Maromak Jeová. Iha loron 7 Maiu 1994, haʼu hetan batizmu.

Nuʼudar haʼu-nia domin ba Maromak no ba ema sai boot liután, haʼu haburas hakarak atu halo serbisu ba Maromak tempu-tomak. Husi loron 1 Dezembru 1995, haʼu komesa uza tempu barak liu atu halo serbisu ba Maromak hodi serbí nuʼudar pioneiru regulár. Iha fulan-Fevereiru tinan 2004 haʼu simu knaar espesiál atu serbí nuʼudar katuas iha kongregasaun. Dala ruma, haʼu hetan knaar atu hatoʼo diskursu kona-ba Bíblia iha kongregasaun sira seluk iha haʼu-nia área. Bensaun sira-neʼe halo haʼu kontente tebes no fó-hanoin haʼu katak, la iha buat ida neʼebé bele hapara ita hodi kumpre ita-nia hakarak atu serbí Maromak Jeová.

Maromak Jeová fó mai haʼu “matan”

Hanesan haʼu esplika tiha ona, haʼu-nia feen soe haʼu tanba haʼu matan-delek. Maibé haʼu simu bensaun ida tan husi Maromak Jeová. Feto ida naran Anny Mavambu, simu haʼu atu sai ninia laʼen, maski haʼu matan-delek. Nia sai hanesan haʼu-nia “matan”. Tanba nia mós serbí nuʼudar pioneiru regulár, nia sempre akompaña haʼu iha serbisu haklaken. Nia mós lee ba haʼu informasaun husi haʼu-nia diskursu hodi haʼu bele hakerek haʼu-nia nota iha braile. Nia hanesan bensaun espesiál ba haʼu. Haʼu hatene katak liafuan iha Provérbios (Amsal) 19:14 mak loos duni. Eskritura neʼe hatete: “Liman-rohan husi aman mak uma no rikusoin, maibé feen neʼebé matenek mak husi Jeová.”

Haʼu no Anny simu bensaun tan husi Maromak Jeová. Agora ami iha oan naʼin-rua, mane ida no feto ida. Haʼu hein namanas atu haree sira-nia oin iha mundu foun kuandu haʼu-nia matan nakloke. No bensaun ida tan mak haʼu-nia maun neʼebé fó ninia rai ba ami hela, simu lia-loos husi Bíblia no hetan ona batizmu. Ami hotu serbí iha kongregasaun ida deʼit.

Maski haʼu matan-delek, maibé tanba Maromak fó bensaun barak mai haʼu, haʼu nafatin hakarak halo buat barak liután atu serbí nia. (Malaquias [Maleakhi] 3:10) Haʼu halo orasaun loroloron atu ninia Ukun bele mai hodi halakon terus hotu iha mundu neʼe. Tanba haʼu hatene ona Jeová, haʼu fiar ho laran tomak katak “bensaun husi Maromak Jeová, neʼe mak halo ema riku, no nia la aumenta buat neʼebé halo laran-susar”.—Provérbios 10:22.

[Dezeñu iha pájina 15]

Hatoʼo diskursu kona-ba Bíblia; hamutuk ho haʼu-nia família no haʼu-nia maun