“Wainhira imi harohan, hateten nuneʼe: ‘Aman’”

Kuandu Ita rona liafuan “Aman”, Ita hanoin kona-ba saida? Ita hanoin kona-ba mane ida neʼebé hatudu domin no tau matan didiʼak ninia família? Ka, mane neʼebé la hatene atu tau matan, no karik ema neʼebé hirus-teen? Ida-neʼe depende deʼit ba Ita-nia aman mak ema oinsá.

KUANDU Jesus koʼalia ba Maromak no koʼalia kona-ba nia ba ema seluk, Jesus sempre uza “Aman”. * Kuandu Jesus hanorin ninia dixípulu sira atu harohan, Jesus hatete: “Wainhira imi harohan, hateten nuneʼe: ‘Aman.’” (Lucas 11:2) Maibé, Maromak Jeová mak aman hanesan saida? Resposta ba pergunta neʼe mak importante tebes. Tanbasá? Se ita hatene ho didiʼak kona-ba nia, ita sei hakbesik no hadomi nia liután.

Tanba Jesus iha relasaun neʼebé besik ho ninia Aman, liuhusi nia mak ita bele hatene didiʼak kona-ba ita-nia Aman iha lalehan. Jesus hatete: “Ema ida la hatene Aman, Oan deʼit mak  hatene, no mós ema neʼebé Oan hakarak hatudu ba nia.” (Mateus 11:27) Tan neʼe, dalan neʼebé diʼak liu atu koñese Aman mak liuhusi Oan.

Saida mak Ita aprende husi Jesus kona-ba Ita-nia Aman iha lalehan? Hanoin toʼok Jesus nia liafuan neʼe: “Basá Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.” (Joao 3:16) Jesus nia liafuan sira-neʼe, fó sai ita-nia Aman iha lalehan nia hahalok neʼebé boot liu, neʼe mak domin. (1 Joao 4:8) Jeová hatudu nia domin iha dalan oioin. Porezemplu, nia simu ita, nia hatudu laran-sadiʼa, nia proteje ita, fó dixiplina mai ita, no nia fó buat neʼebé ita presiza.

Jesus hatudu katak ita-nia Aman simu ita

Kuandu oan ida sente katak ninia inan-aman simu nia, oan neʼe sente fiar-an no brani. Klaru katak Jesus sente hanesan neʼe kuandu nia rona ninia Aman hatete: “Ida-neʼe mak Haʼu-nia Oan doben, neʼebé fó ksolok mai Haʼu.” (Mateus 3:17) Jesus hatudu katak Aman mós hadomi ita no simu ita tanba nia hatete: “Ema neʼebé hadomi haʼu, haʼu Aman sei hadomi nia.” (Joao 14:21) Liafuan sira-neʼe halo ita sente kmaan duni. Maibé, iha mós ida neʼebé hakarak hadau ida-neʼe husi ita.

Satanás hakaʼas an atu halo ita hanoin katak ita la merese atu ita-nia Aman iha lalehan simu ita. Dala barak, nia halo ida-neʼe kuandu ita hasoru susar ruma, hanesan kuandu ita moras, idade ona ka ita sente laran-tun tanba ita-nia fraku ruma. Hanoin toʼok kona-ba mane ida naran Lucas neʼebé sente katak nia la merese atu Maromak simu nia. Lucas hatete katak kuandu nia sei kiʼik, ninia inan-aman husik fali hahalok diʼak sira neʼebé sira hanorin ona ba nia. Karik tanba ida-neʼe mak nia sente susar atu bele iha relasaun diʼak ho ninia Aman iha lalehan. No mós, tanba nia ema neʼebé la hanoin didiʼak antes nia atu halo buat ruma, nia sempre hetan susar, liuliu kona-ba ninia relasaun ho ema seluk. Maibé neineik-neineik, ninia feen neʼebé hatudu pasiénsia ajuda nia atu hadiʼa ninia hahalok. Nia hatete katak ninia feen mak “bensaun espesiál no prezente husi Maromak”. Ikusmai, Lucas komprende katak “Jesus Kristu mai iha mundu neʼe atu soi ema maksalak sira”. (1 Timoteo 1:15) Lucas hatete katak, hodi hanoin kleʼan kona-ba Maromak nia domin no oinsá Maromak simu nia, neʼe halo nia sente kontente iha ninia moris.

Se dala ruma, Ita sente Maromak Jeová la bele hadomi Ita no nia la simu Ita, karik Ita sei sente kontente fali se Ita lee no hanoin kleʼan eskritura iha Roma 8:31-39. Iha eskritura neʼe, apóstolu Paulo fó fiar mai ita katak la iha buat ida neʼebé “bele haketak ita husi Maromak nia domin, iha Kristu Jesus, ita Naʼi”. *

Aman neʼebé hatudu laran-sadiʼa

Ita-nia Aman iha lalehan komprende ita-nia sentimentu kuandu ita hasoru terus. Nia mak Maromak “laran-sadiʼa” nian. (Lucas 1:78, MF) Jesus haleno Maromak nia hahalok hodi hatudu laran-sadiʼa ba ema sala-naʼin. (Marcos 1:40-42; 6:30-34) Ema kristaun neʼebé loos mós hakaʼas an atu banati-tuir sira-nia Aman iha lalehan nia hahalok neʼe. Sira halo tuir Bíblia nia matadalan atu hatudu ‘laran-diʼak no laran-sadiʼa ba malu’.—Efeso 4:32, MF.

