ABEL hein hela ninia bibi sira neʼebé han duʼut iha rai-luan neʼebé matak. No husi fatin neʼe neʼebé dook uitoan, karik nia hateke ba ahi neʼebé lakan. Abel hatene katak iha neʼebá mak iha surik ida neʼebé lakan ho ahi no nakdulas hela, neʼebé taka hela dalan atu tama ba jardín Eden. Uluk, ninia inan-aman hela iha neʼebá, maibé agora sira ho sira-nia oan la bele tama ona. Hanoin toʼok kona-ba anin neʼebé huu hela Abel nia fuuk nuʼudar nia hateke ba lalehan no hanoin kona-ba ninia Kriadór. Karik nia hanoin: “Ema nia relasaun ho Maromak bele sai diʼak fali ka lae?” Abel hakarak duni atu ida-neʼe akontese.

Ita bele dehan katak ohin loron mós Abel koʼalia ba ita. Se nuneʼe, Ita bele rona nia ka lae? Karik Ita sente katak neʼe la bele duni tanba Abel, Adão nia oan-mane segundu neʼe, mate kleur ona, besik tinan rihun neen liubá. Ninia ruin mós sai lahuk ona hanesan rai-rahun. Kona-ba ema neʼebé mate, Bíblia hatete: “Sira la hatene buat ida.” (Eclesiastes [Pengkhotbah] 9:5, 10) No mós, Bíblia nunka temi kona-ba Abel nia liafuan sira. Tan neʼe, oinsá mak Ita bele dehan katak nia koʼalia ba ita?

Kona-ba Abel, Maromak haleno apóstolu Paulo hodi hatete: “Maski nia mate ona, nia sei koʼalia daudaun hodi fiar.” (Ebreu 11:4) Entaun, oinsá mak Abel koʼalia ba ita? Eskritura dehan, “hodi fiar”. Abel mak ema primeiru neʼebé haburas hahalok fiar. Nia hatudu fiar neʼebé boot tebes no ninia ezemplu mak diʼak mai ita ohin loron atu halo tuir. Se ita aprende husi ninia fiar no hodi hakaʼas an atu halo tuir, neʼe hanesan Abel mak koʼalia ba ita iha dalan neʼebé bele kona ita-nia moris.

Maibé, tanba Bíblia mós ladún konta buat barak kona-ba Abel, saida mak ita bele aprende husi nia no ninia fiar? Mai ita haree.

Depois Maromak kria tiha ema primeiru, lakleur mak Abel moris mai. Maibé kuandu Jesus iha mundu, nia koʼalia kona-ba Abel no hatete katak Abel moris husi tempu neʼebé “mundu hahú”. (Lucas 11:50, 51) Liafuan “mundu” neʼebé Jesus temi iha eskritura neʼe mak kona-ba ema iha mundu neʼebé iha esperansa atu hetan perdua ba sira-nia sala. Maski Abel mak ema númeru haat neʼebé moris iha mundu neʼe, maibé tuir Maromak nia haree, karik nia mak ema primeiru neʼebé bele hetan perdua. a Nuʼudar Abel sai boot, la iha ema ida neʼebé hatudu ezemplu diʼak ba nia.

Maski tempu neʼebá seidauk iha ema barak iha mundu, maibé Abel nia família tenke hasoru ona situasaun neʼebé susar. Karik Abel nia inan-aman, Adão no Eva, iha isin neʼebé diʼak no forsa. Maibé sira hatene katak sira halo ona sala boot iha sira-nia moris. Uluk, sira ema sala-laek, no sira iha esperansa atu moris ba nafatin. Maibé sira lakohi halo tuir Maromak Jeová no tan neʼe sira lakon sira-nia hela-fatin neʼebé furak, jardín Eden. Tanba sira hanoin deʼit sira-nia hakarak rasik liu fali buat neʼebé sira-nia oan presiza,  sira halakon sira-nia moris nuʼudar ema sala-laek, no mós lakon moris ba nafatin.—Gênesis (Kejadian) 2:15–3:24.

Nuʼudar Adão no Eva moris iha jardín Eden nia liʼur, sira hetan susar iha sira-nia moris. Maski nuneʼe, kuandu sira-nia oan primeiru moris, sira hanaran nia Caim, neʼebé iha arti katak “buat ruma neʼebé mosu mai”. Eva hatete: “Haʼu hamosu oan ida ho Jeová nia ajuda.” Eva nia liafuan neʼe hatudu katak karik nia hanoin kona-ba promete neʼebé Maromak Jeová fó sai iha jardín Eden. Maromak fó-hatene nanis katak feto ida sei hamosu oan, ka “bei-oan”, neʼebé loron ida sei halakon ida neʼebé aat neʼebé book Adão no Eva atu halo sala. (Gênesis 3:15; 4:1) Karik Eva bele hanoin katak nia mak feto neʼebé Maromak fó-hatene nanis no Caim mak oan neʼebé Maromak promete ona.

