Informasaun iha neʼe esplika kona-ba pergunta neʼebé karik Ita husu ona no ajuda Ita atu hetan resposta husi Ita rasik nia Bíblia. Testemuña ba Jeová sira kontente atu koʼalia hamutuk ho Ita kona-ba pergunta sira-neʼe.

1. Sé mak anju sira?

Anju sira hela iha lalehan, sira forsa liu fali ema. Maromak neʼebé loos kria anju sira antes nia kria mundu. (Jó [Ayub] 38:4, 7; Mateus 18:10) Iha anju laran-metin rihun ba rihun neʼebé serbí Maromak Jeová iha lalehan.—Lee Salmo (Mazmur) 103:20, 21; Apokalipse 5:11.

2. Anju sira ajuda ema ka lae?

Iha tempu uluk, anju sira ajuda mane laran-loos ida naran Lot. Nia hela iha sidade neʼebé Maromak atu halakon tanba ema sira-nia hahalok aat. Anju naʼin-rua fó avizu ba Lot no nia família atu halai. Ema balun hanoin katak avizu neʼe la importante no sira la halo tuir. Maibé Lot no nia oan-feto naʼin-rua hetan salvasaun tanba sira halo tuir avizu neʼebé Maromak fó liuhusi anju sira.—Lee Gênesis (Kejadian) 19:1, 13-17, 26.

Bíblia dehan katak ohin loron anju sira ajuda ema hodi dirije serbisu atu haklaken liafuan diʼak kona-ba Maromak nia Reinu, ka ukun. (Mateus 24:14) Liafuan diʼak neʼe inklui mós avizu. Hanesan avizu neʼebé anju sira hatoʼo ba Lot, avizu neʼe mós importante tanba ida-neʼe Maromak mak fó liuhusi anju sira.—Lee Apokalipse 1:1; 14:6, 7.

Maromak uza anju ida atu fó aten-brani ba Jesus. Nuneʼe mós, Maromak bele uza anju sira atu ajuda ita tahan hasoru susar sira neʼebé ita hasoru.—Lee Lucas 22:41-43.

Lakleur tan Maromak sei uza anju sira iha dalan seluk, nia sei uza sira atu halakon ema aat sira neʼebé hamosu terus ba ema. Ida-neʼe sei lori duni kmaan ba ema hotu.—Lee 2 Tesalonika 1:6-8.

  3. Oinsá mak anju aat sira book ita?

Iha ema barak iha mundu neʼebé la halo tuir Maromak, nuneʼe mós anju barak iha lalehan kontra hasoru Maromak. (2 Pedro 2:4) Sira sai anju aat, no sira-nia ulun mak Diabu Satanás. Satanás ho ninia anju aat sira lohi ema iha mundu tomak.—Lee Apokalipse 12:9.

Satanás uza dalan oioin atu lohi ema. Porezemplu, nia uza bisnis sira neʼebé halo korrupsaun, ema nia governu, no relijiaun falsu. Nia uza buat sira-neʼe atu book ema no halo sira dook husi Maromak. Tan neʼe, Satanás mak hun ba problema sira neʼebé ema hotu hasoru, hanesan violénsia, terus no la iha justisa.—Lee 1 Joao 5:19.

4. Oinsá mak anju aat sira lohi ema?

Satanás lohi ema barak hodi halo sira hanoin katak ema mate iha klamar neʼebé moris hela no bele koʼalia ho ema. Maibé, Bíblia hatete katak ema mate la bele halo buat ida. (Eclesiastes [Pengkhotbah] 9:5) Maski nuneʼe, anju aat sira bele hasara ema mate nia lian. (Isaías [Yesaya] 8:19) Anju aat sira lohi ema liuhusi matan-dook, siʼikdór, no astrolojia. Maromak nia Liafuan fó avizu mai ita atu hadook an husi buat sira-neʼe. Tan neʼe ita tenke soe sasán hotu neʼebé iha ligasaun ho anju aat sira no matan-dook nia atividade.—Lee Deuteronômio (Ulangan) 18:10, 11; Apostolu 19:19.

Se ita hadomi Maromak Jeová, ita la presiza taʼuk ba anju aat sira. Se ita estuda Maromak nia Liafuan no halo tuir buat neʼebé Bíblia hatete, ita kontra hasoru Diabu no hakbesik ba Maromak. Jeová mak forsa boot liu fali anju aat sira. No ninia anju sira neʼebé laran-metin bele fó forsa mai ita kuandu ita presiza.—Lee Salmo 34:7; Tiago 4:7, 8.

Atu hetan informasaun liután, haree kapítulu 10 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová.