Oinsá mak ita bele hetan moris susesu iha futuru?

OINSÁ mak Ita bele hetan moris neʼebé susesu iha futuru? Dalan ida mak hodi hanoin didiʼak rezultadu husi desizaun sira neʼebé Ita foti agora.

Ohin loron, ema barak hakarak hetan kedas buat neʼebé sira hakarak. Tanba ida-neʼe karik Ita sente susar atu foti desizaun sira neʼebé lori rezultadu diʼak ba nafatin. Karik Ita rekoñese katak hodi halo tuir Bíblia nia konsellu, neʼe sei ajuda Ita atu hametin Ita-nia relasaun ho família. (Efeso 5:22–6:4) Maibé atu halo ida-neʼe, Ita presiza gasta tempu beibeik hodi hamutuk ho Ita-nia família, no kuidadu atu la fó tempu barak liu ba serbisu ka atividade halimar nian. Iha Ita-nia moris tomak, Ita presiza foti desizaun sira neʼebé importante. Ita sei foti desizaun neʼebé lori kontente ba Ita agora deʼit ka desizaun neʼebé lori kontente ba nafatin? Oinsá mak Ita bele foti desizaun ho matenek? Hakat haat tuirmai neʼe bele ajuda Ita.

1 Hanoin rezultadu husi Ita-nia desizaun

Kuandu Ita atu foti desizaun, hanoin kona-ba rezultadu saida mak desizaun neʼe sei lori. Bíblia hatete: “Ema neʼebé matenek haree perigu no buka atu subar nia an.” (Provérbios [Amsal] 22:3) Se Ita hanoin didiʼak kona-ba rezultadu husi Ita-nia desizaun, karik neʼe sei ajuda Ita atu la halo desizaun neʼebé bele lori susar ba Ita. Iha parte seluk, kuandu Ita hanoin kona-ba rezultadu diʼak neʼebé Ita sei hetan iha futuru, ida-neʼe sei hametin Ita-nia hakarak atu foti desizaun ho matenek.

Husu ba Ita-nia an: ‘Haʼu-nia desizaun sei lori rezultadu saida liutiha tinan ida, tinan 10, ka tinan 20? Desizaun neʼe sei lori rezultadu saida ba haʼu-nia saúde? Haʼu-nia desizaun sei kona haʼu-nia família no ema seluk neʼebé haʼu hadomi iha dalan saida deʼit?’ No importante liu, husu ba Ita-nia an: ‘Haʼu-nia desizaun sei halo Maromak kontente ka lae? Oinsá mak ida-neʼe sei kona haʼu-nia relasaun ho nia nuʼudar belun?’ Tanba Maromak mak leno Bíblia, ida-neʼe bele ajuda Ita atu hatene saida deʼit mak bele halo Maromak kontente, no mós fó avizu ba Ita kona-ba perigu ruma neʼebé karik Ita la hatene.—Provérbios 14:12; 2 Timoteo 3:16.

2 Ita rasik mak tenke foti desizaun

Ema barak halo tuir deʼit ema neʼebé haleʼu sira, duké foti sira-nia desizaun rasik. Maski ema barak foti desizaun neʼebé hanesan, maibé ida-neʼe la dehan katak desizaun neʼe lori susesu. Tan neʼe duké halo tuir deʼit ema seluk, diʼak se Ita rasik mak foti desizaun. Hanoin toʼok kona-ba feto ida naran Natalie. * Nia hatete: “Haʼu hakarak iha moris kaben nian neʼebé kontente. Maibé husi dalan neʼebé haʼu halaʼo haʼu-nia moris, haʼu haree katak haʼu la bele hetan ida-neʼe. Kuandu haʼu sei eskola iha universidade, haʼu-nia kolega hotu mak joven neʼebé matenek, maibé dala barak sira foti desizaun neʼebé la matenek iha sira-nia moris. Sira sempre troka namora. Hanesan ho sira, haʼu mós troka beibeik namora. Tanba haʼu halaʼo haʼu-nia moris iha dalan hanesan neʼe, haʼu sempre laran-kanek.”

Natalie komesa estuda Bíblia ho Testemuña ba Jeová. Nia hatete: “Iha Testemuña sira-nia leet, haʼu haree joven sira neʼebé kontente no kaben-naʼin sira iha relasaun neʼebé metin. Maski susar mai haʼu, maibé neineik-neineik haʼu troka haʼu-nia hahalok no dalan neʼebé haʼu halaʼo haʼu-nia moris.” Ida-neʼe lori rezultadu saida? Natalie hatutan tan: “Haʼu  hakarak duni atu kaben ho mane neʼebé haʼu bele respeitu. Ikusmai, haʼu kaben ho mane neʼebé iha fiar hanesan haʼu. Haʼu sente katak Maromak fó ba haʼu família neʼebé diʼak liu fali buat neʼebé uluk haʼu mehi.”