Se Eva hanoin hanesan neʼe, ninia hanoin mak sala duni. Liután neʼe, se Adão no Eva fó-hatene ideia neʼe ba Caim nuʼudar nia sai boot, klaru katak ida-neʼe sei halo Caim sai foti-an. Lakleur, Eva hahoris oan-mane ida tan, maibé Bíblia la hatudu katak sira koʼalia liafuan hahiʼi nian hanesan neʼe kona-ba nia. Sira hanaran nia, Abel, neʼebé karik iha arti katak “buat neʼebé la iha folin”. (Gênesis 4:2) Maski ita ladún hatene, maibé karik sira hili naran neʼe tanba sira la haree Abel nuʼudar ema importante hanesan Caim.

Klaru katak inan-aman sira ohin loron mós bele aprende husi Adão no Eva nia ezemplu. Inan-aman sira tenke kuidadu atu sira-nia liafuan no hahalok labele halo sira-nia oan sai foti-an no hanoin an deʼit. Inan-aman sira presiza hanorin sira-nia oan atu hadomi Maromak Jeová no atu habelun ho nia. Triste katak inan-aman primeiru la halaʼo didiʼak sira-nia responsabilidade. Maski nuneʼe, iha duni esperansa ba sira-nia oan no bei-oan sira.

Nuʼudar Caim no Abel sai boot, klaru katak sira-nia aman hanorin sira atu halo serbisu hodi fó buat neʼebé sira-nia família presiza. Caim hili serbisu nuʼudar toʼos-naʼin, no Abel hili serbisu nuʼudar bibi-atan.

Maibé, Abel mós halo buat ida neʼebé importante liu. Ba tinan barak nia laran, nia haburas fiar, hahalok diʼak neʼebé apóstolu Paulo temi. Hanoin toʼok kona-ba neʼe. Iha tempu neʼebá, la iha ema ida neʼebé bele fó ezemplu diʼak ba Abel. Entaun, oinsá mak Abel haburas fiar ba Maromak Jeová? Mai ita haree buat tolu neʼebé karik ajuda Abel atu iha fiar neʼebé metin.

Jeová nia kriasaun.

Maski Maromak Jeová fó malisan ba rai, hodi halo rai hamosu ai-tarak no susar tebes atu halo toʼos, maibé rai nafatin fó hahán barak atu nuneʼe Abel nia família bele kontinua moris. No mós, Maromak la fó malisan ba animál sira, inklui mós manu sira no ikan, no foho sira, bee-lihun, mota, no tasi, no lalehan, kalohan, loro-matan, no fitun sira. Abel bele haree duni Maromak Jeová nia domin, matenek, no laran-diʼak iha buat hotu neʼebé nia kria. (Roma 1:20) Hodi hanoin kleʼan kona-ba Maromak nia kriasaun no hahalok sira, neʼe ajuda Abel atu hametin liután ninia fiar.

Ita bele fiar katak Abel uza tempu barak atu hanoin kona-ba Maromak Jeová. Hanoin toʼok kona-ba ninia serbisu nuʼudar bibi-atan. Ninia serbisu neʼe hatudu  katak nia tenke laʼo dook loroloron. Nia presiza lori ninia bibi sira saʼe foho tun foho, hodi laʼo liu iha foho-leet, hakur mota atu buka duʼut neʼebé matak liu, bee neʼebé moos, no fatin diʼak atu deskansa. Husi Maromak nia kriasaun hotu, bibi-malae mak animál neʼebé la bele duni tau matan ba sira-nia an rasik. Sira presiza duni ema atu dirije no tau matan sira. Karik tanba Abel hanoin kona-ba ninia bibi sira, nia mós sente katak nia presiza duni matadalan, protesaun, no ajuda husi Maromak neʼebé matenek no forsa boot liu fali ema. Klaru katak nia hatoʼo beibeik ninia hanoin ba Maromak iha orasaun, no ninia fiar mós kontinua sai metin liután.

Jeová nia promesa sira.

Ita bele fiar katak Adão no Eva konta ba sira-nia oan buat neʼebé akontese iha jardín Eden, no rezultadu neʼebé sira hetan husi sira-nia sala. Tan neʼe, Abel bele hanoin kleʼan kona-ba buat barak.