Hanoin toʼok kona-ba mane ida naran Felipe. Loron ida, kuandu nia atu bá serbisu, derrepente deʼit nia sente moras, hanesan ema sona nia husi kotuk. Ema lori kedas nia ba ospitál no doutór sira koko nia durante oras 8. Ikusmai sira hatete katak nia iha problema boot ho ninia fuan. Sira hatete katak minutu 25 tan nia sei mate, no saugati deʼit atu halo operasaun.

Iha tempu neʼe, Felipe nia maluk kristaun sira hein nia iha ospitál. Sira-nia laran-sadiʼa book sira atu ajuda. Ho lalais, sira arranja atu lori fali Felipe ba ospitál seluk hodi hetan operasaun neʼebé nia presiza. Sira hein nia toʼo operasaun neʼe hotu. Ikusmai, Felipe la mate. Felipe hanoin fila fali ninia esperiénsia neʼe no  nia agradese tanba laran-sadiʼa neʼebé ninia maluk kristaun sira hatudu ba nia. Nia fiar katak ninia Aman iha lalehan mak book sira atu ajuda nia. Nia hatete: “Haʼu sente Maromak hanesan Aman neʼebé hadomi haʼu, neʼebé hamriik iha haʼu-nia sorin atu fó forsa mai haʼu.” Sin, dala barak Maromak Jeová hatudu laran-sadiʼa mai ita hodi book ninia atan sira iha rai atu haleno hahalok neʼe.

Ita-nia Aman proteje ita

Kuandu labarik ida sente taʼuk, karik nia sei halai ba ninia aman atu hetan protesaun. Baibain, labarik sente seguru liu kuandu ninia aman hakoʼak nia. Jesus fiar duni katak Maromak Jeová mak ida neʼebé fó protesaun. (Mateus 26:53; Joao 17:15) Ita mós bele sente seguru tanba ita-nia Aman iha lalehan proteje ita. Ohin loron, Jeová proteje ita liuliu iha dalan espirituál. Neʼe katak, nia fó ba ita buat neʼebé ita presiza atu nafatin iha relasaun diʼak ho nia. Dalan ida neʼebé nia halo ida-neʼe mak liuhusi matadalan sira husi Bíblia. Kuandu ita simu matadalan sira-neʼe, Maromak Jeová mak hanesan laʼo iha ita-nia kotuk hodi hatete: “Ida-neʼe mak dalan. Laʼo tuir nia bá.”—Isaías (Yesaya) 30:21.

Hanoin toʼok ezemplu husi Tiago, ho ninia maun sira naran Fernando no Rafael. Sira mak parte husi grupu múzika rock-and-roll. Kuandu ema hili sira atu toka iha fatin ida ho naran-boot iha São Paulo, iha rai-Brazíl, sira kontente tebes. Sira hanoin katak susesu iha duni sira-nia oin. Maibé sira-nia maluk kristaun ida fó-hanoin sira katak perigu atu ransu beibeik ho ema neʼebé halaʼo sira-nia moris iha dalan neʼebé la tuir Maromak nia matadalan. (Provérbios [Amsal] 13:20) Nia hatudu katak ida-neʼe loos hodi konta ninia esperiénsia rasik. Ninia maun monu ba sala tanba nia ransu ho ema neʼebé la diʼak. Tiago ho ninia maun sira deside atu sai husi sira-nia grupu. Agora, sira naʼin-tolu serbí Maromak ba tempu tomak. Sira fiar katak, hodi halo tuir Maromak nia Liafuan, neʼe proteje sira atu la estraga sira-nia relasaun ho Maromak.

Ita-nia Aman iha lalehan fó dixiplina mai ita

Aman neʼebé hadomi nia oan sei fó dixiplina ba sira, tanba nia hakarak sira atu sai ema boot neʼebé diʼak. (Efeso 6:4) Aman hanesan neʼe, ninia lei sira mak metin duni maibé nia nunka fó dixiplina iha dalan neʼebé makaʼas liu. Hanesan neʼe mós, dala ruma ita-nia Aman iha lalehan presiza fó dixiplina mai ita. Maibé nia sempre halo ida-neʼe ho domin no nia nunka fó dixiplina neʼebé makaʼas liu. Jesus hanesan ninia Aman, nia nunka fó dixiplina ba ninia dixípulu sira iha dalan neʼebé makaʼas liu,  maski sira neineik atu halo tuir ninia konsellu.—Mateus 20:20-28; Lucas 22:24-30.