3 Hanoin kona-ba oinsá Ita-nia desizaun sei kona Ita-nia futuru

Atu Ita la foti desizaun neʼebé sei lori kontente ba tempu uitoan deʼit, Ita presiza hanoin didiʼak kona-ba moris saida mak Ita hakarak hetan iha futuru. No halo planu kona-ba oinsá mak Ita bele hetan ida-neʼe. (Provérbios 21:5) Kuandu Ita atu foti desizaun, lalika hanoin katak Ita-nia moris mak tinan 70 ka 80 deʼit, maibé hanoin kona-ba moris ba nafatin neʼebé Bíblia promete.

Bíblia esplika katak liuhusi Kristu Jesus nia sakrifísiu, Maromak loke dalan hodi ema bele hetan moris ba nafatin. (Mateus 20:28; Roma 6:23) Maromak promete katak lakleur tan ninia hakarak uluk nian ba ema no mundu neʼe sei sai loos. Sira neʼebé hadomi Maromak sei haksolok hodi moris ba nafatin iha mundu neʼebé hanesan jardín furak. (Salmo [Mazmur] 37:11; Apokalipse 21:3-5) Ita mós bele hetan moris kapás neʼe se Ita hanoin didiʼak kona-ba Ita-nia futuru.

4 Hakaʼas an atu kumpre Ita-nia planu sira

Saida deʼit mak Ita bele halo atu hetan futuru kapás neʼebé Maromak promete? Primeiru, hodi aprende kona-ba Maromak. (Joao 17:3) Se Ita hatene didiʼak kona-ba Bíblia nia hanorin, neʼe sei ajuda Ita atu fiar katak buat neʼebé Maromak promete ba futuru mak loos duni. No fiar hanesan neʼe bele hametin Ita-nia hakarak atu halo mudansa iha Ita-nia moris hodi halo Maromak kontente.

Hanoin toʼok kona-ba mane ida naran Miguel. Nia hatete: “Kuandu haʼu tinan 12 haʼu komesa uza droga no hemu tua demais. Haʼu parte husi gang no haʼu hanoin karik haʼu sei mate antes haʼu sai tinan 30. Tanba haʼu rai odi iha laran, haʼu koko atu oho an ba dala balu. Haʼu hakaʼas an atu hetan moris neʼebé diʼak liu maibé haʼu la hetan.” Kuandu Miguel sei eskola sekundária, ninia kolega ida husi gang komesa estuda Bíblia ho Testemuña ba Jeová. Nuneʼe, Miguel mós simu atu estuda Bíblia.

Buat neʼebé Miguel aprende husi Bíblia troka ninia hanoin kona-ba ninia futuru. Nia hatete: “Haʼu aprende katak iha futuru mundu neʼe sei sai hanesan jardín neʼebé furak, no katak ema sei moris ho dame no la laran-susar tan. Haʼu komesa fiar katak haʼu mós bele hetan futuru kapás neʼe. Ulukliu, haʼu halo planu atu haburas haʼu-nia relasaun ho Maromak Jeová nuʼudar belun. Maski haʼu hakaʼas an atu halo ida-neʼe, maibé dala ruma haʼu sei halo buat ruma neʼebé hakanek Maromak nia laran. Porezemplu, ba dala balu haʼu hemu tua toʼo lanu maski haʼu komesa ona estuda Bíblia. No iha tempu neʼebá haʼu mós toba hamutuk ho feto ida.”

Oinsá mak Miguel konsege manán ninia fraku no troka dalan neʼebé nia halaʼo ninia moris? Nia hatete: “Ema neʼebé estuda Bíblia ho haʼu fó laran-manas mai haʼu atu lee Bíblia loroloron, no atu ransu hamutuk ho ema neʼebé hakarak halo Maromak kontente. Haʼu rekoñese katak haʼu-nia kolega sira-nia hahalok, nafatin kona haʼu. Nuneʼe, haʼu para atu ransu ho sira maski haʼu haree sira hanesan haʼu-nia família.”

Miguel halo planu sira neʼebé ajuda nia atu kumpre ninia hakarak atu moris tuir Maromak nia matadalan. Ita mós bele halo hanesan. Hakerek toʼok buat neʼebé Ita hakarak hetan iha futuru, no saida deʼit mak Ita bele halo atu kumpre buat sira-neʼe. Fó-hatene Ita-nia planu sira ba ema neʼebé bele apoia Ita, no husu sira atu ajuda Ita laʼo ba oin nafatin.

Labele demora atu aprende kona-ba Maromak no halo tuir ninia matadalan iha Ita-nia moris. Haburas Ita-nia domin ba Maromak no ba ninia Liafuan, Bíblia. Maromak nia Liafuan koʼalia kona-ba ema neʼebé halo tuir Bíblia nia matadalan, hodi hatete: “Nia sei hetan susesu iha buat hotu neʼebé nia halo.”—Salmo 1:1-3.

[Nota–rodapé]