Maromak Jeová hatete katak nia sei fó malisan ba rai. Abel bele haree ho matan rasik ai-tarak sira mosu iha rai hodi sai tuir duni Maromak nia liafuan. Jeová mós fó-hatene nanis katak Eva sei hetan susar kuandu nia sai isin-rua no tuur-ahi. Nuʼudar Abel nia alin sira moris, nia mós bele haree katak liafuan hirak-neʼe sai loos. Jeová fó-hatene nanis ba Eva katak nia sei kaan ninia laʼen nia domin no atensaun, no ikusmai ninia laʼen sei domina nia. Abel mós bele haree ida-neʼe akontese duni ba ninia inan no aman. Iha situasaun hotu, Abel hatene katak Jeová nia liafuan sempre sai loos. Tan neʼe, Abel iha razaun diʼak atu tau fiar ba Maromak nia promete kona-ba “bei-oan” neʼebé sei hadiʼa buat aat hotu neʼebé hahú iha jardín Eden.—Gênesis 3:15-19.

Jeová nia atan sira.

Maski la iha ema ida neʼebé bele sai ezemplu diʼak ba Abel, maibé iha ninia tempu iha anju sira neʼebé hatudu fiar metin ba Maromak, no Abel bele halo tuir sira-nia ezemplu. Kuandu Maromak Jeová hasai Adão no Eva husi jardín Eden, nia la husik ona sira ka sira-nia oan atu tama fali iha jardín neʼe. Atu sira la bele tama fali, Maromak Jeová tau kerubín sira, katak anju sira neʼebé iha pozisaun aas, no mós tau surik ida neʼebé lakan ho ahi no nakdulas hela.—Gênesis 3:24.

Hanoin toʼok kona-ba Abel kuandu nia sei kiʼik no nia haree anju sira-neʼe. Tanba anju sira-neʼe halo sira-nia an nuʼudar ema, Abel bele haree ho momoos sira iha forsa neʼebé boot tebes. No surik neʼebé nakdulas hela mós halo Abel hakfodak. Nuʼudar Abel sai boot, nia nunka haree anju sira-neʼe sai baruk. Loron no kalan, tinan ba tinan, anju ho forsa boot sira-neʼe la husik sira-nia serbisu. Tan neʼe, Abel bele aprende katak Maromak Jeová iha atan sira neʼebé laran-metin ba nia. Iha Abel nia família rasik, nia la haree ema hatudu laran-metin hanesan anju sira-neʼe. Klaru katak anju sira-neʼe nia ezemplu hametin Abel nia fiar.

Maromak Jeová fó sai kona-ba ninia an liuhusi ninia kriasaun, ninia promesa sira no ninia atan sira-nia ezemplu. Tanba Abel hanoin kleʼan kona-ba buat hotu neʼe, ninia fiar sai metin liután. Ita bele aprende buat barak husi Abel nia ezemplu, loos ka lae? Joven sira mós bele sente kmaan hodi hatene katak sira bele duni haburas fiar ba Jeová, maski sira-nia família la serbí Maromak. Ohin loron, ita mós bele haburas ita-nia fiar hodi aprende husi Maromak nia kriasaun, hodi lee Bíblia no hanoin kleʼan, no hodi halo tuir Maromak nia atan sira neʼebé hatudu fiar.

Nuʼudar Abel nia fiar ba Maromak Jeová sai metin liután, nia hakarak hatene oinsá mak nia bele hatudu sai ninia fiar husi nia hahalok sira. Maibé, saida mak ema bele fó ba Maromak, Ida neʼebé kria lalehan no rai? Klaru katak Maromak la presiza prezente ka ajuda ruma husi ema. Ikusmai, Abel komprende katak se nia ho laran neʼebé loos, fó ba Jeová buat diʼak liu hotu neʼebé nia iha, ida-neʼe sei halo ninia Aman iha lalehan nia laran kontente.

Tan neʼe, Abel hili ninia bibi balu atu fó nuʼudar sakrifísiu. Nia hili bibi sira neʼebé diʼak liu hotu no neʼebé moris primeiru, no nia foti bibi sira-neʼe nia naan neʼebé diʼak liu hodi fó nuʼudar sakrifísiu. Caim mós hakarak simu Maromak nia bensaun, tan neʼe nia hili modo oioin husi ninia toʼos atu fó nuʼudar sakrifísiu. Maibé kuandu maun-alin neʼe hasaʼe sira ida-idak nia sakrifísiu, bele haree duni buat neʼebé la hanesan entre sira naʼin-rua.