Hanoin toʼok kona-ba oinsá mane ida naran Ricardo ikusmai hafolin dixiplina neʼebé Maromak Jeová fó ba nia ho domin. Ricardo nia aman husik nia kuandu nia foin fulan hitu, no ninia inan mesak mak haboot nia. Kuandu nia joven ona, nia sente duni katak nia falta aman ida. Nia halo hahalok sira neʼebé aat no nia laran komesa atu fó-sala ba nia. Tanba nia rekoñese katak ninia moris la tuir Bíblia nia matadalan, nia deside atu bá koʼalia ho katuas kristaun sira iha ninia kongregasaun. Katuas sira fó konsellu ba nia husi Bíblia, maibé sira halo neʼe ho domin. Ricardo hafolin dixiplina neʼebé nia simu, maibé nia nafatin sente terus tanba buat aat sira neʼebé nia halo. Tan neʼe, iha kalan nia la bele toba, nia tanis no nia sente laran-tun tebes. Maibé ikusmai, Ricardo rekoñese katak nia simu dixiplina tanba Jeová sei hadomi nia. Ricardo hanoin-hetan liafuan iha Ebreu 12:6 neʼebé hatete: “Naʼi hanorin dixiplina ba sira neʼebé Nia hadomi.”

Ita labele haluha katak dixiplina la envolve deʼit kastigu tanba sala neʼebé ita halo. Bíblia mós hatudu katak dixiplina iha ligasaun ho treinu. Karik ita-nia Aman iha lalehan fó dixiplina ba ita hodi husik ita atu hasoru rezultadu aat husi ita-nia sala. Bíblia hatudu katak, Maromak nia dixiplina mak fó treinu ba ita, hodi ajuda ita atu laʼo iha dalan neʼebé loos. (Ebreu 12:7, 11) Sin, ita-nia Aman hakarak tebes ita atu sai ema neʼebé diʼak, tan neʼe mak nia korrije ita.

Ita-nia Aman fó buat neʼebé ita presiza

Aman neʼebé hadomi ninia família sei buka atu fó buat neʼebé sira presiza. Maromak Jeová mós hanesan neʼe. Jesus hatete: “Imi-nia Aman lalehan hatene katak imi kuran sira-neʼe.” (Mateus 6:25-34) Jeová promete ba ita: “Haʼu sei la husik ka hadook an husi imi.”—Ebreu 13:5.

Feto ida naran Nice fiar katak liafuan sira-neʼe mak loos. Nice foin husik ninia serbisu diʼak atu bele uza tempu barak liután atu tau matan sira-nia oan-feto naʼin-rua no mós atu aumenta nia serbisu ba Maromak. Maibé iha tempu neʼe ninia laʼen mós lakon nia serbisu. Agora oinsá mak sira bele buka moris? Nice halo orasaun ba Maromak Jeová. Loron tuirmai, nia laʼen fila ba ninia serbisu-fatin atu foti ninia sasán neʼebé nia husik hela iha neʼebá. Maibé nia hakfodak kuandu ninia patraun dehan ba nia katak nia iha serbisu seluk neʼebé nia bele fó ba nia. Entaun, maski Nice nia laʼen lakon nia serbisu iha loron ida, maibé loron tuirmai nia hetan fali. Nice ho ninia laʼen agradese barak ba sira-nia Aman iha lalehan tanba rezultadu diʼak neʼe. Sira-nia esperiénsia fó-hanoin ba ita katak Jeová nunka haluha atu fó ba ninia atan sira buat neʼebé sira presiza.

Hafolin ita-nia Aman nia domin

Klaru katak liafuan sira deʼit latoʼo atu esplika kona-ba ita-nia Aman iha lalehan ninia domin boot. Kuandu ita hanoin kleʼan kona-ba dalan oioin neʼebé ita-nia Aman hatudu domin mai ita, hanesan nia simu ita, hatudu laran-sadiʼa, proteje ita, fó dixiplina mai ita, no nia fó buat neʼebé ita presiza, ita sei fiar duni katak nia mak Aman neʼebé diʼak liu hotu.

Oinsá mak ita bele hatudu katak ita hafolin ita-nia Aman iha lalehan nia domin mai ita? Ita bele hakaʼas an atu aprende liután kona-ba nia no ninia hakarak. (Joao 17:3) Ita bele halaʼo ita-nia moris tuir ninia hakarak no nia matadalan sira. (1 Joao 5:3) Ita bele halo tuir nia hodi hatudu domin ba ema seluk. (1 Joao 4:11) Hodi halo buat hotu neʼe, ita hatudu katak ita haree Jeová nuʼudar ita-nia Aman no ita sente kontente tebes atu sai ninia oan sira.

[Nota–rodapé]

[Liafuan neʼebé foti husi pájina 29]

Se ita hatene ho didiʼak Jeová mak aman hanesan saida, ita sei hakbesik no hadomi nia liután

[Liafuan neʼebé foti husi pájina 32]

Ita bele hatudu katak ita haree Jeová nuʼudar ita-nia Aman no ita sente kontente tebes atu sai ninia oan sira

[Kaixa iha pájina 31]

JEOVÁ HATUDU NINIA DOMIN NUʼUDAR AMAN IHA DALAN OIOIN

NIA SIMU ITA

NIA HATUDU LARAN-SADIʼA

NIA PROTEJE ITA

NIA FÓ DIXIPLINA MAI ITA

NIA FÓ BUAT NEʼEBÉ ITA PRESIZA