▪ Maromak nia Ukun-Fuan ba nasaun Israel inklui mós ukun-fuan tuirmai neʼe kona-ba ema husi nasaun seluk neʼebé haleʼu sira. Ukun-fuan neʼe hatete: “Ó labele halo aliansa kaben nian ho sira. Keta fó ó-nia oan-feto ba ninia oan-mane, no keta foti ninia oan-feto ba ó-nia oan-mane.” (Deuteronômio [Ulangan] 7:3, 4) Tanbasá mak Maromak fó ukun-fuan neʼe?

Maromak Jeová hatene katak Satanás hakarak hafoʼer Ninia povu hodi halo sira adora fali maromak falsu. Tanba ida-neʼe Maromak fó avizu ba ninia povu katak ema neʼebé la adora nia ‘sei halo sira-nia oan-mane atu la tuir nia, no sira sei serbí maromak seluk’. Se nasaun Israel monu ba sala hodi adora maromak seluk, Maromak sei la simu tan sira no nia sei la proteje ona sira. Se nuneʼe, sira-nia inimigu bele halakon sira no Mesias sei la bele mosu husi nasaun neʼe. Klaru katak Satanás iha razaun duni atu tenta ema Israel sira atu kaben ho ema neʼebé laʼós fiar-naʼin.

Hanoin-hetan mós katak Maromak hanoin ninia povu ida-idak. Nia hatene katak sira bele kontente só deʼit se sira iha relasaun diʼak ho nia nuʼudar sira-nia Maromak. Jeová iha razaun diʼak kuandu nia dehan katak perigu atu kaben ho ema neʼebé laʼós fiar-naʼin ka lae? Hanoin toʼok ezemplu husi Liurai Salomão. Nia hatene Maromak Jeová nia avizu kona-ba kaben ho ema neʼebé laʼós fiar-naʼin. Maromak hatete: “Sira sei book imi-nia laran atu tuir sira-nia maromak sira.” Tanba Salomão mak ema neʼebé matenek tebes, karik nia hanoin katak nia la presiza avizu neʼe. Tan neʼe nia la halo tuir. Rezultadu mak saida? “Neineik-neineik ninia feen sira book nia laran . . . atu tuir maromak sira seluk”. Rezultadu neʼe triste loos. Maromak Jeová la fó bensaun tan ba nia, no tanba nia la laran-metin, ninia povu hetan susar no fahe ba rua.—1 Reis (Raja-Raja) 11:2-4, 9-13.

Maibé karik ema balu hanoin, Bíblia mós konta kona-ba ema neʼebé la hetan susar kuandu kaben ho ema neʼebé fiar la hanesan. Porezemplu, ema Israel naran Maalon, kaben ho feto Moab naran Rut, no ikusmai Rut sai ema fiar-naʼin. Maibé kaben ho ema Moab laʼós desizaun neʼebé matenek. Bíblia la fó-hatene katak Maromak kontente ho Maalon nia desizaun hodi kaben ho feto Moab. Maalon mate sedu, karik antes Rut komesa adora Maromak Jeová. Maalon nia alin naran Quilion mós kaben ho feto Moab naran Orpa, neʼebé lakohi husik ninia “maromak sira”. Iha parte seluk, Boaz kaben ho Rut kuandu Rut sai fiar-naʼin ona ba tempu kleur. Tuir loloos, ikusmai ema judeu sira haree Rut nuʼudar ema neʼebé laran-metin ba sira-nia Maromak. Maromak fó bensaun ba Rut no Boaz nia moris kaben nian.—Rute (Rut) 1:4, 5, 15-17; 4:13-17.

Maski ikusmai Rut sai fiar-naʼin, maibé ida-neʼe razaun diʼak ba ita atu halo tuir Maalon nia ezemplu hodi la halo tuir Jeová nia matadalan ka lae? Tuir loloos lae. Se ita hanoin hanesan neʼe, neʼe hanesan ita dehan katak joga osan mak dalan diʼak atu buka moris tan deʼit ema ida manán osan barak.

Bíblia haruka ema kristaun sira ohin loron atu kaben deʼit “iha Naʼi”. Bíblia mós fó avizu mai ita atu labele ‘kesi ita-nia an ho sira neʼebé oin-seluk, sira neʼebé fiar-laek’. Tuir loloos, konsellu sira-neʼe mak ba ema kristaun loos sira neʼebé buka daudauk ema neʼebé sira atu kaben. Ba sira neʼebé kaben ona ho ema neʼebé fiar la hanesan, Bíblia fó konsellu diʼak neʼebé bele ajuda sira tahan hasoru sira-nia situasaun susar neʼe. (1 Korinto 7:12-16, 39; 2 Korinto 6:14) Konsellu hotu neʼe hatudu katak Maromak Jeová, nuʼudar Hun ba moris kaben nian, hakarak duni ita atu moris kontente, maski ita sei klosan ka kaben ona.