Adão nia oan naʼin-rua neʼe karik tau sira-nia sakrifísiu  iha altár hodi sunu ho ahi. Karik sira halo ida-neʼe iha fatin neʼebé anju sira neʼebé hein hela jardín bele haree. Iha tempu neʼebá, anju sira-neʼe deʼit mak Maromak nia atan sira neʼebé reprezenta nia iha rai. Oinsá mak Jeová sente kona-ba Abel no Caim nia sakrifísiu? Gênesis 4:4 hatete: “Jeová kontente ho Abel no ba ninia sakrifísiu.” Oinsá mak Maromak hatudu katak nia gosta Abel nia sakrifísiu? Tuir loloos, Bíblia la fó sai kona-ba neʼe. Maibé, tansá mak Maromak kontente ho Abel?

Karik Maromak kontente ho Abel tanba sakrifísiu neʼebé nia fó. Abel uza buat neʼebé moris, nia uza animál atu fó nuʼudar sakrifísiu hodi fakar nia raan. Karik Abel hatene katak sakrifísiu hanesan neʼe mak iha folin ba Maromak. Tinan atus ba atus depois Abel nia tempu, Maromak uza duni bibi-malae neʼebé la iha buat aat ruma atu reprezenta Ninia Oan-Mane rasik nia sakrifísiu. Bíblia bolu Maromak nia Oan-Mane neʼebé la iha sala ida nuʼudar “Maromak nia Bibi-Oan”, neʼebé sei fakar nia raan. (Joao 1:29; Êxodo [Keluaran] 12:5-7) Maibé iha tempu neʼebá, karik Abel la hatene kona-ba ida-neʼe.

Buat neʼebé ita hatene mak Abel fó ba Maromak buat diʼak liu hotu neʼebé nia iha. Maromak Jeová la haree deʼit ba Abel nia sakrifísiu, maibé haree mós ba ninia laran. Maromak kontente ho Abel tanba ninia domin no fiar ba Maromak mak book nia atu hasaʼe sakrifísiu.

Oinsá kona-ba Caim no ninia sakrifísiu? Bíblia hatete katak Jeová “la kontente ho Caim no ba ninia sakrifísiu”. (Gênesis 4:5) Tuir loloos, Maromak la gosta Caim laʼós tanba nia fó sakrifísiu neʼebé la diʼak. Iha Israel antigu nia tempu, Maromak simu buat neʼebé sira koʼa husi sira-nia toʼos nuʼudar sakrifísiu. (Levítico [Imamat] 6:14, 15) Maibé, Bíblia hatete: “Buat sira neʼebé [Caim] rasik halo la loos.” (1 Joao 3:12) Hanesan ema barak ohin loron, karik Caim hanoin katak nia bele halo kontente Maromak hodi hatudu hahalok finje deʼit. Liuhusi Caim nia hahalok sira, nia la hatudu fiar neʼebé loos no domin ba Maromak.

Caim koko atu aprende husi Abel nia ezemplu kuandu nia hatene katak Jeová la kontente ho nia ka lae? Lae. Duké halo ida-neʼe, nia haburas odi ba ninia alin. Jeová haree saida mak Caim haburas iha ninia laran, tan neʼe ho pasiénsia Maromak koko atu ajuda Caim. Maromak fó avizu ba Caim katak ida-neʼe sei book nia atu halo sala neʼebé boot. No Maromak hatete katak se Caim troka nia hahalok, nia sei hetan hahiʼi, katak Maromak sei simu nia.—Gênesis 4:6, 7.

Maibé Caim la rona ba Maromak nia avizu. Nia konvida ninia alin atu laʼo ho nia ba toʼos. Depois, Caim ataka nia alin hodi oho nia. (Gênesis 4:8) Ita bele dehan katak Abel mak ema primeiru neʼebé sai vítima hodi mate tanba kaer metin ba ninia fiar. Maibé, maski nia mate, ninia istória sei moris toʼo agora.

Abel nia raan hakilar ba Maromak Jeová hodi husu justisa. No Maromak halaʼo duni justisa hodi fó kastigu ba Caim tanba buat aat neʼebé nia halo. (Gênesis 4:9-12) Maibé buat neʼebé importante mak Abel sei koʼalia ba ita ohin loron hodi ninia fiar. Maski Abel moris ba tempu uitoan deʼit kompara ho ema seluk iha tempu neʼebá, maibé nia halaʼo ninia moris iha dalan neʼebé halo Maromak kontente. Nia mate hodi hatene katak ninia Aman Jeová iha lalehan hadomi no kontente ho nia. (Ebreu 11:4) Tan neʼe, ita bele fiar katak Maromak Jeová sei nunka haluha Abel, no nia sei fó moris-hiʼas ba Abel iha mundu foun neʼebé hanesan jardín Eden. (Joao 5:28, 29) Ita mós sei bele hasoru malu ho Abel iha mundu foun, se Ita hakaʼas an atu banati-tuir ninia fiar neʼebé metin.